Panangkita iti Pamilia ti Dios babaen ti Overview Lens
Patiek a mabalintayo, babaen ti mata ti pammati, nga i-zoom out ken kitaentayo ti bagitayo ken pamiliatayo nga addaan namnama ken rag-o.
Idi ubing pay ti buridekmi a babai, ni Berkeley, nangrugiak nga agusar iti reading glasses―ti kita nga ag-zoom in ken ag-magnify iti amin a banag. Maysa nga aldaw, bayat ti panagtugawmi nga aggigiddan nga agbasa iti libro, kinitak nga addaan ayat ngem addaan met liday gapu ta kasla alisto unay a dimmakkel. Napanunotko, “Sadino ti napanan ti panawen? Dimmakkelen!”
Idi intag-ayko ti reading glasses-ko tapno punasak ti lua, naamirisko, “Agurayka—saan a dakdakkel; dagitoy laeng anteohos! Bay-anen!.”
No dadduma makitatayo laeng dayta asideg, napadakkel a view dagiti ay-ayatentayo. Ita, awisenkayo nga ag-zoom out ken kumita iti sabali a lens—ti agnanayon a lens a mangipokus iti dakkel a ladawan, dakkel nga estoriayo.
Idi damo nga ipapan ti tao iti law-ang, awan ti tawa dagiti di nataming a rocket. Ngem babaen ti mision ti Apollo 8 nga agturong iti bulan, addan dagiti astronaut. Bayat panagtayab iti law-ang, nasdaawda iti bileg a makakita iti dagatayo ket innalada daytoy nakaskasdaaw a ladawan, a nangawis iti atension ti intero a lubong. Napadasan dagita nga astronaut ti rikna a nabileg unay isu a naikkan iti bukodna a nagan: ti Overview Effect.
NASA
Ti panangbuya manipud iti baro a vantage point balbaliwanna ti amin. Kinuna ti maysa a biahero iti law-ang iti daytoy “pabassitenna dagiti bambanag iti kadakkel a pagarupenyo a makontrol ti amin. … Maaramidtayo daytoy. Kappia iti daga—awan problema. Mangted daytoy iti tattao iti dayta a kita ti enerhia … dayta a kita ti bileg.”1
Kas tattao, addaantayo iti naindagaan a pannirigan, ngem makita ti Dios ti dakkel a pakabuklan ti uniberso. Makitana ti amin a parsua, amintayo, ken napnuan namnama.
Posible kadi a rugian ti kumita a kas panagkita ti Dios bayat ti biag iti rabaw daytoy a planeta—a riknaen daytoy nakaskasdaaw ? Patiek a mabalintayo, babaen ti mata ti pammati, nga i-zoom out ken kitaentayo ti bagitayo ken pamiliatayo nga addaan namnama ken rag-o.
Umanamong dagiti nasantuan a kasuratan. Kuna ni Moroni kadagiti adda pammatida a “nalabes ti kapigsana” a “pudno a nakitada … nga addaan mata ti pammati, ket naragsakda.”2
Addaan mata a naipokus iti Mangisalakan, nariknada ti rag-o ken ammoda daytoy kinapudno: Gapu ken ni Cristo, agballigi amin. Amin a pakadanaganyo dakayo ken dakayo ken dakayo agbalinto a nasayaat ti amin! Ket dagiti kumita nga addaan mata ti pammati mariknada nga agsayaat itan.
Napadasak ti rigat ti senior year-ko idi haiskul idi diak agar-aramid iti nasayaat a pili. Malagipko a nakitak ni nanangko nga agsangsangit, ken pampanunotek no naupayko. Iti dayta a kanito, madanaganak amangan ta napukawnan ti namnamana kaniak, ket dinan marikna ti namnama a makapagsubliak.
Ngem ad-adda a nasanay ni tatangko nga ag-zoom out ken mangala iti atiddog a view. Naadalna iti padasna a ti panagdanag ket marikna unay a kasla ayat, ngem saan nga agpada.3 Inusarna ti mata ti pammati tapno makitana nga agballigi ti amin, ket ti manamnama a wagasna ti nangbalbaliw kaniak.
Idi nagturposak iti haiskul ken napanak iti BYU, sinuratannak ni tatangko, mangipalpalagip kaniak no asinoak. Isu ti cheerleader-ko, ken kasapulan ti amin ti cheerleader—smaysa a tao a di mangibagbaga kenka, “Dika agtaray iti napardas”; siaayat nga ipalagipda kenka a kabaelam.
Impagwadan ni tatang ti tagainep ni Lehi. Kas ken ni Lehi, ammona a dikayo kumamat kadagiti patpatgenyo a makarikna a napukawda. “Agtalinaedkayo iti yanyo ket awaganyo ida. Inkayo iti kayo, agtalinaed iti kayo, itultuloyyo a kanen ti bunga ket, siisemkayo, itultuloy nga ayaban dagiti ay-ayatenyo ken ipakitayo babaen ti pagwadan a ti pannangan iti bunga ket naragsak a banag!”4
Daytoy bisual a ladawan ti nakatulong kaniak kadagiti naliday a kanitok idi addaak iti kayo, a mangmangan iti bunga ken agsangsangit gapu ta madanaganak; ken pudno, anian a nakatulong dayta? Ketdi, pilientayo ti namnama—namnama iti Namarsua ken iti tunggal maysa, a mangpabileg iti kabaelantayo ti agbalin a nasaysayaat ngem ita.
Nabiit kalpasan ti ipupusay ni Elder Neal A. Maxwell, dinamag ti reporter iti barona no ania ti kailiwna unay. Kinunana a kailiwna dagiti pangrabii iti balay dagiti dadakkelna gapu ta kanayon a namati kenkuana ni tatangna.
Daytoy met ti panawen a yaay iti balay dagiti nataengan nga annakmi iti pangrabii iti Domingo a kakuyog dagiti assawada. Bayat ti lawas, inlistak iti panunotko dagiti banag a maipalagipko kadakuada iti Domingo, kas iti “Mabalinyo ti agtinnulong a mangaywan kadagiti ubbing no addakayo iti pagtaengan” wenno “Diyo liplipatan ti dumngeg a nasayaat.”
Idi nangngegak ti komento ni Brother Maxwell, diakon inaramid ti napanunotko, isu a no makitak dagiti annakko iti dayta ababa laeng nga oras iti linawas, naipamaysak ti pasnekko iti adu a positibo a banag a siguden nga ar-aramidenda. Idi pimmusay ti inauna nga anakmi, ni Ryan, kalpasan ti sumagmamano a tawen, malagipko a siyayaman a naragragsak ti panawen a panagtitiponmi.
Sakbay a makilangentayo iti maysa nga ipatpateg, maisaludsodtayo iti bagitayo ti “Makatulong kadi wenno makasair ti aramidek wenno ibagak?” Dagiti saotayo adda dakkel nga epektona iti tao, ket dagiti miembro ti pamilia kasla pisarra a tao, a nakatakder iti sangotayo a kunkunada, “Isuratyo ti makunayo kaniak!” Dagitoy a mensahe, naigagara man wenno saan, mangipanamnama ken mangparegtada koma.5
Ti trabahotayo saan koma a mangisuro iti tao a lumasat iti narusanger a paset a dakes wenno makapaupay. Iti manmano a gundaway matignaytayo a mangatur, ngem kanayon koma nga ibagatayo kadagiti ipatpategtayo dagiti mensahe nga il-iliwenda a mangngegan; “Marikna ti pamiliatayo a naan-anay ken kumpletoda gapu ta addakayo ditoy.” “Maipatpategka iti unos ti biagmo—ania man ti mapasamak.”
No dadduma, kasapulantayo ti pannakipagrikna ngem ti balakad; idedengngeg ngem iti lektura; maysa a dumngeg ken masdaaw, “Ania koma ti mariknak a sawen iti kaisasaoda laeng?”
Laglagipen, inikkannatayo ti Dios ti pamilia a pagpanunotantayo iti bambanag, isu a di laeng posible dagiti biddut nga addang ken di husto a panagkuentatayo, ngem nalabit. Ket di kadi makaay-ayo no, iti gibus ti biagtayo, makitatayo a dagita a relasion, uray dagiti mapannubok a kanito, ket mismo a nakatulong kadatayo nga agbalin nga ad-adda a kas iti Mangisalakantayo? Tunggal narigat nga interaksion ket gundaway a mangadal no kasano ti agayat iti naun-uneg a lebel—lebel ti Dios.6
Ag-zoom out-tayo a mangkita iti relasion ti pamilia kas nabileg a gundaway a pangisuruan kadatayo iti leksion nga immayantayo ditoy no umaytayo iti Mangisalakan.
Akuentayo, iti natnag a lubong, awan ti wagas tapno agbalin a perpekto nga asawa, nagannak, anak, apoko, mannursuro, wenno gayyem—ngem minilion a wagas ti panagbalin a nasingpet.7 Agtalinaedtayo iti kayo, makiranudtayo iti ayat ti Dios, ken ibinglay daytoy. Babaen ti panangitag-ay iti tattao iti lawlawtayo, aggigiddantayo a ngumato.
Daksanggasat, ta di umdas ti lagip ti pannangan iti bunga; agtultuloytayo koma a makiranud iti wagas a mangipuesto manen iti lenstayo ken mangikonekta kadatayo iti nailangitan nga overview babaen ti panagbasa iti nasantuan a kasuratan, a napno iti lawag, a mangpapanaw ti sipnget; agtultuloytayo iti kararagtayo. Ditoy a mapalukneng ti puspuso, ken mangrugi a makakitatayo kas iti Dios.
Kadagitoy maudi nga aldaw, nalabit ti kadakkelan a trabahotayo ket kadagiti ay-ayatentayo—nasingpet a tattao nga agnanaed iti dakes a lubong. Ti namnamatayo ti mangbaliw iti wagas a panangkitada iti bagida ken ti kinasiasinoda. Ken babaen daytoy a lens ti ayat makitada no asinonto ti pagbalinanda.
Ngem di kayat ti kabusor nga agkukuyogtayo wenno dagiti ipatpategtayo nga agawid. Ket gapu ta agbibiagtayo iti planeta a naibegkes iti panawen ken bilang ti tawen,8 pagtalinaeden ti kabusor ti pudno unay a rikna ti buteng. Narigat a makita, no naka-zoom intayo, napatpateg ti direksiontayo ngem ti kapartaktayo.
Laglagipen, “No kayatyo ti agalisto, agmaymaysakayo. No kayatyo ti umadayo, aggigiddankayo.”9 Ti Dios a pagrukbabantayo saan a naibegkes iti panawen. Makitana no asino a talaga dagiti ipatpategtayo, no asinotayo a talaga.19 Isu a naanus Isuna kadatayo, a mangnamnama nga agiinnanustayo.
Awatek nga adda dagiti kanito a ti daga, ti temporal a taengtayo, kasla maysa nga isla ti ladingit—kanito nga adda maysa a matak ti pammati ken maysa a matak ti aglulua.11 Ammoyo kadi daytoy a rikna?
Kastoy ti riknak iti Martes.
Mabalintayo kadi ketdi a pilien ti kababalin ti propetatayo no ikarina dagiti milagro iti pamiliatayo? No aramidentayo, dumakkel ti rag-otayo uray no kumaro ti riribuk. Ikarkarina a mabalin a mapadasan ti epekto ti overview itan, ania man dagiti kasasaadtayo.12
Ti kaadda daytoy mata ti pammati itan ket maipada iti pammatitayo sakbay nga immaytayo ditoy a planeta. Makitana ti napalabas ti kinaawan sigurado ti maysa a kanito, a palugodannatayo nga “agragsak nga aramiden ti amin dagiti naipakumit iti bilegtayo; kalpasanna agtakdertayo.”13
Adda kadi narigat iti biagmo ita, maysa a banag a pakadanagam a saan a marisut? No awan ti mata ti pammati, mabalin a kasla napukawen ti Dios ti panangkita iti bambanag, ket pudno kadi dayta?
Wenno nalabit a mabutengka unay a dumaliasat a maymaysa iti daytoy narigat a panawen, ngem kayatna a sawen a binaybay-annaka ti Dios, pudno kadi dayta?
Paneknekak a kabaelan ti Mangisalakan, gapu iti Pannubbotna, a pagbalinen a bendision ti ania man a pannubok a mapaspasaranyo. Inikkannatayo iti kari nga “addaan iti katulagan a di mabaliwan” a no ipasnektayo ti agayat ken sumurot Kenkuana, “amin a banag no [naparigatantayo] agtitinnulongdanto para iti pagimbagan[tayo].”14 Amin a banag.
Ket gapu ta annaknatayo ti katulagan, makiddawtayo daytoy a manamnama a rikna itan!
Idinto a ditayo perpekto a pamilia, maaramidtayo a perpekto ti ayattayo iti dadduma agingga nga agbalin a kanayon, di agbalbaliw, ania man a kita ti ayat—ayat a mangsuporta iti panagbalbaliw ken mangpalugod iti panagdur-as ken panagsubli.
Aramid ti Mangisalakan a pagsublien dagiti ipatpategtayo. Daytoy ti aramidna ken panawenna . Daytoy ti aramidtayo a mangipaay iti namnama ken puso a pagawidanda. “Awanantayo iti turay [ti Dios] a mangkondena wenno ti bilegna a mangsubbot, ngem nadutokantayo a mangaramat iti ayatna.”15 Insuro pay ni Presidente Nelson nga ad-adda a kasapulan ti dadduma ti ayattayo ngem ti panaghusgatayo. “Nasken a padasenda ti natarnaw nga ayat ni Jesucristo a maipakita iti balikas ken aramid[tayo].”16
Ti ayat ti banag a mangbalbaliw iti puspuso. Daytoy ti katarnawan a motibo ti amin, ken marikna ti dadduma. Kumpettayo kadagitoy sao ti propeta a naidiaya 50 a tawen ti naglabas: “Awan pagtaengan a mapaay malaksid no di agkagumaan.”17 Awan duadua, dagiti agayat unay ken kapautan ti mangabak!
Kadagiti pamilia iti daga, ar-aramidentayo ti inaramid ti Dios kadatayo—a mangitudtudo iti dalan ken mangnamnama a mapan dagiti ay-ayatentayo iti dayta a direksion, nga ammo a pilida ti dalan a pagdaliasatanda.
Ket no lumasatda iti sabali a bangir ti belo ket umasidegda iti ayat a mamagtarigagay iti nailangitan a taengda,18 patiek a pamiliar ti rikna gapu ta naayatda ditoy.
Usarentayo koma dayta overview lens ket kitaen dagiti tao nga ay-ayaten ken kadennatayo kas agkakadua iti daytoy napintas a planetatayo.
Dakayo ken siak? Maaramidtayo daytoy! Makakapet ken makanamnamatayo! Makapagtalinaedtayo iti kayo, makiranud iti bunga a siiisemtayo, ken ti Silaw ni Cristo iti matatayo agbalin koma a banag a pangnamnamaanda iti kasipngetan nga orasda. Ket no makitada ti lawag a maiparangarang iti rupatayo, maallukoydanto. Makatulongtayo ngarud a mangipokus manen iti atensionda iti sigud a paggapuan ti ayat ken lawag, “ti naraniag ken bituen ti agsapa,” ni Jesucristo.19
Paneknekak a daytoy—amin daytoy—ket agbalinto a nasaysayaat nga amang ngem iti mapanunottayo! Buyogen ti mata ti pammati ken ni Jesucristo, makitatayo koma a nasayaatto ti amin iti kamaudiananna ken mariknatayo a nasayaatto itan. Iti nagan ni Jesucristo, amen.