“Ukulungiselela Ukuya Ethempelini,” ILiyahona, Dis, 2023.
UMyalezo waNyanga zonke we-Liyahona yangoDisemba 2023
Ukulungiselela Ukuya Ethempelini
Isithombe seThempeli lase-Ogden Utah nguMark Brunson
Emathempelini eBandla likaJesu Kristu labaNgcwele beziNsuku zokuGcina singathola izivumelwano ezingcwele kanye nezimiso zethu kanye nokhokho bethu. Siya ethempelini ukukhombisa uthando lwethu kanye nokubonga kuBaba oseZulwini kanye noJesu Kristu. Singalungiselela ukuya ethempelini ngokufunda futhi siphile ivangeli likaJesu Kristu. Ukuze uthole ulwazi olwengeziwe ngamathempeli, bheka isihloko esithi I-Gospel Basics “Umsebenzi Wasethempelini” kumbhalo ka-Okthoba 2021 we-Liyahona.
Isithombe seThempeli laseThekwini eNingizimu Afrika nguMatthew Reier
Indlu yeNkosi
Amathempeli abizwa ngokuthi “yindlu yeNkosi.” Ayizindawo ezingcwele lapho singezwa khona uMoya kaNkulunkulu kanye nothando Lwakhe ngathi. Futhi ayizindawo lapho singenza khona izivumelwano futhi sithole izimiso ezikhethekile ezizosilungiselela ukuba sibe nokuphila okuphakade. (Izivumelwano ziyizithembiso ezingcwele phakathi kukaNkulunkulu nabantwana Bakhe.) Ukwethembeka ezivumelwaneni zethu kanye nokwamukela lezi zimiso kusisiza ukuba sibe nobudlelwane obukhethekile noBaba waseZulwini kanye noJesu Kristu.
Isithombe seThempeli lase-Guayaquil e-Ecuador nguJanae Bingham
Ngubani Ongaya Ethempelini?
Amalungu ebandla angakwazi ukubhabhadisela abafileyo ukusuka ngonyaka abahlanganisa iminyaka eyi-12. Ilungu lingathola ukwembathiswa uma okungenani lineminyaka eyi-18, libe yilungu leBandla okungenani unyaka owodwa, futhi lifisa ukwenza nokugcina izivumelwano zethempeli (bheka General Handbook: Serving in The Church of Jesus Christ of Latter-day Saints, 27.2.2, ChurchofJesusChrist.org). Owesilisa nowesifazane asebekutholile ukwembathiswa kwabo kwasethempelini bangaboshwa (bashade) ingunaphakade ethempelini.
IziVumelwano kanye neziMiso
Uzokwenza izivumelwano futhi uthole izimiso ethempelini. “Ukungena ebudlelwaneni besivumelwano noNkulunkulu kusibophezela Kuye ngendlela eyenza yonke into ngempilo ibe lula” (Russell M. Nelson, “Nqoba Umhlaba futhi Uthole Ukuphumula,” ILiyahona, Nov. 2022, 97). Isimiso yisenzo esingcwele somzimba esenziwa ngegunya lobupristi. Izimiso zinencazelo ejulile engokomoya. Isibonelo, uma ubamba iqhaza esimisweni, ukhombisa uNkulunkulu ukuthi uzimisele ukwamukela nokugcina izivumelwano Zakhe.
Ukuzilungiselela Wena
Lungiselela ngokomoya ngokulandela izimfundiso zikaJesu Kristu kanye nokugcina izivumelwano owazenza noNkulunkulu ngesikhathi ubhabhadiswa. Ungakwazi futhi ukufunda izinsiza zeBandla, njengemibhalo engcwele kanye nezinkulumo zengqungquthela kazwelonke. Temples.ChurchofJesusChrist.org inikeza ulwazi mayelana nokuthi yini ongayilindela uma uya ethempelini. Kuhlanganisa futhi imininingwane eyengeziwe mayelana nezivumelwano, izimiso, kanye nezimpawu zethempeli.
Isithombe seThempeli lase-Nauvoo e-Illinois ngu-Eve Tuft
Uphawu
INkosi ivame ukufundisa isebenzisa izimpawu. Isibonelo, ukubhabhadiswa—ukungena ngaphansi kwamanzi nokukhuphuka futhi—kufana nobuwena obudala bufa kanye nobusha bakho bokuzalwa kabusha (bheka KwabaseRoma 6:3–6). Izimiso zasethempelini zikhomba kuJesu Kristu kanye neNhlawulo Yakhe. Kungase kube nzima ukuqonda zonke izimpawu ngesikhathi uqala ukuya ethempelini, kodwa ungaqhubeka nokufunda njengoba ubuyela ethempelini impilo yakho yonke.
IMvume yaseThempelini
Ukungena ethempelini, udinga ukuzilungiselela futhi ufaneleke. Ungathola imvume yokungena ethempelini emva kokuxoxisana nombhishobhi wakho noma umongameli wegatsha kanye nomongameli wesikhonkwane noma wemishini. Laba baholi bazobuza iqoqo lemibuzo ukuze baqinisekise ukuthi uyaliphila ivangeli likaJesu Kristu. Abaholi bakho bangakhuluma nawe ngale mibuzo kusanesikhathi.
Ukubuyela Ethempelini Kokhokho Bakho
UBaba oseZulwini ufuna bonke abantwana Bakhe benze izivumelwano Naye futhi bathole izimiso ezingcwele. Lezi zimiso, njengokubhabhadiswa kanye nokwembathiswa, kufanele zenziwe emathempelini zenzelwa labo abadlula emhlabeni bengakalitholi ivangeli. Ungabuyela ethempelini uyokwenzela amalungu omndeni wakho angasekho izimiso.
© 2023 by Intellectual Reserve, Inc. All rights reserved. Igaywe eMelika. Usuku okuvunywe ngalo ukuba lesi sifundo sikhishwe ngesiNgisi: 6/19. Usuku okuvunywe ngalo ukuba lesi sifundo sihunyushwe: 6/19. Ukuhunyushwa kwe Monthly Liahona Message, December 2023. Language. 19049 783