God Bae i Sapotem mo Sevem Yumi

I kam long Elda Dale G. Renlund

Blong Kworom blong Olgeta Twelef Aposol

Olsem kapten Moronae, yumi save kasem tabu help mo paoa blong ol faet we yumi stap fesem long laef.

Kapten Moronae i stap holem taetol blong fridom

Fas taem we mi bin ridim Buk blong Momon, mi bin laekem histri blong ol wo bitwin ol man blong Nifae mo ol man blong Leman. Mi intres long fet, waes tingting , mo ol plan we Moronae i yusum, wan militeri komanda we oli putum hem i kam lida blong evri ami blong ol man blong Nifae taem hem i gat 25 yia nomo. Hem i gat save, hem i strong mo i waes . Hem i bin komitim hem fulwan long fridom mo welfea blong ol pipol blong hem. (Luk long Alma 48:11–12.)

Moronae i no leftemap tingting blong hemwan from sakses we hem i kasem be hem i talem tangkyu from sakses blong hem i go long God mo i go long tabu sapot we ol ami blong hem oli bin kasem long olgeta woman mo pikinini we oli no faet. Hem i talem long lida blong enemi we oli winim olgeta long faet se: “Lod … i givim yufala i kam long han blong mifala. Mo nao mi wantem se bae yufala i andastanem se samting ia i hapen long mifala from relijin blong mifala mo fet blong mifala long Kraes.” Afta Moronae i givim toktok blong hem olsem wan profet se: “God bae i sapotem, mo kipim, mo sevem mifala, evri taem we mifala i fetful long hem, mo long fet blong mifala, mo long saed blong bilif long God blong mifala” (Alma 44:3, 4).

Afta sam taem, mi kam blong luksave se Moronae i soem tru long eksampol olgeta prinsipol we yumi save folem blong helpem yumi, blong mitim ol jalenj long laef blong yumi long ol dei blong tedei. Taem yumi stap soem fet long Jisas Kraes, Sevya blong wol ia, Hem bae i blesem yumi wetem paoa blong Hem. Be blong Hem blong mekem hem ia mo blong yumi luksave ol blesing blong Hem, yumi nidim blong andastanem stamba tingting blong yumi, gat wan plan blong sakses, mo mekem rere from ol faet blong laef we bae yumi fesem, semmak olsem we Moronae i bin mekem rere from mo fesem ol ril faet blong laef long taem blong hem. Taem yumi mekem olsem, Papa long Heven mo Jisas Kraes bae i sapotem mo sevem yumi.

Andastanem Stamba Tingting blong Yumi

Plante taem Moronae i rimaenem ol pipol huia i olgeta(olgeta oli bin bon insaed long Kavenan blong Ebraham) we oli (ol pikinini we God i lavem tumas) mo hemia i wnaem we oli faet from (famli, fet, mo fridom) Moronae i bin tijim ol pipol blong hem se olgeta ol stap faet from laef blong olgeta nomo mo from fridom aot long prisen mo slef. Long narasaed, ol enemi blong olgeta oli stap faet from paoa blong tekova long ol narafala samting.

Taem sam long ol man blong Nifae oli stap lukaotem blong tekova long paoa from ol samting we oli wantem blong olgetawan, Moronae i terem kot blong hem, mo i raet long wan pis blong hem stamba tingting blong mesej blong hem: “Blong tingbaot God blong yumi, relijin blong yumi, mo fridom, mo pis blong yumi, ol waef blong yumi, mo ol pikinini blong yumi.” Hem i leftemap flag ia, we hem i singaotem “taetol blong fridom”, long en blong wan stik mo hem i yusum blong rimaenem ol pipol se faet ia i blong wanem mo blong tekem olgeta i kambak from stamba tingting ia. (Luk long Alma 46:12–13, 19–20.)

Long ol faet blong laef long saed blong spirit, “yumi stap faet agens long olgeta long laef blong yumi, oli no man. Yumi stap faet agens long ol devel we oli stap olbaot long wol ya. Hemia ol lida blong olgeta, mo olgeta we oli gat paoa, mo ol jif blong olgeta we oli stamba blong ol fasin blong tudak long wol ya” (Efesas 6:12). Yumi nidim tu blong rimaenem yumi long wanem faet yumi stap mekem. Elda Neal A. Maxwell (1926–2004), wan foma memba blong Kworom blong olgeta Twelef Aposol i talemaot tingting ia tru long wan sot storian.

Long 2004, mi bin visitim Elda Maxwell long rum blong hem long hospital bifo hem i ded. Hem i bin kaen tumas long evriwan we oli bin visitim mo helpem hem. Ol wokman blong helt oli go insaed long rum blong hem mo oli krae taem oli kamaot. Mi talem long hem, “Elda Maxwell , hemia i had tumas.” Hem i laf smol mo talem, O, Dale, yumi ,yumi ol man mo woman we i no save finis we yumi stap laef long wan wol ia. Yumi no blong wol ia, olsem fis we i stap aotsaed long wota. Yumi luksave hemia nomo taem yumi gat wan lukluk we i no save finis.”

Yumi no mas lusum fokas long bigfala pikja blong tabu fasin mo ples we bae yumi kasem we i no save finis mo ol fos blong Setan we i kam agensem yumi. Taem yumi andastanem gud plan blong Papa long Heven bae hemia i leftemap tingting blong yumi blong gohed blong stap faet from laef ia we i no save finis mo fridom blong yumi aot long prisen long saed blong spirit.

Mekem Plan blong Sakses

Truaot long ol faet we ol ami blong hem oli faet long hem, Moronae i mekem gud plan blong mekem sua se oli kat sakses. Hem i bin yusum ol man blong spae blong faenemaot ol aktiviti mo ol tingting blong ol enemi blong hem. Hem i lukaotem daereksen long profet , Alma. Moronae i yusum insperesen ia blong Alma afta, long plan blong hem blong go faet. Hem i putum ol risos folem ol nid, hem i putum moa soldia long ol siti we oli no strong tumas. Hem i mekem plan folem ol infomesen we hem i kasem.

Mekem se hem i kasem plante sakses ova long ol enemi ami blong hem. Hem i neva hapi wetem ol win blong olgeta long ol faet we i pas; be, hem i gohed blong mekem i kam moa gud paoa blong hem mo blong ol ami blong hem blong fesem ol fiuja jalenj.

Yumi save yusum ol semmak fasin blong fesem ol jalenj long saed blong spirit. Yumi save stat taem yumi stap luksave wanem nao Setan i stap traem blong mekem long laef blong yumi. Hem i traem blong pulumaot tingting blong yumi long stamba tingting blong yumi. Taem yumi fesem temtesen, yumi sapos blong askem yumiwan:

?Olsem wanem nao aksen ia i save go wetem toktok blong God we Hem i soem?
?Wanem nao ol risal blong tekem aksen ia?
?Bae aksen ia i helpem mi blong fulfilim stamba tingting blong mi long wol ia?

Yumi mas luksave tu bigfala risal blong stap foldaon long ol smol temtesen. Taem yumi foldaon long temtesen, yumi fulap long “smol smol posen” (Alma 47:18), wan gud plan we i wok gud we oli yusum folem ol paoa blong ol rabis man we i save lid i go long ded long saed blong spirit olsem risal.

Yumi save mekem yumiwan i kam strong agensem ol temtesen blong Setan taem yumi folem ol daereksen blong ol lata dei profet blong yumi. Taem yumi olsem i helpem yumi blong kipim wan lukluk we i no save finis we long hem yumi save luklukbak long ol aksen blong yumi. Blong stap planem gud olsem wanem bae yumi fesem ol temtesen we bae oli kam antap long ol defren eria long laef blong yumi, bae i helpem yumi blong mekem ol moa gud mo stret joes long taem blong mekem joes. Blong stap mekem ol plan bifo mo plan we bae i kam bae i helpem yumi blong protektem yumi agensem ol samting we bae i spolem yumi blong kasem ol stamba tingting blong yumi we i no save finis.

Wan eksampol hem i blong teknoloji. Teknoloji i save kam olsem wan naef blong faet we tugeta saed i sap, tugeta saed i gat yus blong hem mo i save givim kil, dipen long hao yumi yusum. Blong helpem yumi blong mekem ol waes joes abaot ol divaes blong yumi, ol yangfala mo olfala i save luk long “Taking Charge of Technology” mo Blong ol Yut oli kamStron: Wan Gaed blong stap Mekem Joes. Hem ia i rimaenem yumi long stamba tingting blong yumi, i poenem yumi i go long Jisas Kraes, mo i helpem yumi blong invaetem Tabu Spirit i kam long laef blong yumi. Blong stap mekem plan long olsem wanem, wanem taem mo wea ples bae yumi yusum teknoloji blong i mekem yumi stanap strong agensem ol fasin blong wol we oli rong.

Stap Mekem Rere from ol Faet long Saed blong Spirit

Blong stap lukluk fored from ol faet we i stap kam, Moronae i bin mekem rere wanwan man blong hem wetem ol jesplet, ol hansil, ol sil blong blokem hed , mo ol tik klos. Hem i mekem rere ol pipol blong hem i kam tugeta long grup mo raonem ol siti wetem ol strong haos,hem i wokem ol wol long graon mo i raonem olgeta.

Long saed blong spirit, yumi mekem rere yumiwan taem yumi stap kipim ol komanmen blong God. Yumi mekem mo kipim ol kavenan wetem God we i tekem i kam paoa blong Jisas Krae long laef blong yumi. Yumi tekpat long wanwan mo praevet wei blong fasin blong folem Jisas Kraes, olsem blong stap prea, stap lego kaekae, mo stap stadi long ol skripja. Mo tu, yumi soem fet, taem yumi stap ansa long ol daereksen long saed blong spirit we yumi kasem. Yumi rere gud from mo klin inaf blong tekpat long sakramen. Taem yumi mekem olsem, Sevya i kam moa ril insaed long laef blong yumi, olsem we hem i bin ril long Moronae, we hem i bin stap strong long fet blong hem long Jisas Kraes. Moronae i save se hem i save dipen long Sevya blong kasem daereksen mo kam fri (luk long Alma 48:16). Yumi save dipen tu long Sevya blong kasem daereksen mo kam fri.

Yumi save rere gud moa taem yumi mekem famli blong yumi i kam strong. Papa blong yumi long Heven i putum yumi long oda insaed long ol famli blong helpem yumi blong stap glad mo lanem olsem wanem blong gobak long Hem. Ol famli blong yumi i save stap olsem wan fas help long yumi. Yumi evriwan i save filim glad mo lav taem yumi tingabaot se yumi,pat long bigfala famli blong God, nomata long wanwan situesen blong famli blong yumi.

Yumi save kam tugeta blong kasem paoa mo rere from olgeta faet blong yumi long saed blong spirit taem yumi joen tugeta long ol komuniti blong ol sent. Ol stek mo distrik blong yumi oli stap olsem ol ples blong haed mo wan sef ples. Yumi save helpem wanwan long yumi long saed blong spirit, helpem wanwan long yumi blong kipim olgeta komanmen blong God, mo leftemap tingting blong wanwan blong dipen long Kraes, oltaem mo speseli long ol taem blong jalenj. Taem yumi kam tugeta, yumi luksave se yumi no stap mekem ol faet blong yumi yumiwan. Yumi gat ol fren, ol tija, mo ol lida we oli save helpem mo protektem yumi. Yumi evriwan i kam moa strong taem yumi rere tugeta.

Laswan, Moronae i talemaot evri glad blong ol pipol blong hem blong stap tru long fet blong olgeta long God mo long relijin blong olgeta. Olsem Moronae, yumi mas luksave se glad i kam tru long Papa long Heven mo plan blong Hem mo from Jisas Kraes mo atonmen blong Hem. Taem yumi kam blong andastanem stamba tingting blong yumi, mekem plan blong gat sakses mo rere from ol faet long saed blong spirit, yumi kasem tabu help mo paoa.

Olsem Moronae, mi save se Papa long Heven mo Jisas Kraes i tekem i kam bigfala fridom aot long prisen—fridom aot long ded mo sin. Tufala i blesem yumi wetem paoa blong Tufala taem yumi lukluk long Tufala long evri samting.

© 2024 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem long translesen: 6/19. Translesen blong Liahona Mesej blong Evri Manis, Ogis 2024. Bislama. 19294 852