Ti Bileg a Mangilantip
Ti bileg a mangilantip ti managbalin iti pannakaisalakan ti tao ken pannakaitan-ok ti pamilia a sapasap a magun-od dagiti annak ti Dios.
Naipadto manipud pay kadagidi aldaw ni Isaias1 a kadagiti maudi nga aldaw, dagiti nagkauna a natulagan a tao ti Apo, ti balay ti Israel, nasken a maummong manipud iti napaut a pannakaiwarasda, manipud iti isla ti baybay, ken manipud iti uppat a paset ti daga”2 ken naisubli iti “daga ti tawidda.”3 Masansan ken sibibileg nga insao ni Presidente Russell M. Nelson daytoy a panaguummong iti “ti kapatgan a banag mapaspasamak ditoy daga iti agdama.”4
Ania ti panggep daytoy a panaguummong?
Babaen ti paltiing ken ni Propeta Joseph Smith, inlasin ti Apo ti maysa a panggep kas ti pannakasalaknib dagiti natulagan a tao. Kinunana, “Ti panaguummong a sangkamaysa iti daga ti Zion, ken kadagiti istakana, agbalin a salakan, ken pagkamangan no agbagyo, ken no maibukbok ti pungtot nga awan lalaokna iti intero a daga.”5 Ti “pungtot” iti daytoy a konteksto ket mabalin a maawatan kas gagangay a pagbanagan ti nasaknap a panagsukir kadagiti linteg ken bilin ti Dios.
Kangrunaanna, ti panaguummong ket para iti panggep a mangyeg kadagiti bendision ti pannakaisalakan ken pannakaitan-ok iti amin nga umawat kadagitoy. Daytoy ti no kasano a matungpal dagiti kari ti katulagan a naited ken Abraham. Imbaga ti Apo ken Abraham a babaen ti bukelna ken priesthood, “[nasken] a mabendisionanto amin a pamilia iti daga, a kas kadagiti bendision ti Ebanghelio, nga isuda dagiti bendision ti pannakaisalakan, a kas iti agnanayon a biag.”6 Impeksa ni Presidente Nelson ti kastoy: No arakupentayo ti ebanghelio ken mabuniagan, awatentayo iti bagbagitayo ti sagrado a nagan ni Jesucristo. Ti panagbuniag ti ruangan nga agturong iti panagbalin a makipagtawid iti amin a kari nga inted ti Apo idi un-unana kada Abraham, Isaac, Jacob, ken ti kaputotanda.”7
Idi 1836, nagparang ni Moises ken ni Propeta Joseph Smith iti Templo ti Kirtland ket “inkumitna … dagiti tulbek ti pannakaummong ti Israel manipud iti uppat a paset ti daga.”8 Iti dayta met la a gundaway, nagparang ni Elias, ket “intalekna ti dispensasion ti ebanghelio ni Abraham, a kinunana a babaen kadakami nasken a mabendisionanto amin a kaputotan a sumarsaruno kadakami.”9 Babaen daytoy a turay, idanontayo itan ti ebanghelio ni Jesucristo—ti naimbag a damag ti pannakasubbot babaen Kenkuana—iti amin a paset ken tattao iti daga ket ummongentayo amin ti agtarigagay iti katulagan ti ebanghelio. Agbalinda a “bukel ni Abraham, ken ti simbaan ken pagarian, ken pili ti Dios.”10
Iti dayta met la a gundaway iti Templo ti Kirtland adda maikatlo a nailangitan a mensahero a nagparang kada Joseph Smith ken Oliver Cowdery. Saritaek maipapan ken ni propeta Elias, ken kayatko nga isarita ita ti turay ken dagiti tulbek nga insublina.11 Ti bileg a mangbalido iti amin nga ordinansa ti priesthood ken mangaramid kadagitoy a maibegkes nga agpada ditoy daga ken sadi langit—ti bileg a mangilantip—ket napateg para iti panangummong ken panangisagana kadagiti natulagan a tao iti agsumbangir ti belo.
Tawtawen kasakbayanna, inlawlawag ni Moroni ken ni Joseph Smith a yegto ni Elias ti kasapulan a turay ti priesthood: “Ipalgakkonto kadakayo ti Priesthood, babaen ti ima ni Elias a propeta.”12 Idi agangay inlawlawag ni Joseph Smith: “Apay ibaon ni Elias? Gapu ta iggemna dagiti tulbek ti turay a mangimaton iti amin nga ordinansa ti Priesthood; ket [malaksid no] maited ti turay, saan a maipatungpal dagiti ordinansa iti kinalinteg,”13—dayta ket, saan koma a maibegkes dagiti ordinansa iti panawen ken kinaagnanayon.14
iti pannursuro a nakanonisado kas nasantuan a kasuratan iti Doktrina ken Katulagan, kinuna ti Propeta: “Agparparang kadagiti dadduma a kasla nabatad unay a doktrina nga isaritatayo—ti bileg a mangisurat wenno mapagkappeng iti daga ken mapagkappeng iti langit. Nupay kasta, iti amin a panawen ti lubong, no kaano nga inted ti Apo ti dispensasion ti priesthood iti asino man a tao babaen ti talaga a paltiing, wenno ania man a grupo ti tattao, kanayon a maited daytoy a bileg. Isu a, no ania man ti inaramid dagidiay a tao babaen ti turay, iti nagan ti Apo, ket inaramidda a pudno ken sipupudno, ken nagidulin iti umno ken napudno a sinurat ti kasta met laeng, agbalin a linteg iti daga ken iti langit, ket saan a mabalbaliwan, a maibatay iti paulog ti naindaklan a Jehova.”15
Panunotentayo ti turay a mangilantip kas mayaplikar laeng iti dadduma nga ordinansa ti templo, ngem kasapulan dayta a turay a mangbalido iti ania man nga ordinansa ken mangibegkes iti labes ti patay.16 Ti bileg a mangilantip ket mangted iti selio ti kinalehitimo iti panagbuniagyo, kas pagarigan, tapno mabigbig ditoy ken idiay langit. Kangrunaanna, amin nga ordinansa ti priesthood a maannong babaen dagiti tulbek ti Presidente ti Simbaan, ken kas inlawlawag ni Presidente Joseph Fielding Smith: “Isu [ti Presidente ti Simbaan] inikkannatayo iti turay, impanna ti bileg a mangilantip iti priesthoodtayo, gapu ta iggemna dagita a tulbek.”17
Adda sabali a napateg a panggep iti pannakaummong ti Israel nga addaan espesial a kaipapanan no saritaentayo ti panaglantip ditoy daga ken idiay langit—dayta ti pannakabangon ken pannakaipagna dagiti templo. kas iti inlawlawag ni Propeta Joseph Smith: “Ania ti panggep ti panangummong kadagiti … tao ti Dios iti ania man a panawen ti lubong? … Kangrunaan a panggep ti mangbangon iti Apo iti balay a pangipalgakanna iti tattaona kadagiti ordinansa ti balayna ken dagiti gloria ti pagarianna, ken pangisuruanna kadagiti tao iti dalan ti pannakaisalakan; ta adda dagiti masinunuo nga ordinansa ken pagbatayan a, no maisuro ken maaramidda, maaramid koma iti lugar wenno balay a nabangon para iti dayta a panggep.”18
Ti kinaumisu nga ited ti bileg a mangilantip kadagiti ordinansa ti priesthood iramanna, siempre, dagiti vicarious nga ordinansa a naannong iti lugar nga intuding ti Apo—ti templona. Ditoy a makitatayo ti kinatan-ok ken kinasagrado ti bileg a mangilantip—aramidenna ti indibidual a pannakaisalakan ken pannakaitan-ok ti pamilia a sapasap a magun-odan dagiti annak ti Dios sadino man ken kaano man a nakapagnaedda ditoy daga. Awan sabali a teolohia wenno pilosopia wenno turay a makapada iti kasta a gundaway a mangiraman iti amin. Daytoy a bileg a mangilantip ket naan-anay a pannakaiparangarang ti hustisia, asi, ken ayat ti Dios.
Iti pannakagun-od iti bileg a mangilantip, gagangay nga maiturong ti puspusotayo kadagiti pimmanawen. Ti panaguummong iti ud-udina nga aldaw iti katulagan ket agballasiw babaen ti belo. Iti naan-anay nga urnos ti Dios, di mapadasan dagiti sibibiag ti agnanayon a biag iti pakabuklanna no dida mangbukel iti manayon a silpo kadagiti “amma,” dagiti kapuonantayo. Kasta met, a ti panagdur-as dagiti pimmusayen, wenno dagiti pumusayto a saan a makaawat iti ordinansa ti pannakailantip, ket saan a kumpleto agingga a di ibegkes dagiti vicarious nga ordinansa ida kadatayo, iti an-annaboda, ken datayo kadakuada iti nadiosan nga urnos.19 Ti panagkumit a tumulong iti tunggal maysa iti bangir ti belo ket mailasin kas kari ti katulagan, paset ti baro ken agnanayon a katulagan. Iti balikas ni Joseph Smith, kayattayo nga “ilantip dagiti minataytayo tapno makadua[tayo] ida iti umuna a panagungar.”20
Ti kangatuan ken kasantuan a parangarang ti bileg a mangilantip ket adda iti agnanayon a kaykaysa ti lalaki ken babai iti kallaysa ken ti pannakaisilpo ti sangkataw-an iti amin a kaputotanda. Gapu ta sagrado unay ti turay a mangiwardas kadagitoy nga ordinansa, personal nga imatonan ti Presidente ti Simbaan ti pannakaipakumit daytoy iti dadduma. Kinuna ni Presidente Gordon B. Hinckley iti maysa a gundaway, “Namin-adu a kinunak a no awan ti rimmuar iti amin a ladingit ken rigat ken ut-ot ti pannakaisubli ngem ti bileg a mangilantip ti nasantuan a priesthood a mangbegkes kadagiti pamilia iti agnanayon, maikari koma dayta iti amin a pategna.”21
No awan ti pannakailantip a mangparnuay kadagiti agnanayon a pamilia ken mangisilpo kadagiti kaputotan ditoy ken kalpasanna, mabatitayo iti kinaagnanayon nga awanan ramut wenno sanga—a dayta ti, awanan iti kapuonan wenno kaputotan. Daytoy a nawaya nga agtaptapaw, naisina a kasasaad dagiti tao, iti maysa a bangir, wenno dagiti koneksion a mangsuppiat iti kallaysa ken relasion ti pamilia nga intuding ti Dios,22 iti sabali a bangir, mangdadael iti mismo a panggep ti pannakaparsua ti daga. No agbalin dayta nga alagaden, katupag dayta ti pannakasaplit ti daga iti lunod wenno “naan-anay a madadael” iti yaay ti Apo.23
Makitatayo no apay a “ti kallaysa ti lalaki ken babai ket inordenan ti Dios ken ti pamilia ti kangrunaan iti plano ti Namarsua para iti agnanayon a pagtungpalan dagiti annakna.”24 Maigiddato, bigbigentayo nga iti agdama, saan a daytoy ti kinapudno wenno uray pay napudno a posibilidad para iti dadduma. Ngem adda namnamatayo ken ni Cristo. Iti panaguraytayo iti Apo, ipalagip ni Presidente M. Russell Ballard nga “ipatalged dagiti scripture ken dagiti propeta iti ud-udina nga aldaw a ti amin a napudno nga agtungpal iti katulagan iti ebanghelio maaddaandanto iti gundaway iti pannakaitan-ok.”25
Napadasan ti dadduma ti saan a naragsak ken nasalun-at a kasasaad ti pamilia ken bassit ti mariknada a tarigagay iti agnanayon a pannakilangen iti pamilia. Napaliiw ni Elder David A. Bednar daytoy: “Kadakayo a nakapadas iti saem ti diborsio iti pamiliayo wenno nakarikna iti panagsagaba ti nalabsing a panagtalek, laglagipenyo koma [a ti pagtuladan ti Dios para kadagiti pamilia] mangrugi manen kadakayo! Mabalin a napugsat ti maysa a silpo iti kawar dagiti kaputotam, ngem dagiti dadduma a nalinteg a silpo ken ti nabati iti kawar ket kaskasdi nga agnanayon a napateg. Mabalinmo ti mangnayon iti pigsa iti kawarmo ken nalabit a makatulong pay a mangisubli kadagiti napugsat a silpo. Maipatungpalto dayta nga aramid a saggaysa.”26
Iti serbisio ti pumpon ni Sister Pat Holland, asawa ni Elder Jeffrey R. Holland, idi napalabas a Hulio, insuro ni Presidente Russell M. Nelson: “Iti naituding nga oras, agtiponto da Patricia ken Jeffrey. Kaduadanto inton agangay dagiti annakda ken kaputotanda nga agtungtungpal iti katulagan tapno mapadasanda ti pakabuklan ti rag-o nga insagana ti Dios para kadagiti napudno nga annakna. Gapu ta ammotayo dayta, maawatantayo a ti kapatgan a petsa iti biag ni Patricia ket saan a ti petsa ti pannakayanakna wenno pannakatayna. Kapatgan a petsana ti Hunio 7, 1963, idi mailantipda ken Jeff iti St. George Temple. … Apay a napateg unay daytoy? Agsipud ta ti mismo a rason a naparsua ti daga ket tapno mabukel ken mailantip dagiti pamilia iti tunggal maysa. Ti pannakaisalakan ket pagrebbengan ti tunggal tao, ngem ti pannakaintan-ok ket pagrebbengan ti pamilia. Awan ti mailantip nga agmaymaysa.”
Di pay nabayag, kinaduami iti asawak ti patpatgen a gayyem iti siled a paglantipan iti Bountiful Utah Temple. Damo a naam-ammok daytoy a gayyem idi ubing pay idiay Córdoba, Argentina. Konkontakenmi iti kompanionko a misionario dagiti tao iti sangakaarrubaan mano laeng a bloke ti kaadayona iti mission office, ket linuktanna ti ridaw idi dimtengkami iti pagtaenganna. Iti agangay, kimmappengda ken nanangna ken dagiti kakabsatna iti Simbaan, ket nagtalinaedda a napudno a miembro. Maysa itan a nalapsat a balasang, ket ita addakami iti templo tapno paglantipen dagiti pimmusay a dadakkelna sa ilantip isuna kadakuada.
Maysa a couple nga iti naglabas a tawtawen nagbalin a nasinged nga aggayyem ket nangibagi iti dadakkelna iti altar. Maysa dayta a nainriknaan a kanito a nasamsam-it pay idi mailantip ti gayyemmi nga Argentino iti dadakkelna. Innemkami laeng a dimmar-ay iti naulimek a malem nga adayo iti lubong, ngem mapaspasamaken ti maysa kadagiti kapatgan a banag ditoy daga. Naragsakanak ta nagbalin a naan-anay ti akemko ken pannakikaduak manipud idi nagtuktokak iti ridawna idi misionarioak agingga ita, kalpasan dagitoy adu a tawen, a mangan-annong iti pangilantip nga ordinansa a mangisilpo kenkuana kadagiti dadakkelna ken kadagiti immuna a kaputotanna.
Daytoy ti buya a kanayon a mapasamak iti intero a lubong kadagiti templo. Daytoy ti ultimo nga addang iti panangummong kadagiti natulagan a tao. Daytoy ti kangatuan a pribilehio ti kinamiembroyo iti Simbaan ni Jesucristo. Ikarik a no napudnokayo nga agkiddaw iti dayta a pribilehio, awan duadua a matagikuayonto iti agnanayon.
Paneknekak a pudno ti bileg a mangilantip ken ti turay a naisubli ditoy daga babaen ken ni Joseph Smith, a ti naibegkes ditoy daga ket pudno a naibegkes idiay langit. Paneknekak a ni Presidente Russell M. Nelson, kas Presidente ti Simbaan, isu ti maysa a tao ditoy daga ita a babaen dagiti tulbekna iturongna ti pannakausar daytoy naindaklan a bileg. Paneknekak a ti Pannubbot ni Jesucristo ti namagbalin a pudno ti imortalidad ken ti posibilidad ti naitan-ok a relasion ti pamilia. Iti nagan ni Jesucristo, amen.