Porous Iteiten Maram Ren ewe Pochokunen Sarafo August 2024
Ew Pochokunen Marar
Ew pwon a nap seni ew etipeew; a ew marar.
Mi chok chiwen nom rei echo sasingin ewe sea mi onuen fetin Elter Pistone me Elter Morasco ra mot won nupwen ra afanafan ngeni ai famini non imwem ewe non Argentina. Ra afanafan fiti watten manamanen ngun iwe pwi ewe 10 ierin me ngang (9) am ouwa sa ngeni me atapa ewe sea mwirin ar ewe ra no, anean pwe ena manaman epwe tofata wom.
Muttir chok uwa sinei pwe ewe manaman ese etto seni ewe sea nge seni an wor ach pwonen marar ngeni Kot me Jises Kraist.
Ai Ua Sinei Ussun Papatais
Ua fori ai aewin pwon non November 13, 1977. Use konien chemeni ussun ai papatais, nge ua chemeni Elter Pistone a anisieinong non ewe konik me Elter Morasco a apungano pwe uwa choni ewe Mwichefen, nupwen mokurei mi chok chiwen chochchon. Ua pwan chemeni ewe pwapwa uwa mefi nupwen chienei kewe chon ewe minefon wart ra foropachaeino me kisiei non ewe esin ekan fis non Argentine me ewe pochokunen mochen uwa mefi ai upwe emon noun Samach Kot non Nang nengin mi nikitu.
Fopun Sister Spannaus (nukanapan) fiti inan me saman ewe (penie fefin), pwin ewe Silvina (penie mwan mi towaweno), me Elter Morasco.
Mwirin uwa tepereni pwe ewe pwapwa uwa mefi a feitto seni ewe niffangen ewe Ngun. Ua sinei pwe nupwen ua nikitu ne aponueta ai kewe pwon ngeni Kot, ewe Ngun epwe nom rei. Ewe Ngun mi Fel pwan ew chok me nein ekkewe pochokunen feioch ra feitto seni ew pwonen marar ngeni Kot me Jises Kraist.
Iei, ina mo ika ai kewe popun ai upwe fori mettoch, ekiek, me fofor resap ponueta, A wor ai epinukunuk ai upwe sopweeno chok ne sotuni. Pwata? Pokiten angei ewe sakramen a tufich ngeniei ai upwe asofosefani ai kewe pwon me fori minefon pwon ew me ew wik. Ua fokkun kinisou ren ena feioch.
Ew Kinamwein Pwonen Marar
Fan chommong sia rong pwe ekkewe pwon ra ruu-anen pwon nefinen kich me Kot. Nupwen en mi pung, ei esap iei meinisin. Non ennetin, “aponueta pwon esap ew angangen affor ren angangen sopai, nge ew kinamwein marar”
Iwe ifa ussun om forata ew pwonen marar ngeni Samach Kot non Nang me ewe Chon Amanau? Ra fen tongekemi non unusochun tong me ra mochen ar repwe efeiochukemi (nengeni 3 Nifai 14:11). Nge marar mi wor ruu keangan e mang me a wor tong seni ir me ruepek.
Ka mochen kopwe anapa om fansoun nonnom rer? Nupwen ka fori ekkewe mettoch Repwe fori, ka fiti Ir ne fetan! Meni ena epwe mecheres ussun rongorong ngeni emon chieno nupwen ew fansoun weires, awora fansoun kukunou ngeni emon pwim ika mongeom, ika pachenong emon a mefi an ese wor chienan. Iwe chok ekiseno, Ua awora fansoun ne fiti Kot ne fetan ren ai rekotuni ngingin fos me tinono porous ngeni emon chiechiei non Argentina ewe a mefi anamon. Ua pwan fen ekieki ai upwe chok fori an epwe chok wor manamanen nei ewe taropwen tonong non tempel iteitan pwe upwe tongeni awora fansoun ngeni ewe Samon non Imwan mi pin. Ka tongeni iotek ren ekkewe ekiek minne repwe anisuk om kopwe awora fansoun ngeni Samach won Nang me om ewe Chon Amanau.
Ka mochen kopwe pwar ngeni pwe ene mi ekiekir? Eteneki ekkewe pwon ka fen pwonei om kopwe aponueta ussun ew anen om kopwe pwarano om tong, esap ew tetenin annuk. Awewe chok, ren om kopwe manaueni ewe Annukun Mirit, ua kaeo ifa ussun kukun mongo mi murino ngeni kich. Iei uwa aiti nei ewe nengin an epwe fori ussun chok. Nupwen kopwe mochen aponueta An Kot kewe annuk, om tong fan itenn I me ewe Chon Amanau epwe marino.
Ach pwonen marar ngeni Samach Kot won Nang me Jises Kraist epwe anisikich an epwe murinono ach sinei Ir me napeno an wor ach tifichin an epwe wor Ar manaman non manauach—feinfeino chok nap seni och mettoch efoch sea mi onuwen fetin epwe awora. Me ena manaman a ekesiwinikich fansoun meinisin!
© 2024 seni Intellectual Reserve, Inc. Meinisin pung mi kawor. A för non USA. Kapungunon non fosun Merika: 6/19. Kapungunon chiakun: 6/19. Chiakun porous ren ewe Pochokunen Sarafo iteiten maram, August 2024. Chuukese. 19342 901