Edibighe Idaraesit otode ke Ndinam Ikɔ Abasi

Etop otode Elder D. Todd Christofferson

Eke Eboho mme Apostle Duopeba

Edibighe idaraesit oto ke ediyɔyɔ nnam ikɔ Abasi Jesus Christ nyuŋ ŋwam mbon efen edi-nam ukem oro.

Ekeme edikut ata ibio-ibio edimen ufɔn uwem nnyin nwut ke mme nti ukpep-ŋkpɔ eke Lehi abaŋade ntɔŋɔ uwem ubonowo ke isɔŋ. Ke Iŋwaŋ Eden, Adam ye Eve ekeduŋ ke ndaha unana-ndudue. Ekpedi nte mmɔ ekedu ke ndaha oro, mmɔ ikpi “[nyeneke] idaresit koro mmɔ mifiɔkke ukut; inamke eti ŋkpɔ, koro mmɔ mifiɔkke idiɔk ŋkpɔ” (2 Nephi 2:23). Edi, nte Lehi akamamde anwaŋa ete, “Adam ɔkɔduɔ man owo edu; ndien owo edu, man mmɔ enyene inemesit.”(2 Nephi 2:25; se nko Moses 5:10–11).

Nte nnyin ikɔride ke idiɔk ererimbot emi, nnyin ikpep ukpuhɔde ke ufɔt eti ye idiɔk ito ke se ekpepde nnyin ye ke ifiɔk-ukpep emi nnyin inyenede. Nnyin “itabi idot, man [nnyin] ididiɔŋɔ ekɔm-urua eti ŋkpɔ” (Moses 6:55). Idaresit edi-di ke nte nnyin isinde idot ndien idikɔri ima inyuŋ inehede imum sifɔnde ikama.

Edikut Idraesit

Otode ke mfɔn-ma ima Esie kabaŋa nnyin, Ete nnyin ke Enyɔŋ enehede oyom edibuana mfɔn-ma idaresit Esie ye nnyin, mbiba idahaemi ye ke nsinsi. Oro ekedi udɔŋ Esie ke kpukpru ŋkpɔ tɔtɔŋɔ ke eritɔŋɔ, esinede ɔyɔhɔ-ubɔŋ uduak inemesit Esie ye nwaidem eke Ikpɔŋ-ikpɔŋ Eyen Esie Emi Ebonde man erifak nnyin.

Abasi idomoke edikpakpak idaresit mme inemesit nnɔ nnyin, edi Enye ekpep nnyin daŋa nte idikutde oro. Enye nko etiŋ ɔnɔ nnyin ebiet emi nnyin midikutke idaresit—“koro idiɔk ŋkpɔ [idige ndien] akananam ididige inemesit” (Alma 41:10). Oto ke ibet Esie ke Ete nnyin ke Enyɔŋ ayarare usuŋ emi adade ekesim idaresit ɔnɔ nnyin.

Presifeny Russell M. Nelson okowut oro ntem ete:

Edi se ɔyɔhɔ akpanikɔ mi: ke ini ererimbot edɔhɔde ete ke odudu, mme inyene, uwɔrɔ etop, ye inemesit obukidem ɔnɔ inemesit, mmɔ inɔhɔ! Mmɔ ikemeke ndinɔ! Se mmɔ edade edi edi ukpɔk ŋkpɔ emi adade ke nde ‘eridiɔŋ ye idaha inemesit eke [mmɔ] emi enimde ibet Abasi’ [Mosiah 2:41].

“Akpanikɔ edi ete ke etim ɔsɔŋ ndiyom inemesit ke ebiet emi mbufo mikemeke edikut enye! Edi, ke ini mbufo ediande idem mbufo ye Jesus Christ enyuŋ enamde utom spirit emi eyomde man ekan ererimbot, Enye, ndien Enye ikpɔŋ, enyene odudu ndimenere mbufo mkpɔŋ odudu ererimbot emi.”¹

Ntem, edikut edibighe idaresit oto ke edinim ibet Abasi, ndien edikut ibet Abasi ito ke ikɔ Abasi Jesus Christ. Edi oro edi mbumek nnyin. Edieke edide ke mmemidem nnyin nnyin itre ke esisit ini ke edinim ibet, nnyin imikeme edisuk ŋwɔŋɔre, isin idot, ndien inikiet efen itiene ŋkpɔ sifɔn. Ima Abasi isioho eto ke idiɔk ŋkpɔ—oro ekpedi mbɔm edituk ubiere-ikpe—edi otode ke Erisio-isop Esie, Jesus Christ ama ɔnɔ erifak oto ke idiɔk ŋkpɔ.

“Amulek … ete … ke Jehovah ke akpanikɔ eyedi man erifak ikɔt esie, edi ke enye ididige idifak mmɔ ke mme idiɔk ŋkpɔ mmɔ, edi man erifak mmɔ osio ke mme idiɔk ŋkpɔ mmɔ.

“Ndien Ete ama ɔnɔ enye odudu man erifak mmɔ osio ke mme idiɔk ŋkpɔ mmɔ oto ke erikabare-esit; mmɔdo enye ama ɔnɔ mme angel esie ete efiori inem-mbuk eke mme ndaha nkabare-esit, emi edidade odudu Andifak, ekesim erinyaŋa-ukpɔŋ mmɔ” (Helaman 5:10–11; edian akpan-ŋkpɔ).

Jesus ɔdɔhɔ ete:

“Edieke mbufo enimde mme mbet mi, [ndien eyedu ke ima mi; kpa nte ami nnimde mme mbet Ete mi, ndien ndu ke ima esie.

“Mma ntiŋ mme ŋkpɔ emi nnɔ mbufo, man idaresit Mi odu ke mbufo, idaraesit mbufo onyuŋ ɔyɔhɔ” (John 15:10–11).

Emi edi se Lehi okokop ke ndap esie ke nte enye atabide mfri eke eto uwem—emi adade ɔnɔ ima Abasi. Enye ete, Nte ami ndiade mfri esie enye ɔyɔhɔ ukpɔŋ mi ye ata akwa idara” (1 Nephi 8:12; se nko 11:21–23).

Lehi nko ayarare udiana usuŋ emi nnyin ikemeke edida idaresit nsin ke uwem nnyin ke ini enye ɔdɔhɔde ete, Ke nte, ami ntɔŋɔ edinyene udɔŋ man ufɔkemana mi ekpedia [mfri] oro nko” (1 Nephi 8:12).

Eto Uwem, otode Kazuto Uofa

Ndinwam Mbon Efen Man Enyene Idaraesit

Ukem nte mbon Edidem Benjamin, nnyin imi “yɔhɔ ye idaresit” ke ini nnyin ibɔde erifen ke mme idiɔk ŋkpɔ nnyin inyuŋ inyene emem ke esit nnyin” (Mosiah 4:3). Nnyin imifiak ikop oro ke ini nnyin isede ɔfɔn inyuŋ iyom mbon ufɔkemana ye mbon efen ebɔ ukem inemesit ye emem oro.

Nte akparawa eren, Alma ama oyom inemesit ke kpukpru ŋkpɔ emi ekedide ubiɔŋɔre ɔnɔ ikɔ Abasi Jesus Christ. Ke angel ama akasua ɔnɔ enye, enye ama oto anyan usuŋ “ndot-ndot” edisim “edifɔn-ebiet” oto ke ŋkabade esit “tutu mkpere mkpa” (Mosiah 27:28) ye uwakmfɔn eke Andinyaŋa. Ke mme isua eken, Alma enehede etiŋ ɔnɔ eyen esie Helaman ete:

“Ndien oh, nsutɔ idaresit, ye ewe akwa unwana ke ami nkokut; iŋ, ukpɔŋ mi ɔkɔyɔhɔ ye idara emi okokponde ukem nte ubiak mi ekedide! …

“Iŋ, ndien tɔŋɔ ke ini oro tutu ata idahaemi, ami mmenam-utom ndien nterke, man ami mkpeda mme ukpɔŋ nkesim ŋkabade esit, man ami mkpeda mmɔ man editabi akwa idartesit eke ami ŋketabide. …

“Iŋ, ndien idahaemi sese, O eyen mi, Jehovah ɔmɔnɔ mi ata akwa idara ke mfri utom mi;

“Sia otode ke ikɔ eke [ikɔ Abasi Jesus Christ] emi enye eketiŋde ɔnɔ mi, sese, ediwak owo edimana ke Abasi, enyuŋ editabi ukem nte ami ŋketabide” (Alma 36:20, 24–26).

Ke ndaha efen, Alma etiŋ ete:

“Emi edi ubɔŋ mi; man ami mkpedi ŋkpɔ-utom ke ubɔk Abasi ndinam usuk ukpɔŋ ekabare-esit; ndien idaresit mi edi emi.

“Ndien sese, ini eke ami nkutde ediwak nditɔ-ete mi nte enehede etua mkpɔfiɔk, ndien edi etiene Jehovah Abasi mmɔ, do ke esit mi ediyɔhɔ ye idara” (Alma 29:9–10).

Alma aka iso editiŋ ɔyɔhɔ idaraesit emi enye okokopde ke ini mbon efen ekutde unen ke edida mme ukpɔŋ nsɔk Christ.

“Edi ami ndarake ke edikut-unen mi ikpɔŋ, edi idaraesit mi enehede ɔyɔhɔ oto ke edikut-unen eke nditɔ-ete mi [nditɔ iren Mosiah], emi ekedɔkde eka ke isɔŋ Nephi.

“Sese, mmɔ ema enehede enam utom, enyuŋ eda ediwak mfri edi, ndien utip mmɔ eyenehede okpon eti-eti!

“Idahaemi, kini ami nkerede mbaŋa edikut-unen eke nditɔ-ete mi emi ukpɔŋ mi ama adara, ekesim edibahare enye mkpɔŋ ikpɔkidem, nte oro ekedide, idaresit mi ama enehede okpon” (Alma 29:14–16).

Nnyin imikeme edikut ukem idaresit oro ke nte nnyin imade mbon efen ye edisana ima Christ” (Moroni 7:47; se nko verse 48), ibuana mfiak-men-ndi akpanikɔ ye mmɔ, inyuŋ ikoot mmɔ ediboho ye mbon ediomo.

O Ete Mi,, otode Simon Dewey

Idaraesit Ke-ufɔt Ukut

Inaha nte nnyin ikop ndik koro mme idomo ye afanikɔŋ emi nnyin inehede ikut ke uwem isɔŋ eyekpan mme edibiat idaraesit nnyin. Alma ekedi owo kiet emi utom ima emi enye akanamde ɔnɔ mbon efen akakpade enye ŋkpɔ eti-eti. Enye ama ɔbɔ ukut ŋkpɔkɔbi, anyan ini edina-biɔŋ ye nsat-itɔŋ, umia, ediyom uwem esie ediwot, ye ediwak esuene ye edisisin. Ndien edi, kpukpru oro ama “okokure ke uyɔhɔ idara eke Christ“ (Alma 31:38) Ndusuk ndutuhɔ eke Alma ama anam idadaesit emi eketienede enehede okpon.

President Nelson editi nnyin ete ke idaraesit ama anam utom ke ndutuhɔ eke Andinyaŋa—“koro idaraesit emi eke anade enye ke iso emi [Enye] okobiomde cross” (Mme Hebrew 12:2)

“Kere banga oro! Man otodo Enye ekeme edibiom ata akpan ubiak emi owo akananam ibiomke ke isɔŋ, Andinyaŋa nnyin okowuk enyin ese idaraesit!

“Ndien nso ikedi idaraesit emi ekenimde enye ke iso? Ke akpanikɔ oro ekesine idara eriyet, erikɔk, ye edisɔŋɔ nnyin idem, idaraesit edikpe ekɔm-urua nnɔ mme idiɔk ŋkpɔ eke ofuri mbon emi edikabarede esit; idaraesit edi-nam emem ɔnɔ afo ye ami edifiak nnyɔŋ ufɔk—isana inyuŋ idot—man ikoduŋ ye mme Ete ye Eka Heaven ye mme ufɔkemana nnyin.

“Edieke nnyin isede idaraesit emi edidide ibine nnyin, mme ekedibinede mbon emi nnyin imade, nso ke nnyin ikeme ediyɔ emi ebietde idahaemi nte enehede okpon, esine-ubiak, enyene-ndik, ɔdiɔk, mme enehede ɔsɔŋ ndinam?”²

Edibihe idaraesit oto ke ediyɔyɔ nnam ikɔ Abasi Jesus Christ nyuŋ ŋwam mbon efen edi-nam ukem oro. Edibighe idaraesit edidi ke nte nnyin iduŋde ke ima Abasi, inim ibet Esie inyuŋ ibɔ mfɔn Andinyaŋa. Ke usuŋ ikɔ Abasi, idaraesit odu ke usuŋ-isaŋ oro ukem nte idaraesit odude ke utit-isaŋ oro. Ikɔ Abasi Jesus Christ edi usuŋ eke kpukpru usen idaraesit.

©2024 eketode Intellectual Reserve, Inc. Ekpan kpukpru unen ndimiŋ nwed emi. Ekemiŋ ke USA. Enyime edikabare ke Ikɔ Mbakara: 6/19. Enyime ndikabare: 6/19. Edikabare Ɔfiɔŋ-ke-ɔfiɔŋ Etop eke Liahona, Ɔyɔhɔ Ɔfiɔŋ Iba 2024. Language. 19276 553