« យើងត្រូវបានហៅឲ្យធ្វើល្អ » លីអាហូណា ខែ មិថុនា ឆ្នាំ ២០២៤ ។
សារលិខិត លីអាហូណា ប្រចាំខែ មិថុនា ឆ្នាំ ២០២៤
យើងត្រូវបានហៅឲ្យធ្វើល្អ
យើងកសាងនគរនៃព្រះពេលយើងបម្រើអ្នកដទៃ កាន់ពន្លឺរបស់យើងឡើង និងឈរដើម្បីសេរីភាពខាងសាសនា ។
គេឌានបានដឹងពីគោលលទ្ធិក្លែងក្លាយនៅពេលគាត់ឮវា ។ លោកធ្លាប់ឮវាពីមុនមកពីស្តេចណូអេ និងពួកសង្ឃរបស់ទ្រង់—ពួកសង្ឃដែល « បានលើកខ្លួនឡើងក្នុងការឆ្មើងឆ្មៃនៃចិត្តរបស់គេ » ហើយដែល « បានទទួលការគាំទ្រក្នុងការខ្ជិលច្រអូសរបស់គេ និងការថ្វាយបង្គំរូបព្រះ និងអំពើសហាយស្មន់ទាំងឡាយរបស់គេ ដោយពន្ធដារដែលស្ដេចណូអេបានដកយកពីប្រជាជនរបស់ទ្រង់ » ( ម៉ូសាយ ១១:៥–៦ ) ។
អាក្រក់ជាងនេះទៅទៀត ស្តេចណូអេបានសម្លាប់ព្យាការីអ័ប៊ីណាដៃ ហើយបានព្យាយាមបំផ្លាញអាលម៉ា និងពួកអ្នកប្រែចិត្តជឿរបស់លោក ( សូមមើល ម៉ូសាយ ១៧; ១៨:៣៣–៣៤ ) ។ ដើម្បីបញ្ចប់អំពើទុច្ចរិតបែបនេះ គេឌានបានសច្ចាថានឹងបញ្ឈប់ស្ដេចនោះឲ្យបាន ដែលលោកបានទុកជីវិតឲ្យដោយសារតែការឈ្លានពានរបស់ពួកសាសន៍លេមិនប៉ុណ្ណោះ ( សូមមើល ម៉ូសាយ ១៩:៤–៨ ) ។
ក្រោយមក គេឌានបានស្តីបន្ទោសយ៉ាងត្រឹមត្រូវដល់ពួកសង្ឃរបស់ស្ដេចណូអេដែលបានចាប់យកកូនស្រីសាសន៍លេមិន ២៤ នាក់ ។ លោកបានសង្កេតឃើញថា ការព្យាកររបស់អ័ប៊ីណាដៃទាស់នឹងប្រជាជនបានបំពេញ ដោយសារតែពួកគេបានបដិសេធមិនប្រែចិត្ត ។ ( សូមមើល ម៉ូសាយ ២០:១៧–២២ ) ។ លោកបានជួយរំដោះប្រជាជនលិមហៃ ដែលនៅក្នុងសេវកភាពរបស់ពួកសាសន៍លេមិន ( សូមមើល ម៉ូសាយ ២២:៣–៩ ) ។
ឥឡូវនេះ ដោយមានវ័យចំណាស់ គេឌានបានប្រឈមមុខប្រឆាំងនឹងភាពឆ្មើងឆ្មៃ និងអំពើទុច្ចរិតជាថ្មីម្តងទៀត នៅពេលដែលលោកឈរនៅចំពោះមុខនីហូរ ដែលណែនាំឲ្យមានឧបាយកលផ្នែកសង្ឃក្នុងចំណោមប្រជាជន ។ នីហូរបាន « ធ្វើការទាស់នឹងសាសនាចក្រ » ហើយព្យាយាមដឹកនាំប្រជាជនឲ្យវង្វេង ។ ( សូមមើល អាលម៉ា ១:៣, ៧, ១២; សូមមើលផងដែរ នីហ្វៃទី២ ២៦:២៩ ) ។
ដោយប្រើព្រះបន្ទូលរបស់ព្រះជាអាវុធរបស់លោក នោះគេឌានបានព្រមានដាស់តឿននីហូរអំពីសេចក្ដីទុច្ចរិតរបស់លោក ។ ដោយកំហឹងខឹង នីហូរបានវាយប្រហារ និងសម្លាប់គេឌានដោយដាវរបស់គាត់ ។ ( សូមមើល អាលម៉ា ១:៧–៩ ) ។ តាមរបៀបនេះ ក៏បានបញ្ចប់ជីវិត « បុរសសុចរិត » ម្នាក់ ដែល « ធ្លាប់បានធ្វើការណ៍ល្អជាច្រើននៅក្នុងចំណោមប្រជាជន » ( អាលម៉ា ១:១៣ ) ។
ថ្ងៃចុងក្រោយដែលយើងរស់នៅនេះ ផ្ដល់ឱកាសជាច្រើនឲ្យយើងធ្វើត្រាប់តាមគេឌានជា « គ្រឿងឧបករណ៍មួយនៅក្នុងព្រះហស្តនៃព្រះ » ( អាលម៉ា ១:៨ ) ដោយ « យកមកប្រើការ » ( ម៉ូសាយ ២២:៤ ) ដល់អ្នកដទៃ ឈរដើម្បីភាពសុចរិត ហើយតស៊ូនឹងការគម្រាមកំហែងដល់សេរីភាពរបស់យើងក្នុងការថ្វាយបង្គំ និងបម្រើព្រះ ។ នៅពេលដែលយើងធ្វើតាមគំរូដ៏ស្មោះត្រង់របស់គេឌាន នោះយើងក៏អាចធ្វើការណ៍ល្អជាច្រើនផងដែរ ។
រួបរួមគ្នាក្នុងការបម្រើ
គណៈប្រធានទីមួយបានមានប្រសាសន៍ថា ៖ « ក្នុងនាមជាអ្នកដើរតាម [ របស់ព្រះអង្គសង្គ្រោះ ] យើងព្យាយាមស្រឡាញ់ព្រះ និងអ្នកជិតខាងរបស់យើងនៅទូទាំងពិភពលោក ។ « សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយមានបំណងយ៉ាងខ្លាំងក្នុងការផ្ដល់ពរជ័យដល់អ្នកដទៃ និងជួយអ្នកដែលខ្វះខាត ។ យើងមានពរជ័យដែលមានសមត្ថភាព ធនធាន និងទទួលការទុកចិត្តលើទំនាក់ទំនងជាសកល ដើម្បីអនុវត្តការទទួលខុសត្រូវដ៏ពិសិដ្ឋនេះ » ។១
ខ្ញុំមានអំណរគុណចំពោះការបម្រើ និងការងារបម្រើដែលគ្មានភាពអាត្មានិយមដែលសមាជិកសាសនាចក្រផ្ដល់ជូននៅក្នុងព្រះវិហារបរិសុទ្ធរបស់យើង និងនៅក្នុងវួដ សាខា និងស្តេករបស់ពួកគេ ។ ខ្ញុំក៏មានអំណរគុណផងដែរ ដែលសមាជិកសាសនាចក្របម្រើនៅក្នុងសហគមន៍ អង្គការអប់រំ និងអង្គការសប្បុរសធម៌រាប់មិនអស់ ហើយដែលពួកគេចូលរួមក្នុងគម្រោងមនុស្សធម៌រាប់ពាន់ជារៀងរាល់ឆ្នាំ ស្ម័គ្រចិត្តរាប់លានម៉ោងនៅក្នុងប្រទេស និងទឹកដីជិត ២០០ ។២
វិធីមួយដែលសាសនាចក្រពង្រីកឱកាសបម្រើនៅក្នុងប្រទេសជាច្រើនគឺតាមរយៈ JustServe.org ។ ឧបត្ថម្ភដោយសាសនាចក្រ ប៉ុន្តែប្រើបានសម្រាប់មនុស្សគ្រប់គ្នាដែលចង់ផ្ដល់ពរជ័យដល់អ្នកដទៃទៀត JustServe.org « ភ្ជាប់តម្រូវការអ្នកស្ម័គ្រចិត្តក្នុងសហគមន៍ជាមួយអ្នកស្ម័គ្រចិត្ត » ដែល « បង្កើនគុណភាពជីវិតនៅក្នុងសហគមន៍ » ។៣
សាសនាចក្រ និងសមាជិករបស់ខ្លួនក៏បានរួមគ្នាជាមួយអង្គការដែលផ្ដល់ការបម្រើនៅទូទាំងពិភពលោកផងដែរ ។ ដោយសារសមាជិករបស់ខ្លួន សាសនាចក្រគឺជា « អ្នកបរិច្ចាគឈាមដល់កាកបាទក្រហមធំជាងគេបំផុតនៅឆ្នាំ ២០២២ » ។ បន្ថែមពីលើនេះទៀត កាលពីពេលថ្មីៗនេះ សាសនាចក្របានធ្វើការបរិច្ចាគទឹកប្រាក់ ៨,៧ លានដុល្លារដល់កាកបាទក្រហម ។៤
សាសនាចក្រក៏បានចូលរួមជាមួយអង្គការនានាដើម្បីនាំយកគម្រោងទឹកស្អាត និងអនាម័យទៅតំបន់នានាទូទាំងពិភពលោកផងដែរ ។ នៅឆ្នាំ ២០២២ សាសនាចក្របានចូលរួមក្នុងគម្រោងបែបនេះចំនួន ១៥៦ គម្រោង ។៥ យើងក៏សហការជាមួយ និងបរិច្ចាគដល់ភ្នាក់ងារផ្សេងៗទៀតដែលនាំមកនូវការជួយសង្គ្រោះដល់បុត្រាបុត្រីរបស់ព្រះដែលរងទុក្ខផងដែរ ។៦
ប្រធាន ហែនរី ប៊ី អាវរិង ទីប្រឹក្សាទីពីរនៅក្នុងគណៈប្រធានទីមួយ បានមានប្រសាសន៍ ៖ « នៅពេលដែលយើងរួមគ្នាបម្រើមនុស្សដែលខ្វះខាត នោះព្រះអម្ចាស់រួបរួមចិត្តយើង » ។៧
ចូរលើកពន្លឺរបស់អ្នករាល់គ្នាឡើង
ក្នុងនាមជាសិស្សរបស់ព្រះអង្គសង្រ្គោះ យើងក៏ផ្ដល់ពរជ័យដល់អ្នកជិតខាងរបស់យើងផងដែរ នៅពេលយើងរក្សាសេចក្ដីសញ្ញារបស់យើង ហើយរស់នៅក្នុងជីវិតដូចព្រះគ្រីស្ទ ។ ព្រះគម្ពីរមរមនបង្រៀនថា « ប្រជាជននៃសាសនាចក្រ » មិនត្រឹមតែត្រូវជ្រើសរើសភាពសុចរិតប៉ុណ្ណោះទេ ប៉ុន្តែថែមទាំងធ្វើឲ្យសំឡេងសុចរិតរបស់ពួកគេបានឮ ប្រសិនបើពួកគេចង់ឲ្យព្រះអម្ចាស់ការពារ និងចម្រើនពួកគេឡើង ( សូមមើល អាលម៉ា ២:៣–៧; សូមមើលផងដែរ ម៉ូសាយ ២៩:២៧ ) ។ ព្រះអម្ចាស់រំពឹងឲ្យយើងចែកចាយសេចក្ដីជំនឿ និងការជឿរបស់យើង ហើយលើកពន្លឺរបស់យើងឡើង ។ « មើលចុះយើងជាពន្លឺដែលអ្នករាល់គ្នានឹងលើកឡើង » ( នីហ្វៃទី៣ ១៨:២៤ ) ។
ប្រធាន ដាល្លិន អេក អូក ទីប្រឹក្សាទីមួយនៅក្នុងគណៈប្រធានទីមួយ បានមានប្រសាសន៍ ៖ « យើងមិនបម្រើព្រះអង្គសង្គ្រោះរបស់យើងបានល្អទេ ប្រសិនបើយើងខ្លាចមនុស្សច្រើនជាងព្រះនោះ » ។ លោកបានបន្ថែម ៖ « យើងត្រូវបានហៅឲ្យស្ថាបនាបទដ្ឋានរបស់ព្រះអម្ចាស់ មិនមែនធ្វើតាមបទដ្ឋានរបស់លោកិយនោះទេ » ។៨
មិនថានៅសាលា កន្លែងធ្វើការ ឬលេង នៅពេលវិស្សមកាល ការណាត់ជួប ឬតាមអ៊ីនធឺណិតទេ ពួកសិស្សរបស់ព្រះអម្ចាស់មិន « មានការអៀនខ្មាសក្នុងការលើកដាក់លើខ្លួននូវព្រះនាមនៃព្រះគ្រីស្ទ » ឡើយ ( អាលម៉ា ៤៦:២១ ) ។ តាមរយៈពាក្យសម្តី និងកិច្ចការរបស់យើង យើងធ្វើជាសាក្សីថា ព្រះមានព្រះជន្មរស់ ហើយថាយើងធ្វើតាមព្រះរាជបុត្រារបស់ទ្រង់ ។
« សេចក្ដីជំនឿរបស់យើងមិនត្រូវបានបែងចែក ឬវាពិតជាមិនគួរត្រូវបានបែងចែកនោះទេ ។ សេចក្ដីជំនឿមិនមែនគ្រាន់តែសម្រាប់សាសនាចក្រទេ វាក៏មិនមែនគ្រាន់តែសម្រាប់ផ្ទះប៉ុណ្ណោះដែរ វាក៏មិនមែនគ្រាន់តែសម្រាប់ [ សាលា ] ប៉ុណ្ណោះដែរ សេចក្ដីជំនឿគឺសម្រាប់អ្វីៗគ្រប់យ៉ាងដែលអ្នកធ្វើ » ។ នេះបើតាមការសង្កេតរបស់ ប៉ុល ឡាំបឺត ជាពួកបរិសុទ្ធថ្ងៃចុងក្រោយមួយរូបដែលជាអ្នកជំនាញខាងពហុសាសនា ។៩
យើងមិនដឹងពីឥទ្ធិពលដែលទីបន្ទាល់របស់យើងអាចមានទៅលើអ្នកដទៃនោះទេ ទាំងគំរូល្អ និងទង្វើល្អ ។ ប៉ុន្តែនៅពេលយើងឈរដើម្បីអ្វីដែលត្រឹមត្រូវ ហើយលើកពន្លឺរបស់ព្រះអង្គសង្គ្រោះឡើង នោះមនុស្សនឹងកត់សម្គាល់ឃើញយើង ហើយស្ថានសួគ៌នឹងគាំទ្រយើង ។
ឈរដើម្បីសេរីភាពខាងសាសនា
ឧបាយកលផ្នែកសង្ឃសព្វថ្ងៃនេះ ដែលមានសង្គមខាងលោកិយកាន់តែមានប្រជាប្រិយភាពប្រឆាំងនឹងមនុស្សដែលមានសេចក្ដីជំនឿ គឺមិនខុសគ្នាខ្លាំងពីសម័យព្រះគម្ពីរមរមននោះទេ ។ សំឡេងរបស់ពួកអ្នកដែលប្រឆាំងនឹងតួនាទីដ៏សំខាន់របស់សាសនានៅលើឆាកសាធារណៈ និងនយោបាយគឺកំពុងតែមានឮខ្លាំងឡើង ។ បុគ្គលមិនជឿសាសនា និងរដ្ឋាភិបាល រួមទាំងសាលារៀន និងសាកលវិទ្យាល័យជាច្រើនកំពុងតែជំរុញឲ្យមានការប្រព្រឹត្ត និងផ្សព្វផ្សាយឲ្យមានអំពើអសីលធម៌ ការមិនជឿលើសាសនា និងទស្សនៈជ្រុលនិយម ។
ការវាយប្រហារទៅលើសេរីភាពខាងសាសនានឹងទទួលបានជោគជ័យ ប្រសិនបើយើងមិនក្រោកឈរដើម្បីសិទ្ធិជឿលើសាសនារបស់យើង ។ ខ្ញុំបានបង្រៀនក្នុងពេលថ្មីៗនេះថា « ក្នុងនាមជាសាសនាចក្រមួយ យើងចូលរួមជាមួយសាសនាដទៃដើម្បីការពារមនុស្សមកពីគ្រប់ជំនឿ និង ការជឿទាំងអស់ និងសិទ្ធិក្នុងការនិយាយអំពីជំនឿស៊ប់របស់ពួកគេ » ។១០
សង្គ្រាមនៅស្ថានសួគ៌ត្រូវបានប្រយុទ្ធគ្នាដើម្បីសិទ្ធិជ្រើសរើសខាងសីលធម៌—សេរីភាពរបស់យើងដើម្បីជ្រើសរើស ។ ដើម្បីរក្សាសិទ្ធិជ្រើសរើសរបស់យើង គឺតម្រូវឲ្យយើងមានភាពឧស្សាហ៍ព្យាយាមក្នុងការការពារសេរីភាពខាងសាសនារបស់យើង ។
សេចក្ដីជំនឿខាងសាសនាដ៏រស់រវើកពង្រឹង និងការពារក្រុមគ្រួសារ សហគមន៍ និងជាតិសាសន៍ទាំងឡាយ ។ វាធ្វើឲ្យមានការគោរពច្បាប់ បណ្ដុះនូវការគោរពចំពោះជីវិត និងទ្រព្យសម្បត្តិ ហើយបង្រៀនសប្បុរសធម៌ ភាពស្មោះត្រង់ និងសីលធម៌—គុណធម៌ដែលត្រូវការដើម្បីបន្តបង្កើតសង្គមដែលយុត្តិធម៌ សេរី និងស៊ីវិល ។ យើងមិនត្រូវសុំទោសដោយសារសេចក្ដីជំនឿរបស់យើងឡើយ ។
ការខិតខំរបស់អ្នកផ្សព្វផ្សាយសាសនារបស់យើង កិច្ចការជំនួសរបស់យើងនៅក្នុងព្រះវិហារបរិសុទ្ធ ការខិតខំរបស់យើងក្នុងការកសាងនគរនៃព្រះ និងសុភមង្គលរបស់យើងតម្រូវឲ្យយើងក្រោកឈរឡើងដើម្បីសេចក្ដីជំនឿ និងសេរីភាពខាងសាសនា ។ យើងមិនអាចបាត់បង់សេរីភាពនោះ ដោយមិនបាត់បង់សេរីភាពផ្សេងៗទៀតបានឡើយ ។
ព្យាការី យ៉ូសែប ស៊្មីធ បានបង្រៀនថា « នេះជាក្ដីស្រឡាញ់នៃសេរីភាពដែលបំផុសគំនិតព្រលឹងខ្ញុំ—គឺសេរីភាពខាងសង្គមស៊ីវិល និងខាងសាសនាចំពោះពូជសាសន៍មនុស្សទាំងពួង » ។១១ សេរីភាពខាងសាសនាក៏នឹងបំផុសគំនិតដល់ព្រលឹង យើង ផងដែរ នៅពេលយើងធ្វើតាមដំបូន្មានពីថ្នាក់ដឹកនាំសាសនាចក្រ ៖
-
« តាមដានព័ត៌មានអំពីបញ្ហាសំខាន់ៗជាសាធារណៈ ហើយបន្ទាប់មកនិយាយដោយក្លាហាន និងការគួរសម » ។១២
-
« សូមទទួលស្គាល់ថាការសាបរលាបនៃសេរីភាពខាងសាសនានឹងធ្វើឲ្យប៉ះពាល់យ៉ាងខ្លាំងដល់ឱកាសរបស់យើងក្នុងការរីកចម្រើនក្នុងកម្លាំង និងចំណេះដឹងអំពីដំណឹងល្អ ក្នុងការទទួលបានពរជ័យពីបទបញ្ញត្តិដ៏ពិសិដ្ឋ និងក្នុងការពឹងផ្អែកលើព្រះអម្ចាស់ដើម្បីដឹកនាំសាសនាចក្ររបស់ទ្រង់ » ។១៣
-
« ចូរក្រោកឈរឡើង ហើយនិយាយបញ្ជាក់ថា មានព្រះមែន ហើយថាមានសេចក្ដីពិតទាំងស្រុងដែលបទបញ្ញត្តិរបស់ទ្រង់បង្កើតឡើង » ។១៤
-
« ច្បាប់ដែលអាចបង្កឲ្យសេរីភាពក្នុងការអនុវត្តសេចក្ដីជំនឿរបស់យើងត្រូវចុះអន់ថយ » ។១៥
-
« ចូរចូលទៅក្នុងលោកិយដើម្បីធ្វើល្អ ស្ថាបនាសេចក្ដីជំនឿទៅលើព្រះដ៏មានមហិទ្ធិឫទ្ធិ ហើយដើម្បីជួយនាំអ្នកដទៃទៅកាន់ទីកន្លែងដែលមានសុភមង្គលជាងមុន » ។១៦
-
ធនធានសិក្សានៅគេហទំព័រ religiousfreedom.ChurchofJesusChrist.org និង religiousfreedomlibrary.org/documents ។
យើងកសាងនគរនៃព្រះ ពេលយើងបម្រើ លើកពន្លឺរបស់យើងឡើយ ហើយឈរដើម្បីសេរីភាពខាងសាសនា ។ សូមព្រះអម្ចាស់ប្រទានពរដល់យើងក្នុងកិច្ចខិតខំប្រឹងប្រែងរបស់យើងដើម្បីធ្វើ « ការណ៍ល្អជាច្រើន » ក្នុងចំណោមក្រុមគ្រួសារ សហគមន៍ និងប្រជាជាតិរបស់យើង ។
© 2024 by Intellectual Reserve, Inc. All rights reserved. បោះពុម្ពនៅ ស.រ.អា. ។ ការអនុម័តជាភាសាអង់គ្លេស ៖ ៦/១៩ ។ ការអនុម័តឲ្យបកប្រែ ៖ ៦/១៩ ។ ការបកប្រែនៃ Monthly Liahona Message, June 2024. Cambodian. 19347 258