“Te Kimwareirei ae Akea Tokina man Maiuakinan te Euangkerio,” Riaona, Beberuare 2024.
Rongorongon te Riaona ni Katoa Namwakaina, Beberuare 2024
Te Kimwareirei ae Akea Tokina man Maiuakinan te Euangkerio
Te kimwareirei ae reitinako e reke man ara teimatoa inanon ana euangkerio Iesu Kristo ao ni buokiia aomata ni karaoan naba anne.
The Garden of Eden[Te Ne n Aroka are i Eten] , iroun Grant Romney Clawson; Leaving the Garden of Eden[Kitanan te Ne n Aroka are i Eten], iroun Joseph Brickey
A kona ni kuneaki kabwarabwaraan te kaantaninga ibukin maiura n ana reirei te burabeti ae Riaai iaon aron moanakin maiun te aomata i aon te aba. Inanon te Ne n Onaroka are i Eten, a maeka Atam ao Ewa inanon aroia n aki ataibwai. Ao a teimatoa n aroia n aki ataibwai, n akea “[irouia] te kimwareirei, bwa a aki ataa te karawawataaki; n aki karaoa ae raoiroi, ngkai a aki ataa te bure” (2 Nibwaai 2:23). Eng, n aron are kabwarabwara Riaai bwa, “e bwaka Atam bwa aonga n riki aomata; ao a riki aomata, bwa aonga ni karekea te kimwareirei” (2 Nibwaai 2:25; taraa naba Mote 5:10–11).
Ngkai ti tabe n ikawairake inanon te aonaaba ni kataaki, ti reiakina te kaokoro imarenan te raoiroi ao te buakaka man bwaai ake ti reireinaki iai ao man baike ti rinanona. Ti “katoonga maona, bwa [ti] aonga n ataia bwa ti na kakawakina ae raoiroi.” (Mote 6:55). E na reke te kimwareirei ngkana ti aki butimwaea maona ao n teimatoa n nim nakon raoiroina.
Kunea te Kimwareirei
Ibukin Ana tangira ae kororaoi ibukira, Tamara are i Karawa e ingainga n tibwaua Ana kimwareirei ae kororaoi nakoira, ngkai ao n akea tokina. Bon anne mai ibuakon Ana iango mai moana, n raonaki ma Ana babaire ni kakukurei ae moan te mimitong ao ana karea are Ana Riki Temanna n Nati bwa e na kabooira.
E aki kairoroa te kimwareirei ke te kakukurei te Atua bwa e na reke iroura, ma E reireiniira arora bwa ti na kangaa ni kunea. E tuangiira naba taabo ake aki kona n reke iai te kimwareirei—“te aro ae buakaka [e bon aki kona] ni karekea te kakukurei” (Aramwa 41:10). Inanon Ana tua Tamara are i Karawa ao e kaoti iai kawaira nakon te kimwareirei.
Beretitenti Russell M. Nelson e kabwarabwara n te aro aei:
“Aio bon te koaua ni koaua: Ngkai te aonaaba e kairooro bwa te mwaaka, te bwaibwai, kinaakira, ma kakukurein te rabwata anganiira te kukurei, ma a bon aki! A aki kona! Te bwai ae a kona ni karaoia bon te akea ma tii te kinono are e onea mwiin ‘te kakabwaia ma te aro ni kukurei irouia [naake] a kaawakin ana tua te Atua’ [Motiaea 2:41].
Te koaua bwa e rangi kakua riki bon ukoran te kukurei n taabo ake aki kona ni kuneaki iai! Ma e ngae n anne, ao ngkana ko kanimko ma Iesu Kristo ao ni karaoi mwakuri ni maiun tamneim ake a kainnanoaki bwa ko aonga n tokanikai iaon te aonaaba, bon tii Ngaia n akea riki, ae iai irouna te mwaaka n eutikorake man te aonaaba aei.”1
Ma ngaia are, te kimwareirei ae akea tokina e bon reke man kawakinan ana tua te Atua, ao a kuneaki ana tua te Atua n ana Euangkerio Iesu Kristo. Ma e a bon nakoira ara rinerine. Ngkana ti bwaka inanon ara tai ni mamaara ni kawakina te tua, ti konaa ni manga rairaki, n aki butimwaea maona, ao ni manga ukora raoiroina riki teuana te tai. Ana tangira te Atua e aki kainaomata te bure—bwa ngkana e kainaomataki, aiaron ae e iraeaki te motiraoi—ma n Ana Mwakuri ni Kamaiu, e karekea nakoira Iesu Kristo te kamaiuaki man ara bure:
“E taekinna … Amureki …bwa e bon koaua bwa te Uea e na roko ni kabooia ana botanaomata, ma e na aki roko ni kabooia i nanon aia bure, ma e na kabooia man aia bure.
“Ao iai mwaakana are e anganaki mai iroun te Tama bwa e na kabooia man aia bure ibukin aia rairannano; ngaia are e a tia ni kanakoia anera bwa a na tataekina rongorongon aron te rairannano, are e kairiri nakon mwaakan te Tia Kabomwi, nakon kamaiuan tamneia” (Ereman 5:10–11; e kairaki ma katuruturuana).
E taku Iesu:
“Ngkana kam kawakin au tua, ao kam maeka n tangirau; n ai arou ngkai I kawakin ana tua Tamau, ao I maeka n tangirana.
“I atongi baikai nako imi, ba e aonga n reke iroumi te kimwareirei ae titebo ma ae e reke irou, ao bwa e aonga ni kororaoi kimwareireimi” (Ioane 15:10–11).
Aio te bwai ae namakinna Riaai inanon miina ngke e katoonga uaan te kai ni kamaiu—are e tei ibukin ana tangira te Atua. Ao e taku, “ngke I a katoonga te uaanikai aei ao e kaonaki tamneiu n te kimwareirei ae moan te bati” (1 Nibwaai 8:12; taraa naba 11:21–23).
E kaota nakoira te kauoua ni kawai Riaai ibukin karekean te kimwareirei ni maiura ngke e taetae ni kangai, “Mangaia are, I a tangiria kaain au utu bwa a na katoonga naba [uaan] te kai” (1 Nibwaai 8:12).
Te Kai ni Kamaiu, iroun Kazuto Uota
Buokaia tabeman bwa ana Kunea te Kimwareirei
Ai aroia ana botanaomata te Uea ae Beniamina ngaira, ti “kaonaki ma te kimwareirei” ngkana ti kaitiakaki man ara bure ni karekea “namakinan te rau” (Motiaea 4:3). Ti kona n manga namakinna riki kaua ngkana ti karabaaba ara taratara n buokiia kaain ara utu ao temwaangina ni karekea te kimwareirei ao te rau are e a tia n reke iroum.
Ngke te kairake ngaia n ataeinimwaane, e a tia Aramwa n rinanon taian kakukurei aika kaaitara ana euangkerio Iesu Kristo. Imwiin kataetaeana iroun te anera, e a kona n tokanikai man te “mao” nakon te “raoiroi” man ana rairannano “ni karokoa kaniian matena” (Motiaea 27:28) ao n ana akoi te Tia Kamaiu. Ririrki imwiina, ao e a kukurei Aramwa n taekinna nakon natina te mwaane ae Ereman ni kangai:
Ao O, te kimwareirei teraa, ao te oota ae tamaroa teraa are I a nooria; eng, tamneiu e a onrake n te kimwareirei ae rianako n aron marakiu! …
“Eng, ao man te tai anne nua ngkai, I a tia ni beku n aki motirawa, bwa I aonga ni kairiia aomata nakon te rairannano; bwa I aonga ni kairiia bwa a na katoonga te kimwareirei ae rianako are I a tia ni katoonga. …
Eng, ao ngkai nooria, O natiu, te Uea e bon anganai te kimwareirei ae rianako n uaan au beku;
“Bwa ibukin te taeka ae [ana euangkerio Iesu Kristo] are e bon aki toki n tutuangai, nooria, a mwaiti ake a tia ni bungiaki mai iroun te Atua, man tia ni katoonga are I a tia ni katoonga” (Aramwa 36:20, 24–26).
N taekana teuana, ao e kakoaua Aramwa:
“Aio au kakatonga, bwa N na kona n riki bwa te bwai ni mwakuri i nanon bain te Atua bwa N na kairia aomata tabemwaang nakon te rairannano; ao aio kimwareireiu.
“Ao nooria, ngkana I nooria tariu aika a mwaiti bwa a bon raraoma raoi, man roko nakon te Uea ae Atuaia, ao ngkanne e kaonaki tamneiu n te kimwareirei” (Aramwa 29:9–10).
E nako Aramwa n taetaekina taekan te kimwareirei are namakinna ngkana iai aika tokanikai ni uouoti tamneia aomata n roko nakon Kristo:
“Ma I aki kimwareirei n nakoraoin au waaki n ti ngai, ma e onrake riki kimwareireiu ibukin nakoraoin aia waaki tariu [natin Motiaea mwaane], ake a nakon te aba are Nibwaai.
“Nooria, a tia ni beku korakora, ma ni kariki uaa aika a bati, ao tao korakora ra kanuangaia!
“Ao ngkanne, ngkana I iangoi nakoraoin aia waaki tariu ao e uotaki nako tamneiu, n te aro are e a kamaenakoaki ma te rabwata, ao n aei, are e a korakora iai au kimwareirei” (Aramwa 29:14–16).
Ti kona n kunea te kimwareirei naba aio ngkana ti tangiriia aomata ma “te nano ae itiaki ai aron ana tangira Kristo” (Moronaai 7:47; taraa naba kiibu 48), Tibwai koaua aika kaokaki ma ngaiia, ao ni kaoiia bwa na ikoikotaki ma aomata inanon te berita ae tabu.
O Tamau, iroun Simon Dewey
Kimwareirei ribuakon te Karawawataaki
Ti riai n aki maaku bwa taian kataaki ke kakawenako ake ti aitara ma ngaia ni maiura ae mamate aei a bon aki kona n totokoa ke n uruana te kimwareirei are iroura. Aramwa bon temanna te aomata ae rangi ni moanbwaiia aomata n ana beku ao n mena irarikiia n aia tai ni kainnano. E a tia ni kabureaki, e baki ao n taka inanon te tai ae maan, e oreaki, kaan bua maiuna, ao n teimatoa bwainingareana ao n aki kubaraki. Ao eng, e bane “ni kabwautaki n te kimwareirei are iroun Kristo” (Aramwa 31:38). Te korakai are rinanona Aramwa e bon karekea nakoina te kimwareirei ae korakora rimwii.
E kauringiira Beretitenti Nelson bwa te kimwareirei e bon irekereke ma te korakai are rinanona te Tia Kamaiu—ibukin te kimwareirei are kamenaki imwaina ao [E] kariaia bwa e na tauraki n te kaibangaki” (Ebera 12:2).
Iangoa anne! “N te aro bwa e na kona Ngaia n rinanon te taneiai ae kammaraki ae akea ae e a tia n rinanona iaon te aba, ara Tia Kamaiu e katurua te iango iaon te kimwareirei!
“Ao tera te kimwareirei are e kamenaaki Imatana? Koauana e kairaki ma te kimwareirei ni kaitiaki, kamarurung, ao ni kakorakoraira; te kimwareirei ni kaboan ara bure ibukiia ake a na rairinanoia; te kimwareirei ni karaoan ae riai ibukim ao ibukiu n okira te mweenga—n itiaki ao n tau—ni maeka ma ara Karo i Karawa ao ara utu.
“Ngkana ti katurua ara iango iaon te kimwareirei are e na roko nakoira, ke nakoia koraki ake ti tangiriia, tera ti kona n teimatoa ngkai n taraan rootakira, maraki, kakamaaku, inanonano, ke ae taraa ni kaangaanga?”2
Te kimwareirei ae reitinako e reke man ara teimatoa inanon ana euangkerio Iesu Kristo ao ni buokiia aomata ni karaoan naba anne. E reke iroura te Kimwareirei ae akea tokina ngkana ti maeka inanon ana tangira te Atua, kaawakin Ana tua ao ni karekea ana akoi te Tia Kamaiu. Inanon kawain te euangkerio, bon iai te kimwareirei inanon mwanangara ao iai naba te kimwareirei n te tokin te tai. Ana euangkerio Iesu Kristo bon te kawai ibukin karekean te kimwareirei ni katoa bong.
© 2024 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/19. Kariaiakaki rairana: 6/19. Rairan Rongorongo n te Riaona ni Katoa Namakaina, Beberuare 2024. Language. 19276 859