Koht Pahn Ketin Ieiang Kitail oh Pil Sewesei Kitail

Sang Elder Dale G. Renlund

Sang Pwihn en Wahnpoaron Ehk Riemeno

Kitail kak alehdi sawas mwahu oh manaman ong mahwin kan me kin wiawi nan atail mour, duwehte Captain Moroni.

Captain Moroni kolokol Pilaik en Saledek

Ni ansou me I tepin wadek Pwuhk en Mormon, I mwahuki rekohd en mahwin kan me kin wiawi nan pwungen mehn Nihpai kan oh mehn Lehman kan. I pwuriamweikihla soangen pwoson, loaloakoang, oh mai en pilahn en Captain Moroni, kaun en sounpei me pilipilda en kahlua sounpei en mehn Nihpai kan ni ansou me e sounpar 25. E loaloakoang, kehlail, oh eripit. E udahn kesempwaliki saledek oh soanemwahu en ah aramas akan. (Kilang Alma 48:11–12.)

Moroni sohte kin kapinga pein ih ahpw kin kapinga Koht oh sawas mwahu me sounpei kan kin alehdi sang lih oh seri me sohte iang mahwin kan. E padahkiong kaun en imwintihtio; “Kauno … ketin pangkumwaillahng pahn aht manaman. Oh met I men ke en wehwehki me met wiawi … pwehki at pelien lamalam oh at pwoson Krais.“ Moroni eri ehukiwei kaudiahl wet: “Koht kin utung, oh kolokol, oh doarei kiht, ma se pahn kin loalopwoat ong ih, oh at pwoson, oh at pelien lamalam“ Alma 44:3, 4).

Mwurin ansou ehu, I ahpw diaradahr me Moroni koasonedier ire mehlel kan koaros pwe kitail en kak dodohngki ong sewese kitail en kak kalowehdiki kahpwal akan en nan atail momour en rahn pwukat. Ni atail kin dodohngki atail pwoson Sises Krais, Sounkomour pen sampah, E pahn kapai kitailda ki Sapwelime manaman. Ahpw En kak wia met oh kitail en kak diarada Sapwelime kapai kan, kitail anahne esehla atail kahrepe, wonowei pwe en pweida, oh kounopehng mawin laud kan me kitail kin sohpai, nin duwen Moroni ah kounop kitaildahr en sohpai mawin mehlel kan nan atail mour. Ni atail pahn wia met, Samatail Nanleng oh Sises Krais pahn ieiang kitail oh pil sewesei kitail.

Kitail en kak wehwehki atail pwukoah.

Moroni kin kalapw katamankieng aramasoko ihs irail (iei kadaudok en inou sarawi en Abraham), irail iei (sapwelimen Koht serih kan), oh iei kahrepen arail wie pepei (peneinei, pwoson, oh saledek). Moroni padakieng irail me re wie pepeihki arail pwung en momour oh saledek sang kolokolok oh selidi. Wekisang, arail imwin tihtihkan me wie pepeiki arail men sansal oh lapalapala pohn mehtei kan.

Ni ansou me ekei mehn Nephite kan kin song en pein kaunda mehteikan, Moroni tehrpeseng ah sehto oh intingihdi: “Pwe kitail en kak tamataman atail Koht, atail mwomwohdiso, oh atail saledek, oh atail meleileiand, atail pwoud kan, oh neitail serih kan.” E kawada nah pilaik, iei “pilaik en saledek,” ni tuhke pwoat oh doadoahngki pwe en kin kataman ehng aramas akan dahme re wie pepeiki. (Kilang Alma 46:12-13, 19-20.)

Ni mwauin en pali ngenitail, ”kaidehk aramas ekei me kitail mahweniong, pwe ong … [meh] suwed akan … [oh kasongosong en ngehn]” (Episos 6:12). Kitail, pil, kin anahne tamataman dah kahrepen mwahwino. Elder Neal A. Maxwell (1926–2004), me kin iang Wahnpoaron Ehk Riemeno keilahn aiou, kawehwehda madamadau wet ni sansal, pil pweida nan ah kapahreko.

Nan 2004, I pwarek Elder Maxwell nan nimwen wini mwohn ah kepin salehdalau. Eh udahn mwahu ong koros me pwarek oh sewese. Souhn doadoahk en nan nimwen winiko kin kohla nan ah perehu oh pwureido wie sengiseng. I indahiong, “Elder Maxwell, me met udahn apwal.” Eh kisin kouruhr, “Oh, Dale, kitail aramas soutuk ahpw momour pohn sampah en uduk. Kitail sohte mihmi ni pali pwuhng, duwehte mwahmw me lusdahsang nan pihl. Ahnsou me kitail medewe soahngkan me soutuk, ihte ahnsou me soahng koaros wehwe.“

Kitail dehr peikasalikihla kahrepen atail momour oh wasa me kitail pahn lel ie oh pali suwed akan me kin uhwoang kitail. Wehweki ni pwung sapwelimen Sahm Nanleng pilahn pahn kakelailih kitail en pepeiki atail mour soutuk oh atail saledek sang soalidi en pali ngehn.

Pilpilahn ong Pweida

Nan mahwin me nah sounpei kan peikier, Moroni me pilahnedahr pwe en pweida. E doadoahngki meninkeder kan en diarada kamwakid akan oh dahme irail pilpilahne ong arail imwintihti kan. E rapahki kaweid sang soukohp, Alma. Moroni eri dodohngkier kaweid pwukat ni ah mwekidlahn nan mahwin. E kadarala dipwisou kan ni duwen me e anahne, kihdiong sounpei tohto nan kanihmw kan me sohte pereperail. E kosonedier duwen pilahn en mwekid wet sang ni ah poasonki kaweid en-rahn-pwukat.

Ih eri kalewedier soupei en imwintihti kan. E sohte kin nohn kin medewe mahwin en mahs kan, e doulahte kalaudehla an ih oh nah sounpei kan mwekid en sohpai kahpwal me pahn kohdo mwowe kan.

Kitail pil kak dodohngkite songen mwekid wet ong kasuwed pen pali ngehn kan. Kitail kak tapikihda sang ni atail pahn diarada dahme Sehda songosong en wia nan atail mour kan. E kin songosong en katokedi sang kitail dah kahrepen atail kohdoki sampah. Ni ansou me kitail pahn sohpai kasongosong, kitail anahne idek rehtail:

Ia mwomwen mwekid wet ah pahn laudla sang kasalehda mahsen en Koht?
Dahme pahn pwarada sang ni mwekid wet?
Mwekid wet pahn sewese ie kanekehla ai pwukoah pohn sampah wet?

Kitail pil anahne tehk dahme pahn pwarada ong ni kisin kasongosong me tikitik kan. Ni atail pahn alehda kasongosong kan, kitail kin audaudki “dikihri en wini suwed“ (Alma 47:18), Ih kamwakid me kin dodohk sang manaman en pali suwed o me kak kahreiong kitail pwopwilahn pali ngehnitail.

Kitail kak perehsang kitail an Sehdan kasongisong kan sang ni atail pahn idahwen kaweid kan sang atail soukohp en Imwin-rahn-akan. Ni atail pahn wia met e pahn sewese kitail en kolokol atail mour me pahn kahreiong atail pahn kak kin kilang mwomwen atail mwekid kan. Kosonehdi mwomwen atail pahn kin sohpai kasongosong kan me kin pwarada wasa kan koaros nan atail mour kan pahn sewese kitail en kak pilada pilipil pwung nan ansou pwuko. Pilpilahne mwekid kan oh mwomwen atail pahn sohpai pahn sewese kitail en perehsang mehn kamanok kan sang atail pwukoah en mour soutuk.

Ehu karasepe iei technology. Technology kak wia imwin-naip riau, koaros mie katepe, e pahn dodohk ni mwomwen amw pahn dodohngki. Pwe en kak sewese kitail en wiahda pilipil mwahu ong neitail dipwisou kan, me pwulopwul oh me mah kak kohla ni “Taking Charge of Technology“ oh For the Strenth of Youth: A Guide for Making Choices. Met e kin katamankiong kitail atail pwukoah, kainenehiong kitail ong Sises Krais, oh sewese kitail en luke Ngehn Sarawi ong atail mour kan. Pilpilahne mwomwe, ansou da, oh iawasa kitail en dodohngki technology pahn perehsang kitail mehkot me sohte katepe, oh mwekid en sampah kan.

Kokounop ong Mahwin kan

Sang ni ah wewehki me mie mahwin pahn kohdo, Moroni kounapahr nah aramas akan emen te naineki perepen nan mwaremware, mehn sansar kan, lisoarop, oh likou me mwosul. E kounopadahr nah aramas akan sang ni ah kapekapil perepen kanihmw kan, kesikesiki seli pwelpar.

Ni pali ngehn, kitail kin kounapada pein kitail sang ni atail kin kolokol kosonned akan en Koht. Kitail kin wiahda oh kolokol kosonned akan en Koht me kin wahdo manaman Sises Krais nan atail mour kan. Kitail kin pein ahneki de wia, pein atail mwekid en poadidi, me duwehte kapakap, kaisihsol, oh wadewadek noumw pwuhk sarawi kan. Kitail pil kin mwekid ki pwoson, sapsapeng kaweid en ngehn sarawi me kin kohdo kan. Kitail kin ansou koaros kounopada ong oh warohng en ale kamadipw sarawi. Ni atail pahn kin wia met, Sounkomour o pahn kin mihmila nan ataiol mour kan, duwehte Ah kin ieiang Moroni, me inenen tengeteng nan ah pwoson Sises Krais. Moroni ese me e kak kopworopworki Sounkomour o ong kaweid oh saledekla (kilang Alma 48:16). Kitail, pil, kak kopworopworki Sises Krais ong kaweid oh saledekla.

Kitail kak doulahte oh kounopada sang ni atail pahn kakehlailih atail peneinei kan. Samatail Nanleng kosonediong kitail nan peneinei kan en sewese kitail en peren oh esehla mwomwen atail pahn pwurala Reh. Atail peneinei kan kak wia mehn sewese kitail. Kitail kak kehn peren oh limpok sang ni atail pahn tamataman me kitail wia kisehn peneinei lap en Koht, mendahte an emen emen irair en nan peneinei kan.

Kitail kak alehdi kehlail oh kounopada atail mahwin en pali ngehn ni atail pahn patehng pwihn en Souleng kan. Atail stake oh district kan kihda wasahn rukila oh perehre. Kitail kak sewese emen emen ni pali ngehn, sewese emen emen ong kolokol kosonned akan en Koht, oh kangongehki emen emen en kopworopwor ki Krais, ansou koaros ahpw nan ansou en apwal aka. Ansou me kitail pahn kohpene, kitail kin diarada me kitail sohte kin mamahwin kelehpw. Mie kompokepatail, sounpadahk kan, oh kaun kan me kin sawas oh doare kitail. Kitail koaros kin kehlail ansou me kitail kin ehupoanoa ong koukounop.

E intingdier, Moroni kileledier koaros popohl en nah aramas akan ong mehlel ong arail pwoson Koht oh arail mwomwodiso. Duwehte Moroni, kitail kak diarada popohl ah kohdo pwehki Samatail Nanleng oh Sapwelime pilahn oh pwehki Sises Krais oh Sapwelime Tomwo. Ni atail kin esehla oh wewehkila atail kahrepe, kosonedi ong pweida, oh kounop ehng mahwin kan, kitail kin alehda sawas laud oh manaman.

Duehte Moroni, Ih ese me Samatail Nanleng oh Sises Krais me ketkieng kitail saledek sang kolokolok—saledek sang mehla oh dihp. Re kin kapai kitailda sang arail manaman ma kitail kin idawehn irail ni mehkoros.

© 2024 sang Intellectual Reserve, Inc.Kolokol pwuhng koaros. Intingda nan Wehin Amerika. Kamanaman ong ni Lokaiahn Wai: 6/19. Kamanaman ong kawehwe: 6/19. Kawehwe pen Padahk en Sounpwung kan en Liahona, Oahkos 2024. Pohnpeian.19294 000