Oli Bin Singaotem Yumi blong Mekem Gud

I Kam long Elda Ronald A. Rasband

Blong Kworom blong Olgeta Twelef Aposol

Yumi bildimap kingdom blong God taem yumi givim seves long ol narafala man, leftemap laet blong yumi, mo stanap from fridom blong relijin.

Gidion i bin save se i ol giaman doktrin taem we hem i bin harem olgeta. Hem i bin harem hemia bifo long King Noa mo ol pris blong hem—ol pris we “oli gat hae tingting long hat blong olgeta” mo we “oli sapotem olgeta long les blong olgeta, mo long fasin blong wosipim ol aedol blong olgeta, mo long fasin ia blong olgeta blong slip olbaot, tru long ol takis we king Noa i putum long ol pipol blong hem” (Mosaea 11:5–6).

Samting we i moa nogud i we, King Noa i bin mekem se oli bin kilimded profet Abinadae mo i lukaotem blong smasem nogud Alma mo ol konvet blong hem (luk long Mosaea 17; 18:33–34). Blong putum wan en long ol fasin nogud ia, Gidion i promes blong kilimded king, be hem i nomo kilim king i ded from ami blong Ol Man blong Leman we oli kam insaed long boda blong graon (luk long Mosaea 19:4–8).

Afta, Gidion hem i bin talemaot stret se ol pris blong Noa oli bin stilim ol 24 gel blong Ol Man blong Leman. Hem i bin luk ol profesi blong Abinadae i bin hapen agensem ol pipol ia from oli no bin wantem blong sakem sin. (Luk long Mosaea 20:17–22 Hem i bin helpem ol pipol blong Limhae blong oli go fri, aot long han blong Ol Man blong Leman (luk long Mosaea 22:3–9).

Naoia we i hem i kam olfala, Gidion i fesem, tugeta, fasin blong gat hae tingting mo fasin nogud, be bakegen hem i stanap agensem Nehor, man we i bin statem fasin blong giaman pris long medel blong ol pipol ia. Nehor i bin “go agensem jos” mo i stap traem blong lidim ol pipol oli go lus. (Luk long Alma 1:3, 7, 12; mo luk tu long 2 Nifae 26:29.)

Blong stap yusum toktok blong God olsem wan tul blong faet blong hem, strongfala mo fetful Gidion i bin wonem Nehor from fasin nogud blong hem. Nehor i bin kros, nao i atakem mo i kilimded Gidion wetem naef blong faet blong hem. Luk long Alma 1:7–9 Mo hem ia i bin en blong dei blong “wan stret mo gud man” we i bin “mekem plante gudfala samting long medel blong olgeta pipol ia.” (Alma 1:13).

Long ol las dei we yumi stap laef long hem, i givim yumi plante janis blong save kam olsem Gidion blong stap olsem “wan tul long ol han blong God” (Alma 1:8) blong stap “givim seves” (Mosaea 22:4) long ol narafala man, stanap from fasin we i stret mo gud, mo stanap strong agensem ol samting we i wantem spolem fridom blong yumi blong wosipim mo mekem ol wok blong God. Taem yumi folem fetful eksampol blong Gidion, yumi save mekem plante gudfala samting.

Kam Tugeta Blong Givim Seves

Olgeta long Fas Presidensi i bin talem “Olsem ol man blong folem [Sevya], yumi lukaot oltaem blong lavem God mo olgeta man raon long wol,”. “Jos Ia blong Jisas Kraes blong Ol Lata-dei Sent i wantem tumas blong blesem ol narafala man mo helpem olgeta we oli stap long nid. Yumi gat blesing ia blong gat ol skil, ol risos, mo wol koneksen we yumi save trastem blong i karemaot ol tabu wok ia.”¹

Mi glad tumas long fasin blong no stap selfis long taem blong givim seves mo wok blong givhan we ol memba blong Jos oli stap givim long ol tempol blong yumi mo ol wod, ol branj mo ol stek blong olgeta. Mi glad tumas se ol memba blong Jos oli givim seves long plante komuniti, long saed blong edukesen, mo ol oganaesesen we oli stap helpem ol man we oli stap long nid mo blong oli pat long taosen yumaniterian projek blong evri yia, we oli volontia blong milian aoa long kolosap 200 kantri mo long ol stet.²

Long wan wei Jos i stap putumaot ol janis blong givim seves long sam kantri hem i tru long JustServe.org. Jos i sponsa be hem i stap long eniwan we i wantem blong blesem ol narafala man, JustServe.org “i karem i kam tugeta ol nid blong komuniti volontia wetem ol volontia” we oli “stap mekem kwaliti blong laef i kam antap insaed long komuniti.”³

Jos mo ol memba blong hem oli wok tugeta tu wetem ol seves oganaesesen truaot long wol. Jos, i talem tangkyu long ol memba blong hem, oli bin “ kontribiut bigwan long Red Kros we i stap helpem ol man we oli nidim blad long 2022.” Moa long hem ia, Jos i jes givimaot wan donesen blong $8.7 milian i go long Red Kros.⁴

Jos i joen wetem ol oganaesesen blong karem ol klin wota mo ol projek blong fasin blong stap klin long saed blong helt i go long ol eria raon wol. Long 2022, Jos i tekpat long ol 156 projek olsem.⁵ Mo tu mifala i wok tugeta wetem mo kontribiut long ol narafala bisnis we i stap helpem ol pikinini blong God we oli stap safa.⁶

“Taem yumi joenem ol han blong givim seves long ol man we oli stap long nid,” Presiden Henry B. Eyring, Seken Kaonsela long Fas Presidensi i talem “Lod i mekem hat blong yumi i kam wan.”⁷

Leftemap Laet blong Yufala

Olsem ol disaepol blong Sevya, yumi blesem ol neba blong yumi taem yumi kipim olgeta kavenan blong yumi mo laef folem laef ia blong Kraes. Buk blong Momon i tijim se “ol man blong jos” bae i no mas jusum nomo blong mekem fasin we i stret mo gud be tu oli mas mekem ol voes blong olgeta we i stret mo gud ia blong oli harem, sapos oli wantem se Lod i protektem mo mekem olgeta i kam antap (luk long Alma 2:3–7; mo tu long Mosaea 29:27). Lod i wantem se yumi serem fet mo ol bilif blong yumi mo blong leftemap laet blong yumi. “Luk mi mi laet we yufala i mas leftemap” (3 Nifae 18:24

Presiden Dallin. H. Oaks, Fas Kaonsela long Fas Presidensi, i talem, “Yumi no save mekem wok blong Sevya i kam gud sapos yumi fraet long man moa bitim God” Mo hem i ademap, “Oli bin singaotem yumi blong akseptem ol standet blong Lod, be i no blong folem hem ia blong wol.”⁸

Nomata long skul, wok, o long ples blong pleiplei, long taem blong spel, long wan deit, o onlaen, ol disaepol blong Lod oli no “stap sem blong tekem long olgeta nem blong Kraes” (Alma 46:21) Tru long ol toktok mo ol wok blong yumi, yumi stap soem witnes se God i laef mo se yumi stap folem Pikinini blong Hem.

“Fet blong yumi i no seperet, o i tru i no mas seperet. Paul Lambert, wan speselis blong relijin blong Lata-dei Sent i bin lukluk gud se, Fet i no blong jos nomo, i no blong hom nomo, i no blong [skul] nomo,”. “Hem i blong evri samting we yu stap mekem.”⁹

Yumi no save paoa blong testemoni blong yumi, gudfala eksampol mo gudfala fasin we yumi save mekem long ol narafala man. Be taem yumi stanap from samting we i stret mo leftemap laet blong Sevya, ol man bae oli luksave yumi mo heven bae helpem yumi.

Stanap from Fridom blong Relijin

Tedei ol giaman pris, wetem wan bigfala namba blong sosaeti we oli no bilif oli stap go agensem ol pipol we oli gat fet, hem ia i semmak olsem ol taem blong Buk blong Momon. Ol voes blong ol man we oli go agensem ol impoten samting blong relijin long pablik mo long saed blong politik oli stap kam antap bigwan. Ol man we oli no bilif mo ol gavman, we i gat tu plante skul mo yunivesiti, oli stap fosem mo mekem ol man blong mekem fasin we i no stret, ol man we oli no bilif long God mo tingting ia se i no gat ol gudfala prinsipol blong folem.

Ol samting ia oli save atakem fridom blong relijin blong yumi sapos yumi no stanap from wanem we yumi bilif long hem se i stret. “Olsem wan jos,”we mi jes tijim se, “yumi joen wetem ol nara relijin blong protektem ol pipol long evri fet mo bilif mo ol raet ia we oli gat blong talem wanem oli bilif long hem.”¹⁰

Wan wo we yumi faet from long heven, hem i blong fasin ia blong jus long wol ia—fridom blong yumi blong jus. Blong lukaotem gud fasin ia blong yumi blong jus, i nidim blong yumi mas wok had plante blong protektem fridom blong relijin blong yumi

Wan strong relijin fet i givim paoa mo i protektem famli, ol komuniti, mo ol nesen. Hem ia i mekem yumi save obei long loa, fasin blong gat respek long laef mo propeti, mo i tijim jareti, onesti mo fasin blong stap stret mo gud—klin fasin i nid blong stap gohed long stret fasin, fri, mo wan gudfala sosaeti. Yumi no nid blong sori from fet we yumi gat.

Ol misinari efot blong yumi, ol defdefren wok blong yumi insaed long ol tempol, ol efot blong yumi blong bildimap kingdom blong God, mo glad blong yumiwan, i nidim blong yumi stanap from fridom mo fet blong relijin. Yumi no mas lusum fridom ia.

Profet Josef Smit i tijim, “Hem ia i wan lav blong fridom we i givim insperesen long sol blong mi—sitisen mo fridom blong relijin blong evri man blong kala blong skin.”¹¹ Fridom blong relijin bae i givim insperesen tu long sol blong yumi taem yumi folem kaonsel blong ol lida blong Jos:

“Stap lisin long ol impoten samting blong pablik, mo afta toktok wetem strong tingting mo stap kaen.”¹²
“Luksave se ol samting we i stap putum daon fridom blong relijin, bae i save spolem ol janis blong yumi, blong gro long saed blong paoa mo save blong gospel, blong kasem blesing blong ol tabu odinens, mo blong stap dipen long Lod blong lidim Jos blong Hem.”¹³
“Stanap mo toktok blong talemaot se God i laef mo se i tru i gat ol trutok i stap we i mekem ol komanmen blong Hem oli stanap.”¹⁴
“Jalenjem ol loa we i save daonem fridom blong praktisim fet blong yumi.”¹⁵
“Go long wol blong mekem gud, blong bildimap fet long God ia We I Gat Olgeta Paoa, mo blong helpem blong karem ol narafala man i kam long wan ples blong stap glad.”¹⁶
Ol stadi risos i stap long religiousfreedom.ChurchofJesusChrist.org mo long religiousfreedomlibrary.org/documents.

Yumi bildimap kingdom blong God taem yumi givim seves, leftemap laet blong yumi, mo stanap from fridom blong relijin. Bae Lod i blesem yumi long ol efot blong yumi blong mekem “plante gudfala samting” insaed long famli, komuniti, mo ol nesen blong yumi.

© 2024 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem long translesen: 6/19. Translesen blong Monthly Liahona Message, June 2024. Bislama. 19347 852