“A Dios a Mo Olngeseu e Mengeluolu er Kid,” Liahona, Aug. 2024.
Klumech er a bek el buil LiahonaOngeai el buil 2024
A Dios a MoOlngeseu e Mengeluolu er Kid
El ua Captain Moroni, kid a sebeched el ngmai a chedaol ngeseu ma klisiich el kirel a odechelakl el de chelbangel er tial klengar.
Sunga mlara Eric Chow
Sera ak kot el choieuii a Babier er a Mormon, ng mle soak a reksii ra mekemad e ra delongelir a re Nephites ma re Lamanites. Ak mle mechas a renguk er sel klaumerang, llemesel, me a dechal er a ikel tekoi lousbech a Captain Moroni, el mengeteklel a soldau el miltutk el merredel er a rokui el soldau ra re Nephites el dirk ke lluich me eim a rekil. Ng mle ultebechel, mesisiich, e kladikm. Ng mle mui el cheloit a rengul el kirel a mimokl e ungil klengar er a rechedal. (Mesa Alma 48:11–12.)
Meng dimlak losiik a chetengakl el mora bedengel ra urelel a klsoldau, a Moroni a bai ulemes er ngii el kmong Dios me a chedaol ngeseu el ngilai a re soldau er ngii er a re dimlak el ngara mekemad el redil me a rengalk. Ng dilu ra mlo mechitechut el merredel ra cherreuir el kmo a Rubak … a milkrolii el mo er tir. E chelehang eng soal a bo lodengei el kmo tia ea uchul … leng sel klechelid er tir ma klaumerang er tir e ra Kristo. Moroni a mocha ouchais er tial lomes er ngii lulauch el kmo a Dios a mo olngeseu, e mesebechakl, e mengeluoleu er tir, mete melmolm loltirakl er ngii, e otireklii a klaumerang er tir, me a klechelid er tir (mesa Alma 44:3, 4).
Melmuut er chelechang, e ak mocha melchesuar el kmo a Moroni a kiltmokl a llach el sebeched lousbech el olngeseu er kid el obangel a ongarem er chelechal beches el klechad er kid. Sel douedikel ra klaumerang er kid ra Jesus Kristo, el Osobel ra beluulechad, Ngii a mo omekngeltengat er kid loba Klisichel. Ngdi alsekum Ngii a mo meruul er ngii me kid el mo mesa sel klengeltengat el mla re Ngii, eng kired el mo medengelii a moktek, mengedechuul a tekoi elmo ungil, e mengetmokl el kirel a ikel ua el mekemad el doldechelakl, eldi ua Moroni el keltmokl el kirel e ilbangel a meral mekemad ra klengar er ngii. Mesel de uaisei, ea Demad ra Babeluades ma Jesus Kristo a mo olngeseu e mengeluoleu er kid.
Medengelii a Moktek er Kid
A Moroni a blechoel lomeklatk ra rechad el kmo te reua techang (temo ngmai a ikal telbiil lokiu ra Abraham), le tir el (betik er a rengul ngelekel a Dios), e luchul e te ou mekemad el kirel a (telungalk, klaumerang, me a ilmokl). A Moroni olisechakl ra rechedal el kmo toumekemad mel sobel el mimokl ra uracheb me a kelebus. Ea, roumekemad er tir, a oldechelakl el kmal di kirel a bedengir ma klisiich el mengelbus ra rechad.
Me sera le borngii a bebil ra re Nephites el melai ra klisiich eldi kirel a tekoi ra bedengir, ea Moroni a tiltengii a bilel e lilchesii er ngii sel moktek er a tekingel: “Aki melatk er a Dios er kemam, klechelid er kemam, ma mimokl, ma budech er kemam, ma re bechemam, me a rengelekam.” E uldersii tial banderang, el lulmekedong er ngi el kmo deruchelell a ilmokl el telcherakl er a rsel a kerekar e ulesbech er ngii lomeklatk ra rechad ra moktek er tial mekemad e omekrael er tir el kirel. (Mesa Alma 46:12–13, 19–20.)
Sel mekemad er a reng er tial klechad, “e kede oldechelakl el diak el kirel a tech ma rasech ngdi bai omtok … ra re merredel ra milkolk … [e] omtok a mekngit er a reng” (Efesus 6:12). Kid, meng dirrek, el kired elmo medengei el kmo tial mekemad ngera moktek er ngii. A Elder Neal A. Maxwell (1926–2004), el mle chedal a Chelechad ra re Teruich ma terung el Apostol, a ulechotii tiakid el luldasu ra kmal klebokel, e kekedeb, el cheldecheduch.
Sera 2004, e ak mlo oldingel e ra Elder Maxwell e ra rum er ngii ra ospitar ruchei ra bol secher. Ngii a kmal mle lungil mora rokui el chad el mlo oldingel malechub e lolengeseu er ngii. A rureor ra ospitar a mora rum er ngii e te tuobed el merael iuosoch ra mederir. Mak melekoi er ngii, “Elder Maxwell, tia kmal meringel.” Ngulecherechur e kmul kmo, “E, Dale, kid a rechad a ngar elmo cherechar el kiei er tial beluulechad ra tech. Ke dultobed ra kerensed, el ua ngikel el diak el ngara ralm. Ngdi sel bo lultebechel osenged el bedul sel diak a ulebengelel e seikid ea ikal tekoi a morngii a belkul.”
Ngdiak el kired loridii osenged ersel klou el cherrengelel tial chedaol utekeled ma omroled el bedul sel diak a ulebengelel ma cheltel a mekngit el omtok er kid. Sel bo dungil medengelii a uldeseul a Demad ra Babeluades eng oremlid me kede melemolm lou mekemad el kirel sel diak a ulebenglel osobeled me a llemelted ra reng mel lak el llechotel.
Melib a mo Ungil
A ikel bekl mekemad el rechedal a ulemekemad, ea Moroni a melib el kirel me bo lungil. Ngulusbech er a rourabek el momes a loruul me a moktek ra re cherreuel. Ngulsiik a ulekrael er a profet, el Alma. Moroni a mlo ousebch er seikid el lulekrael luldasu sel lorech er ngii el mou mekemad. Ngultobed a ngarngii el klekedall loltirakl a usbechir a rechad, meleketek a ikel beluu ra re betok el soldau leng mechitechut cheuetelel. Ngungil melib e oltaut a uldasu el ultuil ra beches el tekoi.
Meng sebechel ngoriakl el mesisiich ra re cherareu el soldau. Ngdiak lungil besul ra rengul ra ikel blol mesisiich er ngii el mekemad; e bai, millemolm el lemuut el melisiich er ngii ma re soldau er ngii ra klisichir sel bol chebangel a ikel ngarmederir el ongarem.
Kid a sebeched e lousbech a osisiu el teletael sel bode chelbangel er tirkel lomtok a reng. Ng sebeched el omuchel el mesang a Satan el kmo ngerang meruul er a chelsel a klengar er kid. Ng melasem el mengesang er kid er a ikel ngerecheled. Sel de chebengelii a ngibsereng, e kede oker rekid:
-
Ng uangera tial omerellek a bol chasisois lomtok a mla mocholt el tekingel a Dios?
-
Ngera mo dubech ra omeliul tial lomeruul?
-
A uai tial lomeruul ngmo ngosukak el urengelii a moktek el ngar tial beluulechad?
Ng kired el dirrek el mesa sel mo dubech sel de mechelaud ra ikel mekerei lolngibsereng el tekoi. Sel de mechelodang ra ngibsereng, e kede mla ngmai el “blechobech el mekikiongel” (Alma 47:18), el kot el bedochel rael lousbech er ngii sel klisichel a mekngit el ngoikid elmo ridii a reng e morsel metacherbesul el teletael.
Ng sebeched el smisichid ra ikel ongarm ra Diablong sel doltirakl ra osisechakl el de ngai ra re profet er chelechal taem. Sel de uaisei eng ngosukid el mengeluoleu a ikel domes el diak a ulebengelel me bol sebeched lungil sumechokl a blekerdeled. Melib ra kmo kede mekerang a domes a ongarem el morngii ra kakerous el tekoi ra klengar er kid a ngosukid me kede meduch el melilt ra ungil ra bekl taem. A omelib luldasu ruchei ma dorech er kid a ngosukid el otngakl a olibesongel el tekoi el kirel a moktek ersel diak a ulebengelel rael.
A okesiul a sel tekingel a technology. A technology a sebechel erung a usebechellel, ngusbechall e melmall, ng kmal di ior ra usbecheled er ngii. Ma mo ngosukid el kutmokl a ungil luldasu el kirel tial donguu, a re ngeasek ma re meklou a sebechir lomes ersel “Taking Charge of Technology” me a Kirel a Klisichir a re Ngeasek: A Guide for Making Choices. A ikang a mekletkid ra moktek, e melutk er kid el bedul a Jesus Kristo, e olngeseu er kid el oleker er a Chedaol Reng el mera klengar er kid. Melib ra dokerang, oingerang, e ngar ker a dousbech er tial technology a mo smisichid el kirel a ikel kmal mekikiongel lomeruul er tial beluulechad.
Mengetmokl el kirel a Kakerous el Mekemad
Mengichiil ra merael mei el mekemad, a Moroni a mengetmokl ra rechedal lomael er tir ra deel, kaba, ulekou el deel, ma okrokl el bail. Ng mengetmokl el mengudel ra rechedal el liueklii a beluu el melissich el melers er ngii, e omekchutem el meliuekl.
Ngokiu a reng, e kede mengetmokl el dertal chad el oltirakl a llechul a Dios. Kede remuul e oltirakl a telbiil lobengkel a Dios el melai ersel klisichel a Jesus Kristo el mera klengar er kid. Kede ouediekl el kirel a klengar er kid, eldi kid lobang a blakelreng, el ua omeluluuch, olsengerengel, e mesuub ra chedaol llechukl. Kede dirrek el ouedikel loba klaumerang, loltirakl ersel ulekrael el reng el de nguu. Ng moungil selmechokl a rengud el kirel e ungil a delecherud e melai ra chedaol belsoil. Mesel de uaisei, e a Osobel a mengai elmo bleketakl ra chelsel a klengar er kid, eldi uaisel Ngii el mora Moroni, el mle mesisiich e ra klaumerang er ngii el mora Jesus Kristo. A Moroni a medengei e le bora Osobel eng mekrolii e osebelii (mesa Alma 48:16). Kid, meng dirrek, el sebehed el ultuil ra Jesus Kristo me lomekrael e losobel.
Kid a sebeched el mengetmokl el melisiich ra re telungalk er kid. A Demad ra Babeluades a milngederodel er kid elmo telungalk lolngeseu er kid me de ngara deurreng e dosuub el mekerang a deluut elmo re Ngii. A telungalk er kid a sebechel uchul a ngeseu el me rekid. Kede sebeched el melchesuar ra deurreng ma beltikelreng sel dolbedebek el kmo kid a telkib ersel klou el telungalk ra Dios, el diak el ior ra ngesengesel a telungalk er kid.
Kid a sebeched eldi kid e ngmai a klisiich e mengetmokl el kirel a mekemad ra reng sel bode dak kid ma rebebil er kid ra re Santo. A stake ma districts er kid a meskid a basiop el dolenguul er ngii e selbechakl. Kid a sebeched el kasisiich ra reng, kaingeseu loltirakl a llechul a Dios, e kaukledem el dmak el ultuil ra Kristo, el di blechoel e omesind ra taem ra ongarem. Sel bode chelludel, e kede melchesuar el kmo kid a diak dou mekemad a mekemedid eldi kid el tang. Ngarngii a re sechelid, re sensei, ma re meredeled el sebechir lolngeseu e mesebechakl er kid. Kede rokui el mesisiich sel de dak el mengetmokl.
Ngutebengall, el Moroni a chemat ra rokui el deurreng ra rechedal le te meral lultireklii a klaumerang er tir ra Dios me a klechelid er tir. Di ua Moroni, kid a kired elmo medengei el kmo a deurreng a mei leng Demad ra Babeluades me a Uldesuel e dirrek el Jesus Kristo ma Tngakireng er Ngii. Mesel bo dodengelii a moktek, melib e ra moungil, e mengetmokl el kirel a betok lodechelakl, e kede ngmai a chedaol ngeseu ma klisiich.
Di ua Moroni, Ngak a medengei el Demad ra Babeluades ma Jesus Kristo a meskid sel de meral mo mimokl kelebus—mimokl ra kodall ma klengit. Tir a omekngeltengat er kid loba Klisichir sel domes el bedul Tir ra rokui el tekoi.
© 2024 lokiu Intellectual Reserve, Inc. All rights reserved. Milluches er a USA. Kengei er a English: 6/19. Kengei er a Oidel: 6/19. Oidel ra Monthly Liahona Message, August 2024. Palauan. 19294 000