Kot Epwe Anisi me Tumunu Kich

Seni Elter Dale G. Renlund

Seni ewe Mwichen Ekkewe Engon me Ruemon Aposel

Ussun Kaptin Moronai, sia tongeni angei aninis seni nang me pochokun ren ekkewe maun sia mesengeni.

Kaptin Moronai a komoch ewe taitonun ngasano

Nupwen uwa karan aneani ewe Puken Mormon, ua fokkun sani ewe uruon ekkewe maun nefinen ekkewe aramasen Nifai me Lamenite. Ua fokkun ingeno ren ewe nuku, tipachem, me murinon omokut Kaptin Moronai a aea, emon meinapen sounfiu ewe a kefinita epwe emweni meinisin ekkewe sounfiun Nifait nupwen a chok karan 25 ierin. I a tipachem, pochokun, me a pwano an nipwakoch non an tipachemin ekiek. I a wesewesen mochen angang ngeni ewe ngaseno me nonomochun noun aramas. (Nengeni Alma 48:11–12.)

Nge ese fen feiochuni winen ewe mwichen sounfiu, Moronai a anganga ewe win fan iten Kot me ngeni ewe aninis mi pin noun we mwichen sounfiu a angei seni ekkewe fefin me semirit rese pwan pachenong non ewe moun. I a apasa ngeni emon sou emwenin ewe kumien chon u ngeni ra kuf: “Ewe Samon … a fen uweikemito non peum. Iwe iei ua mochen pwe oupwe weweiti pwe ei a fis … pokiten am namanam me am nuku non Kraist.” Mwirin Moronai a aporousa ei tufichin angei anononun weweiti me fatafatochun mettoch non pekin ngun: “Kot epwe anisi, me eteneki, me tumunu kich, anongonong won ach nikitu ngeni i, me ngeni ach nuku, me ach namanam” (Alma 44:3, 4).

Non fansoun, ua fen karan esina pwe Moronai a fori anapanapen ekkewe nongonong pwe sipwe tongeni aea an epwe anisi kich ne churi ekkewe sosotun non manauach iei. Nupwen sia omokutu ach nuku non Jises Kraist, ewe Chon Amanauen ewe fonufan, I epwe efeiochu kich ngeni An manaman. Nge ren I an epwe fori me ren kich ach sipwe esinna An kewe feioch, a auchea sipwe weweiti ach popun, ekieki tichikin kokot ren fetanochun ponutan ach mochen, me amonata ren ewe awewen ew ekiek mi awewe ngeni maun sia mesengeni, ussun chok Moronai an a amonata ngeni me mesengeni ewe wesewesen maun non manauan. Nupwen sia fori, Samach won Nang me Jises Kraist repwe anisikich me tumunukich.

Weweiti Ach Popun

Moronai a eniwini ne achema ngeni ekkewe aramas ekkewe ir (chon anemwiri ewe pwon an Kot ngeni Abraham me mwirimwirin kewe), ekkewe ir (noun Kot semirit achengicheng), me ewe popun minne ra fiu (famini, nuku, me ngaseno). Moronai a aiti noun kewe aramas pwe ra fiu fan iten ar repwe manau me ren ar ngaseno seni riaffoun nemenemengaw me fotek. Non sokofesenin, ekkewe chon u ngenir ra fiu fan iten ar mochen anapano pusin ar pochokun ika nemenem me pochokun ren ar repwe nemeni ekkoch.

Nupwen ekkoch chon Nephites ra kutta ar repwe wiseni ekkewe wis pochokun nge ese fiti pungun annuk ren pusin ar mochen angei, Moronai a kamwei ufan ewe me a makkei won och kamwan ewe oucheanapen mettochun an porous: “Non achechemen ach Kot, ach namanam, me ngaseno, me ach kinamwe, punuwach me nouch kewe semirit.” I a eitieta ei funaik, ewe minne a eita ngeni “ewe taitonun ngaseno,” won nesopun ewe mecha ma a aea ne achema ngeni kewe aramas met ewe wesewesen popun ewe fiu me ochusefanir ren ewe popun. (Nengeni Alma 46:12–13, 19–20.)

Non mounen ei manau non pekin ngun, “sise fiu ngeni aramas, nge sia fiu ngeni ekkewe ngun mi ngaw non nang, … ekkewe sou nemenem me ekkewe nouwis … [pwan] ngeni ekkewe pochokunen nang non ei fansoun rochopwak” (Ephesus 6:12). Pwan kich, a pwan, auchea ach sipwe achema ngenikich ussun met ewe fiu a fis fan itan. Elter Neal A. Maxwell (1926–2004), emon wesewesen chon ewe mwichen ekkewe Engon me Ruemon Aposel, apwarano ei ekiek non ew fatafatochun kapas, inamo ika ew chok mochomochen porous.

Non 2004, ua feinno churi Elter Maxwell non rumwan ewe non ewe pioing ese pwan tam me mwen a mano. I a fokkun umoumoch ngeni meinisin ion mi feitto churi i ne anisi i. Chon angangen pekin tumunu mi samau ra tonong non rumwan ewe ra tosefaniu nge ra kechiw. Ua ureni, “Elter Maxwell, ei a men fokkun aweires.” I a kikin takir me apasa, “Oh, Dale, kich sia nom non ew fonufan iei. Kich sia tou seni ach ereni, sia nom non muun sofo. Iei chok nupwen a wor ew nonomuch feinfeino pwe ew me nein ei epwe weweoch.”

Sisap tongeni sipwe poutano ewe watten forutan kinikinin mettochun fonufan me fetanin manauen emon feinfeino me ewe foforungawen ewe tefin a oumwesi ekewe ra u ngenikich. Weweochuti an Samach won Nang kokkot epwe amwasanga kich ach sipwe achocho ne fiu fan iten ach manau ese much me ach ngaseno seni fotekin non pekin ngun.

Ekieki ussun ew tichikin kokot ren fetanochun ponutan ach mochen.

Seni unusen ewe moun noun kewe sounfiu ra fiu, Moronai a ekieki ussun ew tichikin kokkot ren ponutan met a mochen. I a nounou spai an epwe sinei ika kuna ekkewe mokutukut me met ekkewe chon u ngeni ra mochen. I a kutta emwen seni ewe soufos, Alma. Mwirin Moronai a aea ewe omokut mi fokkun amwasangasang non an fein ngeni moun. I a enenia ekkewe neni anongonong ngeni met mi auchea, enenia chommong sounfiu non teninim ikewe a kukkun minen eppet. I a forata ew an epwe anisi an kokotun omokut anongonong won minefon porous.

Iwe i a angei tufichin an epwe okufu ekkewe sounfiu ra u ngeni. I ese pwan ekieki kinamwein pwapwan an win me nom, nge, i a chok sopweno ne anapano an me an noun kewe sounfiu tufich ne anganga ar osukosuk non fansoun mwer.

Sia tongeni aea omokut mi wewe ngeni ne angang ngeni emon mi pochokun ne u ngeni pwan emon non pekin ngun. Sia tongeni poputa ren ach esina met Setan a sotuni ne fori non manauach. I a sotuni an epwe omoruka ekiekich seni ach popun. Nupwen sia churi sosot, sipwe pusin eisinikich:

Ifa ussun ei mokutukut won ai kinikin a etetenita an epwe epeti ewe kapasen Kot mi pwano?
Met ekkewe osukosuken fori ei mokutukut?
Ei mokutukut epwe anisiei ne aponueta ai popun won ei fonufan?

Sipwe pwan esina ewe omuchunon met mi pwano ren anganga osukosuk nupwen mi namot ngeni pwan mwo kukkun sossot. Nupwen sia awora anen sosot, unumi “poison ekis me ekis” (Alma 47:18), ew omokutun kokot mi fetanoch angangan a aea seni ewe pochokunen angangen kirikiringaw ewe a tongeni emwen ngeni manon ewe ngun.

Sia tongeni awora epetin inisich seni an Setan sosot ren ach tapwei ewe emwen sia angei seni nouch soufos ikenai. Ren ach fori a anisi kich ach sipwe aponueta ew nonomuch ese much ren minne epwe cheki foforuch. Ren ach sipwe ekieki ussun ew tichikin kokkot ika epwe ifa ussun sipwe mesengeni ekkewe sosot a fisita non sokopaten neni non manauach epwe anisi kich ach sipwe anapano ach sipwe fori ekkewe mochen mi pung non ewe fansoun. Ota chok me mwan kewe kokkot mi fetanoch angangan me omokut epwe anisi kich ne epetikich seni tumunungawen ach ekiek seni ach popun ese much.

Ew minen awewe ren ena pekin tehnology. Technology a tongeni efoch ketinas mi ken me ruepek, ir me ruu mi namot me efeiengaw, anongonong won ifa ussun ach aea. Ren an epwe anisikich ach sipwe fori miritin ekiek ussun pisekich kewe, sarafo me mi mukono ra tongeni wewe ngeni “Nemeni Pekin Technology” me Ren ewe Pochokunen Sarafo: Ew Emwen ren Fori Ekiek. Ekkei ra achema kich ren ach popun, a itin ngenikich Jises Kraist, me anisi kich ne korato ewe Ngun mi Fel ngeni non manauach Ota ifa ussun, nupwen, me ian sipwe aea me ian technology epwe awora minen eppeti kich seni ekkewe ese wor ar nongonong, mokutukutun kokotun fonufan.

Amonata ren Kapasen Maun

Awitiwiti maun epwe fis, Moronai a amonata noun kewe aramas emon me emon fiti chechen neupwer, ar eppet, imwer won mokurer me uf mi manun. I a amonata noun aramas ren an a orokopwani ekkewe teninim ngeni imwen eppet a aparasata pun unukur.

Non pekin ngun, sia amonata emon me emon ren ach aponueta ekkewe annukun Kot. Sia fori me aponueta ekkewe pwon ngeni Kot ekkewe ra ngenikich pochokunen Kraist non manauach. Sia pachenong non pusin ach, foforun fen ngeni, ussun iotek, echikefen, me anneani ekkewe pukefel. Sia pwan mokutukut non nuku, mokut won emwenien ewe ngun sia angei. Sipwe achocho ngeni ach sipwe amonata ngeni me nimenimoch ach sipwe angei ewe sakramen. Nupwe sia fori, ewe Chon Ammanau a napano an winiti wesewesan non manauach, ussun chok nupwen I a wesewesan ngeni Moronai, ewe a pochokun non an nuku non Jises Kraist. Moronai a sinei pwe i epwe wata an epinukunuk won ewe Chon Amanau ren emwen me angasereno (nengeni Alma 48:16). Pwan kich, sia tongeni pwan wata ach epinukunuk won Jises Kraist ren emwen me amanau.

Sia tongeni sopweno ach amonata ren opochokunen ach kewe famini. Samach won Nang a forikicheta non ekkewe famini an epwe anisikich ach sipwe pwapwa me kaeo ifa ussun ach sipwe niwinsefanino ren I. Ach kewe famini ra tongeni ar repwe nenien aninis fan itach. Kich meinisin sia tongeni mefi pwapwa me tong ren ach chechemeni pwe kich kinikinin an Kot wachemuken famini, inamo ika met nonnomun ew me ew ach kewe famini.

Kich meiinisin ren unusan sia tongeni angei ach pochokun me amonata ren ach maun non ngun nupwen sia pachenong non ekkewe nenien Souneng. Ach kewe steik me tistrik ra awora ew nenien oponong non me eppet seni feiengaw. Sia tongeni tumunu fengeni kich non pekin ngun, anisi fengenikich ne aponueta ekkewe annukun Kot, me pesei fengenikich ach sipwe wata ach epinukunuk won Kraist, iteitan me akaewin non fansoun sossot. Nupwen sia chufengen, sia esinna pwe sise anamon ne fiu non ach maun. Mi wor chienach, nouch sense, me chon ewen ekkewe ra tongeni anisi me tumunu kich. Sia pochokun meinisin nupwen sia chufengen ne amonata.

Eingeingan, Moronai a anganga meinisin ewe pwapwan noun kewe aramas ar ra ennet ngeni ar nuku non Kot me ar namanam. Ussun Moronai, sipwe esina pwe pwapwa a feitto pokiten Samach Kot won nang me An kokkot me pokiten Jises Kraist me An Achasefan. Nupwen sia weweiti ach popun, sia ekieki ew tichikin kokkot ren sipwe win, me amonata ren anapanapen ekkewe moun, sia angei aninis seni nang me pochokun.

Ussun Moronai, ua sisnei pwe Samach Kot won nang me Jises Kraist ra wato ewe omuchunon ngaseno seni fofo—ngaseno seni mano me tipis. Ra efeiochu kich ren Ar pochokun nupwen sia nenenngeni Ir non mettoch meinisin.

© 2024 by Intellectual Reserve, Inc.Meinisin pung mi kawor. A för non USA. Kapungunon non fosun Merika: 6/19. Kapungunon chiakun: 6/19. Chiakun porous ren Liahona Iteiten Maram, August 2024. Chuukese. 19294 901