Kayatmo Kadi ti Agbalin a Naragsak?
Agtalinaed iti dana ti katulagan. Nalaklaka, naragragsak, ken napno iti rag-o ti biagyo.
Kayatmo ti agbalin a naragsak? Ania ti mangpaliday kenka? Kinuna ni Presidente Nelson: “No kayatmo ti agbalin a miserable supringem dagiti bilin—ket dika pulos agbabawi. No kayatmo ti rag-o, agtalinaedka iti dana ti katulagan.”1 Di kadi simple ti agragsak? Makitulagka laeng ken tungpalem ida iti biagmo. Irebyutayo ti mano a banag a makatulong kadatayo nga agtalinaed iti dana ti katulagan ken paragsakendatayo.
1. Ania ti Dana ti Katulagan?
Segun ken ni Elder Dale G. Renlund, “maibasar ti balikas a dana ti katulagan iti agsasaruno a katulagan a pakaasitgantayo ken ni Cristo ken maikonekta Kenkuana. Babaen daytoy a begkes ti katulagan, magun-odtayo ti agnanayon a bilegna. Mangrugi ti dana iti pammati ken Jesucristo ken panagbabawi, a sarunuen ti buniag ken panangawat iti Espiritu Santo.2 Pabaruentayo dagitoy a katulagan tunggal makiranudtayo iti sakramento.
Mangrugi iti katulagan iti panagbuniag, ad-adu pay dagiti pannakitulagtayo iti unos ti biagtayo. Kinuna pay ni Elder Renlund: “Ti dana ti katulagan iturongnatayo iti ordinansa ti templo, kas iti endowment ti templo. Ti endowment ket sagut ti Dios a sagrado a katulagan a naan-anay a maikonektanatayo Kenkuana.”3
2. Addaka Kadi iti Dana ti Katulagan?
No dadduma no makitulagtayo, ditayo matungpal ida. No mapasamak, kasano a makasublika iti dana ti katulagan? Ibinglayko man ti mano a pagwadan ti panagsubli iti dana ti katulagan?
Nasurok bassit a makabulan ti naglabas, immawatak iti mensahe manipud iti nagsublin a misionario a nakipagserbi kadakami. Kinunana: “Narigat ti maudi nga oras. Ti pannakibakal iti danag ken depresion iti inaldaw ti nangpadagsen ken nangparigat unay kaniak. Nariknak a sisiak ken miserable. Inkararagko ti tarabay ti Nailangitan nga Amatayo para iti talna ken liwliwa no ania ti aramidek a mangparmek iti rigat. … Bayat ti panagkararagko, nariknak ti Espiritu a mangibagbaga a nasken a naan-anay a bayadak ti apagkapullok. … Nariknak unay ti Espiritu, ket dagus a naguyugoyak a mangaramid iti daytoy. Addaan tarigagay a mangaramid, nariknak ti pannignay a ‘no bayadam ti apagkapullom okeyton ti amin.’ Marigatanak latta a mangbirok iti talna, ngem adda pammaneknekko iti Mangisalakan ken babaen ti panagtulnogko, masarakak ti talna a sapsapulek iti pusok ken panunotko. Nabiit pay nga inkeddengko ti agsubli iti simbaan ken agpatarabay iti espiritu iti amin nga aramidek.”
Itan nalaingen ti kasasaadna. Makapagkiddawka iti Nailangitan nga Ama iti talna, ngem mabalin a sabali ti sungbat ngem iti ninamnamam. No la ketdi kalikagumam nga ammuen ti Mangisalakan ken agkararagka iti Nailangitan nga Ama, sungbatannakanto.
Insuro ni Presidente Thomas S. Monson:
“Ti kaindaklan a leksion a maadaltayo iti biag ket no agsao ti Dios ken tungpalentayo, kanayonto nga umisutayo.”4
“No tungpalentayo dagiti bilin, naragragsak ti biagtayo, ad-adda a makapnek, ken saan a narikut. Dagiti pannubok ken parikuttayo ket nalaklaka nga ibturan, ken maawattayto dagiti inkari ti [Dios] a bendision.”5
Idi naawaganak a bishop, daytoy ti karigatan a panawen ti biagko. Ubingak pay nga ama nga adda iti early 30s ngem marigatanak iti pinansial gapu iti pannubok iti pamiliak. Awan ti makitak a solusion, ken impagarupko a dinton aggibus dagiti pannubok. Nabannogakon no pakaseknan iti kuarta ken rikna. Rinugiak ti nagduadua pay iti naespirituan a pigsak. Iti dayta a narigat a kanito ti panangted ti stake president-ko iti calling kaniak. Nupay kasta, inawatko ti calling, nupay narigat.
Kinauman met ti stake president ti asawak, ngem di makapag-wen ken saanna met a maisao ti saan ngem agsangsangit. Nagsangit iti makalawas, nga agdawdawat iti Ama iti langit, “Apay itan?” ken “Am-ammom kadi ti tunggal tao?” Dina naawat ti sungbat, ngem nakanunonganak a bishop iti sumuno a Domingo. Dinan dinamag pay iti Ama iti Langit dagita a saludsod ngem sinuportarannak iti calling-ko iti innem a tawen.
Iti Domingo a pannaka-release-ko, nakangngeg ti asawak iti timek bayat ti panangawatna iti sakramento. Inyarasaas ti timek kenkuana, “Gapu ta marigatanka unay a magna, inawagak a bishop tapno adda mangiggem ken magna para kenka.” Idi nalagipna ti naglabas nga innem a tawen, naamirisna nga amin dagiti adu a pannubok a kasla awan patinggana ket narisuten bayat ti panagdaliasat.
Naadalmi a no ipagaruptayo a di nasayaat a kanito a yaawattayo iti calling, mabalin a dayta ti kanito a kasapulantayo unay dayta a calling. No kiddawen ti Apo nga agserbitayo iti ania man a calling, nalaglag-an man wenno nadagdagsen, makitana ti panagkasapulantayo. Itedna ti pigsa a kasapulantayo ken isaganana dagiti bendision a maibukbok kadatayo no napudno nga agserbitayo.
Adu a dadduma pay a banag a mangsinga kadatayo iti panagtalinaed iti dana ti katulagan. Ania man daytoy, di pay a naladaw ti mangiturong iti puspusotayo iti Nailangitan nga Ama para iti tulong. Insuro ni Elder Paul V. Johnson: “No surotentayo ni Satanas, ikkantayo iti bileg. No surotentayo ti Dios, ikkannatayo iti bileg.”6
Paneknekan ni Ari Benjamin iti Libro ni Mormon: “Kayatko nga ibilangyo koma ti nagasat ken naragsak a kasasaad dagiti agtungpal kadagiti bilin ti Dios. Ta adtoy, naparaburanda iti amin a banag, a nainlasagan ken naespirituan; ket no agtalinaedda a situtulnog agingga iti kamaudianan maawatdanto idiay langit, ket makipagtaengdanto iti Dios iti kasasaad nga awan ti gibusna a kinaragsak.”7
3. Kasano a Maparagsaknaka ti Panagtungpal iti Katulagan ti Dios?
Kuna ti asawak a ti kallaysami ti mangsangol kadakami, ket gapu iti dayta maaramidna dagiti banag a dina maaramid idi. Kas pagarigan, manipud pay idi ubing, marigatan a rummuar iti sipnget, ngem saanen a marigatan gapu ta kaduanak. Pandak ken dina magaw-at ti nangato a salansan malaksid no usarenna ti tugaw wenno agdan, ngem magaw-atko ti nangato a salansan para kenkuana gapu ta nataytayagak. Maipada dayta ti yaawattayo iti sangol ti Mangisalakan. No isangoltayo iti bagbagitayo Kenkuana, maaramidtayo dagiti banag a ditayo maaramid gapu ta maaramidna dagiti banag a ditayo maaramid.
Kinuna ni Elder David A. Bednar: “Ti panagaramid ken panagtungpal iti sagrado a katulagan isangolnatayo ken Apo Jesucristo. Kinapudnona, ay-ayabannatayo ti Mangisalakan nga agpannuray ken makiguyod Kenkuana, nupay di maipada dagiti kasayaatan nga aramidtayo iti aramidna. No agtalek ken makipagguyodtayo iti awit Kenkuana iti panagdaliasat iti biag, pudno a nalaka ti sangolna, ken nalag-an ti awitna.”8
Insuro pay ni Presidente Nelson:
“Ngem ti panangisangolyo iti bagiyo iti Mangisalakan kaipapananna a maaramatyo ti pigsa ken pangsubbot a bilegna.”9
“Ti gunggona iti panagtungpal iti katulagan iti Dios ket bileg manipud iti langit—bileg a mangpapigsa kadatayo a mangsaranget iti pannubok, sulisog, ken leddaangtayo. Daytoy a bileg ti mangpalaka iti dalantayo. Dagiti agbiag iti nangatngato a linteg ni Jesucristo ti makagun-od iti nangatngato a bilegna.”10
“Ti panagtungpal iti katulagan ti pudno a mangpalaka iti biag! Tunggal tao a makitulag kadagiti puente a pagbuniagan ken templo—ken mangtungpal kadagitoy—ket ad-adda a makagun-od iti bileg ni Jesucristo.”11
Patpatgek a kakabsatko, kayatyo kadi ti agragsak? Agtalinaed iti dana ti katulagan. Nalaklaka, naragragsak, ken napno iti rag-o ti biagyo. Aw-awisennatayo ti Mangisalakan, “Umaykayo kaniak, dakay amin nga agrigrigat ken madagdagsenan, ta paginanaenkayto.”12 Isu ti sibibiag a Cristo. Ibaklayna ti dagensentayo ken palakaenna ti biagtayo. Iti nagan ni Jesucristo, amen.