ເຮົາຖືກເອີ້ນໃຫ້ສ້າງຄວາມດີ

ໂດຍ ແອວເດີ ຣອນໂນ ເອ ແຣັສ໌ແບນ

ແຫ່ງກຸ່ມອັກຄະສາວົກສິບສອງ

ເຮົາສ້າງສາອານາຈັກຂອງພຣະເຈົ້າເມື່ອເຮົາຮັບໃຊ້ຄົນອື່ນ, ຍົກຄວາມສະຫວ່າງຂອງເຮົາຂຶ້ນ, ແລະ ຢືນຢູ່ເພື່ອອິດສະລະພາບທາງສາດສະໜາ.

ກີເດໂອນຮູ້ຄຳສອນທີ່ບໍ່ຖືກຕ້ອງເມື່ອລາວໄດ້ຍິນມັນ. ລາວເຄີຍໄດ້ຍິນເລື່ອງນີ້ມາກ່ອນຈາກກະສັດໂນອາ ແລະ ພວກປະໂລຫິດຂອງເພິ່ນ—ປະໂລຫິດທີ່ “ມີຄວາມລະເມີເພີ້ຝັນດ້ວຍຄວາມທະນົງໃຈ” ແລະ “ໄດ້ຮັບການຄ້ຳຈູນຢູ່ໃນຄວາມກຽດຄ້ານຂອງພວກເຂົາຢູ່ດັ່ງນັ້ນ, ແລະ ໃນການນັບຖືຮູບບູຊາຂອງພວກເຂົາ, ແລະ ໃນການທຳການໂສເພນີຂອງພວກເຂົາ, ໂດຍພາສີຊຶ່ງກະສັດໂນອາເກັບມາຈາກຜູ້ຄົນຂອງຕົນ” (ໂມໄຊຢາ 11:5–6).

ຮ້າຍແຮງໄປກວ່ານັ້ນ, ກະສັດໂນອາໄດ້ສັ່ງຂ້າສາດສະດາອະບີນາໄດ ແລະ ໄດ້ສະແຫວງຫາທີ່ຈະທຳລາຍແອວມາ ແລະ ຜູ້ປ່ຽນໃຈເຫລື້ອມໃສຂອງເພິ່ນ (ເບິ່ງ ໂມໄຊຢາ 17; 18:33–34). ເພື່ອຢຸດຕິຄວາມຊົ່ວຮ້າຍດັ່ງກ່າວ, ກີເດໂອນໄດ້ປະຕິຍານວ່າຈະຢຸດກະສັດ, ຜູ້ທີ່ລາວໄດ້ໄວ້ຊີວິດຍ້ອນການຮຸກຮານຂອງຊາວເລມັນ (ເບິ່ງ ໂມໄຊຢາ 19:4–8).

ຕໍ່ມາ, ກີເດໂອນໄດ້ກ່າວໂທດພວກປະໂລຫິດຂອງໂນອາຢ່າງຖືກຕ້ອງ ທີ່ໄດ້ພາພວກລູກສາວຊາວເລມັນ 24 ຄົນມາ. ລາວໄດ້ສັງເກດເຫັນວ່າຄຳທຳນາຍຂອງອະບີນາໄດຕໍ່ຜູ້ຄົນໄດ້ສຳເລັດແລ້ວ ເພາະວ່າພວກເຂົາບໍ່ຍອມກັບໃຈ. (ເບິ່ງ ໂມໄຊຢາ 20:17–22.) ລາວໄດ້ຊ່ວຍປົດປ່ອຍຜູ້ຄົນຂອງລິມໄຮ, ຜູ້ທີ່ຕົກຢູ່ໃນຄວາມເປັນທາດຂອງຊາວເລມັນ (ເບິ່ງ ໂມໄຊຢາ 22:3–9).

ຕອນນີ້ມີອາຍຸສູງແລ້ວ, ກີເດໂອນໄດ້ປະເຊີນກັບຄວາມທະນົງຕົວ ແລະ ຄວາມຊົ່ວຮ້າຍອີກຄັ້ງ ໃນຂະນະທີ່ລາວຢືນຢູ່ຕໍ່ໜ້ານີຮໍ, ຜູ້ທີ່ໄດ້ແນະນຳການຫລອກລວງຂອງປະໂລຫິດໃນບັນດາຜູ້ຄົນ. ນີຮໍໄດ້ “ກ່າວຄຳຕໍ່ຕ້ານສາດສະໜາຈັກ” ແລະ ພະຍາຍາມນໍາພາຜູ້ຄົນໃຫ້ຫລົງທາງ. (ເບິ່ງ ໂມໄຊຢາ 1:3, 7, 12; ເບິ່ງ 2 ນີໄຟ 26:29 ນຳອີກ.)

ໃນການໃຊ້ພຣະຄຳຂອງພຣະເຈົ້າເປັນອາວຸດຂອງລາວ, ກີເດໂອນຜູ້ກ້າຫານໄດ້ຕັກເຕືອນນີຮໍກ່ຽວກັບຄວາມຊົ່ວຮ້າຍຂອງລາວ. ດ້ວຍຄວາມໃຈຮ້າຍ, ນີຮໍໄດ້ໂຈມຕີ ແລະ ຂ້າກີເດໂອນດ້ວຍດາບຂອງລາວ. (ເບິ່ງ ແອວມາ 1:7–9.) ສະນັ້ນວັນເວລາຂອງ “ຄົນຊື່ສັດຜູ້ໜຶ່ງ” ຜູ້ທີ່ໄດ້ “ສ້າງຄວາມດີໄວ້ຫລາຍທີ່ສຸດໃນບັນດາຜູ້ຄົນເຫລົ່ານີ້” ຈຶ່ງຈົບລົງ (ແອວມາ 1:13).

ຍຸກສຸດທ້າຍທີ່ເຮົາມີຊີວິດຢູ່ໄດ້ເປີດໂອກາດໃຫ້ເຮົາຢ່າງພຽງພໍທີ່ຈະເອົາແບບຢ່າງຂອງກີເດໂອນທີ່ເປັນ “ເຄື່ອງມືໃນພຣະຫັດຂອງພຣະເຈົ້າ” (ແອວມາ 1:8) ໂດຍການເປັນ “ຜູ້ຮັບໃຊ້” (ໂມໄຊຢາ 22:4) ຄົນອື່ນ, ຢືນຢູ່ໃນຄວາມຊອບທຳ ແລະ ທົນກັບການຂົ່ມຂູ່ຕໍ່ອິດສະລະພາບຂອງເຮົາທີ່ຈະນະມັດສະການ ແລະ ຮັບໃຊ້ພຣະເຈົ້າ. ເມື່ອເຮົາເຮັດຕາມຕົວຢ່າງທີ່ຊື່ສັດຂອງກີເດໂອນ, ເຮົາກໍສາມາດເຮັດຄວາມດີຢ່າງຫລວງຫລາຍເຊັ່ນກັນ.

ມີຄວາມສາມັກຄີໃນການຮັບໃຊ້

“ໃນຖານະຜູ້ຕິດຕາມຂອງ [ພຣະຜູ້ຊ່ວຍໃຫ້ລອດ], ເຮົາສະແຫວງຫາທີ່ຈະຮັກພຣະເຈົ້າ ແລະ ເພື່ອນບ້ານຂອງເຮົາຕະຫລອດທົ່ວໂລກ,” ຝ່າຍປະທານສູງສຸດໄດ້ກ່າວ. “ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍກະຕືລືລົ້ນທີ່ຈະໃຫ້ພອນແກ່ຄົນອື່ນ ແລະ ຊ່ວຍເຫລືອຄົນຂັດສົນ. ເຮົາໄດ້ຮັບພອນທີ່ມີຄວາມສາມາດ, ຊັບພະຍາກອນ, ແລະ ການເຊື່ອມຕໍ່ທົ່ວໂລກທີ່ເຊື່ອຖືໄດ້ ເພື່ອປະຕິບັດໜ້າທີ່ອັນສັກສິດນີ້.”¹

ຂ້າພະເຈົ້າມີຄວາມກະຕັນຍູສຳລັບການຮັບໃຊ້ ແລະ ການປະຕິບັດສາດສະໜາກິດທີ່ບໍ່ເຫັນແກ່ຕົວ ທີ່ສະມາຊິກຂອງສາດສະໜາຈັກໄດ້ມອບໃຫ້ຢູ່ໃນພຣະວິຫານຂອງເຮົາ ແລະ ໃນຫວອດ, ສາຂາ, ແລະ ສະເຕກຂອງເຂົາເຈົ້າ. ຂ້າພະເຈົ້າຍັງມີຄວາມກະຕັນທີ່ສະມາຊິກຂອງສາດສະໜາຈັກຮັບໃຊ້ຢູ່ໃນຊຸມຊົນ, ການສຶກສາ, ແລະ ອົງການກຸສົນຈົນນັບບໍ່ຖ້ວນ ແລະ ເຂົາເຈົ້າຍັງມີສ່ວນຮ່ວມໃນຫລາຍພັນໂຄງການທາງດ້ານມະນຸດສະທຳຕໍ່ປີ, ອາສາສະໝັກຫລາຍລ້ານຊົ່ວໂມງໃນເກືອບ 200 ປະເທດ ແລະ ເຂດປົກຄອງຕ່າງໆ.²

ອີກວິທີໜຶ່ງທີ່ສາດສະໜາຈັກເປີດກວ້າງໂອກາດການຮັບໃຊ້ໃນຫລາຍປະເທດແມ່ນຜ່ານທາງ JustServe.org. ໂດຍທີ່ໄດ້ຮັບການສະໜັບສະໜູນຈາກສາດສະໜາຈັກ ແຕ່ມີໃຫ້ທຸກຄົນທີ່ຕ້ອງການເປັນພອນໃຫ້ແກ່ຄົນອື່ນ, JustServe.org “ເຊື່ອມຕໍ່ຄວາມຕ້ອງການຂອງອາສາສະໝັກໃນຊຸມຊົນກັບອາສາສະໝັກ” ຜູ້ທີ່ “ເສີມຂະຫຍາຍຄຸນນະພາບຊີວິດໃນຊຸມຊົນ.”³

ສາດສະໜາຈັກ ແລະ ສະມາຊິກຂອງຕົນຍັງຮ່ວມມືກັບອົງການບໍລິການຕະຫລອດທົ່ວໂລກນຳອີກ. ສາດສະໜາຈັກ, ຂອບໃຈສະມາຊິກຂອງຕົນ, ທີ່ເປັນ “ຜູ້ປະກອບສ່ວນບໍລິຈາກເລືອດໃຫ້ແກ່ສະພາກາແດງຫລາຍທີ່ສຸດໃນປີ 2022.” ນອກຈາກນັ້ນ, ເມື່ອບໍ່ດົນມານີ້, ສາດສະໜາຈັກໄດ້ບໍລິຈາກ 8.7 ລ້ານໂດລາ ໃຫ້ແກ່ສະພາກາແດງ.⁴

ສາດສະໜາຈັກຍັງຮ່ວມມືກັບອົງການຕ່າງໆເພື່ອນຳເອົາໂຄງການນ້ຳສະອາດ ແລະ ສຸຂະອະນາໄມໄປສູ່ເຂດຕ່າງໆຕະຫລອດທົ່ວໂລກ. ໃນປີ 2022, ສາດສະໜາຈັກໄດ້ເຂົ້າຮ່ວມໃນ 156 ໂຄງການ.⁵ ພວກເຮົາຍັງຮ່ວມມືກັບໜ່ວຍງານຕ່າງໆ ແລະ ບໍລິຈາກໃຫ້ໜ່ວຍງານອື່ນໆ ເພື່ອນຳການບັນເທົາທຸກໄປໃຫ້ລູກໆຂອງພຣະເຈົ້າທີ່ທຸກທໍລະມານນຳອີກ.⁶

“ເມື່ອພວກເຮົາຮ່ວມມືຮັບໃຊ້ຄົນທີ່ຂັດສົນ,” ປະທານເຮັນຣີ ບີ ໄອຣິງ, ທີ່ປຶກສາທີສອງໃນຝ່າຍປະທານສູງສຸດກ່າວວ່າ, “ພຣະຜູ້ເປັນເຈົ້າຮ່ວມຫົວໃຈຂອງເຮົາເຂົ້າກັນ.”⁷

ຍົກຄວາມສະຫວ່າງຂອງທ່ານຂຶ້ນ

ໃນຖານະສານຸສິດຂອງພຣະຜູ້ຊ່ວຍໃຫ້ລອດ, ເຮົາຍັງເປັນພອນໃຫ້ແກ່ເພື່ອນບ້ານຂອງເຮົານຳອີກ ເມື່ອເຮົາຮັກສາພັນທະສັນຍາຂອງເຮົາ ແລະ ດຳລົງຊີວິດເໝືອນດັ່ງພຣະຄຣິດ. ພຣະຄຳພີມໍມອນສິດສອນວ່າ “ຜູ້ຄົນຂອງສາດສະໜາຈັກ” ບໍ່ພຽງແຕ່ຕ້ອງເລືອກຄວາມຊອບທຳເທົ່ານັ້ນ ແຕ່ຍັງຕ້ອງເຮັດໃຫ້ສຽງທີ່ຊອບທຳຂອງເຂົາເຈົ້າຖືກໄດ້ຍິນນຳອີກ ຖ້າເຂົາເຈົ້າປາດຖະໜາໃຫ້ພຣະຜູ້ເປັນເຈົ້າປົກປ້ອງ ແລະ ເຮັດໃຫ້ເຂົາເຈົ້າຈະເລີນຮຸ່ງເຮືອງ (ເບິ່ງ ແອວມາ 2:3–7; ເບິ່ງ ໂມໄຊຢາ 29:27). ພຣະຜູ້ເປັນເຈົ້າຄາດຫວັງໃຫ້ເຮົາແບ່ງປັນສັດທາ ແລະ ຄວາມເຊື່ອຂອງເຮົາ ແລະ ຍົກຄວາມສະຫວ່າງຂອງເຮົາຂຶ້ນ. “ຈົ່ງເບິ່ງເຮົາຄືຄວາມສະຫວ່າງຊຶ່ງເຈົ້າຈະຍົກຂຶ້ນ” (3 ນີໄຟ 18:24).

“ເຮົາບໍ່ໄດ້ຮັບໃຊ້ພຣະຜູ້ຊ່ວຍໃຫ້ລອດຂອງເຮົາໄດ້ດີຖ້າວ່າເຮົາຢ້ານກົວມະນຸດຫລາຍກວ່າພຣະເຈົ້າ,” ປະທານດາລິນ ເອັຈ ໂອກສ໌ ທີ່ປຶກສາທີໜຶ່ງໃນຝ່າຍປະທານສູງສຸດໄດ້ກ່າວ. ເພິ່ນໄດ້ກ່າວຕື່ມວ່າ, “ເຮົາຖືກເອີ້ນໃຫ້ສະຖາປະນາມາດຕະຖານຂອງພຣະຜູ້ເປັນເຈົ້າ, ບໍ່ແມ່ນໃຫ້ເຮັດຕາມໂລກ.”⁸

ບໍ່ວ່າຈະຢູ່ທີ່ໂຮງຮຽນ, ເຮັດວຽກ, ຫລື ໄປຫລິ້ນ, ໄປທ່ຽວພັກຜ່ອນ, ໄປທ່ຽວກັບຄົນຮັກ, ຫລື ຢູ່ອອນລາຍ,ສານຸສິດຂອງພຣະຜູ້ເປັນເຈົ້າບໍ່ “ລະອາຍໃຈທີ່ຍອມຮັບພຣະນາມຂອງພຣະຄຣິດ” (ແອວມາ 46:21). ໂດຍຖ້ອຍຄຳຂອງເຮົາ ແລະ ວຽກງານຂອງເຮົາ, ເຮົາເປັນພະຍານວ່າພຣະເຈົ້າຊົງພຣະຊົນຢູ່ ແລະ ເຮົາຕິດຕາມພຣະບຸດຂອງພຣະອົງ.

“ສັດທາຂອງເຮົາບໍ່ໄດ້ຖືກແບ່ງແຍກ ຫລື ມັນບໍ່ຄວນເປັນຢ່າງແນ່ນອນ. ສັດທາບໍ່ແມ່ນພຽງແຕ່ສໍາລັບສາດສະໜາຈັກ, ມັນບໍ່ແມ່ນພຽງແຕ່ສໍາລັບບ້ານເຮືອນ, ມັນບໍ່ແມ່ນພຽງແຕ່ສໍາລັບ [ໂຮງຮຽນ],” ພອລແລມເບີດ, ໄພ່ພົນຍຸກສຸດທ້າຍຄົນໜຶ່ງ ຜູ້ຊ່ຽວຊານດ້ານຫລາກຫລາຍສາດສະໜາໄດ້ສັງເກດເຫັນ. “ມັນແມ່ນສໍາລັບທຸກສິ່ງທຸກຢ່າງທີ່ທ່ານເຮັດ.”⁹

ເຮົາບໍ່ຮູ້ວ່າປະຈັກພະຍານ, ຕົວຢ່າງທີ່ດີ, ແລະ ການກະທຳທີ່ດີຂອງເຮົາອາດມີຜົນກະທົບຕໍ່ຄົນອື່ນແນວໃດ. ແຕ່ເມື່ອເຮົາຢືນຢູ່ເພື່ອຄວາມຖືກຕ້ອງ ແລະ ຍົກຄວາມສະຫວ່າງຂອງພຣະຜູ້ຊ່ວຍໃຫ້ລອດຂຶ້ນ, ແລ້ວຜູ້ຄົນຈະສັງເກດເຫັນເຮົາ ແລະ ສະຫວັນຈະຮ້ອງເຊຍເຮົາ.

ຢືນຢູ່ເພື່ອອິດສະລະພາບທາງສາດສະໜາ

ການຫລອກລວງຂອງປະໂລຫິດໃນທຸກວັນນີ້, ດ້ວຍສັງຄົມທາງໂລກທີ່ນັບມື້ນັບຖືກຕໍ່ຕ້ານຜູ້ມີສັດທາ, ບໍ່ໄດ້ແຕກຕ່າງຈາກສະໄໝຂອງພຣະຄຳພີມໍມອນເລີຍ. ສຽງຂອງຜູ້ທີ່ຄັດຄ້ານຕໍ່ບົດບາດອັນສຳຄັນຂອງສາດສະໜາໃນວົງການສາທາລະນະ ແລະ ການເມືອງແມ່ນດັງຂຶ້ນເລື້ອຍໆ. ບັນດານິກາຍນິຍົມ ແລະ ລັດຖະບານ, ລວມທັງໂຮງຮຽນ ແລະ ມະຫາວິທະຍາໄລຫລາຍແຫ່ງ, ກໍາລັງບີບບັງຄັບໃຫ້ປະພຶດຕົວ ແລະ ຊັກຈູງການຜິດສິນທໍາ, ຄວາມຕໍ່າຊ້າ, ແລະ ສໍາພັນທະພາບທາງສິນທໍາ.

ການໂຈມຕີອິດສະລະພາບທາງສາດສະໜາຈະປະສົບຜົນສໍາເລັດຖ້າວ່າເຮົາບໍ່ຢືນຢູ່ເພື່ອສິດທິທາງສາດສະໜາຂອງເຮົາ. “ໃນຖານະສາດສະໜາຈັກ,” ຂ້າພະເຈົ້າໄດ້ສິດສອນເມື່ອບໍ່ດົນມານີ້ວ່າ, “ເຮົາຮ່ວມມືກັບສາດສະໜາອື່ນໆເພື່ອປົກປ້ອງຜູ້ຄົນໃນທຸກສາດສະໜາ ແລະ ປົກປ້ອງການຊັກຊວນ ແລະ ສິດທິຂອງພວກເຂົາທີ່ຈະກ່າວເຖິງຄວາມເຊື່ອໝັ້ນຂອງພວກເຂົາ.”¹⁰

ສົງຄາມໃນສະຫວັນໄດ້ຕໍ່ສູ້ກັນເພື່ອອຳເພີໃຈທາງສິນທຳ—ອິດສະລະພາບຂອງເຮົາທີ່ຈະເລືອກ. ເພື່ອຮັກສາອຳເພີໃຈຂອງເຮົາ ເຮົາຈະຕ້ອງຂະຫຍັນໝັ່ນພຽນໃນການປົກປ້ອງອິດສະລະພາບທາງສາດສະໜາຂອງເຮົາ.

ຄວາມສັດທາທາງສາດສະໜາທີ່ສົດໃສ ເພີ່ມຄວາມເຂັ້ມແຂງ ແລະ ປົກປ້ອງຄອບຄົວ, ຊຸມຊົນ, ແລະ ປະເທດຊາດ. ມັນຍັງເຮັດໃຫ້ມີການເຊື່ອຟັງກົດໝາຍ, ປູກຝັງຄວາມເຄົາລົບຕໍ່ຊີວິດ ແລະ ຊັບສິນ, ແລະ ສິດສອນຄວາມໃຈບຸນ, ຄວາມຊື່ສັດ, ແລະ ສິນທຳ—ຄຸນນະທຳທີ່ຈຳເປັນເພື່ອສືບຕໍ່ສະແດງໃຫ້ເຫັນເຖິງຄວາມທ່ຽງທຳ, ຄວາມມີອິດສະລະ, ແລະ ປະຊາສັງຄົມ. ເຮົາບໍ່ຈໍາເປັນຕ້ອງຂໍໂທດສໍາລັບຄວາມເຊື່ອຂອງເຮົາ.

ຄວາມພະຍາຍາມໃນການເຜີຍແຜ່ຂອງເຮົາ, ວຽກງານການກະທຳແທນຂອງເຮົາໃນພຣະວິຫານ, ຄວາມພະຍາຍາມຂອງເຮົາທີ່ຈະສ້າງສາອານາຈັກຂອງພຣະເຈົ້າ, ແລະ ຄວາມສຸກທີ່ສຸດຂອງເຮົາຮຽກຮ້ອງໃຫ້ເຮົາຢືນຂຶ້ນເພື່ອຄວາມເຊື່ອ ແລະ ອິດສະລະພາບທາງສາດສະໜາ. ເຮົາບໍ່ສາມາດສູນເສຍອິດສະລະພາບນັ້ນໄປໂດຍບໍ່ສູນເສຍອິດສະລະພາບອື່ນໆ.

ສາດສະດາໂຈເຊັບ ສະມິດ ໄດ້ສິດສອນວ່າ, “ຄວາມຮັກເສລີພາບນັ້ນເອງ ທີ່ສ້າງແຮງບັນດານໃຈໃຫ້ຈິດວິນຍານຂອງຂ້າພະເຈົ້າ—ເສລີພາບຂອງພົນລະເມືອງ ແລະ ສາດສະໜາຕໍ່ເຜົ່າພັນມະນຸດທັງປວງ.”¹¹ ເສລີພາບທາງສາດສະໜາຈະສ້າງແຮງບັນດານໃຈໃຫ້ ຈິດວິນຍານ ຂອງເຮົາເຊັ່ນກັນ ເມື່ອເຮົາເຮັດຕາມຄຳແນະນຳຈາກຜູ້ນຳຂອງສາດສະໜາຈັກ ທີ່ວ່າ:

“ຮັບຂ່າວສານກ່ຽວກັບປະເດັນທີ່ມີຄວາມສໍາຄັນຕໍ່ສາທາລະນະ, ແລະ ແລ້ວເວົ້າອອກມາດ້ວຍຄວາມກ້າຫານ ແລະ ສຸພາບ.”¹²
“ຮັບຮູ້ວ່າການທຳລາຍອິດສະລະພາບທາງສາດສະໜາເທື່ອລະໜ້ອຍ ຈະສົ່ງຜົນກະທົບອັນໃຫຍ່ຫລວງຕໍ່ໂອກາດຂອງເຮົາທີ່ຈະເຕີບໂຕໃນຄວາມເຂັ້ມແຂງ ແລະ ຄວາມຮູ້ພຣະກິດຕິຄຸນ, ທີ່ຈະໄດ້ຮັບພອນຈາກພິທີການສັກສິດ, ແລະ ເພິ່ງອາໄສພຣະຜູ້ເປັນເຈົ້າເພື່ອຊີ້ນຳສາດສະໜາຈັກຂອງພຣະອົງ.”¹³
“ຢືນຂຶ້ນ ແລະ ກ່າວເພື່ອຢືນຢັນວ່າພຣະເຈົ້າມີຈິງ ແລະ ວ່າມີຄວາມຈິງອັນສົມບູນທີ່ພຣະບັນຍັດຂອງພຣະອົງໄດ້ສະຖາປະນາ.”¹⁴
“ທ້າທາຍກົດໝາຍທີ່ທຳລາຍອິດສະລະພາບຂອງເຮົາໃນການນັບຖືສາດສະໜາຂອງເຮົາ.”¹⁵
“ເຂົ້າໄປໃນໂລກເພື່ອເຮັດຄວາມດີ, ເພື່ອສ້າງສັດທາໃນພຣະເຈົ້າຜູ້ຊົງລິດອຳນາດຍິ່ງໃຫຍ່ ແລະ ເພື່ອຊ່ວຍນຳຄົນອື່ນໄປສູ່ບ່ອນທີ່ມີຄວາມສຸກຫລາຍກວ່າ.”¹⁶
ສຶກສາແຫລ່ງຂໍ້ມູນທີ່ religiousfreedom.ChurchofJesusChrist.org ແລະ ທີ່ religiousfreedomlibrary.org/documents.

ເຮົາສ້າງສາອານາຈັກຂອງພຣະເຈົ້າເມື່ອເຮົາຮັບໃຊ້ຜູ້ອື່ນ, ຍົກຄວາມສະຫວ່າງຂອງເຮົາຂຶ້ນ, ແລະ ຢືນຢູ່ເພື່ອອິດສະລະພາບທາງສາດສະໜາ. ຂໍໃຫ້ພຣະຜູ້ເປັນເຈົ້າຈົ່ງອວຍພອນເຮົາໃນຄວາມພະຍາຍາມຂອງເຮົາທີ່ຈະເຮັດ “ຄວາມດີຢ່າງຫລວງຫລາຍ” ໃນບັນດາຄອບຄົວ, ຊຸມຊົນ, ແລະ ປະເທດຊາດຂອງເຮົາ.

© 2024 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, June 2024. Laotian. 19347 331