“Ti Garment ti Nasantuan a Priesthood,” Liahona, Sept. 2024.
Binulan a Mensahe ti Liahona , Septiembre 2024
Ti Garment ti Nasantuan a Priesthood
Kas paset ti endowment iti templo, naikkantayo iti maysa a sagrado a pisikal a palagip kadagiti katulagantayo —maysa a simbolo ti Mangisalakan Mismo.
Detalye manipud iti Da Adan ken Eva, ni Douglas M. Fryer
Ania man ti panagsagana nga awan duadua a naited kadakuada ken dagiti pammatalged a pinadasda a laglagipen, nakapasiddaaw kada Adan ken Eva a nangpanaw iti naparaisuan a Minuyongan ti Eden ken nagturongda iti natnag a lubong.
Addaan iti napasnek a pannakaammo, naamirisda no ania ti kaipapanan ti panangisukat iti natalna, nawaya a biagda iti maysa a lubong a napnuan iti pagsusupadian ken ling-et, siit ken ladingit—a sinaruno iti kamaudiananna ti maysa a banag a maawagan iti ipapatay. Saanda koma nga ammo idi damo no ania ti kaipapanan amin dagitoy, ngem di nagbayag naammuanda a mabalin a mangyeg iti baro a saem ti tunggal aldaw. Pudno unay, ti kasaeman iti amin ket ti pannakaamirisda a maipasangoda iti amin kadagitoy a naisina iti Amada idiay Langit—“napapanaw manipud iti imatangna,” nga insurat ni Moises idi agangay.
Gapu iti daytoy a panagsina ken panagmaymaysa iti nalamiis, naliday a lubong, anian a makaliwliwa kada Adan ken Eva ti pananglagipda iti maysa a banag: a naaramiden dagiti kari—banag a sagrado ken agnanayon a maawagan kadagiti katulagan. Inkarida nga agtulnogda iti Ama iti amin nga aldaw ti biagda, ket inkarina a mangipaay iti maysa a Mangisalakan, a mangpabang-ar iti saem ken ladingitda, mangsubbot kadagiti biddutda, ken mangisubli kadakuada a sitatalged iti imatangna.
Ngem kasano a malagip dagitoy a mortal no ania ti inkarida? Kasano nga agtalinaedda a makaammo iti napeggad a kasasaadda—a sipapanunot iti amin a panawen, aldaw ken rabii?!
Palagip Kadagiti Katulaganda
Para iti kasta a palagip intedna kadakuada dagiti “kawes a lalat.” Anian a sagut daytoy ken anian a naintiempuan. Kalpasan ti pannangan da Adan ken Eva iti maiparit a bunga, madagdagus a naammuanda a lamulamoda. Umuna, pinadasda nga abbongan ti kinalamulamoda iti bulbulong ti igos. Kalpasanna, gapu ta maamakda a saan nga umdas dayta, pinadasda ti naglemmeng manipud iti Apo. (Ti kasta a minamaag a panagregget ket pakakitaan ti panagtalinaed iti mortalidad!) Manipud iti dayta a kanito agingga iti agdama, inawis ti naayat nga Ama dagiti annakna a rummuarda, manipud iti paglemlemmengan, ket umasidegda Kenkuana. Ket kas kadagiti kawes a lalat idi ken ti nadumaduma a banag ti kawes manipud idi, Isu iti asina ket saannatayo a binaybay-an a lamulamo no di ket kinawesanna dagiti natulnog iti “roba ti kinalinteg,” maysa a palagip kadagiti kari ken katulagantayo. Dagitoy a “garment ti pannakaisalakan” ket mangisimbulo iti kaindaklanan iti amin a sagut, ti Pannubbot ni Jesucristo.
Ti Garment ti maysa a Simbulo ti Mangisalakan
Bueno, amin daytoy a kapanunotan maipapan kada Adan ken Eva ken dagiti katulagan ken kawes ket, siempre, ad-adda pay ngem iti maysa laeng a panangwatwat a mainaig iti panunot. Saan a narigat a panunoten no kasano ti narikna da Adan ken Eva, gapu ta maipasangotayo met kadagiti pakarikutan iti daytoy natnag a lubong. Naisinatayo met iti imatang ti Dios, ket ad-adda a mayadayotayo ti bagitayo tunggal agsalungasingtayo. Kas kada Adan ken Eva, naikkantayo iti isu met laeng a Mangisalakan, ni Jesucristo ti Nazaret, Alfa ken Omega, ti Anak ti sibibiag a Dios. Kas kada Adan ken Eva, nakitulagtayo iti Dios. Ket, kas paset ti endowment ti templo, naikkantayo iti sagrado a pisikal a palagip kadagita a katulagan—maysa a simbulo ti Mangisalakan Mismo. Iti dispensasiontayo maawagan daytoy iti kawes ti nasantuan a kinasaserdote.
Detalye manipud iti Ti Maikadua a Yaay, ni Harry Anderson
Ikawestayo daytoy a garment iti uneg ti akinruar a kawestayo. Aniaman dagiti pagrebbengak, ania man nga akemak iti biag, aniaman ti naidawat a kasapulan dagiti pagrebbengan iti inaldaw a panagbiag, iti babaen amin dagitoy ket dagiti katulagak—kanayon ken agnanayon. Iti babaen amin daytoy ket dagiti sagrado a kari a pagkapkaptak unay. Nailemmeng wenno saan a naiparang ti garment iti sanguanan ti lubong, ken kasta met dagiti katulagak. Ngem agpada a pagtalinaedek nga asidegda kaniak—agingga a kabaelak. Nalaus a personal ken sagradoda unay.
Iti pananglagip kadagita a katulagan, a panagtinnulag ti dua, ikawestayo ti garment iti unos ti panagbiagtayo. Daytoy nga aramid ket mangyanninaw iti tarigagaytayo nga agbalin a kanayon nga impluensia ti Mangisalakan iti biagtayo. Adda panawen dagiti dadduma pay nga ipatpategtayo a simbulo. Maminsan a mabuniagantayo iti biagtayo. Makiranudtayo iti sakramento iti maminsan ti makalawas. Dumar-aytayo iti templo no ipalubos dagiti kasasaad. Naiduma ti garment ti nasantuan a priesthood: daytoy a simbulo a dayawentayo iti tunggal aldaw ken rabii.
Ket kasta ti wagas dagiti katulagan—saan a mailasin gapu iti pagimbagan wenno awanan iti panagannad ken saan a mabalbaliwan tapno maibagay kadagiti estilo ken uso ti kagimongan. Iti biag ti maysa a disipulo ni Jesucristo, dagiti wagas ti lubong ti nasken a balbaliwan tapno maitunos kadagiti katulagantayo, saan a ti kasupadina.
No ikawestayo ti garment, ikawestayo, kas insuro ti Umuna a Panguluen, ti maysa a sagrado a simbolo ni Jesucristo. Gapu iti dayta, apay nga agsapultayo iti pambar a mangikkat iti dayta a simbolo? Apay a paidamantayo ti bagbagitayo iti kari ti bileg, salaknib, ken asi nga ibagi ti garment? Ti kasupadina, no nasken a temporario nga uksobentayo ti garment, nasken a magagarantayo koma a mangisubli nga ikawes manen daytoy, a madagdagus no mabalin gapu ta laglagipentayo nga agpadpada dagiti kari ken peggad a mangted iti kaipapanan kadagiti katulagantayo. Kangrunaan iti amin, malagiptayo ti krus ken awan tao a tanem ni Cristo.
Mabalin a kunaen ti dadduma, “Adda pay sabali a wagas a panglagip ken ni Jesus.” Ket sungbatak, nasayaat dayta. No ad-adu nasaysayaat. Panunotentayo amin ti adu a wagas agingga a kabaelantayo nga agtungpal iti panagkumittayo a “kanayon a manglagip kenkuana.” Ngem iti panangaramidtayo iti kastoy, saan a napudno ti naigagara a panangbaybay-a iti palagip nga inted ti Apo Mismo kadagiti na-endow, iti garment ti nasantuan a kinasaserdote.
Napnuan kaipapanan ti amin a banag kaniak ni Jesucristo ken ti ebangheliona. Amin nga agnanayon a namnamak ken arapaapko, amin a banag nga ipatpategko, agpannurayda Kenkuana. Isu ti “bato ti pannakaisalakanko,” ti dalanko tapno makaasidegak iti Nailangitan nga Amak, ti kakaisuna a dalanko nga agsubli iti sigud a naggapuak ket itan tarigagayak manen a maaddaanak, a karaman dagiti ad-adu pay. Ti sagutna kadatayo ti kangrunaan a parabur a naawatko, ti kangrunaan a parabur a naited pay laeng—nagatang a kas idi buyogen ti awan patinggana a panagsagaba, naisaknap agingga iti awan patinggana a bilang, naited iti awan patinggana nga ayat. Dagiti sisiit ken kalkalunay, ti saem ken leddaang, ti ladingit ken basol daytoy natnag a lubong ket “naalun-on ken ni Cristo.”
Isu nga inkawesko ti garment ti nasantuan a kinasaserdote—aldaw ken rabii kas maitutop manipud idi naikkannak iti endowment 64 a tawenen ti napalabas, idi agtawenak iti 19—gapu ta ay-ayatek Isuna ken gapu ta kasapulak dagiti kari nga ibagina.
Dagiti Saludsod maipapan iti Panagkawes iti Garment?
Mabalin a basbasaen ti dadduma kadakayo daytoy nga artikulo a mangnamnama a sungbatak ti partikular a saludsod maipapan iti garment. Mabalin a mangnamnamakayo iti “Kastoy ti kuna ti Apo”—wenno uray pay ti “Kastoy ti kuna dagiti adipenna”—maipapan iti maysa a banag nga asideg iti pusom. Mabalin a naggapu ti saludsodyo iti bukod a kasasaad a mainaig iti panggedan, panagwatwat, kinadalus, klima, kinaemma, pasilidad ti sanitary, wenno uray pay iti medikal a kondision.
Sumagmamano a sungbat kadagitoy a kita ti saludsod ket masarakan iti temples.ChurchofJesusChrist.org ken iti benneg 38.5 ti Sapasap a Handbook. Mabalin a makiuman dagiti mapagtalkan a miembro ti pamilia ken lider maipapan iti personal a banag. Nupay kasta, adda nalawag unay a panangiturong a naited kadagiti pangrugi nga ordinansa, ken adda agnanayon ken awan inggana nga Amayo idiay Langit, a makaam-ammo kadakayo ken mangay-ayat kadakayo ken makaawat iti amin a banag maipapan kadagiti kasasaadyo. Maragsakan Isuna no damagenyo Kenkuana dagitoy a saludsod a bukbukodyo.
Ladawan ti tuktok ti Templo iti St George Utah
Saandak koma a mapagbiddutan. No agpatulongkayo iti nadiosan a pannarabay, ti Espiritu saan a mangparegta kadakayo nga agaramid iti basbassit pay ngem iti mangsurot iti panangiturong a naawat iti templo ken ti naimpadtuan a balakad nga imbinglay ti Umuna a Panguluen iti nabiit pay a panangisaoda. Ti maysa a managayat nga Ama saannakayo a tulongan a mangirason iti panagaramid iti basbassit ngem iti kabaelanyo a mangitunos kadagiti pagalagadanna iti kinaanep ken kinaemma a mangbendisionto kadakayo ita ken iti agnanayon. Ngem maawatanna kadi dagiti saludsodyo, ket tulongannakayo kadi nga umawat kadagiti bendision ti panangraem iti garment ken panangtungpal kadagiti katulaganyo? Wen! Nasken kadi a makiumankayo pay kadagiti makabael a propesional iti medisina ken salun-at no kasapulan? Siempre! Naken kadi a diyo ikankano ti sentido komon wenno kumita iti labes ti marka? Ikarkararagko a saanyonto nga aramiden.
Diak masungbatan ti tunggal saludsodyo. Diak masungbatan ti tunggal saludsodko. Ngem kabaelak, kas maysa nga Apostol ni Apo Jesucristo, nga ikarik kadakayo ti tulong ti naayat a Dios, nga agkalikagum iti tunggal balligi ken bendisionyo, kadagiti wagas a diyo kabaelan ita a maawatan wenno makita, bayat ti panangtungpalyo kadagiti katulagan nga inaramidyo Kenkuana.
© 2024 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, September 2024. Ilokano. 19295 864