ການກຽມຕົວເພື່ອເຂົ້າພຣະວິຫານ

ໃນພຣະວິຫານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ເຮົາສາມາດຮັບເອົາພັນທະສັນຍາ ແລະ ພິທີການສັກສິດເພື່ອຕົວເຮົາເອງ ແລະ ເພື່ອບັນພະບຸລຸດຂອງເຮົາ. ເຮົາເຂົ້າພຣະວິຫານເພື່ອສະແດງຄວາມຮັກ ແລະ ຄວາມຮູ້ບຸນຄຸນຂອງເຮົາຕໍ່ພຣະບິດາເທິງສະຫວັນ ແລະ ພຣະເຢຊູຄຣິດ. ເຮົາສາມາດກຽມຕົວເພື່ອເຂົ້າພຣະວິຫານໄດ້ ໂດຍການຮຽນຮູ້ ແລະ ດໍາລົງຊີວິດຕາມພຣະກິດຕິຄຸນຂອງພຣະເຢຊູຄຣິດ. ສໍາລັບຂໍ້ມູນເພີ່ມເຕີມກ່ຽວກັບພຣະວິຫານ, ໃຫ້ເບິ່ງບົດຄວາມ ພື້ນຖານພຣະກິດຕິຄຸນ “ວຽກງານພຣະວິຫານ” ໃນສະບັບເດືອນຕຸລາ 2021 ຂອງ Liahona.

ຮູບພາບຂອງພຣະວິຫານເດີແບນອາຟຣິກາໃຕ້ ໂດຍ ແມັດທິວ ເຣເອີ

ບ້ານຂອງພຣະຜູ້ເປັນເຈົ້າ

ພຣະວິຫານຖືກເອີ້ນວ່າ “ບ້ານຂອງພຣະຜູ້ເປັນເຈົ້າ.” ມັນເປັນສະຖານທີ່ສັກສິດ ບ່ອນທີ່ເຮົາສາມາດຮູ້ສຶກເຖິງພຣະວິນຍານຂອງພຣະເຈົ້າ ແລະ ຄວາມຮັກຂອງພຣະອົງທີ່ມີຕໍ່ເຮົາ. ມັນຍັງເປັນສະຖານທີ່ບ່ອນທີ່ເຮົາສາມາດເຮັດພັນທະສັນຍາ ແລະ ຮັບພິທີການພິເສດທີ່ຈະກະກຽມເຮົາເພື່ອຮັບຊີວິດນິລັນດອນ. (ພັນທະສັນຍາ ແມ່ນຄຳສັນຍາອັນສັກສິດລະຫວ່າງພຣະເຈົ້າ ແລະ ລູກໆຂອງພຣະອົງ.) ການທີ່ເຮົາຊື່ສັດຕໍ່ພັນທະສັນຍາຂອງເຮົາ ແລະ ຮັບເອົາພິທີການເຫລົ່ານີ້ ຊ່ວຍໃຫ້ເຮົາມີຄວາມສຳພັນທີ່ພິເສດກັບພຣະບິດາເທິງສະຫວັນ ແລະ ພຣະເຢຊູຄຣິດ.

ຮູບພາບຂອງພຣະວິຫານກວາຢາກິລເອກວາດໍ ໂດຍ ຈາເນ ບິງແຮັມ

ແມ່ນໃຜສາມາດເຂົ້າພຣະວິຫານໄດ້?

ສະມາຊິກຂອງສາດສະໜາຈັກສາມາດເຮັດການບັບຕິສະມາສຳລັບຄົນຕາຍໄດ້ ເລີ່ມຈາກປີທີ່ເຂົາອາຍຸຄົບ 12 ປີ. ສະມາຊິກສາມາດຮັບ ຂອງປະທານສັກສິດ ຖ້າຫາກເຂົາອາຍຸຢ່າງຕໍ່າ 18 ປີ, ເປັນສະມາຊິກຂອງສາດສະໜາຈັກມາເປັນເວລາຢ່າງໜ້ອຍໜຶ່ງປີ, ແລະ ປາດຖະໜາທີ່ຈະເຮັດ ແລະ ຮັກສາພັນທະສັນຍາພຣະວິຫານ (ເບິ່ງ ຄູ່ມືທົ່ວໄປ: ການຮັບໃຊ້ໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, 27.2.2, ChurchofJesusChrist.org). ຊາຍ ແລະ ຍິງທີ່ໄດ້ຮັບຂອງປະທານສັກສິດໃນພຣະວິຫານແລ້ວ ສາມາດຮັບການຜະນຶກ (ແຕ່ງງານ) ຊົ່ວນິລັນດອນໃນພຣະວິຫານໄດ້.

ພັນທະສັນຍາ ແລະ ພິທີການ

ທ່ານຈະເຮັດພັນທະສັນຍາ ແລະ ຮັບພິທີການຕ່າງໆໃນພຣະວິຫານ. “ການເຂົ້າສູ່ຄວາມສຳພັນແຫ່ງພັນທະສັນຍາກັບພຣະເຈົ້າຈະຜູກມັດເຮົາເຂົ້າກັບພຣະອົງ ໃນແບບທີ່ເຮັດໃຫ້ ທຸກສິ່ງ ກ່ຽວກັບຊີວິດງ່າຍຂຶ້ນ” (Russell M. Nelson, “Overcome the World and Find Rest,” Liahona, Nov. 2022, 97). ພິທີການ ແມ່ນການກະທຳທາງກາຍະພາບທີ່ສັກສິດ ຊຶ່ງປະຕິບັດໂດຍສິດອຳນາດຂອງ ຖານະປະໂລຫິດ. ພິທີການຕ່າງໆມີຄວາມໝາຍທາງວິນຍານທີ່ເລິກເຊິ່ງ. ຍົກຕົວຢ່າງ, ເມື່ອທ່ານເຂົ້າຮ່ວມໃນພິທີການ, ທ່ານກໍສະແດງໃຫ້ພຣະເຈົ້າເຫັນວ່າ ທ່ານເຕັມໃຈທີ່ຈະຮັບ ແລະ ຮັກສາພັນທະສັນຍາຂອງພຣະອົງ.

ການກະກຽມສ່ວນຕົວ

ກຽມຕົວທາງວິນຍານ ໂດຍການເຮັດຕາມຄຳສອນຂອງພຣະເຢຊູຄຣິດ ແລະ ຮັກສາພັນທະສັນຍາທີ່ທ່ານໄດ້ເຮັດກັບພຣະເຈົ້າຕອນທີ່ຮັບບັບຕິສະມາ. ທ່ານຍັງສາມາດສຶກສາແຫລ່ງຊ່ວຍເຫລືອຂອງສາດສະໜາຈັກ, ເຊັ່ນ ພຣະຄຳພີ ແລະ ບົດປາໄສຂອງກອງປະຊຸມໃຫຍ່ສາມັນນຳອີກ. Temples.ChurchofJesusChrist.org ໃຫ້ຂໍ້ມູນກ່ຽວກັບສິ່ງທີ່ຄາດຫວັງທີ່ຈະພົບ ເມື່ອທ່ານເຂົ້າພຣະວິຫານ. ມັນຍັງລວມທັງລາຍລະອຽດກ່ຽວກັບພັນທະສັນຍາພຣະວິຫານ, ພິທີການຕ່າງໆ, ແລະ ການສະແດງສັນຍາລັກອີກດ້ວຍ.

ຮູບພາບຂອງພຣະວິຫານນາວູອິລິນອຍ ໂດຍ ອີບ ທັຟທ໌

ການສະແດງສັນຍາລັກ

ພຣະຜູ້ເປັນເຈົ້າມັກຈະສິດສອນໂດຍການໃຊ້ສັນຍາລັກ. ຍົກຕົວຢ່າງ, ການບັບຕິສະມາ—ການລົງໄປໃນນໍ້າ ແລະ ກັບຂຶ້ນມາອີກຄັ້ງ—ເປັນເໝືອນດັ່ງການທີ່ຕົວຕົນເກົ່າຂອງເຮົາຕາຍໄປ ແລະ ຕົວຕົນໃໝ່ຂອງເຮົາກໍເກີດໃໝ່ອີກຄັ້ງ (ເບິ່ງ ໂຣມ 6:3–6). ພິທີການພຣະວິຫານ ຊີ້ໄປຍັງພຣະເຢຊູຄຣິດ ແລະ ການຊົດໃຊ້ຂອງພຣະອົງ. ມັນອາດຍາກທີ່ຈະເຂົ້າໃຈການສະແດງສັນຍາລັກທັງໝົດ ເມື່ອທ່ານເຂົ້າພຣະວິຫານເປັນເທື່ອທຳອິດ, ແຕ່ທ່ານສາມາດສືບຕໍ່ຮຽນຮູ້ ຂະນະທີ່ທ່ານກັບຄືນໄປຍັງພຣະວິຫານຕະຫລອດຊີວິດຂອງທ່ານ.

ໃບຮັບຮອງເຂົ້າພຣະວິຫານ

ເພື່ອທີ່ຈະເຂົ້າໄປໃນພຣະວິຫານ, ທ່ານຈຳເປັນຕ້ອງກຽມພ້ອມ ແລະ ມີຄ່າຄວນ. ທ່ານສາມາດຮັບໃບຮັບຮອງເພື່ອເຂົ້າໄປໃນພຣະວິຫານໄດ້ ຫລັງຈາກການສຳພາດກັບອະທິການ ຫລື ປະທານສາຂາຂອງທ່ານ ແລະ ກັບປະທານສະເຕກ ຫລື ປະທານເຜີຍແຜ່. ຜູ້ນຳເຫລົ່ານີ້ຈະຖາມຄຳຖາມຊຸດໜຶ່ງເພື່ອໃຫ້ແນ່ໃຈວ່າ ທ່ານກຳລັງດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ. ບັນດາຜູ້ນຳຂອງທ່ານສາມາດເວົ້າລົມກັບທ່ານກ່ຽວກັບຄຳຖາມເຫລົ່ານີ້ລ່ວງໜ້າ.

ການກັບຄືນໄປພຣະວິຫານເພື່ອບັນພະບຸລຸດຂອງທ່ານ

ພຣະບິດາເທິງສະຫວັນຢາກໃຫ້ລູກໆຂອງພຣະອົງທຸກຄົນເຮັດພັນທະສັນຍາກັບພຣະອົງ ແລະ ຮັບພິທີການສັກສິດ. ພິທີການເຫລົ່ານີ້, ເຊັ່ນ ການບັບຕິສະມາ ແລະ ຂອງປະທານສັກສິດ, ແມ່ນຕ້ອງເຮັດໃນພຣະວິຫານສຳລັບຜູ້ທີ່ໄດ້ລ່ວງລັບໄປໂດຍທີ່ບໍ່ໄດ້ຮັບພຣະກິດຕິຄຸນ. ທ່ານສາມາດກັບຄືນໄປພຣະວິຫານເພື່ອເຮັດພິທີການຕ່າງໆເພື່ອສະມາຊິກຄອບຄົວຂອງທ່ານທີ່ໄດ້ເສຍຊີວິດໄປ.

© 2023 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, December 2023. Language. 19049 331