Garment eke Edisana Itie-oku

Etop otode Elder Jeffrey R. Holland

Andida-nnɔ President eke Eboho mme Apostle Duopeba

Nte ubak ŋkpɔ eke temple endowment, enɔ nnyin nsasana editi-ŋkpɔ ke ikpɔkidem kabaŋa ediomi nnyin—idiɔŋɔ eke Andinyaŋa ke Idemesie.

Ibeheke mbeŋe-idem emi ekenehde enɔ mmɔ ye mme ɔsɔŋɔ emi mmɔ ekeŋwanade nditi, ekedi mkpaidem ŋkpɔ ɔnɔ Adam ye Eve ndikpɔŋ paradise Iŋwaŋ Eden mmɔ nyuŋ mbe nduk idiɔk ererimbot.

Ye ata edinehede ndiɔŋɔ, mmɔ ema efiɔk se oro ɔwɔrɔ ke edikpuhɔ emem, uwem mbre mmɔ nnɔ ererimbot efaŋa ye utom, ŋkukim ye ukut—ke akpatre ŋkpɔ emi ekotde mkpa eketienede. Mmɔ ikikemeke ndidiɔŋɔ ke ntɔŋɔ se ofuri emi ɔwɔrɔde, edi mmɔ edisɔp ekpep ke usen kiet-kiet eyeda obufa ubiak edi. Ke akpanikɔ, ata mbiak-ŋkan ke kpukpru ekedi edifiɔk ke mmimɔ idi-kut kpukpru emi ke ebahare ekpɔŋ Ete mmɔ eke Heaven—“ ebin esio ke iso esie,” ekem Moses ekediwet ntre.

Enɔde ubahare ye ndobo-ikpɔŋ emi ke mbit-mbit, enyene-ndik ererimbot, ekedi ŋkpɔ ndɔŋesit ɔnɔ Adam ye Eve nditi ŋkpɔkiet: ke ema enm mme eŋwɔŋɔ—ŋkpɔ edide nsasana ye nsinsi ekotde ediomi. Mmɔ ema eŋwɔŋɔ ke mmimɔ iyekop item Ete ke ofuri eyo uwem mmɔ, ndien Enye ama ɔŋwɔŋɔ ke iyenɔ Andinyaŋa, emi edisuhɔde ubiak ye ukut, osio-isop ke ndudue mm, onyuŋ afiak ada mmɔ aka ke iso Esie.

Edi didie mbon obukidem emi edi-ti se mmɔ ekeŋwɔŋɔde? Didie ke mmɔ edifiɔk idiɔk ndaha mmɔ efiɔk ke kpukpru ini, uwemeyo ye okoneyo?!

Editi-ŋkpɔ eke Ediomi Mmɔ

Eke oruk editi oro Enye ama ɔnɔ mmɔ “mme ɔfɔŋ eke ikpa-unam.” Se nte enɔ emi eketiede onyuŋ edide ke edikem ini. Ke ema ekedia mfri emi ekekpande, Adam ye Eve ke ndo-ndo oro ema efiɔk ke mmimɔ ikedi iferi. Akpa, mmɔ ekedomo ndifu iferi mmɔ ye ikɔŋ fig. Ekem, ekutde ke oro ikemke, mmɔ edomo ndidibe mkpɔŋ Jehovah. (Oruk ndisime utom oro okowut idiɔŋɔ ke uwem isɔŋ ama ɔtɔŋɔ!) Tɔŋɔde ke ini oro edisim emi, edima Ete ama okot nditɔ Esie ete edi, ewɔrɔ ke ndibe, etiene Enye. Ndien ye nte mme ɔfɔŋ ikpa-unam eke ini oro ye nsio-nsio ŋkpɔ ɔfɔŋ tɔŋɔde do, Enye ke mbɔm Esie iyakke nnyin idi iferi edi ofufuk “mbon ŋkpoitem ke ewura edinen ido,” ŋkpɔ-editi eke eŋwɔŋɔ ye ediomi nnyin. Mme “garment erinyaŋa” emi ada ɔnɔ mkpon-ŋkan ke kpukpru mme enɔ, Erisio-isop Jesus Christ.

Garment Edi Idiɔŋɔ Andinyaŋa

Ntem, kpukpru ekikere emi kabaŋa Adam ye Eve ye ediomi ye ɔfɔŋ edi, nte ededi, okpon akan utom edikekere ke ibuot. Isɔŋke edikere nte eketiede Adam ye Eve ke idem, koro nnyin ŋko imikut afanikɔŋ ke idiɔk ererimbot emi. Ema ebahare nnyin ŋko esio kiso Abasi, ndien nnyin imisihede idem nnyin anyan-usuŋ ke ofuri ini emi nnyin inamde ndudue. Nte Adam ye Eve, ema enɔ nnyin ukem Andinyaŋa oro, Jesus Christ Eyen Nazareth, Alpha ye Omega, Eyen eke odu-uwem Abasi. Nte Adam ye Eve, nnyin ima inam ediomi ye Abasi. Ndien, nte ubak ŋkpɔ eke temple endowment, enɔ nnyin nsasana editi-ŋkpɔ ke ikpɔkidem kabaŋa ediomi nnyin—idiɔŋɔ eke Andinyaŋa ke Idemesie. Ke eyo nnyin ekot oro garment eke edisana itie-oku.

Nnyin isine garment emi ke idak ɔfɔŋ-idem nnyin. Ke se oruk ubiɔŋ eke ami nnyenede, ke se oruk mbubehe eke mi namde ke uwem, ke se oruk utom eke edidu uwem ke usen ke usen oyomde, ke esit kpukpru oro edi ediomi mi—kpukpru ini ye ke nsinsi. Ke esit oro edi mme nsasana ediomi eke ami nehede nyire-mum. Garment idige ndifufuŋ mme ndimen-ŋwut ererimbot, ndien edimi mi inyuŋ idige ŋko. Edi ami mmenin mbiba mkpere idem mi—nehede mkpere nte ami ŋkemede. Mmɔ enehede edi eke idem mi ndien enehede edi nsasana.

Ke editi ediomi oro, mme usuŋ eŋwɔŋɔ iba oro, nnyin isine garment ke ofuri eyo uwem nnyin. Ido emi owut udɔŋ nyin ɔnɔ Andinyaŋa ndidi ofuri odudu ke uwem nnyin. Mme ndima idiɔŋɔ eken edi kini ekemde. Enim nnyin uduɔkmmɔŋ inikiet ke uwem nnyin. Nnyin idia udia-ɔbɔŋ inikiet ke udua. Nnyin ika temple ke nte ndaha enyimede. Edi garment edisana itie-oku enyene ukpuhɔde: idiɔŋɔ emi nnyin ikponode ke ofuri uwemeyo ye okoneyo.

Ndien oro edi usuŋ nte ediomi edide owo isiho inim ke ntak inem mme mbubru ndien inyuŋ idiɔŋke man ekekem ye ido ye edinam ererimbot. Ke uwem eke mbet Jesus Christ, enyene edi-nam usuŋ ererimbot man edisaŋa ye ediomi nnyin, idige ke usuŋ efen.

Ini eke nnyin isinede garment, nnyn idi, ke nte Akpa Presidency ekekpepde, ke isine nsasana idiɔŋɔ Jesus Christ. Ke ntre, ntak emi nnyin ikpiyomde efaŋa man ikpisio idiɔŋɔ oro ifep? Didie ke nnyin idituk idem nnyin ke eŋwɔŋɔ dudu, ukpeme, ye mbɔm emi garment oro adade ɔnɔ? Ke ndaha efen, ini ekededi emi nnyin ikpisiode grment oro ke esisit ini, ana nnyin inyene udɔŋ edifiak nsine enye, ke ata usɔp-usɔp, koro nnyin imiti mbiba eŋwɔŋɔ ye afanikɔŋ emi ɔnɔde ediomi nnyin ibɔrɔ. Akande kpukpru, nnyin imiti cross ye ukpɔk udi eke Christ.

Ubak owo ekeme nditiŋ ete, “Ami mmenyene usuŋ efen ndida nti Jesus.” Ndien ami nyebɔrɔ, Oro ɔfɔn. Nte awakde ke enehede ɔfɔn. Yak nnyin ikere ibaŋa ediwak usuŋ nte nnyin ikemede ndinim ubiere nnyin ke “editi enye kpukpru ini.” Edi ke ndinam ntre, idifɔnke ke edinehede nsin editi-ŋkpɔ emi Jehovah ke Idemesie ɔkɔnɔde mme andinam endowment, garment eke edisana itie-oku.

Jesus Christ ye ikɔ Abasi Esie ɔwɔrɔ ofuri ŋkpɔ ɔnɔ mi. Kpukpru nsinsi idorenyin ye udɔŋ mi, ofuri ŋkpɔ se ami nehede mum-ŋkama, ɔkɔŋɔ ke Enye. Enye edi “itiat erinyaŋa mi,” usuŋ mi ndikut Ete Heaven mi, ŋkokure usuŋ mi ndifiak ŋka se ami ŋkenyenede ke akpa ini ndien idahaemi nyom ndifiak nnyene, diana ye ata ediwak ŋkpɔ efen. Enɔ Esie emi Enye ɔnɔde nnyin edi mfɔn-ŋkan enɔ eke ami mbɔde, mfɔn-ŋkan enɔ emi enɔde ekedep nte ke oro ekedi ye anana-adaŋa ukut, eyakde enɔ anana-adaŋa ibat-owo, enɔde ye anana-adaŋa ima. Mme ŋkukim ye mbara-ekpe, ubiak ye nta-edet, ukut ye idiɔkŋkpɔ eke idiɔk ererimbot emi “kpukpru ema ekure ke Christ.”

Ntem ami mmesine garment eke edisana itie-oku—ofuri uwemeyo ye okoneyo nte odotde tɔŋɔ nte ekenam mi endowment ke isua Ata-ye-inaŋ emi ekebede—ke isua Efurenaŋ koro ami mmema Enye ye koro ami mmoyom mme ewŋɔŋɔ emi enye adade ɔnɔ.

Mme Mbume kabaŋa Edisine Garment?

Ubak mbufo emekeme edikot ŋkpɔ emi ekere ke ami nyebɔrɔ akpan mbume kiet kabaŋa garment. Afo emekeme edikere nyom “Ntem ke Jehovah ɔdɔhɔ”— mme “Nte ke mme isuŋutom Esie edɔhɔ”— ke ŋkpɔ emi esinede fi ke esit. Mbume fo ekeme edito ndaha idem fo emi enyenede ebuana ye utom, usiŋe-idem, nsana-idem, ndaha-isɔŋ, mfara-ke-idem, ndisana-ŋkpɔ, mme kpa ke ndaha nsɔŋidem.

Ekeme edikut mme ubak ibɔrɔ ke oruk mbume ntem ke temples.ChurchofJesusChrist.org ye ke section 38.5 eke General Handbook. Ekeme edikut nti mbon ufɔkemana ye mme adausuŋ kabaŋa mbubehe ekebeede owo. Edi odu, nte ededi, ata eti ndausuŋ emi enɔde ke ntɔŋɔ edinam ikɔ-Abasi, ndien odu Ete Heaven fo ke nsinsi ye nsinsi, emi ɔfiɔkde onyuŋ amade fi onyuŋ ɔfiɔk ofuri ɔkpɔ abaŋa ndaha fo. Enye eyekop inem ke afo edibup Enye mme mbume emi ke idem fo.

Mbɔk, mbↄk kop mi ↄfↄn. Nte afo oyomde edisana ndausuŋ, Spirit idi dɔŋke fi ete anam ekpri aan nditiene item emi ɔkɔbɔde ke temple ye item prophet emi Akpa Presidency ekebuanade ke ikɔ mmɔ eke mmi-mmi-emi. Edima Ete idi ŋwamke fi edikere nam ekpri akan nte ekemede edidian ye mme ido nsinifik ye mfara-ke-idem Esie emi edidiɔŋde fi idahaemi ye ke nsinsi. Edi nte Enye ɔfiɔk mbume fo, ndien nte Enye eyeŋwam fi edibɔ mme edidiɔŋ eke edikpono garment ye edinim ediomi? Iŋ! Nte afo ŋko eyeyom eti ata-ifiɔk ibɔk-mbakara ye nsɔŋidem kini ekpeyomde? Edi ntre! Nte afo eyesin nda-mana ifiɔk mme eyese ebe adaŋa? Ami mbeŋe nte ke afo udunamke.

Ami ŋkemeke edibɔrɔ ofuri mbume emi afo enyenede. Ami ŋkemeke edibɔrɔ ofuri mbume eke ami nnyenede. Edi ami. mmekeme, nte Apostle Ɔbɔŋ Jesus Christ kiet, ŋwɔŋɔ uŋwam eke edim Ete nnɔ fi, emi oymde ouri edikut-unen ye edidiɔŋ fo, ke usuŋ emi afo mukemeke edidiɔŋɔ mme edikut, ke nte afo enimde ediomi emi afo akanamde ye Enye.

© 2024 eketode Intellectual Reserve, Inc. Ekpan kpukpru unen ndimiŋ nwed emi. Ekemiŋ ke USA. Enyime edikabare ke Ikɔ Mbakara: 6/19. Enyime ndikabare: 6/19. Edikabare Ɔfiɔŋ-ke-ɔfiɔŋ Etop Liahona, Ɔyɔhɔ Ɔfiɔŋ Usukkiet 2024. Efik. 19295 553