Iti Dalan ti Pagrebbenganda
Dakayo nga agtultuloy ita iti dalan ti pagrebbenganyo ket ti pigsa ti naisubli a Simbaan ti Mangisalakan.
Sipapasnek nga ikararagak ti tulong ti Espiritu Santo iti panangipeksak ita ti ayat, panagraem, ken panagyamanko kadagiti miembro Ti Simbaan ni Jesucristo dagiti Santo iti Ud-udina nga Aldaw iti sangalubongan.
Dagiti Adda iti Maudi a Karison
Ti tawen 1947 ti maika-100 nga anibersario ti isasangpet dagiti immuna a pioneer a Latter-day Saint iti Salt Lake Valley. Adu a parambak ti naangay iti dayta a tawen, ken adu a panagyaman ti impeksa dagiti napudno a disipulo ni Jesucristo nga immuna a nangaramid iti pagnaan a suroten ti dadduma, nangbangon kadagiti balay, nagmula iti nalawa a disierto, ken nagindeg kadagiti purok.
Ni Presidente J. Reuben Clark, Umuna a Mammagbaga iti Umuna a Panguluen, ket nangted iti nakallalagip ken makasagid a pammadayaw kadagitoy a napudno a pioneer iti sapasap a komperensia ti Oktubre 1947.
Iti mensahena, binigbig ni Presidente Clark dagiti nalatak a lider a nangidaulo iti panagakar dagiti tao nga agturong iti laud, kas kada Brigham Young, Heber C. Kimball, Wilford Woodruff, ken Parley P. Pratt, ken dadduma pay. Nupay kasta, ti kangrunaan a panggepna ket saan a ti mangisalaysay manen iti nagapuanan dagitoy a napateg a tao. Ketdi, impamaysana ti mensahena kadagiti natibker a kararua a saan a naammuan wenno opisial a nairekord ti nagnaganda iti pakasaritaan ti Simbaan. Daytoy ti makaisuro a paulo ti mensahena, “Dagiti Adda iti Maudi a Karison.”1
Detaliado nga inladawan ni Presidente Clark dagiti kababalin ken karit a nakaipasanguan dagiti migrante a nagbiahe iti maudi a naabbongan a karison iti kada atiddog a karison a bimmallasiw kadagiti tanap. Pinadayawanna dagitoy di nainaganan ken di napadayawan a bannuar, nga iti inaldaw, linawas, ken binulan, narigatanda nga umanges gapu iti tapok a pinarnuay ti adu a karison iti sanguananda—ken nangparmek kadagiti di agsarday a lapped a napasaranda iti dalan.
Kinuna ni Presidente Clark, “Dagiti adda iti maudi a karison ket a nagtultuloy, nakapuy ken nabannogda, nasakit ti saksakada, a no dadduma maupayda, ngem tinaginayon ida ti pammati nga ay-ayaten ida ti Dios, a pudno ti naisubli nga ebanghelio, ken ti Apo ti nangidaulo ken nangiturong kadagiti Kakabsat a lallaki iti sanguananda.”2
Inggibusna ti mensahena nga addaan iti daytoy a komendasion: “Kadagitoy napakumbaba a kararua, a naindaklan iti pammatida, iti trabahoda, iti nalinteg a panagbiagda, iti panangsukogda iti di magatadan a tawidtayo, sipapakumbaba nga itedko ti ayat, respeto, ken nalaus a pammadayawko.”3
Awan Pakaidumaan iti Panagserbi
Idi 1990, ni Presidente Howard W. Hunter, nga idi ket Presidente ti Korum dagiti Sangapulo-ket-dua nga Apostol, nangted iti mensahe iti napateg a kontribusion dagiti di mabilang a miembro ti Simbaan a sipapasnek ken sipupudno a nagserbi ken bassit wenno awan ti naawatda a pannakabigbig wenno pammadayaw ti publiko.
Inlawlawag ni Presidente Hunter:
“Naibaga [maipapan iti agtutubo ken maingel a Kapitan Moroni]:
“‘No amin a tao kastan, ken kasta, ken kastanto pay, kas ken ni Moroni, adtoy, agar-arigenggen koman iti agnanayon ti bileg ti impierno; wen, awan koma ti bileg ti sairo iti puspuso dagiti annak ti tattao’ (Alma 48:17).
“Anian a pammadayaw iti maysa a nalatak ken nabileg a tao. … Dua a bersikulo kalpasanna ti nagbalin a sasao maipapan ken ni Helaman ken dagiti kabsatna, a saan unay a nakadkadlaw ti akemda ngem ni Moroni, a mabasa:
“‘Ita adtoy, awan ti pakaidumaan ni Helaman ken dagiti kabsatna ken ni Moroni iti panagserbi kadagiti tao’ (Alma 48:19).”
Intuloy ni Presidente Hunter, “Iti sabali a pannao, nupay saan a madlaw wenno nalawag ni Helaman a kas ken Moroni, nasagana nga agserbi daytoy; kayatna a sawen, makatulong wenno adu ti maaramidna kas ken Moroni.”4
Sa binalakadannatayo amin ni Presidente Hunter nga awan koma ti pakaidumaan ti serbisiotayo. Kinunana: “No mariknayo a ti kaaduan nga aramidenyo ita a tawen wenno iti sumaganad a tawtawen ket dinakayo pagbalinen a nalatak, dikay maupay. Saan met a nalatak ti kaaduan kadagiti kasayaatan a tao a nagbiag. Agserbi ken dumur-askayo, a napudno ken naulimek.”5
Iti Dalan ti Pagrebbenganda
Agyamanak iti minilion a miembro ti Simbaan ita nga umay iti Mangisalakan6 ken agtultuloy iti dana ti katulagan kadagiti maudi a karison ti kontemporario a wagon train-tayo—ken pudno nga awan pakaidumaan ti serbisioda. Ti natibker a pammatiyo iti Nailangitan nga Ama ken ni Apo Jesucristo ken ti di aginkukuna, naikonsagrar a biagyo ket mangparegta kaniak nga agbalin a nasingsingpet a tao ken disipulo.
Ay-ayatenkayo. Daydayawenkayo. Agyamanak kadakayo. Ken idaydayawkayo.
Ti sao ni Samuel a Lamanite iti Libro ni Mormon ti kasayaatan a manggupgop iti riknak kadakayo.
“Makitayo a kaaduanna kadakuada ti adda iti dalan ti pagrebbenganda, ket magnada a siaannad iti sango ti Dios, ket sitatallugodda a mangtungpal kadagiti bilin ken dagiti lintegna. …
“Wen, kunak kadakayo, nga adu kadakuada ti mangar-aramid iti daytoy, ket inkagumaanda nga awan pannakabannog a kinapasnek tapno mayegda dagiti nabati a kakabsatda a mangammo iti kinapudno.”7
Mamatiak a ti ragup ti balikas nga “iti dalan ti pagrebbenganda” iladawanna dagiti mannakaawat a kakabsat a nga agsapul ken agtugaw iti abay dagiti tao nga agmaymaysa iti miting ti simbaan ken iti nadumduma a kasasaad. Agtultuloy nga ipasnekda ti “mangliwliwa iti makasapul iti pannakaliwliwa,”8 nga awan ti namnamaenda a pannakabigbig wenno pannakadayaw.
Ti ragup ti sao nga “iti dalan ti pagrebbenganda” iladawanna dagiti assawa ken annak a mangsuporta iti asawa, nagannak, wenno anak nga agserbi iti saad ti panangidaulo iti naisubli a Simbaan ti Apo. Ti natalged, naulimek, ken kadawyan a di mabigbig nga impluensiada a suporta ti mangyeg iti bendision iti adu nga indibidual ken pamilia iti wagas a naan-anay a maammuanto laeng iti kinaagnanayon.
Ti ragup ti sao nga “iti dalan ti pagrebbenganda” iladawanna dagiti indibidual a, gapu iti panangtallikudda iti Dios, sipapakumbaba nga ag-sublida manen Kenkuana,9 nga agbabbabawi kadagiti basolda ken mangsapsapul iti mangdalus ken mangpaimbag a bileg ti Pannubbot ti Mangisalakan. Ti yaasideg ken ni Cristo10 babaen ti panagsubli iti dalan ti katulagan manipud kadagiti managbasol a dalan nga agturong kadagiti “maiparit a dana”11 ket napateg iti naespirituan ken nainget iti kinalinteg. Bayat nga agtultuloyda iti pammati ken saanda a mabannog nga agaramid iti nasayaat, isagsaganada ti pundasion ti naindaklan nga aramid iti bukodda a biag,12 “iti amin a kaputotan ken iti kinagnanayon.”13
Ti ragup ti sao nga “iti dalan ti pagrebbenganda” iladawanna dagiti nalinteg a tao nga aggagar a maisangol iti Mangisalakan babaen dagiti awtorisado a katulagan ken ordinansa ti ebangheliona—ngem maiparit nga aramidenda daytoy gapu iti banag a dida makontrol. Ikarik a mapalag-anto ti panagleddaangyo ket magunggonaan ti panagtulnog ken kinapudnom a siaanus nga agpasakup iti pagayatan iti Dios a “mainugot iti naituding a panawen ti Apo.”14 “Ti sangit mabalin nga agpatnag, ngem ti rag-o umay iti bumigat.”15
Ti ragup ti sao nga “iti dalan ti pagrebbenganda” iladawanna dagiti naparegta a translator ken interpreter iti sangalubongan nga agserbi iti Apo babaen ti panangtulongda kadagiti gagayyem ken miembro a “mangngegan ti pakabuklan ti ebanghelio iti bukod[da] a pagsasao.”16 Dagiti bosesda, signed language, ken naipatarus a dokumento ti mangipakaammo kadagiti agnanayon a kinapudno, ngem manmano kadatayo ti makaammo iti nagnaganda wenno mangbigbig iti pategda. Babaen ti sagut dagiti pagsasao a naiparabur kadakuada, agserbi dagiti translator ken interpreter a sipapasnek, saan a managimbubukod, ken kaaduanna, a dida mainaganan a mangtulong kadagiti tao nga umawat iti naespirituan a sagut ti pammati babaen ti panagbasa ken panagdengngeg iti sao ti Dios.17
Ti ragup ti sao nga “iti dalan ti pagrebbenganda” iladawanna dagiti napudno a naasawaan a lallaki ken babbai a mangdayaw iti natulagan a pagrebbenganda nga agpaadu ken mangpunno iti daga ken naparaburanda iti pigsa ken panagibtur a makidangadang kadua dagiti annakda iti miting ti sakramento. Iti kumarkaro a lubong a nasaknap iti didigra ken di umiso a prioridad, di ipangag dagitoy natured a kararua dagiti naindagaan a timek a mangitandudo iti kinamanagimbubukod; raemenda ti kinasagrado ken kinapateg ti biag iti plano ti ti Nailangitan nga Ama iti ragsak kadagiti annakna.
Adu nga agassawa ti agtalek iti Dios uray no saan a matungpal dagiti nalinteg a tarigagay ti pusoda no kasano wenno kaano ti ninamnama ken inarapaapda. “Aguray[da] iti Apo”18 ken dida kiddawen a sanguenna ti naituding a panawenda iti daga. “Ta manipud pay idi punganay ti lubong saanen a nangngegan wenno naawatan ti tao babaen ti lapayag, wenno nakitada iti mata, O Dios, iti sibaymo, anian a nagindaklan dagiti banag nga insaganam [kadakuada] nga agur-uray kenka.”19
Ti ragup ti sao nga “iti dalan ti pagrebbenganda” iladawanna ti rinibu a lider iti nursery ken mannursuro iti primary a mangipateg ken mangisuro kadagiti ubbing ti Simbaan iti tunggal Aldaw ti Sabbath.
Ibilangyo ti agnanayon nga epekto ti panagserbi dagitoy napasnek a disipulo—ken dagiti nakaskasdaaw a bendision a naikari kadagiti agserserbi kadagiti ubbing.
“Ket nangala [ni Jesus] iti maysa nga ubing, ket inkabilna iti nagtengngaanda: ket idi nga inubbana iti takiagna, kinunana kadakuada,
“Siasinoman nga umawatto a gapu iti naganko iti maysa kadagiti kastoy nga ubbing, siak ti awatenna: ket ti umawat kaniak, saan a siak ti awatenna, no di daydiay nangibaon kaniak.”20
Ti ragup ti sao nga “iti dalan ti pagrebbenganda” iladawanna dagiti napasnek nga annak nga agay-aywan iti nataengan a dadakkelda, ti ina a di makaturturog a mangliwliwa iti mabuteng nga ubing bayat ti panangbantayna a kas “leon iti ruangan” ti balayna,21 dagiti miembro ti Simbaan a nasapa nga umay ken naladaw a pumanaw tapno agikabil ken agipakni iti tugaw, ken dagiti naregta a tao nga agawis iti pamilia, gagayyem, ken kapulapol nga umayda kitaen, tumulong, ken agtalinaed.22
Manmano laeng ti inladawak kadagiti napili a pagarigan dagiti managtungpal iti katulagan ken naanep a disipulo ni Jesucristo kas kadakayo nga agtultuloy “iti dalan ti pagrebbengan[yo].” Minilion pay a pagarigan dagiti santo iti ud-udina nga aldaw a mangidiaya iti “sibubukel a kararuada”23 iti Dios ti masarakan kadagiti pagtaengan a nakasentro ken Cristo ken kadagiti yunit ti Simbaan iti sangalubongan.
Agayat ken agserbikayo, dumngeg ken agsursuro, agaywan ken mangliwliwa, ken mangisuro ken agpaneknek babaen ti bileg ti Espiritu Santo. Agayuno ken agkararagkayo a masansan, ket pumigsa ken pumigsakayo iti kinapakumbaba, ken tumibker ken tumibkerkayo iti pammati ken Cristo, “agingga a mapno ti kararuayo iti rag-o ken linglingay, wen, iti pannakapatarnaw ken pannakapasanto ti puspuso[yo], pannakapasanto a dumteng gapu iti … panangiturongyo iti puspusoyo iti Dios.”24
Kari ken Pammaneknek
Dagiti adda iti maudi a karison, amin nga awan pakaidumaan ti panagserbida, ken dakayo ita nga agtultuloy iti dalan ti pagrebbenganyo ket ti pigsa ti naisubli a Simbaan ti Mangisalakan. Ket kas inkari ti Apo, “Amin a trono ken pagturayan, masakupan ken bileg, maipalgakto ken maisaadto iti amin a nakaibtur a simamaingel iti ebanghelio ni Jesucristo.”25
Siraragsak a paneknekak a sibibiag ti Nailangitan nga Ama ken ti Ay-ayatenna nga Anak, ket sigurado dagiti karida, iti sagrado a nagan ni Apo Jesucristo, amen.