Binulan a Mensahe ti Para iti Pigsa dagiti Agtutubo , Septiembre 2024

Mabuteng iti Panagbabawi?

Jessica Zoey Strong

Dagiti Magasin iti Simbaan

Segun ken ni Presidente Russell M. Nelson, adtoy ti gapuna a nasken a saanmo a pagbutngan.

Ania ti kabutengmo ? Dagiti rollercoaster? Klase ti Math? Ikarkarigatan a maawatan ti Isaias?

Ania ti maipapan iti panagbabawi? No ti kapanunotan a panagbabawi ti mangtignay kenka nga aglemmeng iti uneg dagiti abbongmo wenno mangan iti adu unay a tsokolate, daytoy nga artikulo ti para kenka.

“Saankayo koma nga agbuteng wenno mangitantan iti panagbabawi,” kinuna ni Presidente Russell M. Nelson. Ken addaan iti nasayaat a rason. Adtoy ti sumagmamano a banag a kaipapanan ti ken saan a kaipapanan ti panagbabawi, segun ken ni Presidente Nelson.

Dagiti panangiladawan ni Corey Egbert

Ti panagbabawi ket: Para iti tunggal maysa.

Ti panagbabawi ket SAAN: Laeng a para kadagiti “dakes” a tattao.

“‘Kasapulan kadi ti tunggal maysa nga agbabawi?’ Wen ti sungbat.”

“Kasapulan ti panagbabawi ti tunggal agsungbat a tao nga agtarigagay iti agnanayon a gloria. Awan dagiti panangilaksid. … Ti panagbabawi isu ti tulbek iti panagdur-as.”

Ti panagbabawi ket: Maysa a wagas tapno sumayaat iti inaldaw.

Ti panagbabawi ket SAAN: Laeng a manmano a pasamak para kadagiti “dadakkel” a basbasol.

“Padasenyo ti pangpapigsa a bileg ti inaldaw a panagbabawi—ti panangaramid ken panagbalin a nasaysayaat bassit iti inaldaw.

“No pilientayo ti agbabawi, pilientayo ti agbalbaliw! Palugodantayo ti Mangisalakan a mangbalbaliw kadatayo nga agbalin a kasingpetan. …

“… Saan a namnamaen ti Apo ti panagbalintayo a perpekto itoy a kanito iti agnanayon a panagdur-astayo. Ngem namnamaenna nga agbalintayo a natartarnaw.”

Ti panagbabawi ket: Maysa a wagas tapno makarikna iti talna ken rag-o.

Ti panagbabawi ket SAAN: Nga adda sadiay a mangiparikna kadakayo iti bain ken buteng.

“Ti panagbabawi … ket ti tulbek nga agturong iti ragsak ken talna iti panunot. …

“No pilientayo ti agbabawi, … pilientayo ti dumur-as a naespirituan ken umawat iti rag-o—ti rag-o ti pannakasubbot ken ni [Jesucristo].” (Kitaen met ti Alma 36:17–23.)

Ti panagbabawi ket: Maysa a bendision manipud iti Nailangitan nga Ama ken iti Mangisalakan, a mangipatpateg kadatayo.

Ti panagbabawi ket SAAN: A maysa a pannusa.

“Ibilang ti adu a tao a dusa ti panagbabawi—maysa a banag a liklikan malaksid kadagiti kadagsenan a kasasaad. Ngem daytoy rikna a pannakadusa ket gapuanan ni Satanas. Lapdannatayo iti panangkita ken ni Jesucristo, a nakatanggaya ti takiagna, mangnamnama ken nakasagana a mangagas, mamakawan, mangdalus, mangpapigsa, mangpatarnaw, ken mangpasanto kadatayo.”

Dakayo ket: Kasapulan iti Simbaan ti Apo.

Dakayo ket SAAN: Nga adayo unay tapno agbabawi.

“No nalabit a mariknayo a nayaw-awankayo iti dana ti katulagan nga adayo unayen wenno napaut unayen, isiguradok kadakayo a saan a pudno dayta. Babaen ti Pannubbot ni Jesucristo, mabalin a naraniag ti masakbayanyo—narayray pay ketdi. Kasaritayo dagiti nagannak kadakayo ken ti bishop wenno branch presidentyo. … Pangngaasiyo, agsublikayo iti rag-o ken talged ti dana ti katulagan. Kasapulandakayo a kaduami.”

Awaten ti Naan-anay a Sagut ti Dios

Gapuna, nakasaganaka kadi nga agtalek iti Mangisalakan a mangparmek iti panagbutengmo iti panagbabawi? Saankayonto nga agbabawi.

Kuna ni Presidente Nelson: “Gapu ta kasapulan ti lubong ti pannakaisalakan, ken gapu ta kasapulanmi ken dakayo ti pannakaisalakan, nangibaon [ti Nailangitan nga Ama] iti maysa a Mangisalakan kadatayo.

“… Awatentayo koma ti naan-anay ken napateg a sagut ti Dios. Ibellengtayo koma dagiti dadagsen ken basoltayo iti sakaanan ti Mangisalakan ket padasentayo ti rag-o nga aggapu iti panagbabawi ken panagbalbaliw.”

© 2024 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, September 2024. Ilokano. 19343 864

Dagiti Nagadawan

1. Russell M. Nelson, “The Power of Spiritual Momentum,” Abr. 2022 general conference (Liahona, Mayo 2022, 98).

2. Russell M. Nelson, “We Can Do Better and Be Better,” Abr. 2019 general conference (Ensign wenno Liahona, Mayo 2019, 67).

3. Russell M. Nelson, “The Power of Spiritual Momentum” (98).

4. Russell M. Nelson, “We Can Do Better and Be Better” (67–68).

5. Russell M. Nelson, “We Can Do Better and Be Better” (67).

6. Russell M. Nelson, “We Can Do Better and Be Better” (67).

7. Russell M. Nelson, in “Worldwide Day of Testimony: I Can Do All Things through Christ,” broadcasts.ChurchofJesusChrist.org.

8. Russell M. Nelson, Instagram, Dis. 24, 2021, instagram.com/russellmnelson.