Mukenji wa ku Ngondu wa Liahona, Ngondu Muitanu 2024
Tusankayi bua Dipa dia Nsapi ya Buakuidi
Nsapi ya buakuidi idi ilombola mushindu kayi udi buakuidi bua Nzambi mua kuikala buenzekibua bua kutuala tuipatshila tua Nzambi ne kubenesha aba bonsu badi bitaba lumu luimpa lupingajilula.
Bana betu baluma ne bakaji, lelu ndituka dia kuvuluka bua Mulombodi Mukulu Dallin H. Oaks ne mema. Bidimu 40 bikadi bipita, mu matuku 7 Ngondu Muinayi, 1984, patuvua batuibua panda mu Mpuilu wa Bapostolo Dikumi ne Babidi. Tuvua basanka mu mpungilu munena yonsu ne yonsu katshia ku dituka adi, biangata ne ewu. Tuvua kabidi babeneshibua ne dipumukibua dia Nyuma. Ndi ntekemena ne nenuambulula kulonga kua mikenji ya mpungilu ewu mu ngondu ilualua.
Royaume-Unis
Pamvua muledibua, kuvua ntempelo isambombo ivua mu mudimu mu Ekelezia—umua mu St. George, Logan, ne Salt Lake City, Utah; ne bumudi mu Cardston, Alberta, Canada; ne Laie, Hawaii. Ntempelo ibidi ya kumpala yakenza mudimu wa tshitupa mu Kirtland, Ohio, ne Nauvoo, Illinois. Muvua tshisumbu tshikongakaji tshia bidimba tshiya ku wesete, Bansantu bavua basakibua bua kushiya panyima ntempelo eyi ibidi.
Ntempelo wa Nauvoo uvua mubutudibua kudi mudilu wa mubutudi. Uvua muibakilula ne mujidila kudi Mulombodi Mukulu Gordin B; Hincley. Ntempelo wa Kirtland uvua munyangibua kudi bena lukuna ba Ekelezia. Pashisha, ntempelo wa Kirtland uvua muangatshibua kudi Community of Christ, uvua muikala muena nenda bua bidimu biabungi.
Ngondu mushala tuvua bamanyisha ne Ekelezia wa Yezu Kilisto wa Bansantu ba Matuku a Ndekelu musumba Ntempelo wa Kirtland, ne miaba yabungi ya bivulukidi mu Nauvoo. Tudi tuanyisha bikola diyukilangana dia pa bantu ne dia mushinga dituvua nadi ne balombodi ba Community of Christ didi difikisha ku dipetangana.
Ntempelo wa Kirtland
Ntempelo wa Kirtland udi ne mushinga munene mutamba mu dipinguluja dia lumu luimpa lua Yezu Kilisto. Mianda yabungi idi mienzeka momu ikavua miamba ku nyuma kukadi bidimu binunu ne ivua ya mushinga bua Ekelezia mupingajilula wa Mukalenga kukumbaja bukenji buenda bua matuku a ndekelu.
Umua waku mianda eyi ya mushinga wakafika mu Dialumingu dia Pasaka dia, 3 Ngondu Muinayi, 1836. mu dituku adi, Joseph Smith ne Oliver Cowdery kumona bitupa bia madimueshi a pabuawu. Diambedi, Mukalenga Yezu Kilisto wakamuenekibua. Muambi wa kafunda ne “Mesu a Mukalenga avua bu ludimi lua kapia; nsuki ya ku mutu kuenda ivua mitoka bu neje mene; mpala wenda uvua umueka mutamba bukenka bua dîba; ne dîyi dienda diakadi bu tshiona tshia mâyi abungi.”
Mu didimuesha edi, Mukalenga wakajadika bumuntu buenda. Wakamba, “Ndi mbangilu ne ndekelu; Ndi udi ne moyo, Ndi uvua mushipibua; Ndi munuakuidi kudi Tatu.”
Pashisha Yezu Kilisto wa kamanyisha ne Uvua muitaba nzubu wenda ne muenza dilaya edi ditamba bunena: “Nendimuenesha kudi bantu bandi mu lusa mu nzubu ewu.”
Dilaya edi dia mushinga didi bua ntempelo yonsu mujidibua lelu. Ndi nkubikila bua kunana meji ku tshidi mulayi wa Mukalenga umvuija bueba nkayeba.
Panyima pa didimuenesha dia Mukalenga, Mosa wakamuenekibua. Mosa wakambika pa Joseph Smith nsapi ya kusangisha Isalela ne dipingana dia bisamba dikumi.
Pakakangibua tshimônyi etshi, “Elisha wakamueneshibua, ne wakafila tshikondu tshia lumu luimpa lua Abalahama” kudi Joseph.
Pashisha muambi Eliya wakamuenekibua. Dimuenekibua dienda divua diuwuja mulayi wa Malaki ne kumpala kua Dilua Dibîdi, Mukalenga neatuma Eliya bua “kukudimuna mutshima wa batatu kudi bana, ne mutshima wa bana kudi batatuabu.” Eliya wakambika nsapi ya bukola bua disuika pa Joseph Smith.
Temple Square
Kabiena bikumbana bua kuimanyina pa buatshinyi bivua ne mushinga bua nsapi eyi kuikala mipingajibua pa buloba kudi batumibua basatu ba ku diûlu ku buludiki bua Mukalenga. Nsapi ya buakuidi idi yenza bukokeshi ne bukola bua bulombodi bukulu. Nsapi ya buakuidi idi ilombola mushindu kayi udi buakuidi bua Nzambi mua kuikala buenzekibua bua kutuala tuipatshila tua Mukalenga ne kubenesha aba bonsu badi bitaba lumu luimpa lupingajilula lua Yezu Kilisto.
Bidi bia mushinga bua kumanya ne kumpala kua dilongolola dia Ekelezia, batumibua ba ku diûlu bavua bambika buakuiki bua Alona ne bua Melekisedeke pa Muambi Joseph ne wakapeshibua nsapi ya buakuidi bonsu bubidi. Nsapi eyi yakapesha Joseph Smith bukokeshi bua kulongolola Ekelezia mu 1830.
Pashisha mu Ntempelo wa Kirtland mu 1836, diambika dia nsapi eyi isatu ya buakuidi—bumudi, nsapi ya kusangisha Isalela, nsapi ya lumu luimpa lua Abalahama, ne nsapi ya bukola bua kusuika—ivua ne mushinga. Nsapi eyi ivua mipesha Joseph Smith bukokeshi—ne Balombodi bonsu ba Ekelezia wa Mukalenga badi bamulonda—bua kusangisha Isalela ku nseka yonsu ibidi ya tshilamba, bua kubenesha bana bonsu ba tshipungidi ne mabenesha onsu a Abalahama, bua kujadika kupitshila ku milulu ya buakuidi ne bipungidi bia buakuidi, ne bua kusuika mêku bua tshiendelela. Bukola bua nsapi eyi ya buakuidi budi kabuyi ndekelu ne bukemesha.
Ela meji pa muvua mua kuikala moyo weba mushilangana bu nsapi ya buakuidi kayivua mipingajilula pa buloba to. Bu kakuyi nsapi ya buakuidi, kuvua mua kuikala muambikibua to ne bukola bua Nzambi. Bu kakuyi nsapi ya buakuidi, Ekelezia uvua amu mua kusadila bu tshibambalu tshia dilongesha tshia mushinga ne tshiambuluishi kakuyi bukuabu bualu to. Bu kakuyi nsapi ya buakuidi, nasha umua wa kutudi kavua mua kupeta milulu ya mushinga ne bipungidi bidi bitupepejela bua kuikala batuangajibua ne bidimba bietu bia dîku bua tshiendelela ne kusomba pashisha ne Nzambi.
Nsapi ya buakuidi idi ifila dishilangana pankatshi pa Ekelezia wa Yezu Kilisto wa Bansantu ba Matuku a Ndekelu ne bibambalu bionsu pa buloba. Bibambalu bikuabu biabungi bidi ne bua kuakaja moyo weba biakana apa mu tshifuaka. Kadi kakuena tshibambalu tshikuabu tshidi mua ne netshiludika moyo weba panyima pa lufu.
Nsapi ya buakuidi idi itupesha bukokeshi bua kutantshisha mabenesha onsu malaya kudi Abalahama kudi baluma ne bakaji bonsu badi balama bipungidi. Mudimu wa ntempelo udi utuala mabenesha â a mushinga kudi bana bonsu ba Nzambi, nansha muaba anyi tshikondu tshivuabu ne moyo anyi pindiewu padibu ne moyo. Tusankayi bonsu bualu nsapi ya buakuidi idi kabidi pa buloba!
Kenya
Ndi nkubikila mua uteya ntema ku mamanyisha asatu adi alonda â:
-
Disangisha dia Isalela didi tshijadikilu ne Nzambi munanga onsu wa ku bana benda muaba onsu.
-
Lumu luimpa lua Abalahama ludi tshijadikilu tshikuabu ne Nzambi munanga bana benda bonsu muaba onsu. Udi ubikila bonsu bua kulua kudiye—“bafika ne batoka, bapika ne badikadila, baluma ne bakaji; … bonsu badi momumua kudi Nzambi.”
-
Bukola bua kusuika budi tshijadikilu tshia bunzambi bua mushindu udiye munanga bana benda bonsu muaba onsu ne mujinga yonsu wa kubobu asungula bua kupingana kudiye.
Nsapi ya buakuidi mipingajilula kudi Muambi Joseph Smith mibikumbaja bua ewu yonsu muluma anyi mukaji udi ulama bipungidi bua kusanka ne bipeta bia nkaya bia nyuma. Apa kabidi, tudi ne biabungi bitudi bua kulonga pa malu a tshijila a Kirtland.
Disambila dia dijidila Ntempelo wa Kirtland dia Joseph Smith didi ditulongesha pa mushindu udi ntempelo utukolesha mu nyuma bua kuikala bakumbana bua kuambula ntantu mikola ya mu moyo. Ndi nukankamika bua kubala disambila adi, difunda mu Dilongesha ne Bipungidi tshitupa 109. Disambila dia kujidila, divua dipetshibua ku dibuluibua, didi dilongesha ne ntempelo udi “nzubu wa disambila, nzubu wa kujila biakudia, nzubu wa ditabuija, nzubu wa kulonga, nzubu wa butumbi, nzubu wa bulongama, nzubu wa Nzambi.”
Lista ewu wa ngikadilu udi mutamba diumvuija pa ntempelo. Udi ne mulayi pa biafikila aba bonsu padi basadila ne bakukuila mu nzubu wa Mukalenga. Badi ne mua kupeta mandamuna ku disambila, dibuluibua dia nkaya, ditabuija dinena, bukola, busambi, dimanya didi ditanta, ne bukola budi budiunda.
Kupitshisha diba mu ntempelo nekukuambuluisha bua kuela meji ku bintu bia mu diûlu ne kupeta dimanya dia tshiwudi, uwudi mua kulua, ne luidi lua moyo uwudi mua kupeta bua tshiendelela. Ditamba kukukuilla mu ntempelo nedishidimuna mushindu uwudi udimona ne mushindu uwudi mua kudibuinka mu dilongolola dimpa dia Nzambi. Ndi nulaya ne
Tudi kabidi balayibua ne mu ntempelo tudi mua “kupeta tshiuwidi tshia Nyuma wa Tshijila.” Fuanyikija tshidi mulayi ewu umvuija mu miaku ya kuikala mukumbana bua kupeta dibuluila dia bunzambi bua muntu udi ukeba ne moyo mujima bulela bua tshiendelela.
Tudi balongeshibua ne aba bonsu badi bakukuila mu ntempelo nebapeta bukola bua Nzambi ne banjelo nebikala ne “mudimu wa kubakuba.” Mushindu kayi udibi bidiundisha lulamatu lueba bua kumanya ne, bu muambikibua muluma anyi mukaji udi muvuadikibua ne biluilu bionsu bia nzambi, kuena nkayeba to mu ntatu ya mu moyo emu. Dikima kayi didibi bikupesha bua kumanya ne banjelo nebakuambuluisha bushuwa?
Bua kujikija, tudi balayibua ne “tshisumbu tshia bantu benzedianganyi ba bubi” katshia kuikala ne bukola pa mutu pa aba badi bakukuila mu nzubu wa Mukalenga.
Equateur
Diumvua dia bipeta bia nyuma bifidibua mu ntempelo didi dia mushinga kudi umua yonsu wa kutudi lelu.
Bana betu baluma ne bakaji, etshi mulayi wanyi. Kakuena tshintu tshiakuambuluisha bikola bua kukuata ku mulonda wa tshiamua amu dikukuila mu ntempelo misangu yonsu padi mishindu yeba ikuitabila. Kakuena tshintu tshiakukuba bikola pawatutakena ne midima ya pa buloba. Kakuena tshintu tshia kankamika bujadiki bueba bua Mukalenga Yezu Kilisto ne Bupikudi Buenda anyi kukuambuluisha bua kumvua dilongolola dienda bimpa bikola. Kakuena tshintu tshiatalaja nyuma weba bimpa diba dia kusama. Kakuena tshintu tshiakangula diûlu bimpa. Nansha tshimua!
Ntempelo udi tshibi ku mabenesha manena adi Nzambi nawu mu diyeba bua ewu yonsu wa kutudi, kibualu kayi ntempelo udi muaba umua pa buloba utudi mua kupeta mabenesha onsu malayibua kudi Abalahama. Kibualu kayi tudi tuenza bionsu ne bukola buetu, mu buludiki bua Mukalenga, bua kutamba kufikisha mabensha a ntempelo kudi bidimba bia Ekelezia. Mpidiewu, tudi ne disanka bua kumanyisha ne tudi ne bulongolodi bua kuibaka ntempelo mipia-mipia mu imua ya miaba 15 idi ilonda eyi:
-
Uturoa, Polynésie Francaise
-
Chihuahua, Mexique
-
FlorianĂłpolis, Brezil
-
Rosario, Argentine
-
Edimbourg (Ecosse)
-
Brisbane (Australie)
-
Victoria (Colombie Britannique)
-
Yuma (Arizona)
-
Houston, (Texas, Etats-Unis)
-
Des Moines (Iowa, Etas-Unis)
-
Cincinnati, Ohio
-
Honolulu, Hawaii
-
West Jordan, Utah
-
Lehi, Utah
-
Maracaibo, Venezuela
Bana betu baluma ne bakaji, Ndi njadika ne esthi tshidi Ekelezia wa Yezu Kilisto wa Bansantu ba Matuku a Ndekelu. Udi ku mutu kua Ekelezia wenda. Tudi bayidi benda.
Tusankayi mu dipinguluja dia nsapi ya buakuidi, idi yenza bua wewa ne mema tusankila mabenesha onsu a nyuma atudi nawu dijinga ne bakumbana mua kupeta. Ndi njadika nunku mu dina dia Yezu Kilisto, amena.
© 2024 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, May 2024. Tshiluba. 19285