Bosoom bosoom Liahona Amandzɛɛbɔ, Fankwa 2024

Asɔfodzi Krɔnkrɔn no ne Garment no

President Jeffrey R. Holland ne Kasaa

Asomafo Duebien no hɔn Quorum ne President n’Ananmu-gyinanyi

Dɛ ɔkã temple endowment ho no, wɔama hɛn honandua mu adze krɔnkrɔn nkaadze wɔ hɛn ahyɛmu horow ho—Agyenkwa Nankasa ho sɛnkyerɛdze.

Adam na Eve n’afã bi, Douglas M. Fryer yɛɛ nsaano mfonyin no

Mbrɛ ɔbɛdan biara ahoboaboa biara a wɔdze maa hɔn na awerɛhyɛmudze horow a wɔbɔɔ mbɔdzen dɛ wɔbɛkaa ekyir no, ɔbɛyɛ Adam na Eve ahobow kɛsenara dɛ otwar dɛ wofi hɔn Eden Ture paradise mu na wotu anamɔn kɔ wiadze a ɔahwe ase no mu.

Wohun no awɔse mu pefee dɛ, wɔdze hɔn asomdwee abrabɔ a obiara nnhaw hɔn no asesã wiadze a ɔkõ tsia, mfifir, nsoɛe na awerɛhow—a mbrɛ ɔbɛdan biara ekyir no biribi a wɔfrɛ no owu bɛba. Ahyɛse no nna wonnkotum ehu dza iyinom nyina kyerɛ, naaso annkyɛr na wosũaa dɛ da kor biara botum dze yaw fofor aba. Nokwar, dza nna ɔyɛ dzen kɛse koraa nye wohun dɛ wobehyia iyinom nyinara a woefi hɔn Egya a ɔwɔ Sor nkyɛn—a Moses kyerɛɛw no ekyir no dɛ “woesiw hɔn kwan wɔ n’enyim.”

Mpaapaamu yi na ankonam wiadze nwinwin huuhu mu no, mbrɛ obesi ayɛ awerɛkyekye ama Adam na Eve dɛ wɔbɛkaa adze kor, dɛ wɔabɔ hɔn anohoba—biribi krɔnkrɔn a onnyiewiei a wɔfrɛ no ahyɛmudzi. Wɔabɔ anohoba dɛ wɔbɛyɛ setsie ama Egya hɔn nkwa nda nyina mu, na Ɔno bɔɔ anohoba dɛ Ɔbɛma Agyenkwa, a Ɔbɔdwedwe hɔn yaw na awerɛhow, abɔ hɔn mfomdo ho werdam, na Ɔnye hɔn aba N’enyim dwudwoodwo.

Naaso woyinom a wɔnnkye bo yi besi dɛn akaa dza wɔabɔ ho anohoba no? Wobesi dɛn akɔ do ehu hɔn esian gyinabew—ehu no aber nyina, adzekyee na adzesaa?!

Hɔn Ahyɛmu horow ho Nkaadze

Dɛm nkaadze ho no ntsi Ɔmaa hɔn “nwoma ntar.” Akyɛdze pa na wɔ mber pa mu. Wodzii eduaba a wɔabra no ekyir no, Adam na Eve hun no ber noara mu dɛ wɔda adagyaw. Odzi kan, wɔbɔɔ mbɔdzen dɛ wɔdze adɔmba dua n’ahataw bɛkata hɔn adagyaw do. Nkyii, wosuroi dɛ onndzi mu no, wɔbɔɔ mbɔdzen dɛ wobosuma efi Ewuradze enyim. (Dɛm adze gyangyan yi da edzi dɛ nna ɔnnkyebo gyinabew repempan ba!) Ofitsi dɛm ber no besi ndɛ no, Egya dɔfo ato nsa afrɛ Ne mba dɛ wɔmbra, womfi nsumae mu, mbra No hɔ. Na dɛ nwoma ntar dɛm aber no na efuradze ahorow fitsi dɛm aber no, Ɔno wɔ N’ehumbɔbɔr mu no nngyaa hɛn ma yɛnnda adagyaw, mbom Ɔdze “tsenenee bataker” ewuna setsiefo, hɛn anohoba na ahyɛmu horow ho nkaadze. “Nkwagye ntar” yinom gyina hɔ maa akyɛdze kɛse a ɔsõ koraa no, Jesus Christ No Werdambɔ no.

Garment no Yɛ Agyenkwa no ho Sɛnkyerɛdze

Oye, Adam na Eve na ahyɛmu horow na efuradze ho adwendwen yi nyina no, nokwar, ɔnnyɛ adwen mu ndzeyɛɛ nko. Ɔnnyɛ dzen dɛ yebotum esusu ehu Adam na Eve hɔn atsenka, osiandɛ hɛn so yehyia ɔhaw wɔ wiadze yi ɔahwe ase yi mu. Hɛn so wɔapaa hɛn efi Nyame N’enyim, na ber biara yɛfom no hɛn ntamu twe. Tse dɛ Adam na Eve no, wɔama hɛn Agyenkwa kor noara, Jesus Christ Nazarethnyi no, Alpha na Omega, Nyame tseasefo Ne Ba no. Tse dɛ Adam na Eve no, yɛnye Nyankopɔn edzi ahyɛmu horow. Na, dɛ ɔkã temple endowment ho no, wɔama hɛn honandua mu adze krɔnkrɔn nkaadze wɔ hɛn ahyɛmu horow ho—Agyenkwa Nankasa ho sɛnkyerɛdze. Hɛn berano yi wɔfrɛ no asɔfodzi krɔnkrɔn no ne garment no.

The Second Coming [Mbae a Otsĩa Ebien no] n’afã bi, Harry Anderson yɛɛ nsaano mfonyin no

Yɛhyɛ garment yi wɔ hɛn atar n’ase. Asodzi biara a mowɔ no, asɛdze biara midzi wɔ abrabɔ yi mu no, dwuma a daa daa abrabɔ behia no, ne nyinara ase no m’ahyɛmu horow wɔ hɔ—aber nyina na daapem. Ne nyinara ase no na anohoba krɔnkrɔn horow a musuo mu dzendzenndzen no wɔ. Garment no wɔmmfa nntuw anaa wɔmmfa nnkyerɛ wiadze no, na dɛmara so mennyɛ m’ahyɛmu horow no dɛm. Mbom mema ebien no nyina bɛn me yie—bɛn me yie ara a mubotum. Wɔyɛ ankorankor koraa na krɔnkrɔn abɔso.

Ama yɛaakaa dɛm ahyɛmu horow no, dɛm akwan-ebien anohoba no, yɛhyɛ garment no hɛn abrabɔ nyina mu. Ndzeyɛɛ yi kyerɛ hɛn pɛ dɛ Agyenkwa no bɛyɛ daa daa nhyɛdo wɔ hɛn abrabɔ mu. Sɛnkyerɛdze binom a yɛdɔ no yɛ dza osii ber to ber. Wonuma hɛn kor pɛ wɔ hɛn abrabɔ mu. Yedzi sacrament mpɛn kor wɔ dapɛn mu. Yɛkɔ temple dɛ mbrɛ hɛn gyinabew bɛma ho kwan. Mbom asɔfodzi krɔnkrɔn no ne garment no yɛ soronko: sɛnkyerɛdze yi yedzi no nyi adzekyee biara na anafua biara.

Na dɛm na ahyɛmu horow tse—wɔmmfa nnto nkyɛn wɔ hɛn pɛ do anaa yɛhyɛ no biara biara na wɔnnsesã no ma ɔnnye ɔmamfo hɔn ntarhyɛ no su nnsɛ. Jesus Christ osuanyi n’abrabɔ mu no, otwar dɛ yɛsesa wiadze akwan horow no ma ɔnye hɛn ahyɛmu horow no saa, na nnyɛ ahyɛmu horow no nye wiadze akwan bɛsaa.

Sɛ yɛhyɛ garment no a, wɔkyerɛkyerɛ hɛn, dɛ ma President a Odzi Kan na n’Apamfo kyerɛkyerɛɛ no, nna yɛrehyɛ Jesus Christ ho sɛnkyerɛdze krɔnkrɔn. Dɛm nye asɛm no a, dɛn ntsi na yɛbɔhwehwɛ siantsir bi dze eyi sɛnkyerɛdze no efi hɔ? Dɛn ntsi na yɛbɛma tum, bambɔ, na ehumbɔbɔr a garment no gyina hɔ ma no abɔ hɛn? Naaso, ber biara a ɔwɔ dɛ yeyi garment no mber kakra ara no, ɔsɛ dɛ yɛdze enyimia dze san hyɛ no bio, ntsɛmara a ɔbɛyɛ yie, osiandɛ yɛkaa anohoba na esian horow a ɔma hɛn ahyɛmu horow no ho nkyerɛase. Ne nyina ekyir no, yɛkaa Christ ne mbeamudua no na nda a ɔatɔ pan no.

Binom botum akã dɛ, “Mowɔ akwan horow binom a medze kaa Jesus.” Na mubobua dɛ, ɔno yɛ nwanwa. Ɔrodɔɔ sõ no na oye. Hom mma hɛn nyina yɛndwen akwan horow pii a yebotum dze esie hɛn anohoba dɛ “yɛbɛkaa no aber nyina.” Mbom yɛreyɛ dɛm no, ɔbɛyɛ enyidahɔ ator dɛ yɛbɔpow nkaadze a Ewuradze Nankasa dze maa hɔn a wonyaa endowment akyɛdze no, asɔfodzi krɔnkrɔn no ne garment no.

Jesus Christ na N’asɛmpa no yɛ biribiara ma me. M’onnyiewiei enyidado na ahwehwɛdze nyina, biribiara a ɔsom mo bo no, gyina No do. Ɔno nye “mo nkwagye ɔbotan no,” mo kwan a mefa do kɔ mo Sor Egya hɔ, mo kwan nkotsee a medze san kɔ bea a nna pɛn bi mowɔ na sesei mepɛ dɛ minya bio, dze kã piigyan so ho. N’akyɛdze a Ɔdze ma hɛn no nye dza ɔyɛ ayamuyie kɛse wɔ dza menya biara, ayamuyie kɛse koraa a wɔdze ama pɛn—wɔdze amandzehu a onnyiewiei, wɔtsen ma dodow ara a hɔn nkanee onnyiewiei dze tɔe, wɔdze ɔdɔ a onnyiewiei dze mae. Nsoɛ na kɔkrɔw, yaw na ahohyehye, awerɛhow na wiadze yi ɔahwe ase no bɔn nyina “akɛhyɛ Christ mu.”

Ntsi mahyɛ asɔfodzi krɔnkrɔn no ne garment no—adzekyee biara na anafua biara dɛ mbrɛ ɔfata fitsi ber a megyee me endowment mfe 64 a abasen no, ber a nna medzi mfe 19—osiandɛ Modɔ no na osiandɛ mihia anohoba horow no a ogyina hɔ ma no.

Garment ne Nhyɛe ho Nsɛmbisa?

Hom mu binom a hom rekenkan nkyerɛwee yi enyi bɛda dɛ mibeyi asɛmbisa pɔkyee bi a ɔfa garment no ho ano. Hom enyi bɛda “Dɛm na Ewuradze ase”—anaa mpo “Dɛm na N’asomfo ase”—wɔ asɛm a ɔda w’akoma ho do. W’asɛmbisa befi ankorankor gyinabew bi a ɔfa edwuma mu asɛm, apɔwmutsentsen, ahosiesie ahotsew, wimu nsesa, ɔdwe atarhyɛ, ahosiesie mbea, anaa mpo yarba ho gyinabew.

Nsɛmbisa binom a ɔtsetse dɛm no ho nyiano no wobotum ehu no wɔ temples.ChurchofJesusChrist.org na wɔ ɔfã 38.5 wɔ General Handbook mu. Ebusua mu mba na baanodzifo a hom wɔ awerɛhyɛmu wɔ hɔn mu no wobotum ebisa hɔn ankorankor asɛm bi. Mbom, wɔama kwankyerɛ pefee wɔ ahyɛse ayɛdze no mu, na w’Egya a ɔwɔ Sor wɔ hɔ daa na daapem a, Onyim wo na Ɔdɔ wo na Ɔtse wo gyinabew nyina ho nsɛm ase. N’enyi bɛgye papaapa dɛ ibebisa No nsɛmbisa yinom ankorankor.

Sorɔmsorɔm no mfonyin St. George Utah Temple

Meserɛ hom ntse me ase. Ber a etsen woho hwehwɛ sor kwankyerɛ no, Sunsum no rennkenyan wo ma nnyɛ dza ɔtɔ sin wɔ iridzi nkyerɛkyerɛ a wɔdze maa wo wɔ temple no na nkɔnhyɛ afotu a President a Odzi Kan na n’Apamfo no kyɛe wɔ hɔn nsɛnkã ndaansa yi mu. Egya dɔfo rommboa wo ma nndwen dɛ ebɛyɛ dza ɔtɔ sin a obotum nye No som na efuradze ho gyinapɛn no asaa ma oehyira wo sesei na daapem. Mbom ana Ɔtse wo nsɛmbisa horow no ase, na ana Ɔbɔboa wo ma enya nhyira a ofi iridzi garment no nyi na irisie w’ahyɛmu horow? Nyew! Ana ɔwɔ dɛ sɛ okehia a ibebisa datser na apɔwmudzen edwumayɛfo a wɔawea a? Nyew! Ana ɔsɛ dɛ epow adwen pa anaa ehwɛ tra do? Mobɔ mpaa dɛ ennkɛyɛ.

Munnkotum eyi nsɛmbisa nyina ewɔ no ano. Munnkotum mpo eyi nsɛmbisa nyina a mowɔ ano. Naaso mubotum, dɛ meyɛ Ewuradze Jesus Christ no Somafo no, abɔ hom Nyame tseasefo No mboa ho anohoba, Ɔno a Ɔhwehwɛ wo konyimdzi na nhyira nyina, wɔ akwan horow a sesei innkotum atse ase do, ber a isie ahyɛmu horow a enye No edzi no.

President a Odzi Kan na n’Apamfo no Garment ho Asɛnkã no

Asɔfodzi Krɔnkrɔn no ne garment no kaa hɛn temple mu ntwamutam no, na dɛ ntwamutam no yɛ Jesus Christ ho sɛnkyerɛdze. Sɛ ehyɛ wo garment a, ehyɛ Jesus Christ ne sɛnkyerɛdze krɔnkrɔn no.

Erehyɛ no yɛ wo mu enyimpisi dɛ ebɛkã No do, no ho guado adzekyerɛ. Garment no so yɛ wo temple ahyɛmu horow ho nkaadze. Ɔsɛ dɛ ehyɛ garment no adzekyee na adzesaa w’abrabɔ ber nyina mu. Mber a otwar dɛ iyi dze dzi dwumadzi no a wonnkotum ayɛ ber a wɔhyɛ garment no, hwehwɛ dɛ ebɛsan ahyɛ no bio ntsɛmara a ɔbɛyɛ yie. Ber a isie w’ahyɛmu horow no, a ndzinoa krɔnkrɔn dɛ ebɛhyɛ garment no kã ho dɛ mbrɛ wɔkyerɛkyerɛɛ no wɔ ahyɛse ayɛdze mu no, ibenya Sunsum no n’ehumbɔbɔr, bambɔ, ahoɔdzen, na tum ho kwan kɛse ara yie.

© 2024 by Intellectual Reserve, Inc. All rights reserved. Wotsimtsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly Liahona Message, September 2023 ne nkyerɛasee. Fante. 19295 502

Nsɛnsin

1. Moses 5:4.

2. Moses 4:27.

3. Hwɛ Moses 4:13–14.

4. Hwɛ Isaiah 61:10; 2 Nephi 9:14; hwɛ Nyikyerɛ 19:8; 2 Nephi 4:33; Mormon 9:5; Nkyerɛkyerɛ na Ahyɛmudzi 109:76 so.

5. Nokwar pefee mu ara, garment no a yɛhyɛ no ndɛ no nntse dɛ nwoma ntar no a wɔdze maa Adam na Eve no. Garment no asesa wɔ akwan pii mu mfe rugu mu no, a tam no na no hyɛbea no kã ho. Mbom ndzɛmba a ohia kesɛ—garment no no krɔnkrɔn su, ahyɛmu horow a ɔyɛ ho ngyinahɔmadze no—nnsesa.

6. Garment no ne dzin nyina, tse dɛ Asɔr no ne dzin nyina kyerɛ nsɛm pii. Asɔfodzi no nye Nyankopɔn no tum, na erehyɛ garment no yɛ Nyame no tum a hɛn nsa tum kã ber a yɛnye Nyankopɔn dzi ahyɛmu na yesie ho nkaadze.

7. Moroni 4:3; 5:2.

8. 2 Nephi 4:30.

9. Mosiah 16:8 hwɛ Alma 31:38 so.