Panangtaginayon iti Timek dagiti Natulagan a Tao iti Tumantanor a Kaputotan
Maysa kadagiti kasagraduan a pagrebbengantayo ti mangtulong kadagiti annaktayo a mangammo a nasayaat ken nangnangruna a ni Jesus ti Cristo.
Maysa kadagiti makasagid unay a kanito iti Libro ni Mormon ti isasarungkar ti nagungar a Mangisalakan kadagiti tao iti templo iti daga a Bountiful. Kalpasan ti maysa nga aldaw a panangisuro, panangagas, ken panangbangon iti pammati, inturong ni Jesus ti pasnek dagiti tao tao iti tumantanor a kaputotan: “Imbilinna a mayeg dagiti babassit nga annakda.”1 Inkararaganna ken binendisionanna ida a saggaysa. Makatignay unay ti padas ta main-adu a nagsangit ti Mangisalakan.
Kalpasanna, nagsao iti ummong, kinuna ni Jesus:
“Adtoy dagiti babassit nga ubbingyo.
“Ket idi kumitada … nakitadada ti panaglukat ti langit, ket nakitada dagiti anghel a bumabbaba manipud iti langit,” nga agserserbi iti annakda.2
Masansan a pinanunotko daytoy a padas. Narunaw la ketdi ti puso ti tunggal tao! Nakitada ti Mangisalakan. Nariknada Isuna. Am-ammoda Isuna. Sinuruanna ida. Binendisionanna ida. Ken inayatna ida. Di pakasdaawan a kalpasan daytoy sagrado a pasamak, dimmakkel dagitoy nga ubbing tapno tumulong a mangipasdek iti gimong ti talna, rang-ay, ken ayat a kas ken Cristo a nagpaut iti adu a kaputotan.3
Saan ngata a nagsayaat no maaddaan dagiti annaktayo iti padas a kas iti dayta ken Jesucristo—banag a mangibegkes iti pusoda Kenkuana! Awisennatayo, kas idi inawisna dagiti nagannak iti Libro ni Mormon, a mangyeg iti babassit nga annaktayo Kenkuana. Matulongantayo ida a mangam-ammo iti Mannubbotda kas ti inaramid dagitoy nga ubbing. Maipakitatayo kadakuada no kasano a masarakan ti Mangisalakan iti scriptures ken mabangon ti pundasionda Kenkuana.4
Nabiit pay nga insuro kaniak ti maysa a nasayaat a gayyem ti banag a diak pay nadlaw maipapan iti pangngarig ti masirib a tao a nangbangon iti balayna iti rabaw ti bato. Segun iti salaysay iti Lucas, idi inkabil ti masirib a tao ti pundasion ti balayna, “nagkali iti nauneg.”5 Saan laeng a gagangay a trabaho daytoy—nagkarigatan!
Tapno mabangon ti biagtayo iti bato ti Mannubbottayo, ni Jesucristo, nasken nga agkalitayo iti nauneg. Ikkatentayo ti ania man a di natalged wenno napateg iti biagtayo. Ituloytayo ti agkali agingga a masarakantayo. Ket suruantayo dagiti annaktayo a mangibegkes iti bagbagida Kenkuana babaen kadagiti sagrado nga ordinansa ken katulagan, tapno no dumteng dagiti sumupsupiat a bagyo ken layus, bassitton ti epektoda kadakuada “gapu iti bato a nakaibangonan[da].”6
Di laeng basta mapasamak ti kastoy a kita ti pigsa. Di maipasa daytoy iti sumaruno a kaputotan kas naespirituan a tawid. Agkali koma iti nauneg ti tunggal tao a mangsapul iti bato.
Maadaltayo daytoy a leksion iti sabali a salaysay iti Libro ni Mormon. Idi inted ni Ari Benjamin ti maudi a bitlana iti tattaona, naguummongda kas pamilia a dumngeg iti balikasna.7 Nabileg a nagpaneknek ni Ari Benjamin ken Jesucristo, ket natignay unay dagiti tao iti pammaneknekna. Impakdaarda:
“Ti Espiritu … nangipaay iti naindaklan a panagbalbaliw kadakami, wenno iti puspusomi. …
“Ket siaayatkami a makitulag iti Diosmi nga agaramid iti pagayatanna … iti amin a nabati nga aldawmi.”8
Manamnamatayo a ti babassit nga ubbing a nauneg a napasurot ti nagannakda ket in-inut a mapasurotda ken agaramidda mismo iti katulagan. Ngem, iti dadduma a gapu a di nadakamat iti rekord, ti katulagan nga inaramid dagiti nagannak saan a nakagun-od iti suporta ti dadduma nga annak. Kalpasan ti sumagmamano a tawen, “adu kadagiti tumantanor a kaputotan ti saan a nakaawat iti balikas ni ari Benjamin, ta babassitda pay nga ubbing iti panawen a panangibagana kadagiti taona; ket dida patien ti kannawidan dagiti ammada.
“Dida mamati iti naibagan maipanggep iti panagungar dagiti natay, kasta met a dida mamati iti maipanggep iti yaay ni Cristo. …
“Ket saandanto a mabuniagan; kasta met a dida agkameng iti simbaan. Ket nagsisinada a tattao maipanggep iti pammatida.”9
Anian a napasnek a kapanunotan! Para iti tumantanor a kaputotan, di umdas ti pammati ken Jesucristo nga agbalin a “tradision dagiti ammada.” Kasapulan nga adda mismo pammatida ken Cristo. Kas natulagan a tattao ti Dios, kasano a maimulatayo iti puspuso dagiti annaktayo ti tarigagay nga agaramid ken agtungpal iti katulagan Kenkuana?
Mairugitayo babaen ti panangtulad iti pagwadan ni Nephi: “Agsaotayo maipanggep ken Cristo, agrag-otayo ken Cristo, ikasabatayo ni Cristo, ipadtotayo ni Cristo, ket agsurattayo a maibatay kadagiti padtotayo, tapno maammuan dagiti annaktayo ti pamuidanda a mangkita iti pakaugasan ti basbasolda.”10 Ipaawat dagiti sao ni Nephi ti agtultuloy a panagregget, a mangisuro kadagiti annaktayo ti maipapan ken Cristo. Masiguradotayo a nasken a maisao ken maibinglay ti pammaneknek dagiti natulagan a tao iti tumantanor a kaputotan ken ni Jesus di laeng nga topiko iti Domingo.11
Masarakan ti timek dagiti natulagan a tao iti bukodtayo a balikas iti pammaneknek. Masarakan daytoy iti sao dagiti sibibiag a propeta. Ken mataginayon daytoy a sibibileg iti scriptures. Sadiay a maam-ammonto dagiti annaktayo ni Jesus ken masarakan ti sungbat dagiti saludsodda. Sadiay a masursurodanto para iti bagida ti doktrina ni Cristo. Sadiay a masarakandanto ti namnama. Daytoy ti mangisagana kadakuada iti tungpal-biag a panagsapul iti kinapudno ken panagbiag iti dana ti katulagan.
Magustuak ti balakad ni Presidente Russell M. Nelson:
Sadino ti mabalin a papanantayo a dumngeg Kenkuana?
“Mabalintayo ti agbasa iti nasantuan a kasuratan. Isurodatayo maipapan ken Jesucristo ken ti ebangheliona, ti sakup ti Pannubbotna, ken ti naindaklan a plano iti ragsak ken pannakasubbot ti Amatayo. Napateg ti inaldaw a pannakairarem iti balikas ti Dios iti naespirituan a pannakaispal, nangruna kadagitoy nga aldaw a kumarkaro ti buribor. No agpennektayo iti balikas ni Cristo iti inaldaw, ibaganto dagiti balikas ni Cristo no kasano a sanguentayo dagiti rigat a ditay pulos impagarup a pasarantayo.”12
Kasano ti agbussog kadagiti balikas ni Cristo ken dumngeg Kenkuana? Bueno, kasla maipada iti no ania ti kasayaatan para kadakayo! Mabalin a ti panaguummongyo a sangapamiliaan tapno pagsaritaan dagiti banag nga insuro kadakayo ti Espiritu Santo iti panagadalyo iti nasantuan a kasuratan nga us-usaren ti Come, Follow Me. Mabalin a ti panaguummongyo iti inaldaw kadagiti annakyo tapno basaen ti sumagmamano a bersikulo iti nasantuan a kasuratan ken maaddaan iti gundaway a pagsasaritaanyo dagiti nasursuroyo. Ammuem laeng no ania ti pagimbagam ken iti pamiliam; kalpasanna ikarigatam ti agaramid iti nasaysayaat bassit iti inaldaw.
Ibilang daytoy nga insight iti Teaching in the Savior’s Way: “Aramiden a saggaysa, mabalin a kasla di maipatpatungpal a nasayaat ti maysa a home evening, sesion iti panagadal iti nasantuan a kasuratan, wenno panagsasarita maipapan iti ebanghelio. Ngem ti panagtitipon dagiti babassit, simple a panagkagumaan, agtultuloy a maulit iti panaglabas ti panawen, mabalin a nabilbileg ken mangpappapigsa ngem iti manmano a mapasamak wenno kasla napateg unay.… Ngarud dika sumuko, ket dika agdanag maipapan iti panangileppas iti dakkel a maysa a banag iti tunggal oras. Agtultuloykayo laeng iti panagkagumaanyo.”13
Maysa kadagiti kasagraduan a pagrebbengantayo ti mangtulong kadagiti annaktayo a mangammo a nasayaat ken kangrunaanna a ni Jesus ti Cristo, ti Anak ti sibibiag a Dios, ti personal a Mangisalakan ken Mannubbotda, nga agtakder iti ulo ti Simbaanna! Ditayo maipalubos ti agulimek iti pammaneknektayo no maipapan Kenkuana.
Mabalin a mariknam a dika umdas itoy nga akem, ngem dimo koma marikna nga agmaymaysaka. Kas pagarigan, madutokan dagiti ward council a mangbukel kadagiti teacher council meeting kadagiti nagannak. Kadagitoy quarterly meeting, makapagtitipon dagiti nagannak nga agsisinnuro iti padas, pagsasaritaan no kasano a pappapigsaenda ti pamiliada, ken agsursuro kadagiti kangrunaan a prinsipio ti panangisuro kas ken Cristo. Maangay koma daytoy a miting iti maikadua nga oras ti simbaan.14 Idauluan daytoy ti maysa a miembro ti ward a pinili ti bishop ken mangsurot iti pormat ti regular teacher council meetings, nga us-usaren ti Teaching in the Savior’s Way kas primary resource.15 Dakayo a bishop, no di pay agdama nga ang-angayen ti wardyo dagiti teacher council meeting para kadagiti nagannak, makipagtrabahokayo iti Sunday School presidentyo ken ward council a mangbukel iti bagbagiyo.16
Patpatgek a gagayyemko ken Cristo, nasaysayaat nga amang ti ar-aramidenyo ngem iti ipagarupyo. Itultuloyyo laeng nga aramiden daytoy. Agsipsiput, dumdumngeg, ken agad-adal dagiti annakyo. No suruanyo ida, maawatanyonto ti pudno a kinataoda kas maipatpateg nga annak ti Dios. Mabalin a malipatanda ti Mangisalakan iti maysa a panawen, ngem ikarik kadakayo, dinanto pulos malipatan ida! Agtalinaedto iti puspuso ken panunotda dagita a kanito a kasarita ida ti Espiritu Santo. Ket iti maysa nga aldaw isaonto dagiti annakyo ti pammaneknek ni Enos: “Ammok a nalinteg dagiti dadakkelko“ta insurodak iti pannaripato ken pammagbaga ti Apo—ket maidaydayaw koma ti nagan ti Diosko gapu iti daytoy.”17
Awatentayo koma ti awis ti Mangisalakan a mangyeg iti annaktayo kenkuana. No aramidentayo, makitadanto Isuna. Mariknadanto Isuna. Maam-ammodanto Isuna. Suruannanto ida. Bendisionannanto ida. Ken, o, anian a kadakkel ti panagayatna kadakuada. Ken, o, ipatpategko unay Isuna. Iti nasantuan a nagan ni Jesucristo, amen.