Dagiti Pakabigbigan ti Kinaragsak
Ti panangbangon iti pundasion ni Jesucristo ket napateg iti panagragsaktayo.
Bayat ti panagluganko iti eroplano sumagmamanon a tawen ti napalabas, nagtugawak iti abay ti maysa a lalaki a taga-Netherlands. Sigagagarak a bimmisita kenkuana gapu ta nagserbiak idiay Belgium ken Netherlands kas maysa nga agtutubo a misionario.
Bayat ti panagam-ammomi, intedna ti business card-na nga addaan iti naisangsangayan a titulo ti trabaho a “propesor ti kinaragsak.” Kinomentoak ti nakaskasdaaw a propesionna ket dinamagko no ania ti ar-aramiden ti maysa a propesor ti kinaragsak. Kinunana nga insurona dagiti tao no kasano a maaddaanda iti naragsak a biag babaen ti panangparnuay kadagiti napnuan kaipapanan a relasion ken panggep a tun-oyen. Insungbatko, “Nagsayaat dayta, ngem kasano no maisurom met no kasano nga agtultuloy dagita a relasion kalpasan ti ipapatay ken masungbatan ti dadduma a saludsod ti kararua, kas iti no ania ti panggep ti biag, no kasanotayo a parmeken dagiti pagkapuyantayo, ken no sadino ti pagturongantayo kalpasan ti ipapataytayo?” Inaminna a nakaskasdaaw no addaantayo kadagiti sungbat kadagita a saludsod, ket naragsakanak ngarud a nangibaga nga adda kadatayo dagiti sungbat.
Ita nga aldaw, kayatko nga irebyu ti sumagmamano a napateg a prinsipio para iti pudno a kinaragsak a saan nga ibibiag ti kaaduan iti daytoy nariribuk a lubong, nga adu ti makapainteres ngem manmano lang ti pudno a napateg.
Insuro ni Alma dagiti tao idi panawenna, “Ta adtoy, kunak kadakayo nga adunto ti banag a dumteng; ken adtoy, adda maysa a banag a kapatgan iti amin—ta adtoy, saanen nga adayo ti panawen ti yaay ken pannakipagindeg ti Mannubbot kadagiti taona.”1
Napateg met kadatayo ita daytoy a panangipakdaar bayat ti panagur-uraytayo ken panagsaganatayo iti Maikadua a Yaay ni Cristo!
Gapuna, ti umuna a napaliiwko ket ti panangbangon iti pundasion ni Jesucristo ket napateg iti panagragsaktayo. Daytoy ket awan duadua a pamuon, “ti pamuon a no bangonen dagiti tao saanda a matuang.”2 No kasta ti aramidentayo, nakasaganatayo a mangsango kadagiti karit iti biag, ania man ti mapasamak.
Adu a tawenen ti napalabas idi napankami iti summer Scout camp ken ti anakko a ni Justin. Bayat ti panangrrugi dagiti aktibidad, siraragsak nga impakaammona a kayatna ken dagiti gagayyemna a gun-oden ti archery merit badge. Tapno maaramidda dayta, masapul a makapasa dagiti ubbing iti ababa nga eksaminasion ken mapanada ti puntiria.
Nagladingitak. Iti dayta a kanito, nakapuy ni Justin gapu iti cystic fibrosis-na, maysa a sakit a lablabananna sipud pay pannakayanakna. Pampanunotek no kabaelanna nga iyunnat a nalaing ti bai tapno maiturongna ti pana iti puntiria.
Bayat ti ipapanna ken ti gagayyemna iti archery classda, siuulimek nga inkararagko a saan koma a maibabain iti kapadasanna. Kalpasan ti dua nga oras a panagdanagko, nakitak isuna nga agturong kaniak nakaisem iti dakkel. “Dad!” kinunana. “Naalakon ti merit badge! Naalakon ti bull’s-eye; adda iti abay ti targetko, ngem natirak tay bull’s-eye!” Ginuyodna a nalaing ti bai iti amin a pigsana ket binay-anna ti pana, a dina nakontrol ti pagturonganna. Anian a yamanko iti dayta a mannakaawat nga instruktor iti archery, a di pulos nagkuna, “Sori, biddut a puntiria!” Ketdi, idi nakitana dagiti limitasion ni Justin ken ti napasnek a panagreggetna, siaayat nga insungbatna, “Good job!”
Kasta met laeng ti mapasamak kadatayo no aramidentayo ti amin a kabaelantayo a mangsurot ken ni Cristo ken dagiti propetana iti laksid dagiti limitasiontayo. No umasidegtayo Kenkuana babaen ti panangtungpal kadagiti katulagantayo ken panagbabawi iti basbasoltayo, siraragsak a mangngegtayo ti pammadayaw ti Mangisalakantayo: “Nasayaat ti inaramidmo, naimbag ken mapagtalkan nga adipen.”3
Iburayko ti pammaneknekko iti kinadios ti Mangisalakan ti lubong ken ti manangsubbot nga ayat ken pannakabalinna a mangpaimbag, mangpapigsa, ken mangitag-ay kadatayo no sipapasnek nga ikagkagumaantayo ti umasideg Kenkuana. Iti sabali a bangir, awan ti wagas a makikuyogtayo iti bunggoy ken kasta met nga agturong ken ni Jesus. Pinarmek ti Mangisalakan ti ipapatay, sakit, ken basol ket impaayna ti dalan nga agturong iti kamaudian a kinaan-anaytayo no surotentayo Isuna iti amin a puspusotayo.4
Ti maikadua a napaliiwko ket napateg unay iti kinaragsaktayo a laglagipentayo a datayo ket annak ti managayat a Nailangitan nga Ama. Ti pannakaammo ken panagtalek iti daytoy a kinapudno ti mangbalbaliw iti amin.
Sumagmamanon a tawen ti napalabas, iti panagawidmi manipud iti maysa nga assignment iti Simbaan, adda iti likudan ti tugawmi ken ni Sister Sabin ti maysa a dakkel a lalaki nga addaan dakkel a makapungtot a rupa a naitattoo iti likud ti kalbo nga ulona agraman ti numero a 439.
Idi simmangpetkami, kinunak, “Excuse me, sir. Mabalin kadi a saludsoden ti kaipapanan ti numero a naitattoo iti likud ti ulom?” Diak naitured ti nagsaludsod maipapan iti makapungtot a rupa.
Insungbatna, “Siak dayta. Dayta ti kinataok. Kukuak dayta a territory: 219!”
Uppat-a-gasut ken tallupulo-ket-siam ti aktual a naitattoo iti ulona, isu a nasdaawak no apay a nagbiddut gapu idinto a napateg unay dayta kenkuana.
Pinampanunotko nga anian a nakalkaldaang a ti kinasiasino ken panagraem iti bagi daytoy a tao ket naibatay iti numero a nainaig iti teritorio ti maysa a bunggoy. Napanunotko iti bagik: Daytoy naingel ti langana a lalaki ket maysa nga anak a masapulna pay laeng ti panagayat ken pannakaibilang. No ammona la koma no asino a talaga isuna ken no asino a talaga ti nakaikamenganna, ta datayo amin ket “nagatang iti maysa a pateg.”5
Adda nainsiriban a binatog iti maysa a kanta iti pelikula a The Prince of Egypt a kunana, “Kitaem ti biagmo babaen kadagiti mata ti langit.”6 No ti pannakaammo iti nadiosan a nagtaudantayo ken ti agnanayon a potensialtayo ket sumrek iti kaunggan iti kararuatayo, makitatayo ti biag nga addaan panggep ken agtultuloy nga adbentyur a pagadalan ken pagdur-asan uray no “kumitatayo a sikukudrep babaen ti maysa a sarming,”7 iti apagbiit a panawen.
Ti maikatlo a pakabigbigan ti kinaragsak ket ti kanayon a pananglaglagip iti pateg ti maysa a kararua. Maaramidtayo daytoy iti panangsurot ti pammagbaga ti Mangisalakan nga “agiinnayatkayo iti maysa ken maysa; kas iti panagayatko kadakayo.”8
Insurona pay, “Gapu iti inaramidyo iti maysa kadagitoy kanunumuan kadagitoy kakabsatko, inaramidyo met kaniak.”9
Ti libro a Proverbio ket mangted kadagiti nainsiriban a balakad a, “Dika medmedan ti imbag kadagiti karbenganna, no adda ita imam iti pannakabalin a mangaramid.”10
Ditayto pulos pagbabawyan ti panagbalin a naasi unay. Iti imatang ti Dios, ti panagbalin a naasi ket kapada ti kinatan-ok Paset ti panagbalin a naasi ti manangpakawan ken di mananghusga.
Adu a tawenen ti napalabas idi napankami a sangapamiliaan nga agbuya iti pelikula para iti family home evening. Addakami amin iti van malaksid ti maysa kadagiti annakmi ken ni baketko a ni Valerie. Nasipnget idin, ket idi luktan ti anakmi ti ridaw a nagtaray nga agturong iti lugan, dina inggagara a nakugtaranna ti impagarupna a pusami iti beranda. Daksanggasat ta adda iti mismo a likudanna ti anakmi ken ti baketko, ket saan a ti pusami no di ket maysa a di naragsak a skunk, ket impakaammona daytoy kadakuada! Nagsublikami amin iti balay, a sadiay nagpadada a nagdigos ken binuguanda ti buokda iti juice ti kamatis, a maipagarup a sigurado a mangikkat ti angot ti skunk. Idi nakadigos ken nakasukatdan, di kamin nakaangot iti ania man nga angot, isu nga inkeddengmi nga okeykami a nagtuloy a mapan agbuya iti pelikula.
Apaman a nakatugawkami iti likud ti teatro, maysa-maysa dagiti tattao iti aglawlawmi ket kellaat a rimmuar tapno gumatangda iti popcorn. Nupay kasta, awan kadakuadan ti nagsubli iti sigud a tugawda.
Agkatawakami a makalagip iti dayta a kapadasan, ngem kasano ngata no adda angot ti amin a basoltayo? Kasano ngay no maangottayo iti panagsuitik, kinaderrep, apal, wenno kinapalangguad? No maipakaammo dagiti bukodtayo a pagkapuyan, namnamaentayo nga ad-adda a mannakaawatken naannadtayo kadagiti dadduma ken, kasta met, nga aramidentayo dagiti kasapulan a panagbalbaliw iti biagtayo. Magustuak ti angot ti tabako iti simbaan, ta dayta ti mangipakita a padpadasen ti maysa a tao ti agbalbaliw. Kasapulanda ti nabara a panangpasangbaytayo kadakuada.
Nainsiriban a kinuna ni Presidente Russell M. Nelson, “Maysa kadagiti kalakaan a wagas a pangbigbig iti maysa a pudno a pasurot ni Jesucristo ket no kasano ti panangtrato dayta a tao ti dadduma a tao.”11
Insurat ni Pablo kadagiti taga Efeso, “Ket managayan-ayatkayo, agkikinnaasi, ken agpipinnakawankayo, a kas met ti Dios pinakawannakayo gapu ken Cristo.”12
Kas disipulo ni Jesucristo, maidawat kadatayo nga agtalek iti Nailangitan nga Ama ken iti Mangisalakantayo ken saantayo a padasen a sukatan Ida. Ammo a naan-anay ni Jesucristo ti kinaimperpekto ti tunggal maysa ket naan-anayto a mangukom kadakuada.
Ti maikapat a pakabigbigan ti kinaragsak ket ti agnanayon a pannirigan. Ti plano ti Amatayo ket agpaut iti agnanayon; nalaka laeng ti agpokus iti agdama ken lipaten ti masakbayan.
Sibibileg nga insuronak daytoy nga adalen sumagmamano a tawenen ti napalabas babaen ti 16 ti tawenna idi nga anakmi a ni Jennifer. Ma-double lung transplant isuna, maikkat ti lima a naapektaran a lobe ti barana ken masukatan iti dua a nasalun-at a babbabassit a lobe, nga indonar ti dua a nakaskasdaaw a gagayyem a kas ken Cristo. Napeggad unay daytoy a surgery, ngem iti rabii sakbay ti operasion, kinasabaannak ni Jennifer nga addaan iti 90 a libra a timbangna, a kinunana, “Dika madanagan, Dad! Inton bigat agriingak nga addaan baro a bara, wenno makariingakto iti nasaysayaat a lugar. Ania man kadagitoy ti mapasamak ket nasayaat.” Dayta ti pammati; dayta ti agnanayon a pannirigan! Ti panangkita iti biag manipud iti agnanayon a pannirigan ket mangipaay iti kinatalged, liwliwa, tured, ken namnama.
Kalpasan ti surgery, idi dimteng ti nabayagen nga ur-urayen nga aldaw a panangikkat iti tubo ti respirator ken panangiddep iti ventilator a tumultulong ken ni Jennifer nga aganges, madanagankami a nanguray no gumana dagiti dua a babassit a lobe-na. Apaman a nakaanges, dagus a nagsangit daytoy. Idi nakitana ti panagdanagmi, dagus a kinunana, “Nasayaat la unay ti aganges.”
Manipud iti dayta nga aldaw, nagyamanak iti Nailangitan nga Ama iti agsapa ken rabii gapu iti kabaelak nga aganges. Di mabilang dagiti bendision iti aglawlawtayo ken nalakatayo nga ibilang a kasla awan pategda no ditayo agannad. Iti sabali a bangir, no awan ti manamnama ken mabigbig ti pateg ti amin, agbalin a magic ti biag.
Kinuna ni Presidente Nelson: “Tunggal baro nga agsapa ket maysa a sagut manipud iti Dios. Uray ti angin nga ang-angsentayo ket naayat nga nga inutangtayoKenkuana. Taginayonennatayo iti inaldaw ken saranayennatayo iti tunggal kanito. Gapuna, ti umuna a naindaklan nga aramidentayo iti agsapa ket ti napakumbaba a kararag ti panagyaman.”13
Dayta ti mangisangbay kaniak iti maikalima ken maudi a napaliiwko, a saankayto pulos a naragragsak ngem iti kinamanagyamanyo.
Impakdaar ti Apo, “Ket isu nga umawat iti amin a banag a siyayaman maidaydayawto.”14 Nalabit a daytoy ket gapu a ti kinamanagyaman pataudenna ti nakaad-adu pay a nasasayaat a kababalin.
Anian ti panagbalbaliw ti pannakaawattayo no tunggal bigat nga agriingtayo nga addaan laeng kadagiti bendision a pagyamanantayo iti napalabas a rabii. Ti di panangdayaw kadagiti bendisiontayo ket mabalin nga agresulta iti di pannakapnek, a mabalin a mangikkat iti panagrag-o ken kinaragsak a patauden ti kinamanagyaman. Dagidiay adda iti dakkel ken nalawa a pasdek ti mangsulisogkadatayo a kumita iti labes ti tun-oyen, iti kasta maliwayantayo a naan-anay ti tun-oyen.
Iti kinapudnona, ti kadakkelan a kinaragsak ken bendision ti mortalidad ket masarakan iti no ania ti nagbalinantayo babaen ti parabur ti Dios bayat ti panagaramid ken panagtungpaltayo kadagiti sagrado a katulagantayo Kenkuana. Pasayaaten ken parang-ayennatayonto ti Mangisalakantayo babaen iti napateg a pangsubbot a sakripisiona ket kinunana kadagiti situtulok a sumurot Kenkuana, “Ngem kukuakto pay la ida iti dayta aldaw a yaaykonto a mangaramid kadagiti alahasko.”15
Ikarik a no bangonentayo ti biagtayo iti pundasion ni Jesucristo; ipategtayo ti pudno a kinasiasinotayo kas annak ti Dios; laglagipentayo ti pateg ti kararua, mataginayon ti agnanayon a pannirigan; ken siraragsak a dayawen dagiti adu a bendisiontayo, nangruna ti awis ni Cristo nga umasideg Kenkuana, magun-odtayo ti pudno a ragsak a sapsapulentayo bayat daytoy mortal a panagbiahetayo. Addanto latta dagiti karit iti biag, ngem ad-adda a kabaelantayo a sanguen ti tunggal maysa nga addaan iti panggep ken talna gapu kadagiti agnanayon a kinapudno a maawatantayo ken pagbibiagantayo.
Iburayko ti pammaneknekko ti kinapudno ti Dios, ti naayat nga Amatayo, ken ti Ay-ayatenna nga Anakna a ni Jesucristo. Paneknekak met dagiti sibibiag a propeta, mammaltiing ken mammadto. Anian a bendision ti umawat iti balakad ti langit babaen kadakuada. Kas nalawag nga imbaga ti Mangisalakan,“Babaen man ti bukodko a timek wenno babaen ti timek dagiti katulongak, agpada.”16 Iti sagrado a nagan ni Jesucristo, amen.