Sia Kokko Ach Sipwe Fofforoch

Seni Elter Ronald A. Rasband

Seni ewe Mwichen Ekkewe Engon me Ruemon Aposel

Sia aueta ewe muun Kot nupwen sia anisi ekkoch, chunata ach saram, me utta ren pochokunen namanam.

Gideon a sinei annuk mi mwan nupwen I a rong. I a fen rong akom seni King Noah me noun prist—prist ion ekkewe “ra fen seikireta non sikesiken netiper i” me ekkewe “ra fen angei aninis non ar chipwang, me non ar fen ngeni niosun anu muan, me ar fori angangen nisou, seni ekkewe takises minne King Noah a wata won noun kewe aramas” (Mosaia 11:5-6).

Ngawan, King Noah a nieno ewe soufos Abinadi me a kutta an epwe pwan nieno Alma me noun aramas ra ekesiwin (Nengeni Mosaia 17; 18:33-34). Ren ar repwe awesano ar aramasengaw, Gideon a okopon pwei epwe nino ewe king, ewe i a amanaua pokiten wareton ekkewe Lamanite (Nengeni Mosaia 19:4-8).

Mwirin, Gideon a enletin tipingeni ekkewe pris noun Noah ra sunna fan 24 nengin noun ekkewe chon Leiman . A kuna pwe an Abinadi oseni ngeni kewe aramas a fen ponuta pokiten ar rese mochen aier. (Nengeni Mosaia 20:17-22.) I a aninis ne atoura ekkewe chon Limhi, ekkewe mei nom non fotek ren ekkewe chon Lamanite (Nengeni Mosaia 22:3-9).

Iei a fein ngeni chinap, Gideon a uu sefan ngeni ir me ruu esikesik me aramasangaw nupwen a utta me mwen Nehor, ewe a aiti mwokutokutun pris nein kewe aramas. Nehor a “angawa ewe michefen” me sotuni ne emwenono ekkewe aramas seni ewe an mi pung. (Nengeni Alma 1:3, 7, 12; pwan nengeni 2 Nephi 26:29.)

Aea ewe kapasen Kot usun noun pisekin maun, Gideon emon mi pwara a aukano aramas ne fiti Nehor ren an aramasangaw. Nehor, a song a fiu me nieno Gideon ngeni noun ketinas. (Nengeni Alma 1:7–9.) Iwe muchuno kewe ranin “emon mwan mi tupon” ewe a fen “fori chommong mettoch mi och me nein ekkei aramas” (Alma 1:13).

Ewe ranin soponon non minne kich sia nonom non angeni kich nafen tufichin annen ach sipwe apiru Gideon usun “ewpisekin aninis me non poun Kot” (Alma 1:8) ne “angang” (Mosaia 22:4) ngeni ekkoch, ra utta non wenechar me pochokun ngeni kapassen eniuokus ngeni ach ngasano ach sipwe angang me fen ngeni Kot. Nupwen sia apiru Gideon angangan nukuchar, sia pwan tongeni fofforoch.

Chufengen non angang.

“Ussun [noun ewe Chon Amanau] chon tapweno mwirin, sia kutta ach sipwe tongei Kot me monun unukuch non unusen fonufan,” ewe Aemonun Presentensi a apasa. “Ewe Michefenin Jises Kraist ren Aramas Mi Pin non Fansoun Soponon a mochen efeiochu ekkoch me anisi ekkana mi osupwang. Sia feioch ren ach sia ani ewe tufich, kewe nenien aninis, me trusted global connection ra apwonueta ei wis mi pin.”¹

Uwa kinisou ren ewe fangafangochun angang me iamwir ekkewe chon ewe mwichefen ra awora non ach tempel me non ar kewe wart, pranch, me steik. Uwa pwan kinisou pwe memperun Mwichefen ra angang non chommongun neni, nenien sukkun, me mwichen chon awora aninis ngeni mi osupwang me ra chungeni ngoroun projeckin anisi aramas iteitan ier, fangeno millionun awa non arap ngeni 200 fonu me kinikinin muun.²

Ew an ewe Mwichefen a awatteno ekkewe tufichin angangen aninis non ekkoch fonu a seni ewe JustServe.org. Fan tumunuwen ewe Mwichefen nge a suk ngeni ese nifinifin ion a mochen efeiochu ekkoch, JustServe.org “ochu chon aninisin ewe neni ngeni chon mochen aninis” ekkewe ra “anapano ewe ochun manau non ewe neni.”³

Ewe Mwichefen me mempers ra pwan chiechi ngeni chon mwicheichen aninis ngeni unusen fonufan. Ewe Mwichefen, a kinisou ngeni ekkewe memper, ina “ewe watten ew Red Cross chon awora cha ngeni aramas non 2022.” Kapacheta, ewe Mwichefen a chok karan awora ukukun $8.7 minion monien aninis ngeni ewe Red Cross.⁴

Ewe Michefen a pwan fiti ekkewe mwicheich ne awora konik mi nimoch me projekin tumunu pekin nimoch ngeni neni non unusen fonufan. Non 2022, ewe mwichefen a fiti 156 angangen projek.⁵ Sia pwan fiti ekkoch angangen aninis me fang ngeni ir ekkewe ra uwei aninisin ngaseno ngeni noun Kot semerit mi nom non riaffou.⁶

“Nupwen sia chufengen ne angang ngeni aramas mi osupwang,” Preseten Henry-B. Erying, Aruemonun Chon Aninis non ewe Aewin Presentensi a apasa, “ewe Samon a achufengeni netipach.”⁷

Chunata Om Saram

Ren noun Ewe Chon Amanau chon kuno, sia pwan efeiochu chon winiaruch nupwen sia apwonueta ach pwon mi pin me manaueni manauen Kraist. Ewe Puken Mormon a aiti kich pwe “kewe aramasen ewe mwichefen” resap chok fini aramas wenechar nge repwe pwan aronga wenecharen mongungu ika ra mochen ewe Samon epwe tumunut me efeiochur. (Nengeni Alma 2: 3-7; pwan nengeni Mosaia 29:27). Ewe Samon a mochen kich sipwe aia ngeni ekkoch ach nuku me achifouwa me chunata ach saram. “Nengeni ngang ewe saram minne oupwe chunata”(3 Nephi 18:24).

“Sise asamonuochu ach Chon Amanau ika sia nuokusiti aramas nap seni Kot,” Presenten Dallin H. Oaks, Chon Aninis non ewe Aewin Presentensi, a apasa. A apachata, “Kich sia koko ren ach sipwe auetan an ewe Samon kewe nongonong, sisap fiti an ewe fonufan.”⁸

Ika mo ren sukun, angang, ika urumot, fansoun asoso seni angang, me won line, noun ewe Samon chon kuno rese “sau ne watta wor ewe it Kraist” (Alma 46:21). Seni ach kapas me ach angang, sia kuna pun Kot mi manau me sia tapweno mwirin Noun At.

“Ach nuku ese kinikinitiw, me esap tongeni kinikinitiw. Nuku esap chok ren fan, esap chok ren imwach, esap chok ren [sukun],” rongorong ren Paul Lambert, emon Aramas Mi Pin Non Fansoun Soponon a sinenap won chommongonon namanam. “Faniten mettoch meinisin ka fori.”⁹

Sisap sinei ewe pochokunen mwokutokutan ach kapasen pwarata, minen apiru mi murinno, me angangoch epwe pwa wonekkoch. Nge nupwen sia utta ren pung me chunata an ewe Chon Amanau saram, aramas repwe kuna kich me nang epwe amweira kich.

Utta ren Namanam Pung

Ikenai mwokutokutun prist mi anieput, fiti wattenon chon rese nuku me uu ngeni an aramas nuku, ese wor sokofesenin seni ewe fansoun Puken Mormon. Ewe mongungun ir ekkewe ra uu ngeni an namanam auchean wis non nenien chommongun aramas me nenien chunapen mokutukutun poletiks a watteno okuragan . Chon aimuni aramas me govermen, kapach chommong sukun me universiti, ra emweni mokutokutungaw ne oumwesi ekiekin ekkoch seni ar nuku ika namanam, nafangawen ar nuku, me ese wor annuk epwe anetata ika och mettoch mi pung ika mwan.

Fiu ngeni pochokunen namanam epwe ponuta ika sise utta faniten an ach namanam pung. “Ussun ew mwichefen,” Uwa pin osukun,“sia fiti ekkoch namanam ne tumunu aramas seni namanam meinisin me ekkewe echimw me ar pung ne porous won pungunon ar kapung .”¹⁰

Ew maun non nang a fis faniten pungun finata—ach ngaseno ne finata. Ren iseisan ach pungun finata a auchea pwe sipwe achocho ne tumunu ach pungun finata namanam.

Pochokunen nuku namanam a apochokuna me tumunu famili, neni me muu. A awora anneasosich ngeni annuk, apochokuna ekiekin sufonun manauach me pisek, me osukuna kirekiroch me aninisoch, wenechar, me nongong ren sokofesen nefinen mettoch—nimenimoch a auchea an epwe fori soposoponon ew wenecharen pung, mokut won pusin om mochen, me mwicheichen aramas mi sokofesen ra pusin omokut won ar. Sisap amusomus faniten ach nuku.

Ach angang weires ne misinari, ach angang fan iten ekkoch non tempel, ach achocho ne aueta ewe muun Kot, me ach pusin pwapwa epwe feito ren ach utta faniten ach nuku me ngaseno. Sise tongeni poutano ena ngaseno ika sise poutano ekkoch ngaaseno.

Ewe Soufos Joseph Smith a osukuna, “Iei ewe tongen pichino minne a amwasanga nguni—pichinon mwuun me namanam ngeni unusen sokkun aramas meinisin.”¹¹ Pichinon namanam a pwan awasanga ngunuch nupwen sia apiru aurur seni meinapen Mwichefen:

“Nonom me sinei porausen osukosuken auchean neniach, me pwan kapas non pworacho me sufonoch.”¹²
“Esina pwe ewe moronon pichinon namanam epwe awatteno osukosukan ngeni ach tongeni ne mwarita non pochokun me weweiti ewe kapas allim , angei ekkewe feiochun pwon mi pin, me ach anongonong won ewe Samon ne emweni An Mwichefen.”¹³
“Utta me kapas om kopwe apungano pwe Kot mi manau me mi wor An kewe annuk mi wesewesen enlet ra fen foruta.”¹⁴
“Annuk mi aweires repwe angawano ach pung ne omokutu ach nuku .”¹⁵
“Feino ngeni fonufan o fofforoch, o oueta nuku non Kot mi Napanap, me aninis ne watto ekkoch ngeni ewe nenien pwapwa.”¹⁶
Kaeo nenien aninis ren religiousfreedom.ChurchofJesusChrist.org me pwan religiousfreedomlibrary.org/documents.

Sia aueta ewe muun Kot nupwen sia angang ngeni ekkoch, chunata ach saram, me utta ren pungun namanam. Amo ewe Samon epwe efeiochu kich non ach achocho ne “fofforoch” nein ach famili, ekkewe neni, me muu.

© 2024 seni Intellectual Reserve, Inc. Meinisin pung mi kawor. A för non USA. Kapungunon non fosun Merika: 6/19. Kapungunon chiakun: 6/19. Chiakun Monthly Liahona Message, June 2024. Chuukese. 19347 901