Ewe Amuchunon Pwapwan Manaueni ewe Kapas AllimLiahona, February 2024
Porous Ren LiahonaIteiten Maram, February 2024
Ewe Amuchunon Pwapwan Manaueni ewe Kapas AllimManaueni ewe Kapas Allim
Nikitun pwapwa a feitto seni nikitu non ewe kapas allimen Jises Kraist me anisi ekkoch ar repwe pwan fori usun ei.
Ewe Atake Eden, seni Grant Romney Clawson; Tou Seni ewe Atake Eden, seni Joseph Brickey
Ew mwochomochen afatafatochun ewe popun manauach a tongeni pwa non an ewe soufos Liai osukuna ussun ewe poputan manauen aramas won fonufan. Non ewe Atake Eden, Adam me Eve ra nom non ew nikinikin rese weweiti mettoch. Ika re chok nom non ena sokkun nikinik, esap wor “[ar] pwapwa, pun rese sinei riaffou; rese fori mi pung, pun rese sinei tipis” (2 Nifai 2:23). Nge, nupwen Liai a awewei, “Adam a turutiw pwe aramas repwe; manau, me aramas ra manau, pwe epwe wor ar pwapwa” (2 Nifai 2:25; pwan nengeni Moses 5:10–11).
Nupwen sia marita non ew fonufan mi turutiw, sia kaeo ewe sokofesen nefinen murinno me ngaw seni met sia kaeo me seni met sia sinei. Sia “neni ewe kipwin, pwe [kich] sipwe sinei ach sipwe niwini ewe mi och.”(Moses 6:55). Pwapwa a feitto nupwen sise etiwa ewe mi kipwin me anapano ach tumunuochu me komochunuk ngeni ewe murinno.
Kutta Pwapwa
Pokiten An unusochun tong fan itach, Samach won Nang a pochokunen mochen ach sipwe aea fengen an ewe pwapwa mi unusoch, iei me feinfeino. Ina An popun mochen non mettoch meinisin seni nepoputan pachenong An ewe amwararen kokkoten pwapwa me ewe asor an Noun we Anamon Jises an epwe angasa kich.
Kot ese sotuni an epwe oumwes ngeni kich meseik ika pwapwa, nge I a aiti kich ifa ussun sipwe kuna. I a pwan urenikich ian meseik esap pwa me ian—“foforungaw [esap me] esap tongeni pwapwa” (Alma 41:10). Ei seni An kewe annuk pwe Samach won Nang a pwarano ngeni kich ewe an ngeni pwapwa.
Preseten Russell M. Nelson a pwarano ei an:
Nge iei ewe wachemuken ennet: nupwen ewe fonufan a fichono pwe nemenem, pisekisek, itefouno, me apwapwan ewe inis a wato pwapwa, rese! Rese tongeni! Met ra awora ese wor nge ew ekkesiwin mi pon ren ewe “feiochun me pwapwan nonnomun ekkewe [ra] aponueta ekkewe annukun Kot.” [Mosaia 2:41].
“Ewe ennet pwe a kon napeno apekusach kutta pwapwa ikewe sise tongenikuna me ie! Nge inamo, nupwen oua angang fengen me Jises Kraist me fori ewe angangen ngun mi namot ne okkufu ewe fonufan, I, me I chok, a wor ren ewe manaman an epwe chunoketa seni weitien ei fonufan.1
Nge, omuchunon meseik a pwa me non aponueta ekkewe annukun Kot e ekkewe annukun Kot ra pwa non ewe kapas allimen Jises Kraist. Nge ina ach mochen. Ika non ach apwangapwang sia mwochumochutiw ach sipwe aponueta ekkewe annuk, sia chiwen tongeni kun sefan, sise mochen etiwa ewe kipwin, me tapwesefani ewe murinno. Ewe tongen Kot ese omusano tipis—minne epwe umoumoch ne sonani pungoch—nge seni An Achesefan, Jises Kraist awora ngaseno seni tipis:
“Amulek … a apasa … pwe ennetin ewe Samon epwe wareto an epwe angasa noun kewe aramas, nge i esap wareto an epwe angaser non ar tipis, nge epwe angaser seni ar tipis.
“Me a wor an manaman a kawor ngeni i seni ewe Sam pwe epwe angaser seni ar kewe tipis pokiten aier; iei minne a tinato noun kewe chon nang pwe repwe affata ekkewe kapas allimen ekkewe nonnomun aier, minne a wato ewe manamanen ewe Chon Angasano, ngeni amanauen ngunur.”(Ilaman 5:10–11; auchean mi kapacheta).
Jises a apasa:
“Ika oupwe aponueta ai kewe annuk, oupwe chok nonnom non ai tong; ussun chok uwa fen aponueta an Semei kewe annuk, me nonnom non an tong.
“Ekkei mettoch ua fen apasa ngenikemi, pun ai pwapwa epwe nonnom remi, me ami pwapwa epwe unusoch.”(John 15:10–11).
Iei met Liai a mefi non an ewe tan nupwen i a neni ewe foun iran manau—ewe minne a wewe ngeni ewe tongen Kot. I a apasa, “Nupwen ua ochoch ewe foun ira a fokkun ourano nguni ren pwapwa chapur” (1 Nifai 8:12; pwan nengeni 11:21–23).
Liai a pwan pwarano ew oruen anen ach sipwe tongeni wato pwapwa non manauach nupwen i a apasa,“Iei minne, ua poputa ne mochen pwe ai famini repwe ochoch ewe [ewe foun ira] pwan” (1 Nephi 8:12).
Iran Manau, seni Kazuto Uota
Anisi Ekkoch Kuna Pwapwa
Ussun noun King Banjamin kewe aramas, sia “urono ren pwapwa” nupwen sia angei ew omusomusen ach kewe tipis me “kinamwein memef” (Mosaia 4:3). Sia pwan mefi sefani nupwen sia neneno mwach me kutta ach sipwe anisi chon famini me ekkoch ar repwe angei pwan na chok pwapwa me kinamwe.
Nupwen a emon onuon at, Alma a kutta pwapwa non mettoch meinisin mi u ngeni ewe kapas allimen Jises Kraist. Mwirin an emon chon nang a nanengeni, a ekesiwin seni “ewe kipwin” ngeni “ewe murinno” ren aiersefan “ngeni mano” (Mosaia 27:28) me an ewe Chon Amanau umoumoch. Ekkewe ier mwirin, Alma a unusen pwapwa ne affata ngeni noun ewe at Ilaman:
“Iwe oh, met pwapwa, me met amwararen saram ua kuna; ewer, nguni a ureno ren pwapwa usun chok watten ai metek …
Ewer, iwe seni ena fansoun pwan mwo tori iei, ua fen angang usemo kouno, pwe upwe tongeni uwei kewe ngun ngeni aier; pwe upwe tongeni uwei ir pwe repwe mefi usun ewe nununon pwapwa usun minne ua fen mefi. …
“Ewer, me iei nengeni, O nei onuon, ewe Samon a ngeniei ennetin wachemuken pwapwa non uwan ai angang;
“Pun pokiten ewe kapas [ewe kapas allimen Jises Kraist] ewe a fen pwarano ngeniei, nengeni, chommong ra fen uputiw meren Kot, me ra fen mefi met uwa fen mefi” (Alma 36:20, 24–26).
Non pwan ew fansoun a fis ew mettoch, Alma a pwarata:
“Iei ai ning, pwe eni upwe tongeni ew pisekin aninis non poun Kot ne uwei ekkoch ngun ngeni aier; me iei ai pwapwa.
“Iwe nengeni, nupwen ua kuna chommong me nein pwi kewe ra ennetin aier, me feito ngeni ewe Samon ar Kot, iwe nguni a ureno ren pwapwa” (Alma 29:9–10).
Alma a feinno an epwe affata ewe wachemuken pwapwa a mefi nupwen ekkoch ra fetanoch ne uweato ekkewe ngun ngeni Kraist:
“Nge use pwapwa chok non ai pwisin fetanoch, nge ai pwapwa a kon unusoch pokiten fetanochun pwi kewe [noun Mosaia kewe at] ekkewe ra fen feita ngeni ewe fonuen Nifai.
“Nengeni, ra fen fokkun angang watte, me ra fen uwani chommong foun ira; iwe niwinir epwe fokkun auchea!
“Iei, nupwen ua ekieki usun fetanochun pwi kei nguni a fokkun napeno an chengen, pwan mwo tori keimufesenin seni ewe inisi, usun chok, a fokkun nap ai pwapwa” (Alma 29:14–16).
Sia tongeni kuna pwan ewe chok pwapwa nupwen sia tongei ekkoch ren “ewe nimenimochun tongen Kraist” (Moroni 7:47; pwan nengeni okisin 48), aporousa ewe ennet mi niwinsefanito ngenir, metingor ngenir ar repwe chufengen me ekkewe aramas pwon.
O Semei We, seni Simon Dewey
Pwapwa Nukanapen Wachemuken Riaffou
Sisap nuokus pwe ekkewe sosot me osukosuk sia mesengeni iteiten ran non ei manau epwe epeti ika ataeno ach pwapwa. Alma i emon minne an aninis a chok ekieki ekkoch nge nikitani pusin inisin a efisata an riaffou napanap. I a riaffoun kanapus, soposopono ren nakatamen fansoun echik me kaka, kawet, eniokusu fan iten manauan, me eniwinin turunufas me ketiwengaw. Iwe nge, meinisin “ra tano ren ewe pwapwan Kraist” (Alma 31:38). Meni an Alma riaffou a fori ewe pwapwa a tapweto a fen napeno.
Preseten Nelson a achema ngeni kich pwe pwapwa a fori ew anapanap non ewe riaffou an ewe Chon Amanau—“ren ewe pwapwa a foruta mwen i [I] a nikitu ngeni ewe irapenges” (Hebrews 12:2).
“Ekieki usun ena! Ren an epwe engino ngeni ewe mettoch mi kon ammetek me won fonufan, ach Chon Amanau a anonga an ekieki won pwapwa!
“Iwe, met ewe pwapwa a nom me mwen I? Ennetin mi pachenong ewe pwapwan animenimochu, achikara, me apochokuna kich; ewe pwapwan an moni tipisin ekkewe mi mochen aier; ewe pwapwan atufichi kich ne niwin sefan ngeni imwach—non ach sia fich ngeni me nimenimoch—ne manau ren Semach me Inach kewe me chon ach famini non nang.
“Ika sia anonga ach ekieki won ewe pwapwa epwe feito rech, are ngeni ekkewe ir sia tongei, met sipwe tufichin pworacho ngeni mi kan weires, metek, eniweniw, mwan, are sia ekieki ese tufich ach sipwe pworacho ngeni?”2
Nikitu non pwapwa a feitto seni nikitu non ewe kapas allimen Jises Kraist me anisi ekkoch ar repwe pwan fori ei. Nukucharen pwapwa a feitto nupwen sia soposopono ne nom non ewe tongen Kot anneasosichi An kewe annuk me angei ewe chen an ewe Chon Amanau. Non ewe anen ewe kapas allim, mi wor pwapwa non ewe sai ussun chok pwan pwapwa nesoponon. Ewe kapas allimen Jises Kraist ina ewe anen pwapwa iteitan.
© 2024 seni Intellectual Reserve, Inc.Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Porous ren Liahona Iteiten Maram, February 2024. Language. 19276 000