“Believing in Christ before He Comes Again,” For the Strength of Youth, Apr. 2024.
ຂ່າວສານປະຈໍາເດືອນ For the Strength of Youth, ເດືອນເມສາ 2024
ເຊື່ອໃນພຣະຄຣິດກ່ອນທີ່ພຣະອົງຈະສະເດັດມາ ອີກຄັ້ງ
ຊາວນີໄຟມີສັດທາກ່ອນພຣະຜູ້ຊ່ວຍໃຫ້ລອດສະເດັດມາ, ແລະ ເຮົາກໍສາມາດມີສັດທາກ່ອນທີ່ພຣະອົງຈະສະເດັດມາອີກຄັ້ງ.
ເຈົ້າເຄີຍຄິດບໍວ່າ ການເຊື່ອໃນພຣະຜູ້ຊ່ວຍໃຫ້ລອດ ກ່ອນ ພຣະອົງສະເດັດມາສູ່ແຜ່ນດິນໂລກຈະເປັນແນວໃດ? ຊາວນີໄຟໃນສະໄໝບູຮານຕ້ອງເຮັດແບບນັ້ນ—“ຈົ່ງມຸ້ງຫາພຣະເມຊີອາ, ແລະ ເຊື່ອໃນພຣະອົງທີ່ຈະສະເດັດມາ ຄືກັນກັບພຣະອົງເປັນມາແລ້ວ” (ເຈຣອມ 1:11).
ໃນປະຈຸບັນ, ເຮົາມີບັນທຶກທາງພຣະຄຳພີ ແລະ ປະຫວັດສາດ ທີ່ເປັນພະຍານວ່າພຣະເຢຊູຄຣິດໄດ້ຊົງພຣະຊົນ, ໄດ້ສິ້ນພຣະຊົນ, ແລະ ໄດ້ຟື້ນຄືນພຣະຊົນອີກຄັ້ງ. ເຮົາເຊື່ອວ່າພຣະຜູ້ຊ່ວຍໃຫ້ລອດໄດ້ສະເດັດມາແລ້ວ. ແຕ່ເຮົາກໍຍັງເຊື່ອວ່າ ພຣະຜູ້ຊ່ວຍໃຫ້ລອດຈະສະເດັດມາ ອີກຄັ້ງ.
ກ່ອນພຣະເຢຊູຄຣິດສະເດັດມາ, ຊາວນີໄຟມີສັດທາວ່າຈະ:
ໄດ້ຮັບການໃຫ້ອະໄພຈາກບາບຂອງພວກເຂົາ.
“ຜູ້ໃດກໍຕາມທີ່ເຊື່ອວ່າ ພຣະຄຣິດຈະສະເດັດມາ, ຜູ້ນັ້ນຈະໄດ້ ຮັບການປົດບາບຂອງພວກເຂົາ, ແລະ ປິຕິຍິນດີດ້ວຍຄວາມຊື່ນຊົມຢ່າງຍິ່ງ, ຄືກັບວ່າພຣະອົງໄດ້ສະເດັດມາໃນບັນດາພວກເຂົາແລ້ວ” (ໂມໄຊຢາ 3:13; ເນັ້ນຄຳເນີ້ງ).
ໃຫ້ອະໄພຕົວເອງ.
“ແລະ ສຸລະສຽງມາເຖິງຂ້າພະເຈົ້າ, ມີຄວາມວ່າ: ເອໂນດ, ບາບຂອງເຈົ້າໄດ້ຮັບການອະໄພໃຫ້ແລ້ວ. … ດັ່ງນັ້ນ, ຄວາມຜິດຂອງຂ້າພະເຈົ້າຈຶ່ງຖືກກວາດລ້າງໄປ. ແລະ ຂ້າພະເຈົ້າໄດ້ທູນຖາມວ່າ: ຂ້າແດ່ພຣະອົງເຈົ້າ, ມັນເປັນໄປໄດ້ແນວໃດ? ແລະ ພຣະອົງໄດ້ກ່າວກັບຂ້າພະເຈົ້າວ່າ: ເພາະສັດທາຂອງເຈົ້າໃນພຣະຄຣິດ, ຜູ້ທີ່ເຈົ້າບໍ່ເຄີຍໄດ້ຍິນ ຫລື ໄດ້ເຫັນມາກ່ອນ. ແລະ ຫລາຍປີຈະຜ່ານໄປກ່ອນທີ່ພຣະອົງຈະສະແດງພຣະອົງເອງໃຫ້ປະຈັກໃນເນື້ອໜັງ; … ສັດທາຂອງເຈົ້າເຮັດໃຫ້ເຈົ້າບໍລິບູນແລ້ວ” (ເອໂນດ 1:5–8; ເນັ້ນຄຳເນີ້ງ).
ປະຕິບັດການມະຫັດສະຈັນ.
“ພວກເຮົາຮູ້ຈັກພຣະຄຣິດມາກ່ອນ, ແລະ ພວກເຮົາມີຄວາມຫວັງໃນລັດສະໝີພາບຂອງພຣະອົງມາໄດ້ຫລາຍຮ້ອຍປີແລ້ວ ກ່ອນທີ່ພຣະອົງຈະສະເດັດມາ. … ເຖິງຂະໜາດທີ່ພວກເຮົາສາມາດ ບັງຄັບບັນຊາໃນພຣະນາມຂອງພຣະເຢຊູໄດ້ແທ້ໆຈົນວ່າຕົ້ນໄມ້, ຫລື ພູເຂົາ, ຫລື ຄື້ນທະເລກໍເຊື່ອຟັງເຮົາແທ້” (ຢາໂຄບ 4:4, 6; ເນັ້ນຄຳເນີ້ງ).
ໄດ້ຮັບການເປີດເຜີຍ.
“ມີຫລາຍຄົນທີ່ມີສັດທາອັນແຮງກ້າ, ແມ່ນແຕ່ກ່ອນພຣະຄຣິດສະເດັດມາ, ຜູ້ ບໍ່ສາມາດຖືກກີດກັນຈາກພາຍໃນມ່ານ, ແຕ່ໄດ້ເຫັນດ້ວຍຕາຂອງຕົນເອງ” (ອີເທີ 12:19; ເນັ້ນຄຳເນີ້ງ).
ກ່ອນທີ່ພຣະເຢຊູຄຣິດຈະສະເດັດມາອີກຄັ້ງ, ເຮົາ ສາມາດມີສັດທາວ່າຈະ:
ໄດ້ຮັບການໃຫ້ອະໄພ, ໃຫ້ອະໄພຕົວເອງ, ປະຕິບັດການມະຫັດສະຈັນ, ແລະ ຮັບການເປີດເຜີຍ (ເໝືອນດັ່ງຊາວນີໄຟ).
ກຽມຕົວເອງສຳລັບການສະເດັດມາຄັ້ງທີສອງຂອງພຣະອົງ.
ຂະນະທີ່ເຮົາພະຍາຍາມຮັກສາພັນທະສັນຍາຂອງເຮົາ, ເຮົາກຳລັງກຽມພ້ອມທີ່ຈະມີຊີວິດຢູ່ໃນອານາຈັກຊັ້ນສູງ. “ເພາະຈົ່ງເບິ່ງ, ຊີວິດນີ້ເປັນເວລາສຳລັບມະນຸດທີ່ຈະຕຽມພ້ອມເພື່ອພົບກັບພຣະເຈົ້າ; ແທ້ຈິງແລ້ວ, ຈົ່ງເບິ່ງ ວັນແຫ່ງຊີວິດນີ້ເປັນວັນສຳລັບມະນຸດທີ່ຈະສະແດງຜົນງານຂອງຕົນເອງ” (ແອວມາ 34:32).
ກຽມໂລກສຳລັບການສະເດັດມາຂອງພຣະອົງ.
ເຮົາໄດ້ຖືກເຊື້ອເຊີນໂດຍປະທານຣະໂຊ ເອັມ ແນວສັນ ໃຫ້ເປັນສ່ວນໜຶ່ງຂອງ “ວຽກງານທີ່ຍິ່ງໃຫຍ່ທີ່ສຸດຢູ່ເທິງແຜ່ນດິນໂລກ”—ການເຕົ້າໂຮມອິດສະຣາເອນ. “ພຣະບິດາເທິງສະຫວັນຂອງເຮົາໄດ້ສະຫງວນດວງວິນຍານທີ່ດີເລີດທີ່ສຸດຂອງພຣະອົງ—ບາງທີ, ຂ້າພະເຈົ້າວ່າ, ທີມທີ່ຍອດຍ້ຽມທີ່ສຸດຂອງພຣະອົງ—ສຳລັບໄລຍະສຸດທ້າຍ. ດວງວິນຍານທີ່ດີເລີດເຫລົ່ານັ້ນ—ນັກກິລາທີ່ຍອດຍ້ຽມເຫລົ່ານັ້ນ, ວິລະຊົນເຫລົ່ານັ້ນ—ຄື ພວກເຈົ້າ ນັ້ນເອງ!”1
ມີຄວາມຫວັງໃນຊ່ວງເວລາທີ່ຫຍຸ້ງຍາກລຳບາກ.
ເມື່ອພຣະຜູ້ຊ່ວຍໃຫ້ລອດສະເດັດມາອີກຄັ້ງ, ຄົນຊອບທຳຈະມີຊີວິດຢູ່ຢ່າງສະຫງົບສຸກ. ພຣະຜູ້ຊ່ວຍໃຫ້ລອດຈະປົກຄອງ, ແລະ ຄວາມບໍ່ຍຸດຕິທຳຈະຖືກໃຫ້ເຮັດຖືກຕ້ອງ. “ເພາະພຣະຜູ້ເປັນເຈົ້າຈະສະຖິດຢູ່ໃນທ່າມກາງພວກເຂົາ, ແລະ ລັດສະໝີພາບຂອງພຣະອົງຈະຢູ່ເທິງພວກເຂົາ, ແລະ ພຣະອົງຈະເປັນກະສັດຂອງພວກເຂົາ ແລະ ເປັນຜູ້ໃຫ້ກົດຂອງພວກເຂົາ” (ຄຳສອນ ແລະ ພັນທະສັນຍາ 45:59).
ໄວ້ວາງໃຈໃນການຟື້ນຄືນຊີວິດ.
ມະນຸດທັງປວງຈະຟື້ນຄືນຊີວິດ. ເຮົາຈະມີຮ່າງກາຍທີ່ສົມບູນ ແລະ ອະມະຕະ. ເຮົາສາມາດເຫັນຄົນທີ່ເຮົາຮັກຜູ້ໄດ້ຕາຍໄປແລ້ວອີກຄັ້ງ. “ວິນຍານກັບຮ່າງກາຍຈະຮ່ວມເຂົ້າກັນອີກໃນຮູບລັກສະນະອັນສົມບູນຂອງມັນ; ທັງແຂນຂາ ແລະ ຂໍ້ຕໍ່ຈະກັບຄືນສູ່ໂຄງຮ່າງອັນຖືກຕ້ອງຂອງມັນ, ເໝືອນດັ່ງທີ່ພວກເຮົາເປັນຢູ່ໃນເວລານີ້” (ແອວມາ 11:43).
ຊາວນີໄຟໃນສະໄໝບູຮານມີສັດທາໃນພຣະຜູ້ຊ່ວຍໃຫ້ລອດກ່ອນທີ່ພຣະອົງສະເດັດມາ. ເຮົາສາມາດມີສັດທາວ່າພຣະຜູ້ຊ່ວຍໃຫ້ລອດຈະສະເດັດມາ ອີກຄັ້ງ—ເມື່ອ “[ເຮົາ] ເຫັນ [ພຣະອົງ] ໃນໝູ່ເມກແຫ່ງຟ້າສະຫວັນ, ຫຸ້ມຫໍ່ດ້ວຍອຳນາດ ແລະ ລັດສະໝີພາບອັນຍິ່ງໃຫຍ່” (ຄຳສອນ ແລະ ພັນທະສັນຍາ 45:44; ເບິ່ງ ກິດຈະການ 1:11 ນຳອີກ). ການທີ່ຮູ້ວ່າພຣະອົງຈະສະເດັດມາອີກຄັ້ງປ່ຽນແປງສິ່ງທີ່ເຈົ້າຈະເຮັດໃນມື້ນີ້ແນວໃດ?
© 2024 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, April 2024. Language. 19353 331