iTukutuku Vakavula ni Me iSakisaki ni iTabagone Okosita, 2024
E Dua na Veiwekani Kaukauwa
Na veiyalayalati e sega ni dua ga na konitaraki; e dua na veiwekani.
E se tiko ga vei au na iyaloyalo ni nodrau idabedabe drokadroka rau a dabe kina o Elder Pistone kei Elder Morasco ni rau vakavulica tiko na noqu matavuvale ena neitou vale mai Argentina. Erau veivakavulici ena kaukauwa vakayalo ka keirau dau cici yani kei taciqu yabaki 10 vata kei au (yabaki 9) me keirau tara na idabedabe ni rau sa biubiu yani, ka nuitaka ni na tarai keirau na kaukauwa oqori.
Au sa qai kila ni sega ni lako mai na idabedabe na kaukauwa ia mai na dua na veiwekani ni veiyalayalati kei na Kalou kei Jisu Karisito.
Na Noqu Papitaiso
Au a cakava na isevu ni noqu veiyalayalati ena ika 13 ni Noveba, 1977. Sa vaka meu guilecava na siga ni noqu papitaiso, ia au vakasamataka rawa ni a vukei au o Elder Pistone meu siro i wai ka vakadeitaki au o Elder Morasco ni se suasua tu na uluqu. Au nanuma talega na reki au vakila nira mokoti ka reguca au na itokani vou ni tabanalevu ena itovo vaka-Argentina kei na noqu gagadre kaukauwa meu luvena yalewa yalodina na Tamada Vakalomalagi.
Goneyalewa Sisita Spannaus (e loma) kei rau na nona itubutubu (imawi), tacina o Silvina (iotioti ena imatau), kei Elder Morasco.
E muri au qai kila ni reki au vakila e lako mai na isolisoli ni Yalo Tabu. Au vulica ni gauna au maroroya kina ena yalodina na noqu veiyalayalati kei na Kalou, ena tiko vata kei au na Yalotabu. Na Yalo Tabu e dua ga vei ira na veivakalougatataki kaukauwa e lako mai ena dua na veiwekani ni veiyalayalati kei na Kalou kei Jisu Karisito.
Ia, kevaka mada ga e yaco koso na noqu inaki, vakasama, kei na noqu ivalavala, sa tu vei au na inuinui meu tovolea tikoga. Cava na vuna? Baleta ni noqu votai ena sakaramede ena rawa kina vei au meu vakavouya na noqu veiyalayalati ka cakava na veiyalayalati vou ena veimacawa. Au sa vakavinavinakataka kina na veivakalougatataki oya.
E Dua na Veiwekani Vinaka Ni Veiyalayalati
Eda dau rogoca vakawasoma ni veiyalayalati e veisoli yalayala vei keda kei na Kalou. Me vaka ni dina oqori, e sega ni o koya taucoko. Na ka dina, “na maroroi ni veiyalayalati e sega ni dua na cakacaka batabata ia e dua na veimaliwai katakata.”
O na bulia vakacava e dua na veiwekani ni veiyalayalati kei na Tamada Vakalomalagi kei na iVakabula? Taumada Rau sa lomani iko vakavinaka sara ka vinakata me Rau vakalougatataki iko (raica na 3 Nifai 14:11). Ia na veimaliwai e yasana ruarua e taura na gauna kei na loloma maivei rau ruarua.
O vinakata beka mo vakayagataka e levu cake na gauna vata kei Rau? Ni ko cakava na veika Rau na cakava, ko sa lako vata tiko kei Rau! E rawa ni rawarawa sara oqori me vaka ga na vakarorogo vua e dua na itokani ena gauna dredre, vakayagataka na gauna me qito vata kei na dua na tacina, se okati kina e dua e vakila ni yalolailai. Dua na gauna sa oti, au a salavata tu kei na Kalou ena noqu a katona na voqa ni itukutuku ka vakauta na teks vua e dua na itokani mai Argentina a galili tiko. Au sa nanuma talega me dau bula tikoga na noqu ivolatara ni valetabu me rawa niu vakayagataka na gauna vata kei na Turaga ena Nona vale tabu. E rawa ni o masulaka na vakasama ena vukei iko mo vakayagataka na gauna vata kei na Tamada Vakalomalagi kei na nomu iVakabula.
O vinakata beka mo vakaraitaka vei Rau ni ko kauwai tikoga? Mo vakayacora na ivakaro o sa veiyalayalatitaka mo muria me sala mo vakaraitaka kina na nomu loloma, ka sega ni lisi ni lawa. Kena ivakaraitaki, niu bulataka na Vosa ni Vuku, au vulica na iwalewale ni kena vakasaqari na kakana bulabula. Au sa vakavulici iratou tiko na luvequ yalewa me ratou cakava vakakina. Ni ko sa muria ena lomasoli na ivakaro ni Kalou, ena tubu na nomu lomani Koya kei na iVakabula.
Na noda veiwekani veiyalayalati kei na Tamada Vakalomalagi kei Jisu Karisito ena vukei keda meda kilai Rau vakavinaka cake ka rawa ni da rawata vakalevu cake na Nodrau kaukauwa ena noda bula—ka sega ni vakaiyalayala cake mai na veika kecega e vakarautaka e dua na idabedabe drokadroka. Na kaukauwa oqori ena veisautaki keda me tawamudu!
© 2024 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka Valagi: 6/19. Vakadonui me vakadewataki: 6/19. iVakadewa ni iTukutuku Vakavula ni Me iSakisaki ni Tabagone, Okosita 2024. Fijian. 19342 858