Ena Tokoni Keda ka Maroroi Keda na Kalou

Mai vei Elder Dale G. Renlund

Ena Kuoramu ni iApositolo Le Tinikarua

Me vakataki Kavetani Moronai, eda rawa ni ciqoma na veivuke vakalou kei na kaukauwa baleta na ivalu eda sotava ena bula oqo.

Sa laveta cake o Moronai na drotini ni bula galala

Ena imatai ni gauna au wilika kina na iVola i Momani, au marautaka na itukutuku ni ivalu ena kedra maliwa na Nifaiti kei ira na Leimanaiti. Au taleitaka na vakabauta, maqosa, kei na iwalewale a vakayagataka o Kavetani Moronai, e dua na komada ni mataivalu ka a lesi me iliuliu ni mataivalu kece ni Nifai ni se qai yabaki 25 ga. E a vuku, kaukauwa, ka yaloqaseqase. E a yalodinataka sara ga mera bula galala ka tiko vinaka na nona tamata. (Raica na Alama 48:11–12.)

A sega ni boletaki koya o Moronai baleta na rawa-ka ni mataivalu, ia a vakacaucautaka o Moronai na rawa-ka oqo ki vua na Kalou kei na veitokoni tabu a ciqoma na nona mataivalu mai vei ira na yalewa kei na gone sega ni laki valu. A kaya vua e dua na iliuliu ni meca vakadrukai: “Na Turaga … sa soli kemuni ki na ligai keimami. Ia oqo au gadreva mo ni kila deivaki ni sa vakayacori na veika oqo vei keimami… ena vuku ni neimami lotu kei na neimami vakabauti Karisito.” Sa qai wasea o Moronai na rai vakaparofita oqo: “Ni na tokoni keimami, maroroi keimami, ka taqomaki keimami na Kalou, ena gauna kece keimami dina tiko kina vua, kei na neimami vakabauta, kei na neimami lotu” (Alama 44:3, 4).

Ni toso na gauna, au sa qai kila ni a vakatotomuria o Moronai na ivakavuvuli e rawa ni da vakayagataka me vukei keda ena noda sotava na bolebole ni noda bula nikua. Ni da cakacakataka na vakabauti Jisu Karisito, na iVakabula kei vuravura, ena vakalougatataki keda o Koya ena Nona kaukauwa. Ia me vakayacora vakakina o Koya ka meda kila na Nona veivakalougatataki, eda gadreva me da kila na keda inaki, tuvanaki me rawa-ka, ka vakavakarau ki na ivalu vakaibalebale eda sotava, me vaka ga a vakarautaka o Moronai ka sotava na ivalu dina ena nona bula. Ni da vakayacora vakakina, erau na tokoni keda ka maroroi keda na Tamada Vakalomalagi kei Jisu Karisito.

Kila Vinaka na Keda Inaki

E dau veivakananumi vakawasoma o Moronai vei ira na tamata se o cei o ira (era na taukena na veiyalayalati vaka-Eparaama), ka ra sa (luve ni Kalou lomani), kei na inaki era a vala kina (matavuvale, vakabauta, kei na bula galala). A vakavulici ira na nona tamata o Moronai ni ra vala tiko me baleta na nodra bula kei na galala mai na veivakasaurarataki kei na veivakabobulataki. Ia, era saga na nodra meca mera vakalevulevui ira qai rawai ena nodra vakamalumalumutaki ira na tani.

Ni ra segata eso na Nifaiti me ra taura na lewa me rawa kina na ka e lomadra, a dresuka o Moronai na nona kote ka vola ena dua na tiki ni kena itukutuku: “Me ivakananumi ni noda Kalou, na noda lotu, na noda galala, kei na noda tiko sautu, o ira na watida, kei ira na luveda.” A laveta cake na kuila oqo, ka vakatoka o koya me “drotini ni galala,” ena mua ni dua na kau ka vakayagataka me vakananumi ira kina na tamata se cava sara na ivalu ka soqoni ira vata ki na inaki. (Raica na Alama 46:12–13, 19–20.)

Ena ivalu vakayalo ni bula, “ni da sa sega ni veivala walega kei ira na tamata, ia kei ira … era sa veitaliataka na butobuto … [kei ira] na veivavakoso yalo ca” (Efeso 6:12). Oi keda, talega, e dodonu me tukuni tikoga vei keda na vuna e caka tiko kina na ivalu oqo. O Elder Neal A. Maxwell (1926–2004), e dua na lewe ni Kuoramu ni iApositolo Le Tinikarua e liu, a vakaraitaka na vakasama oqo ena dua na veivosaki vinaka, ka dina ga ni lekaleka.

Ena 2004, au a sikovi Elder Maxwell ena nona rumu ni valenibula ni vo toka vakalailai me mate. E dau yalovinaka vei ira kece era sikovi koya se vukei koya. Era a curu ki na nona rumu na daucakacaka veiqaravi vakavuniwai ka lesu mai ena tagi. Au a kaya vua, “Elder Maxwell, e dredre dina oqo.” A dredre ka kaya, “Isa, Dale, eda sa tamata tawamudu ka bula tiko ena dua na vuravura vakayago. Sa takali na noda yavubula, me vaka na ika biu tani mai wai. Ena gauna ga eda raica kina vakatawamudu na ka oqo sa qai vakaibalebale dina vakalevu na ka oqo.”

Meda kua ni guilecava na levu ni noda ituvaki vakalou kei na icavacava tawamudu kei na mataivalu vakatevoro era saqati keda. Na kilai vakavinaka ni ituvatuva nei Tamada Vakalomalagi ena vakauqeti keda meda vala tikoga me baleta na noda vakabulai tawamudu kei na noda galala mai na veivakabobulataki vakayalo.

Tuvatuva me Rawa-Ka

Ena ivalu taucoko era vala kina na nona mataivalu, a tuvanaka o Moronai me vakadeitaki kina na qaqa. E dau vakayagataka o koya na yamata vuni me kila na nodra ituvatuva kei na nodra inaki na nona meca. A vakasaqara na veidusimaki mai vei parofita Alama. A qai vakayagataka o Moronai na veivakauqeti oya ena nona iwalewale ni ivalu. A vakayagataka na ivurevure me vaka na gagadre, ka biuti ira e levu na sotia ena veikoro era sega ni taqomaki tu vakavinaka. A tuvanaka vakavinaka na ituvatuva ni valu ka yavutaki ena itukutuku buta katakata.

A rawa kina vua me qaqa ki na mataivalu ni meca. E sega vakadua ni lomavakacegu ena qaqa sa oti; ia, a tomana tikoga na nona vakatorocaketaka kei na nodra rawa ni sotava na nona mataivalu na bolebole mai muri.

Eda rawa ni vakayagataka na iwalewale vata oqori meda walia kina na veisaqasaqa vakayalo. E rawa ni da tekivu ena noda kila na ka e saga tiko o Setani me cakava ena noda bula. E saga me vagolei keda tani mai na noda inaki. Ni da sotava na veitemaki, e dodonu meda tarogi keda:

E yaco vakacava noqu lewa oqo me saqata kina na vosa ni Kalou e vakatakilai mai?
Na cava so na revurevu e dau yaco ni da cakava na veika oqo?
Ena vukei au beka na cakacaka oqo meu vakayacora na noqu inaki e vuravura?

E dodonu tale ga meda kila na isau ni noda rawai ena veitemaki lalai sara mada ga. Ni da soro ki na veitemaki, eda na kana “gaga vakamalua” (Alama 47:18), e dua na iwalewale warumisa duadua e vakayagataki ena kaukauwa ni caka ca ka na rawa ni vakavuna na mate vakayalo.

E rawa ni da taqomaki keda mai na veitemaki nei Setani ena noda muria na veidusimaki eda ciqoma mai vua na noda parofita ni gauna oqo. Nida cakava qori ena vukei keda meda rai tawamudu ka meda dikeva kina na noda ivalavala. Ni da tuvanaka na sala meda na sotava kina na veitemaki era basika mai ena veivanua eso ni noda bula ena vukei keda meda digidigi dodonu vakalevu cake ena gauna oqo. Na ituvatuva vakarautaki kei na gugumatua ena vukei keda meda taqomaki mai na veivagolei tani mai na noda inaki tawamudu.

E dua na kena ivakaraitaki o ya na tekinolaji. Na tekinolaji e rawa ni iseleiwau batirua, e yaga ka ca talega, ni vakatau tiko ena ivakarau eda vakayagataka kina. Me vukei keda ena noda digidigi vuku me baleta na noda iyaya vakalivaliva, sa rawa vei ira na gone kei na qase meda raica na “Taura Vakavuku na Tekinolaji” kei na Me iSakisaki ni iTabagone: iDusidusi ni Kena Vakayacori na Digidigi. Oqo e vakananuma vei keda na noda inaki, dusimaki keda vei Jisu Karisito, ka vukei keda meda sureta na Yalo Tabu ki na noda bula. Tuvanaka na sala, na gauna, kei na vanua eda na vakayagataka kina na tekinolaji ena vaqaqacotaki keda mai vei ira na dauvakatulewa, iwalewale vakavuravura.

Vakavakarau ki na iValu Vakaibalebale

Ni namaka tiko o Moronai na ivalu e tarava, a vakarautaki ira yadua na nona tamata ena peleti ni seredra, isasabai, sala kaukaumea, kei na isulu vavaku. A vakarautaki ira vata na nona tamata ena nodra vakavolivoliti ira na veikoro taqomaki tu, ka boloraki ira wavoki ena qele.

Vakayalo, eda vakavakarau yadua ena noda muria na ivakaro ni Kalou. Eda cakava ka maroroya na veiyalayalati kei na Kalou ka na kauta mai na kaukauwa i Jisu Karisito ki na noda bula. Eda vakaitavi ena cakacaka ni yalodina yadua, me vaka na masu, lolo, kei na vakasaqaqara ena ivolanikalou. Sa dodonu talega me da cakacaka ena vakabauta, ena noda rogoca na veidusimaki vakayalo e yacovi keda mai. Eda vakavakarau vakaidina ki na sakaramede ka vakaivotavota kina ena bula kilikili. Ni da vakayacora vakakina, sa na yaco me ka dina vakalevu cake na iVakabula ena noda bula, me vaka ga na nona rairai dina o Koya vei Moronai, ka a tudei tu ena nona vakabauti Jisu Karisito. E kila o Moronai ni rawa ni vakararavi vua na iVakabula me baleta na veidusimaki kei na veisereki (raica na Alama 48:16). Eda rawa talega ni vakararavi vei Jisu Karisito me baleta na veidusimaki kei na veisereki.

Eda na rawa ni kuria na vakavakarau ena noda vaqaqacotaka na noda matavuvale. A tauyavutaki keda na Tamada Vakalomalagi ki na matavuvale me vukei keda meda marau ka vulica na sala meda lesu tale kina Vua. E rawa ni ivurevure ni veivuke vei keda na noda matavuvale. Eda rawa ni vakila kece na reki kei na loloma ena noda nanuma tiko ni da sa tiki ni matavuvale cecere ni Kalou, se cava ga na ituvaki yadua ni noda matavuvale.

E rawa ni da rawata vata na kaukauwa ka vakavakarau ki na noda ivalu vakayalo ni da lewena na veitikotiko raraba ni Yalododonu. Na noda iteki kei na tikina e vakarautaka na vanua ni idrodro kei na veitaqomaki vakaoqo. E rawa ni da veivukei vakayalo, veivukei vakai keda meda muria na ivakaro ni Kalou, ka veivakayaloqaqataki vakai keda meda vakararavi vei Karisito, ena veigauna kece ka vakabibi ena gauna ni bolebole. Nida soqoni vata, eda kila nida sega ni vala duadua ena noda ivalu. Era tiko na noda itokani, qasenivuli, kei na iliuliu ka rawa ni ra vukei keda ka taqomaki keda. Eda sa kaukauwa cake tikoga ni da vakasoqoni vata.

E vakasakiti, ni tukuna o Moronai na nodra marau kece na nona tamata nira dina ena nodra vakabauta na Kalou kei na nodra lotu. Me vakataki Moronai, e dodonu meda nanuma tiko ni reki e yaco mai ena vuku ni Tamada Vakalomalagi kei na Nona ituvatuva kei Jisu Karisito kei na Nona Veisorovaki. Ni da sa kila na noda inaki, tuvanaki meda rawa-ka, ka vakavakarau ki na ivalu vakaibalebale, eda na ciqoma na veivuke kei na kaukauwa vakalou.

Me vakataki Moronai, au kila ni Tamada Vakalomalagi kei Jisu Karisito erau kauta mai na galala cecere mai na veivakabobulataki—galala mai na mate kei na ivalavala ca. Erau na vakalougatataki keda ena Nodrau kaukauwa ni da rai vei Rau ena veika kecega.

© 2024 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka Valagi: 6/19. Vakadonui me vakadewataki: 6/19. iVakadewa ni iTukutuku Vakavula ni Liaona, Okosita 2024. Fijian. 19294 858