Agtalinaed iti Aldaw ken Cristo
Aramiden ni Jesucristo a “makapagtalinaedtayo iti aldaw.”
Daytoy ti aldaw a napno iti natarus a pangngarig, narikut a saludsod, ken nauneg a doktrina. Kalpasan ti makasair a panangtubngar iti kasla “tanem a napapudaw, nga iti ruar pudno a nalibnosda, nga iti uneg napno iti tulang dagiti natay, ken iti amin a rugit,”1 insuro ni Jesus ti tallo pay a pangngarig iti naespirituan a panagsagana ken kinadisipulo. Maysa ti pangngarig ti sangapulo a babbalasang.
“Ti pagarian ti langit maipadanto iti sangapulo a babbalasang, a nangala iti pagsilawanda, ket sinabatda ti nobio.
Lima kadakuada ti manakem, ken lima ti naampang.
“Ta dagiti naampang idi innalada ti pagsilawanda, saanda a nangikuyog ti lana:
“Ngem dagiti manakem nangikuyogda ti lana iti basoda agraman pagsilawanda.
“Idinto a nagbati ti nobio, nagdungsada amin ket nakaturogda.
“Ngem idi tengnga ti rabii, adda nagpukkaw, Adtoy ti nobio; rummuarkayo a sumabat kenkuana.
“Idin timmakder amin a babbalasang, ket tinarimaanda ti pagsilawanda.
“Ket kinuna dagiti naampang kadagiti manakem, Ikkandakami iti lanayo, ta maiddepen ti pagsilawanmi.
“Ngem insungbat dagiti manakem a kunkunada, Saan, tapno di agkurang ti para kadakami ken kadakayo: inkayo gumatang ti para kadakayo.
“Ket idi napanda gimmatang, dimteng ti nobio; ket dagiti adda a nakasagana simrekda a kimmuyog kenkuana iti kallaysa: ket narikpan ti ridaw.
“Idin immay metten dagiti dadduma a babbalasang, nga agkunkuna, Apo, Apo, ilukatandakami.”2
“Ngem simmungbat ket kinunana, Pudno kunak kadakayo, Saandak nga am-ammo.”3
“Agsalukagkayo, ngarud, ta diyo ammo ti aldaw wenno oras a yaay ti Anak ti tao.”4
Indatag ni Presidente Dallin H. Oaks dagiti sumaganad a makaabbukay a saludsod mainaig iti yaay ti Nobio:5 “Kasano no inton bigat ti aldaw ti yaayna? No ammotayo koma a sabtentayo ti Apo inton bigat—babaen ti nasapa nga ipapataytayo wenno babaen ti di ninamnama a yaayna—ania ti aramidentayo ita?”6
Nasursurok iti padasko a ti naespirituan a panagsagana iti yaay ti Apo ket di laeng nasken no di ket ti kakaisuna a wagas tapno masarakan ti pudno a talna ken ragsak.
Narangrang nga aldaw ti panagtitinnag idi damo a nangngegko ti sao nga “Adda kansermo.” Nasdaawkami nga agassawa! Idi agawidmi a siuulimek, a mangut-utob iti damag, nagdanagak iti tallo nga annakmi a lallaki.
Iti panunotko dinamagko iti Ama iti Langit, “Matayak kadin?”
Inyarasaas ti Espiritu Santo, “Agbalinto a nasayaat ti amin.”
Kalpasanna dinamagko, “Agbiagakto kadi?”
Manen, insungbatna: “Agbalinto a nasayaat ti amin.”
Natikawak. Apay nga inawatko ti agpada a sungbat no agbiagak wenno matayak?
Kalpasanna kellaat a napno ti sibubukel a bagik iti naan-anay a talna iti lagip: Dimi nasken ti agdardaras nga agawid ken suruan dagiti annakmi no kasano ti agkararag. Ammoda no kasano nga awaten ti sungbat ken liwliwa iti kararag. Dimi nasken ti agdardaras nga agawid ken suruan ida iti scriptures wenno balikas dagiti sibibiag a propeta. Dagita a balikas ti siguden a pagtaudan ti pigsa ken pannakaawat. Dimi nasken ti agdardaras nga agawid ken suruan ida iti panagbabawi, Panagungar, Pannakaisubli, plano ti pannakaisalakan, agnanayon a pamilia, wenno ti mismo a doktrina ni Jesucristo.
Iti dayta a kanito napateg ti tunggal adalen iti family home evening, panagadal iti nasantuan a kasuratan, panagkararag, pammendision, panagpaneknek, natungpal a katulagan, idadar-ay iti balay ti Apo, ken nangilin a nasantuan ti Sabbath—o, anian a nagpateg! Naladawen a mangipan iti lana iti pagsilawanmi. Kinasapulanmi ti tunggal tedted, ket kasapulanmi itan!
Gapu ken Jesucristo ken ti naisubli nga ebangheliona, no matayak, ti pamiliak ket maliwliwa, mapapigsa, ken maisublinto iti maysa nga aldaw. No agbiagak, magun-odkonto ti kaindaklan a bileg ditoy daga a tumulong a mangagas kaniak. iti udina, gapu ken ni Jesucristo, agbalin a nasayaat ti amin.
Masursurotayo manipud iti naannad a panagadal iti Doktrina ken Katulagan no ania ti “nasayaat”:
“Ket iti dayta nga aldaw, inton umayak iti dayagko, matungpalto ti pangngarig nga imbagak maipanggep iti sangapulo a babbalasang.
“Ta isuda a masirib ken nangawat iti kinapudno, ken nangala iti Nasantuan nga Espiritu a bagnosda, ken saanda a pinaallilaw—pudno kunak kadakayo, saandanto a mapukan ken maipuruak iti apuy, ngem agtalinaeddanto iti aldaw.”7
Aramiden ni Jesucristo a “makapagtalinaedtayo iti aldaw.” Ti panagtalinaed iti aldaw dina kayat a sawen a panangnayon iti umad-adu pay nga aramiden. Panunoten ti maysa a magnifying glass. Panggepna saan laeng a mangpadakkel kadagiti banag. Makaurnong ken makapokus pay iti lawag tapno nabilbileg. Naskentayo a mangpasimple, agpokus iti aramidtayo, ken agurnongtayo iti Silaw ni Jesucristo. Kasapulantayo ti nasansantuan ken naimpadtuan a padas.
Masarakan iti amianan a laud ti Israel ti napintas a kabambantayan a masansan a maawagan kas “berde a bantay.” Ti Bantay Carmel8 agtalinaed a berde iti makatawen kaaduanna iti babassit a linnaaw. Inaldaw a maaramid ti pannakataraon. Kas iti “linnaaw ti Carmel,”9 no agpataraontayo iti kararuatayo “iti bambanag maipanggep iti kinalinteg,”10 “babassit ken gagangay a bambanag,”11 agbiagto ti pammaneknektayo ken ti pammaneknek dagiti annaktayo!
Ita, mabalin a mapampanunotyo, “Ngem Sister Wright, dimo am-ammo ti pamiliak. Talaga a marigatankami ken saan a kastoy ti situasionmi.” Hustokayo. Diak am-ammo ti pamiliayo. Ngem ti Dios iti agnanayon nga ayat, asi, bileg, pannakaammo, ken dayagna, am-ammona.
Mabalin a damagenyo dagiti saludsod ti puso nga agsakit iti kaunggan ti kararuayo. Masarakan dagiti umasping a saludsod iti nasantuan a kasuratan:
“Apo, awan ania man kadi kenka no mapukaw ti [pamiliak]?”12
“Sadino itan ti inanamak?”13
“Anianto ti aramidek, tapno maikkat ti ulep ti sipnget a nanglinged [kaniak]?”14
“Sadino ti pakasarakan iti sirib? ken sadino ti lugar ti pannakaawat?”15
“Kasano ti panagtalekko iti tunggal nasayaat a banag?”16
“Apo, ania ti kayatmo nga aramidek?”17
Ket kalpasanna makaay-ayo nga insungbatna:
“Mamatika kadi iti bileg ni Cristo a mangisalakan?”18
“Binilin kadi ti Apo ti asino man a saanda a makiranud iti kinaimbagna?”19
“Mamatika kadi a maaramid[na] daytoy?”20
“Mamatika kadi kadagiti propeta?”21
“Ipatpatungpalmo kadi ti pammati iti pannakasubbot ti namarsua kenka?”22
“Agaramidto kadi iti umno ti Ukom ti amin a daga?”23
Ay-ayatek a gagayyemko, ditayo maibinglay ti lanatayo, ngem maibinglaytayo ti silawna . Dagiti lana ti pagsilawantayo saan laeng a tulongannatayo nga “agtalinaed iti aldaw” ngem mabalin pay a wagas a manglawag iti dalantayo a mangiturong kadagiti ay-ayatentayo iti Mangisalakan, a nakasagana “nga umawat” kadakuada.24
“Kastoy ti kinuna ti Apo; Medmedam dayta timekmo iti panagsangit, ken dagita matam iti luluam: ta dayta aramidmo magunggonaanto, …ket umaydanto manen manipud iti daga ti kabusor.
“Ket adda inanama iti masanguanam, kuna ti Apo, ket dagiti annakmo umaydanto manen iti beddengda met laeng.”25
Ni Jesucristo ti “inanama iti masanguanam.” Awan ti naaramid wenno ditay naaramid a di maragpat ti awan patinggana ken agnanayon a sakripisiona. Isu ti rason no apay di pulos aggibus ti estoriatayo.26 Ngarud masapul nga agtultuloytayo a sitatalingenngen ken Cristo, nga addaan iti naan-anay a kinalawag ti namnama, ken ayat ti Dios ken ti amin a tao. Gapuna, no agtultuloy[tayo], nga agpennek iti balikas ni Cristo, ken agibtur agingga iti panungpalan, adtoy, kuna ti Ama: Maaddaan[tayto] iti biag nga agnanayon.”27
Agnanayon a rag-o ti agnanayon a biag. Ti rag-o ditoy a biag, itan—saan nga iti baet dagiti karit ti aldawtayo ngem gapu iti tulong ti Apo a masursuruan ken mangparmek kadagitoy—ken ti di marukod a rag-o iti umay a biag. Agmaganto dagiti lua, malainganto dagiti nasugat a puso, masarakanto ti napukaw, marisutto dagiti pakaseknan, maisublinto dagiti pamilia, ket kukuatayto amin nga adda iti Ama.28
Kumita ken Jesucristo ket agbiag29 paneknekak iti sagrado ken nasantuan a nagan ti ay-ayaten a “Pastor ken Obispo dagiti kararua[tayo],”30 ni Jesucristo, amen.