Jar Emakijkij n̄an Kōkajoor Jetōb eo Am̧

Jān Elder Ulisses Soares

Jān Doulul eo an Jon̄oulruo Rijilōk ro

Jej aikuji jetōbin kajoor n̄an kōnono ippān Jemdwōj Ilan̄, juon kōjeraam̧m̧an epād n̄an kōj aolep jikin im aolep iien.

Jaar en̄jake ad aolep kwōle m̧oktaļo̧k. Kwōle ej m̧ōtaan wāween eo ilo an ānbwinnid ba n̄an kōj ke eaikuj kōkajoor. Im n̄e jej kwōle, jejeļā ta eo jen kōm̧m̧ane—m̧ōn̄ā.

Jetōb eo ad aolep iien ej kōtļo̧k bwe jen jeļā n̄e jej aikuj jetōbin naajdik. Ak ej kalikkar an pidodo ļo̧k ad kowaane kwōle ilo jetōb jen kwōle ilo kanniōk.

Āinwōt an lōn̄ kain m̧ōn̄ā ko jemaron̄ kan̄n̄i n̄e jej kwōle, elōn̄ men ko jemaron̄ kōm̧m̧ani n̄an naajdik jetōb eo ad ekwōle. N̄an waanjon̄ak, jemaron̄ “kwojkwoj ioon naan ko an Kraist” (2 Nipai 32:3) ilo jeje ko rekwojarjar im jen naan ko an rikanaan ro. En makijkij ad pād ilo m̧ōnjar n̄an bōk m̧ōttan kwojkwoj eo (lale Katak im Bujen Ko 59:9). Jemaron̄ jerbal n̄an Anij im ro Nejin (lale Mosaia 2:17).

Ak ebar wōr juon unjen n̄an naajdik jetōb epād n̄an kōj aolep iien, ilo aolepen mour ko ad, jekdo̧o̧n jekjek rot ko ad. Jemaron̄ aolep iien kōnono ippān Jemedwōj Ilan̄ ilo jar.

“Im Aō eaar Ean̄den”

Ke rikanaan Inōs ekar kakidudu ilo bukon wōjke ko, eaar ļōmņak kōn “naan ko ekkutkut an kar ron̄ an [jemān] kōnono kōn mour indeeo, im kōn lan̄lōn̄ an ro doon.” En̄iin naan ko rekar “deļo̧n̄ ilo m̧wilaļ in buruō” (Inōs 1:3).

Kōnke Inōs ekar pād ilo juon mejatoto in jetōb, ekar en̄jake juon aikuj eļap: “Aō eaar ean̄den,” eaar ba (Inōs 1:4; naan ko kar kobaiktok).

Ta eo Inōs ekar kōm̧m̧ane ke ekar en̄jake jetōbin ean̄den (kwōle) in, menin eaikuj ke naajdik ilo jetōb? “Iaar bukwelōlō im̧aan aō Rikōm̧anm̧an,” eaar ba, “im iaar kūr n̄an e ilo jar ekajoor im akweļap n̄an jetōb eo aō” (Inōs 1:4).

En̄in ej jetōbin ean̄den (kwōle) eo an Inōs me ekar jar “aolepān raan eo … im ke bon̄on eo eaar itok iaar kotak wōt ainikiō bwe en tōpar lan̄ ko” (Inōs 1:4). Em̧ool, Anij ekar uwaake jar ko an im kar jeo̧rļo̧k an bōd. Inōs eaar en̄jake an bōd ko an jako. Ak n̄an naajdik jetōb eo an eaar jab bōjrak ijo.

Eaar jeļā bwe kōn kajoor in tōmak ilo Jisōs Kraist, n̄an an leļo̧k aolepen an ilo etan armej ro an—bar rikōjdāt ro an. Eaar kōm̧m̧ani bujen ko ippān Irooj im kar būki kallim̧ur ko jān E. Ālkin jar eo ekajoor an Inōs, eaar ilo̧k ilubwijin armej ro an im kanaan im kam̧ool kōn men ko ekar ron̄ im loi. (Lale Inōs 1:5–19.)

Ejjab aolep jar renaaj uwaak ilo juon wāween eo ekabwilōn̄lōn̄, ak en̄jake ko ad kōn jar emaron̄ in wōr tokjeer n̄an ukōt mour. Jemaron̄ jeļā jet katak ko raorōk jān en̄jake eo an Inōs kōn jar. N̄an waanjon̄ak:

Kajjieon̄ mour kōn gospel in emaron̄ jipan̄ kōj loe jetōbin ean̄den (kwōle) eo ad.
Jetōbin ean̄den (kwōle) eo ad emaron̄ kōm̧m̧an bwe jen bukwelōlō ilo bukwiid n̄an pukot jipan̄ an Jemedwōj Ilan̄.
Jar n̄an Jemedwōj Ilan̄ emaron̄ jipan̄ lōn̄aj jetōbin ean̄den (kwōle) eo ad—innām ko jet.
Jemaron̄ jar aolep jikin, aolep iien.
Jar emaron̄ jipan̄ kōj ukweļo̧k.
Jar emaron̄ kōkajoorļo̧k tōmak eo ad ilo Jisōs Kraist?
Jemaron̄ bōk juon ad make naan in kam̧ool bwe Jemedwōj Ilan̄ ej ron̄jake kōj im ej kea kōn kōj.
Naan in kam̧ool im kajoor eo jej būki ilo jar emaron̄ jipan̄ kōj n̄an jerbal im kōkajoorļo̧k ro jet.

En̄jake eo aō kōn Kajoor in Jar

Āinwōt Inōs, iaar jeļā jet iaan ejja katak ko wōt kōn en̄jake eo aō make. Jinō im jema raar kobatok ilo Kabun̄ eo an Jisōs Kraist im Armej ro Rekwojarjar ilo Raan Ko Āliktaa ke iaar juon ļaddik edik, im ikar peptaij ke ekar ralitōk aō iiō. Iaar aolep iien wōr aō en̄jake ko rem̧m̧an, ilo būruwō kōn Jemedwōj Ilan̄ im kōn Jisōs Kraist, gospel eo An ekar jepļaaktok, im Kabun̄ in An. Ak ekar jab m̧ae iien ekar 16 aō iiō ke iaar jar kōn m̧ool ko an men kein.

Bisop eo aō ekar kajjitōk ippa n̄an katakin kūlaaj in Jabōt Jikuuļ eo an Jodikdik ro. In kar kwaļo̧k kōn katak eo elmen ad maron̄ bōk juon naan in kam̧ool kōn gospel in ilo jar. Ijjitōn̄ in jān bisop eo aō ekar kōm̧m̧an bwe in lukkuun ļōmņak kōn naan in kam̧ool eo aō make. Iaar bōk iien n̄an ekkatak kōn Bok in Mormon im aolep iien iaar en̄jake ke Kabun̄ in ej m̧ool. Iaar baj wōt tōmak ilo Rilo̧mo̧o̧r Jisōs Kraist, ak iaar jab lukkuun bōk n̄an būruō kallim̧ur eo an Moronai eo ej waļo̧k ilo Moronai 10:4–5. Iaar jab jar kōn m̧ool eo an gospel in.

Ij keememej en̄jake eo ilo būruwō bwe n̄e inaaj katakin jodikdik rein elmen bōk juon naan in kam̧ool ilo jar, ij aikuj jar kōn juon aō make naan in kam̧ool. Aō eaar ean̄den (kwōle)—bōlen ilo juon wāween eo eoktak jān Inōs, ak iaar en̄jake juon aikuj ilo jetōb.

Ke iaar kōpooj katak eo, iaar bukwelōlō im leļo̧k aolepen būruwō n̄an Jemedwōj Ilan̄ bwe kapen m̧ool eo iaar en̄jake itulowa. Iaar jab aikuji jabdewōt menin bwilōn̄. Ak ke iaar kajjitōk ippān Irooj n̄e gospel in ej m̧ool, eaar itok ilo būruwō juon en̄jake em̧m̧an—edik, im emera ej kapen n̄an n̄a bwe em̧ool im bwe ij aikuj kōm̧m̧ane ta eo ij kōm̧m̧ane.

En̄jake eo eaar kanooj kajoor jon̄an iaar jab maron̄ in ba jabdewōt bwe iaar jab jeļā. Aolepen raan eo iaar lukkuun m̧ōņōņō. Kōļmenļo̧kjeņ eo aō pedped ioon men ko an jetōb me raar em̧m̧an ilo būruwō.

Ilo Jabōt eo juon, iaar jutak im̧aan jilu ak emān rijikuuļ ro m̧ōtta, ro raar aolep dik jen n̄a. Iaar kam̧ool n̄an er bwe Jemedwōj Ilan̄ enaaj uwaaki jar ko aer n̄e ewōr aer tōmak.

Uwaak in jar eo Elder Soares ekar bōke āinwōt juon ļaddik edik ekar kōtļo̧k bwe en kam̧ool—āinwōt juon mijenede (ilōn̄), juon baba im juon ļeo pālele, im juon Rijilōk—bwe Jemedwōj Ilan̄ ej uwaaki jar ko leļo̧k ilo tōmak.

Jān iien eo, naan in kam̧ool in eaar pād wōt ippa. Ekar jipan̄ eō kōm̧m̧ani kāālet ko, eļaptata ilo iien ko n̄e ij ioon apan̄ ko. Jar eo ilo raan eo, ippān kam̧ool ko jet iaar būki ilo iiō eo, raar kōm̧m̧an bwe in kam̧ool n̄an armej, ilo tōmak, bwe remaron̄ bōk uwaak jān Jemedwōj Ilan̄ eļan̄n̄e rej jar ilo tōmak. Menin ekar m̧ool ilo aō kam̧ool āinwōt kar juon mijenede, āinwōt juon ritōl an Kabun̄ in, juon baba im ļeo pālele, im āinwōt Rijilōk rainin.

N̄āāt im Ta eo n̄an Jar Kaki

Aaet, jejjab jar wōt n̄e jej kajoor ilo jetōb. Kōn menin, n̄āāt eo jej aikuj jar? Im ta eo jej aikuj jar kake? Uwaak eo ej aolep iien im kōn aolep men.

Anij ej Jemedwōj Ilan̄. Jeļā oktak in elmen ad jar. Ke Rikanaan Josep Smith ekar kwaļo̧k: “N̄an bōk juon jeļāļo̧kjeņ kōn Anij, jej jino jeļā elmen ad pukot E, im elmen ad kajjitōk n̄an bōk juon uwaak . … N̄e jej pojak n̄an itok n̄an E, Ej pojak in itok n̄an kōj.”¹

Jemedwōj Ilan̄ ej aolep iien pojak in ron̄jake kōj im kōņaan bwe jen jar n̄an E ilo emakijkij. Jej aikuj “Pepe ippān Irooj ilo aolep kōm̧m̧an ko [ad]” (Alma 37:37) im jar jibbon̄, rālep, im jota. Jej aikuj jar ilo m̧weeo, jikin jerbal, jikin jikuuļ—jabdewōt jikin ko jemaron̄ pād ie im ilo aolep kōm̧m̧an ko ad (lale Alma 34:17–26).

Jej aikuj jar ilo baam̧le ko ad (lale 3 Nipai 18:21). Jej aikuj jar “ilo ainikien im ilo būru[wōd], ilo im̧aan armej raņ im ilo make iaam̧” (Katak im Bujen Ko 81:3). Im “n̄e [jej] jab kūr n̄an Irooj, [jej aikuj] bwe būruwōd en obrak, jab jokwōd jān jar n̄an E otemjeļo̧k n̄an oņaake eo [ad], im barāinwōt n̄an oņaake an ro rej pād ipeļaa[kid]” (Alma 34:27). Im jej aikuj iien otemjej jar n̄an Jemād ilo etan Jisōs Kraist (lale 3 Nipai 18:19–20).

Pijain Josep Smith jān Walter Rane, eban kape

Kappukot Jemedwōj Ilan̄

Jemedwōj Ilan̄ ekōņaan kōjeraam̧m̧an kōj. Im Enaaj—n̄e jej kajjitōk. Rikanaan Josep Smith ekar kwaļo̧k, “Keememej bwe n̄e jejjab kajjitōk jeban bōk jabdewōt; kōn menin, kajjitōk ilo tōmak, im kwonaaj bōk kōjeraam̧m̧an ko Anij ej loe rekkar n̄an lewaj ioom̧.”²

Emakijkij in jar ko ad rej m̧ōttan eo eaorōk ilo wāween karōke n̄an naajdik jetōb ko ad rekwōle. Kōnono ippān Anij ilo jar ej pād im ilo aolep jikin im aolep iien.

Juon iaan eoon ko rem̧m̧an ippa rej kwaļo̧k wāween ad kepaak Jemedwōj Ilan̄ ilo ad bukwelōlō ilo jar: “Kwōn kōttāik eok; im Irooj am Anij enaaj tōl eok kōn peim, im lewōj n̄an eok uwaak n̄an jar ko am” (Katak im Bujen Ko 112:10). N̄e jej ettā im pokake, Jemedwōj Ilan̄ enaaj kōjeraam̧m̧an kōj. E enaaj tōl kōj ilo pein. E enaaj im̧we kōj n̄an ia eo n̄an etal ie im ta eo n̄an kōm̧m̧ane. E enaaj uwaaki jar ko ad ekkar n̄an Ankilaan, wāween, iien, im em̧ool kōn jeļā ta eo em̧m̧an n̄an kōj.

Jej aikuj keememej menin im kaorōk iien ko rem̧m̧an n̄an pukot aiboojoj eo an Anij n̄an būki kōjeraam̧m̧an ko ilo Pein.