Mukenji wa ku ngondu wa Liahona, Ngondu wa Dikumi ne Umua 2023
Ela Meji mu Ngikadilu wa ku Diûlu
Masungula eba nealeja muaba uwaya kusomba bua tshiendelela, mubidi uwikala mua kubika nawu ku lufu, ne bantu bawikala mua kuikala nabu bua kashidi.
Bana betu baluma ne bakaji, Ndi ne disakidila dia bungi bua kuakula nenu lelu. Bukola buanyi ebu, dituku dionsu dipia-dipia didi dilua ne bintu bilenga ne bia ntatu. Mu mbingu isatu mishala, mvua mutapika mu misunya ya panyima panyi. Kadi, munkamvua mufila mikenji mipita pa 100 mu mpungilu munena muimana kûlu, lelu, ndi muela meji bua kuakula muikala musomba. Ndi nsambila bua ne Nyuma abueja mukenji wanyi mu mioyo yenu lelu.
Ndi musekelela diledibua dianyi dia 99 ne mubangisha tshidimu tshianyi tshia 100 tshia moyo. Misangu yonsu ntu ngedibua nkonku itangila kuikala ne moyo matuku abungi. Lukonku luimpa ludi ne bua kuikala ne, “Tshinyi tshindi mulonga mu bidimu lukama bianyi bia moyo?”
Lelu diba kadiena dimpesha mushindu wa kuandamuna lukonku elu mu bujima to, kadi ndi mua kunuambila malongesha a mushinga mukole andi mulonga.
Ndi mulonga ne, dilongolola dia Tatu wa mu diûlu buetu didi dilenga, ne bitudi tuenza mu moyo wetu bidi ne mushinga mukola, ne Bupikudi bua Mupandishi budi bupepejela dilongolola dia Tatu wetu.1
Pandi muluangana ne kusâma kukola kufumina ku mputa wanyi, Ndi ngakumvua dianyisha dikole bua Yezu Kilisto ne dipa ditudi katuyi ne bua kumvua dia Bupikudi buende. Elayi meji bua bualu ebu! Mupandishi wakakenga “busâma ne ntatu ne matêta a mishindu yonsu”2 bua kutusamba, kutondopa, kutusungila mu bikondu bia majinga.3 Yezu Kilisto wakumvuija lutatu luenda lua mu Getsemane ne ku calvaire: “Makenga â akenza bua ne mema, ne Nzambi mena, munena wa ku bonsu, bua kuzakala bua kusâma, ne kupatuka kua mashi mu tusosu tua mubidi mujima”4 Ditapika dianyi diakenza bua ne ngela meji bikola bua “bunena bua Wa Tshijila wa Isalele.”5 Mu diondopibua dianyi, Mukalenga wakaleja bukola buenda bua tshijila mu ditalala ne mu mishindu idi kayiyi kalema.
Perou
Kupitshila ku Bupikudi bunena bua Yezu Kilisto, dilongolola dia Tatu wetu wa mu diûlu didi dijalama! Diumvua dia dilongolola dilenga dia Nzambi didi diumbusha dipanga ne dielakana mu moyo wetu ulualua. Bidi bianyishila yonsu wa kutudi bua kusungula mushindu utuikala pa buloba ne muaba utuikala bua tshiendelela. Dilongesha didi kadiyi nshidamenu dia ne, tudi mua “kudia, kunua, ne kuikala ne disanka, bualu makelela netufua; ne netuikala bimpa”6 didi tshimua tshia ku mashimi manene a pa buloba.
Lumu lunena lua dilongolola dia Nzambi ludi ne: bintu bidi mua kuenza moyo weba wa tshifuaka moyo mushema bidi mua kuikala bia momumua bialeja ngikadilu wa moyo weba mu tshiendelela mu mushindu udibi mua kuikala! Lelu, bua ku nuambuluisha bua kupeta mabenesha manena adi Tatu wa mu diûlu muikala nawu buenu, ndi numbikila bua kuteka mu tshienzedi “kuela meji mu ngikadilu wa ku Diûlu”!7 Kuela meji mu ngikadilu wa ku Diûlu kudi kuumvuija ne kuikala muntu wa meji a mu nyuma. Tudi tulonga kupitshila ku muambi Yakobo wa mu Mukanda wa Molomo ne, “kuikala ne meji a nyuma tshidi moyo wa tshiendelela.”8
États-Unis
Moyo wa tshifuaka udi kalasa kanene bua kulonga bua kusungula bintu bidi ne mushinga wa tshiendelela. Kadi bantu babungi badi benza malu bu ne, moyo wetu wa pa buloba ki onsu udi koku. Nansha nanku, masungula eba a lelu nealeja bintu bisatu: muaba uwaya kusomba wa tshiendelela, mubidi uwikala mua kubika nawu ku lufu, ne bantu bawikala mua kuikala nabu bua kashidi. Nanku ela meji mu ngikadilu wa ku diûlu.
Mu mukenji wanyi wa kumpala bu Mulombodi Mukulu wa Ekelezia, Ngakanukankamika bua kubanga ne ndekelu mu meji. Tshidi tshiumvuija ne, kuenza bukalenga bua selestiya kipatshila keba ka tshiendelela ne pashisha kutangila ne budimu muaba udi mapangadika eba onsu akutuma mu buloba bualua.9
Mukalenga mmulongesha patoka ne, amu baluma ne bakaji badi basuikibua bu muluma ne mukaji mu ntempelo, ne badi balama bipungidi biabu, nebikala pamue mu tshiendelela. Wakamba ne, Bipungidi bionsu, diumvuangana, dilamakana, madienzeji, mitshipu, malaya, nkudimukilu, ndamakajilu, nsangilu, anyi ndongoluelu, bidi kabiyi bienza ne bisuikibua pamue kudi Nyuma Muimpa wa mulayi bidi bijika diba didi muntu ufua.10
Nanku, tuetu basungula mu kupanga lungenyi bua kutumikila mikenji ya telestiya mpindiewu, tudi tusungula bua kubika ku lufu ne mubidi wa telestiya. Katuena tusungula to bua kuikala pamue ne meku etu bua kashidi.
Nanku, bana betu balume ne bakaji, munyi ne muaba kayi ne nganyi uwudi musua kuikala nenda bua kashidi? Udi ne bua kusungula.11
Pawudi wenza masungula, ndi kubikila bua kuangata lumonu lule—lumonu lua tshiendelela. Tekayi Yezu Kilisto kumpala, bualu moyo weba wa tshiendelela udi ulonda ditabuija dieba mu yeya ne mu Bupikudi buenda.12 Tshidi kabidi tshilonda mu kutumikila kueba ku mikenji Yenda. Ditumikila didi dikulongoluela njila bua moyo wa disanka bueba lelu ne dilaya, difutu dia tshiendelela makelela.
Pawudi ututakena ne malu makole, ela meji mu ngikadilu wa ku diûlu! Pawudi utêtshibua kudi matêta, ela meji mu ngikadilu wa ku diûlu! Padi moyo wa pa buloba anyi bantu bawudi munanga bakulekela, ela meji mu ngikadilu wa ku diûlu! Padi muntu ufua kumpala kua diba, ela meji mu ngikadilu wa ku diûlu. Padi muntu ukenga ne disama dinena, ela meji mu ngikadilu wa ku diûlu. Padi majitu a pa buloba akupita, ela meji mu ngikadilu wa ku diûlu! Paudi wenda ukoleshibua panyima pa njiwu anyi ditapika, bu mundi ngenza mpindiewu, ela meji mu ngikadilu wa ku diûlu!
Nuenu bashindamena pa diela dia meji mu ngikadilu wa ku diûlu, indilayi bua kututakena ne dishilangana.13 Bidimu bishala, mulunda wa ku mudimu wakampenda mu meyi bualu mvua “munanga ntempelo bikola” ne batangidi bapita ku umue bakankengesha bua ditabuija dianyi. Ndi mumanya nansha nanku, bua ne kuela kua meji mu ngikadilu wa ku diûlu kuvua kuenza bua mudimu wanyi uya kumpala.
Pawudi wela meji mu ngikadilu wa ku diûlu, mutshima weba neushintuluka bikola. Newujinga bua kusambila misangu yonsu ne moyo mujima. Suaku kulekedi masambila eba umvuika bu mukaba wa bintu bia kusumba. Lumonu lua Mukalenga ludi lupita lungenyi lueba lua tshifuaka. Diandamuna dienda ku masambila eba didi mua kukukemesha ne kukuambuluisha bua kuela meji mu ngikadilu wa ku diûlu.
Tangila diandamuna dia Mukalenga kudi Joseph Smith pakasambilaye bua dipepeja dia ntatu yenda mu nzubu wa lukanu wa Liberty. Mukalenga wakalongesha Muambi ne, dikengeshibua dienda nedimupesha dimanya ne nedikala bua buimpa buenda.14 Bua ne yeya munanukila bilenga wakalayibua kudi Mukalenga bua ne, Nzambi neamuzanjika kûlu.”15 Mukalenga uvua mulongesha Joseph bua kuela meji mu ngikadilu wa ku diûlu ne kumona dibenesha dia tshiendelela, pamutu pa kutangila ntatu ya ku dituku. Masambila etu adi mua kuikala—ne adi ne bua ikala—miyuki miunzuluka ne Tatu wetu wa mu diûlu.
Pawudi wela meji mu ngikadilu wa ku diûlu, Newudisangana ubenga bintu bionsu bidi bikuiba budienzedi bueba. Tshibidilu tshionsu tshibi—tshia manaya, manaya a makuta, mabanza, manga makola, mala, tshiji, pornographie, masandi, anyi biadidia—bidi binyingalaja Nzambi. Bua tshinyi? Bualu tshikadilu tshieba tshidi tshilua nzambi weba. Udi utangila bintu ebi pamutu pa kumutangila bua kupeta dikankamika. Wewa muikala ukenga ne tshibidilu tshibi, keba diambuluisha dia nyuma ne dia bantu badi ne dimanya mu malu awudi nawu dijinga. Suaku kulekedi tshibidilu tshikuiba bukokeshi bueba bua kulonda dilongolola dilenga dia Nzambi.
Kuela meji mu ngikadilu wa ku diûlu nekukuambuluisha kabidi bua kutumikila mukenji wa bunonoka. Bintu bikesa nebitatshisha moyo weba lukasa bikola, bipitshila kushipa mukenji ewu wa bunzambi. Bua aba bakadi benza bipungidi ne Nzambi, buenzavi budi tshimua tshia ku bintu bidi bijimija bujadiki lukasa.
Matêta a bungi a muluishi a manena adi atangila kushipa bukezuka bua meji etu. Bukola bua kufuka moyo budi bunema bumue bua bunzambi budi Tatu wetu wa mu diûlu upesha bana benda ba pa buloba bua kuenzela. Nanku, Nzambi mmuela mikenji mitoka bua kuenzela bukola ebu bua moyo ne bua bunzambi. Dimanyangana dia mubidi didi amu bua muluma ne mukaji badi baselangana.
Bantu ba bungi pa buloba kabena bitaba esthi nansha, kadi ngenyi ya bantu kayena yamba bulelela to. Mukalenga wakamba ne muntu udi kayi munonoka kakupeta bukalenga bua selestiya to. Nanku pawudi usungula malu pa buloba, ela meji mu ngikadilu wa ku diûlu. Ne pawikala kuyi munonoka, ndi nkusengelela bua ukudimuna musthima. Luaku kudi Kilisto ne upeta milayi yenda bua dibuikidila dikumbana pawudi utonda menamena mibi yeba.16
Danemark
Pawudi wela meji mu ngikadilu wa ku diûlu, newubanga kumona makenga ne dishilangana ne lumonu lupia-lupia. Padi muntu uwudi munanga uluisha bulelela, ela meji mu ngikadilu wa ku diûlu, ne kuedi mpata ku bueba bujadiki to. Mupostolo Polo wakamba mu nyuma ne, mu matuku a ku nshikidilu ba bungi ne bumbuka ku ditabuija, bua kulonda nyuma ya dipambuisha, ne malongesha a diabulu.17
Kakuena ndekelu wa mashimi a muena lukuna to. Suaku wikala mudilongolola. Kuangatshi mibelu kudi aba badi kabayi bitabuija to. Keba bulombodi kudi meyi awudi mua kutekemena—kudi bambi, bamonyi, ne babuluidi ne kudi bidi Nyuma wa Tshijila wamba, udi bua kukuleja bintu bionsu biwudi ne bua kuenza.18 Enza koku mudimu wa nyuma bua kubandisha bukola bueba bua kupeta dibuluibua dia nkaya.19
Biwela meji mu ngikadilu wa ku diûlu, ditabuija dieba nedikola. Pantshivua songaluma kumbangilu kua mudimu wanyi, difutu dianyi divua dia ndola 15 ku ngondu. Butuku bukuabu, mukajianyi Dantzel wakankonka bua kumanya bingikala mvua mfuta tshia dikumi tshia difutu edi dikesa. Ntshivua mfuta to. Ngakakudimuna mutshima lukasa ne kubanga kufuta tshia dikumi tshia 1.50$ ku ngondu.
Ekelezia uvua mushintuluka bualu tuvua bavudija tshia dikumi tshietu anyi? Kabivua nanku to. Kadi, kulua mufutshi wa tshia dikuma tshijima kuakanshintulula mema. Ki pangakalonga ne, kufuta tshia dikumi mbualu bua ditabuija, ki mbualu bua makuta to. Pangakalua mufutshi wa tshia dikumi tshijima, bibi bia diûlu biakabanga kukanguka buanyi. Ndi mfila mabenesha a bungi a mishindu ya kupeta midimu kudi bena lulamatu mu difuta dia tshia dikumi.20
Kufuta kua tshia dikumi kudi kulomba ditabuija, ne kudi kabidi kuibaka ditabuija mu Nzambi ne mu Muanenda Mulume Munangibua.
Kusungula bua kuikala ne moyo wa tshikadilu tshimpa pa buloba budi buwula ne malu a masandi ne a bidîdi, kudi kuibaka ditabuija.
Kupitshisha meba a bungi mu ntempelo kudi kuibaka ditabuija. Pamua ne disadila ne kutendelela kueba mu ntempelo nebikuambuluisha bua kuela meji mu ngikadilu wa ku diûlu. Ntempelo udi muaba wa dibuluila. Mu ntempelo badi bakuleja mushindu wa kuya kumpala mutangila ku moyo wa mu diûlu. Mu ntempelo udi usemejibua bapuipi ne Mukalenga ne upeshibua dikumbana dinene dia bukola buenda. Mu ntempelo udi ulombodibua bua kupeta disulakana mu malu a moyo weba, anyi malu eba a makola.
Milulu ne bipungidi bia mu ntempelo bidi ne mushinga wa tshiendelela. Tudi tutungunuka ne kuibaka ntempelo ya bungi bua ne, malu a tshijila ȃ abanga kumueneka mu mioyo yetu. Tudi ne disanka bua kuamba bulongolodi buetu bua kuibaka ntempelo mu miaba 20 idi ilonda eyi:
-
Savai’i, Samoa
-
Cancún, Mexique
-
Piura, Pérou
-
Huancayo, Pérou
-
Viña del Mar, Chilie
-
Goiânia, Brésil
-
João Pessoa, Brésil
-
Calabar, Nigeria
-
Cape Coast, Ghana
-
Luanda, Angola
-
Mbuji-Mayi, République Démocratique du Congo
-
Laoag, Philippines
-
Osaka, Japon
-
Kahului, Maui, Hawaii
-
Fairbanks, Alaska
-
Vancouver, Washington
-
Colorado Springs, Colorado
-
Tulsa, Oklahoma
-
Roanoke, Virginie
-
Ulaanbaatar, Mongolie
Mukalenga udi utulombola bua kuibaka ntempelo eyi bua kutuambuluisha bua kuela meji mu ngikadilu wa ku diûlu. Nzambi udi ne moyo. Yezu udi Kilisto. Ekelezia wenda ukadi mupingajilula bua kubenesha bana bonsu ba Nzambi. Ndi njadika nunku mu dina dia Yezu Kilisto, amena.
© 2023 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, November 2023. Language. 19050 760