« ការរៀបចំខ្លួនដើម្បីចូលរួមក្នុងព្រះវិហារបរិសុទ្ធ » លីអាហូណាខែ ធ្នូ ឆ្នាំ ២០២៣ ។
សារលិខិតប្រចាំខែ ទស្សនាវដ្តី លីអាហូណា ខែ ធ្នូ ឆ្នាំ ២០២៣
ការរៀបចំខ្លួនដើម្បីចូលរួមក្នុងព្រះវិហារបរិសុទ្ធ
រូបថតព្រះវិហារបរិសុទ្ធ អូហ្គឌិន រដ្ឋយូថាហ៍ ដោយម៉ាក ប្រ៊ុនសុន
នៅក្នុងព្រះវិហារបរិសុទ្ធនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ យើងអាចទទួលសេចក្ដីសញ្ញា និងបទបញ្ញត្តិដ៏ពិសិដ្ឋសម្រាប់ខ្លួនយើង និងសម្រាប់បុព្វការីជនរបស់យើង ។ យើងចូលរួមក្នុងព្រះវិហារបរិសុទ្ធដើម្បីបង្ហាញសេចក្ដីស្រឡាញ់ និងការដឹងគុណរបស់យើងចំពោះព្រះវរបិតាសួគ៌ និងព្រះយេស៊ូវគ្រីស្ទ ។ យើងអាចត្រៀមខ្លួនចូលរួមក្នុងព្រះវិហារបរិសុទ្ធ ដោយការរៀននិងរស់នៅតាមដំណឹងល្អរបស់ព្រះយេស៊ូវគ្រីស្ទ ។ សម្រាប់ព័ត៌មានបន្ថែមអំពីព្រះវិហារបរិសុទ្ធ សូមមើលអត្ថបទមូលដ្ឋានគ្រឹះនៃដំណឹងល្អ « កិច្ចការព្រះវិហារបរិសុទ្ធ»នៅក្នុងទស្សនាវដ្តី លីអាហូណាខែ តុលា ឆ្នាំ ២០២១ ។
រូបថតព្រះវិហារបរិសុទ្ធ ឌូរ៉ាន អាហ្វ្រិកខាងត្បូង ដោយម៉ាធ្យូ រីរៀ
ព្រះរាជដំណាក់ព្រះអម្ចាស់
ព្រះវិហារបរិសុទ្ធត្រូវបានហៅថា « ជាព្រះរាជដំណាក់ព្រះអម្ចាស់ » ។ មានកន្លែងពិសិដ្ឋជាច្រើនដែលជាកន្លែងយើងអាចទទួលអារម្មណ៍ពីព្រះវិញ្ញាណ និងសេចក្ដីស្រឡាញ់របស់ទ្រង់ចំពោះយើង ។ វាក៏ជាកន្លែងដែលយើងអាចធ្វើសេចក្តីសញ្ញា និងទទួលបានបទបញ្ញត្តិពិសេស ដែលនឹងរៀបចំយើងឲ្យមានជីវិតដ៏អស់កល្បជានិច្ច ។ ( សេចក្ដីសញ្ញាគឺជាកិច្ចសន្យាដ៏ពិសិដ្ឋរវាងព្រះ និងបុត្រាបុត្រីរបស់ទ្រង់ ) ការធ្វើជាមនុស្សស្មោះត្រង់ចំពោះសេចក្ដីសញ្ញារបស់យើង និងការទទួលបទបញ្ញត្តិទាំងនេះជួយយើងឲ្យមានទំនាក់ទំនងពិសេសជាមួយនឹងព្រះវរបិតាសួគ៌ និងព្រះយេស៊ូវគ្រីស្ទ ។
រូបថតព្រះវិហារបរិសុទ្ធ ហ្គាយ៉ាគីល អេក្វាឌ័រ ដោយជេនែ ប៊ីងហាំ
តើនរណាខ្លះអាចចូលរួមក្នុងព្រះវិហារបរិសុទ្ធបាន ?
សមាជិកសាសនាចក្រអាចធ្វើពិធីបុណ្យជ្រមុជទឹកសម្រាប់មរណជន នៅពេលដែលពួកគេគ្រប់អាយុ១២ ឆ្នាំ ។ សមាជិកម្នាក់អាចទទួលអំណោយទានពិសិដ្ឋប្រសិនបើគាត់មានអាយុយ៉ាងតិចណាស់ ១៨ ឆ្នាំ បានក្លាយជាសមាជិកនៃសាសនាចក្រយ៉ាងហោចណាស់មួយឆ្នាំ ហើយមានបំណងចង់ធ្វើ និងរក្សាសេចក្ដីសញ្ញានៃព្រះវិហារបរិសុទ្ធ ( សូមមើល ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ២៧.២.២នៅលើគេហទំព័រ ChurchofJesusChrist.org ) ។ បុរសម្នាក់ និងស្ត្រីម្នាក់ដែលបានទទួលអំណោយទានពិសិដ្ឋនៅក្នុងព្រះវិហារបរិសុទ្ធរួចហើយ អាចផ្សារភ្ជាប់ ( រៀបអាពាហ៍ពិពាហ៍ ) សម្រាប់ជីវិតអស់កល្បជានិច្ចនៅក្នុងព្រះវិហារបរិសុទ្ធបាន ។
សេចក្ដីសញ្ញា និងពិធីបរិសុទ្ធ
អ្នកនឹងធ្វើសេចក្តីសញ្ញា និងទទួលបានពិធីបរិសុទ្ធក្នុងព្រះវិហារបរិសុទ្ធ ។ « ការចូលទៅក្នុងទំនាក់ទំនងនៃសេចក្តីសញ្ញាជាមួយព្រះ ចងភ្ជាប់យើងទៅនឹងទ្រង់ តាមរបៀបមួយដែលធ្វើឲ្យអ្វីៗគ្រប់យ៉ាងអំពីជីវិតកាន់តែមានភាពងាយស្រួល » ( រ័សុល អិម ណិលសុន« ឈ្នះលោកិយ ហើយបានសេចក្តីសម្រាក »លីអាហូណាខែ វិច្ឆិកា ឆ្នាំ ២០២២ ទំព័រ ៩៧ ) ។ ពិធីបរិសុទ្ធគឺជាកិច្ចការដ៏ពិសិដ្ឋមួយដែលបានធ្វើឡើងដោយសិទ្ធិអំណាច បព្វជិតភាព ។ ពិធីបរិសុទ្ធមានអត្ថន័យខាងវិញ្ញាណដ៏ជ្រាលជ្រៅ ។ ឧទាហរណ៍ នៅពេលអ្នកចូលរួមក្នុងពិធីបរិសុទ្ធនោះ អ្នកបង្ហាញព្រះថាអ្នកមានឆន្ទៈទទួល និងរក្សាសេចក្ដីសញ្ញារបស់ទ្រង់ ។
ការរៀបចំផ្ទាល់ខ្លួន
សូមរៀបចំខ្លួនខាងវិញ្ញាណ ដោយការធ្វើតាមការបង្រៀនរបស់ព្រះយេស៊ូវគ្រីស្ទ ហើយរក្សាសេចក្ដីសញ្ញាដែលអ្នកបានធ្វើជាមួយនឹងព្រះនៅឯពិធីបុណ្យជ្រមុជទឹក ។ អ្នកក៏អាចសិក្សាធនធានសាសនាចក្រដូចជាព្រះគម្ពីរ និងសុន្ទរកថាក្នុងសន្និសីទទូទៅបានផងដែរ ។ នៅក្នុងគេហទំព័រTemples.ChurchofJesusChrist.org ផ្តល់ព័ត៌មានអំពីអ្វីដែលរំពឹងទុក ពេលអ្នកចូលរួមក្នុងព្រះវិហារបរិសុទ្ធ ។ វាក៏រួមបញ្ចូលព័ត៌មានលម្អិតបន្ថែមទៀត អំពីសេចក្ដីសញ្ញានៃព្រះវិហារបរិសុទ្ធ ពិធីបរិសុទ្ធ និងនិមិត្តសញ្ញាផងដែរ ។
រូបថតព្រះវិហារបរិសុទ្ធ ណៅវូ អិលលីណោយ ដោយ អេវ៉ា ធូហ្វ
និមិត្តសញ្ញា
ព្រះអម្ចាស់តែងបង្រៀនដោយប្រើនិមិត្តសញ្ញា ។ ឧទាហរណ៍ ពិធីបុណ្យជ្រមុជទឹក—ត្រូវមុជចុះក្នុងទឹក ហើយងើបឡើងម្តងទៀត—គឺប្រៀបដូចជារូបកាយចាស់របស់អ្នកត្រូវស្លាប់ ហើយរូបកាយថ្មីរបស់អ្នកកំពុងកើតឡើងវិញ ( សូមមើល រ៉ូម៦:៣–៦ ) ។ ពិធីបរិសុទ្ធនៃព្រះវិហារបរិសុទ្ធចង្អុលទៅព្រះយេស៊ូវគ្រីស្ទ និងដង្វាយធួនរបស់ទ្រង់ ។ វាប្រហែលជាពិបាកយល់អំពីនិមិត្តសញ្ញាទាំងអស់នៅពេលអ្នកចូលរួមក្នុងព្រះវិហារបរិសុទ្ធជាលើកដំបូង ប៉ុន្តែអ្នកអាចបន្តរៀននៅពេលអ្នកត្រឡប់ទៅព្រះវិហារបរិសុទ្ធវិញពេញមួយជីវិតរបស់អ្នក ។
ប័ណ្ណចូលព្រះវិហារបរិសុទ្ធ
ដើម្បីចូលទៅក្នុងព្រះវិហារបរិសុទ្ធអ្នកត្រូវរៀបចំខ្លួន និងមានភាពសក្ដិសម ។ អ្នកអាចទទួលបានអនុសាសន៍ឲ្យចូលទៅក្នុងព្រះវិហារបរិសុទ្ធ បន្ទាប់ពីសម្ភាសន៍ជាមួយប៊ីស្សព ឬប្រធានសាខារបស់អ្នក និងជាមួយប្រធានស្តេក ឬប្រធានបេសកកម្ម ។ អ្នកដឹកនាំទាំងនេះនឹងសួរសំណួរមួយចំនួន ដើម្បីប្រាកដថាអ្នកកំពុងរស់នៅក្នុងដំណឹងល្អរបស់ព្រះយេស៊ូវគ្រីស្ទ ។ ថ្នាក់ដឹកនាំរបស់អ្នកអាចនិយាយជាមួយអ្នកអំពីសំណួរទាំងនេះជាមុន ។
ការត្រឡប់ទៅព្រះវិហារបរិសុទ្ធវិញសម្រាប់បុព្វការីជនរបស់អ្នក
ព្រះវរបិតាសួគ៌ចង់ឲ្យកូនចៅទាំងអស់របស់ទ្រង់ធ្វើសេចក្ដីសញ្ញាជាមួយនឹងទ្រង់ ហើយទទួលបានពិធីបរិសុទ្ធពិសិដ្ឋ ។ ពិធីបរិសុទ្ធទាំងនេះដូចជាពិធីបុណ្យជ្រមុជទឹក និងអំណោយទានពិសិដ្ឋ ត្រូវធ្វើនៅក្នុងព្រះវិហារបរិសុទ្ធ សម្រាប់មរណជនដែលបានចែកឋានដោយមិនបានទទួលដំណឹងល្អទេ ។ អ្នកអាចត្រឡប់ទៅព្រះវិហារបរិសុទ្ធវិញ ដើម្បីធ្វើពិធីបរិសុទ្ធសម្រាប់សមាជិកគ្រួសារដែលបានចែកឋាន ទៅហើយរបស់អ្នក ។
©2023by Intellectual Reserve, Inc. All rights reserved. បោះពុម្ពនៅ ស.រ.អា ។ ការអនុម័តជាភាសាអង់គ្លេស ៖ ៦/១៩ ។ ការអនុម័តឲ្យបកប្រែ ៖ ៦/១៩ ។ ការបកប្រែនៃMonthly Liahona Message, December 2023Language.19049 258