Ghamente ya Boperesiti jo bo Boitshepo

Ka Poresidente Jeffrey R. Holland

Poresidente e e tshwareletseng ya Khoramo ya Baaposetole ba ba Lesome le bobedi

E le karolo ya endaomente ya tempele, re neetswe kgakololo e e boitshepo ya nama ya dikgolagano tsa rona—e leng sesupo sa Mmoloki ka Boene.

Go sa kgathalesegele paakanyetso e kwa ntle ga pelaelo ba neng ba e neetswe le kgothatso e ba neng ba leka go e gakologelwa, go tshwanetse ga bo e ne ya nna selo se se makatsang mo go Atamo le Efa go tloga mo Tshimong ya Etene ya parataise ya bone mme ba tsena mo lefatsheng le le oleng.

Ka temogo e e masisi, ba ne ba lemoga gore go raya eng go ananyana botshelo jwa bone jwa kagiso, bo sena matshwenyego ka ntlheng ya lefatshe la kganetso le mofufutso, mitlwa le bohutsana—le le neng la latelwa pheletsong ke selo se se bitswang loso. Ba ne ba ka se ka ba itse kwa tshimologong gore sena sotlhe se raya eng, mme ka pele ba ne ba ithuta gore letsatsi lengwe le lengwe le ka tlisa botlhoko bo bo ntsha. Ele ruri, mo go botlhoko mo go tsotlhe e ne ele temogo ya gore ba ne ba tlaa lebagana le tsena tsotlhe ba kgaogane le Rara wa bone wa Legodimo—“ba tswaletswe kwa ntle go tswa mo boleng teng jwa gagwe,” morago Moshe o ne a tlaa bega.

Ga go elwa tlhoko kgaogano e na le bolutu mo lefatsheng le le tsididi, le la bonosi, go tshwanetse ga bo go ne go gomotsa jang mo go Atamo le Efa go gakologelwa selo se le sengwe: gore ditsholofetso di ne di dirilwe—sengwe se se boitshepo le sa bosakhutleng se se bidiwang dikgolagano. Ba ne ba solofeditse gore ba tlaa obamela Rara malatsi otlhe a botshelo jwa bone, mme O ne A solofeditse go neela Mmoloki, yo a neng a tlaa thusa botlhoko le bohutsana jwa bone, a lefela diphoso tsa bone, mme a ba tlise ka tshireletsego mo boleng teng jwa Gagwe.

Mme batho ba ba swang ba ba ne ba tlaa gakologelwa jang seo ba se solofeditseng? Ba ne ba tlaa nna ba lemoga seemo sa bone se se diphatsa jang—ba lemoga ka dinako tsotlhe, bosigo le motshegare?!

Kgakololo ya Dikgolagano Tsa Bone

Ka kgakololo e e ntseng jalo O ne a ba naya “diaparo tsa matlalo.” Ena e ne e le mpho e ntle thata ebile e le mo nakong. Morago ga go ja leungo le le ileditsweng, Atamo le Efa ba ne mo e ka nnang ka ponyo ya leitlho ba lemoga gore ga ba a ikatega. La ntlha, ba ne ba leka go khurumetsa bosaikategang jwa bone ka matlhare a mofeige. Ke gone, ba boifa gore se ga se a lekana, ba ne ba le ka go iphitlhela Morena. (Boiteko jwa boeleele jo bo ntseng jalo e ne e le bosupi jwa gore loso le ne le itshitlela!) Go tloga mo motsotsong oo go fitlhelela gompieno, Rara yo o lorato o laleditse bana ba Gagwe go tswa moo ba iphitlhileng teng, go tla kwa go Ene. Mme jaaka ka diaparo tsa letlalo nakong eo le diaparo tse di farologanyeng go tloga ka nako eo, Ene mo kutlwelongbotlhokong ya Gagwe ga a re tlogela re sa ikatega mme o apesitse ba ba utlwang “seaparo sa tshiamo,” e leng kakololo ya ditsolofetso le dikgolagano tsa rona. “Dighamente tsena tsa poloko” di kaya mpho e kgolo ya tsotlhe, Tetlanyo ya ga Jeso Keresete.

Ghamente Ke Sekao sa Mmoloki

Sentle-ntle, dikakanyo tsena tsotlhe ka Atamo le Efa le dikgolagano le diaparo, jaaka go solofetswe, e feta fela go ikatisa tlhaloganyo. Ga go thata go gopola gore Atamo le Efa ba ne ba ikutlwa jang, gonne le rona re lebagana le matshwenyego mo lefatsheng lena le le oleng. Le rona re kgaogantswe mo boleng teng jwa Modimo, mme re tswela pele go ikatosa nako le nako fa re dira molato. Jaaka Atamo le Efa, re neetswe ene Mmoloki yoo, Jeso Keresete wa Nazaretha, Alefa le Omega, Morwa wa Modimo o o tshelang. Jaaka Atamo le Efa, re dirile dikgolagano le Modimo. Mme, jaaka karolo ya endaomente ya tempele, re neetswe kgakololo e e boitshepo ya nama ya dikgolagano—sekao sa Mmoloki ka Boene. Mo tebalebelong ya rona e bidiwa ghamente ya boperesiti jo bo boitshepo.

Re apara ghamente ena ka fa tlase ga diaparo tsa rona tsa kwa ntle. Le fa ele maikarabelo afe a ke nang le one, le fa ele dikarolo dife tse ke di tsayang mo botshelong, le fa ele ditiro dife tse botshelo jwa letsatsi le letsatsi di bo tlhokang, kwa tlase ga tsotlhe ke dikgolagano tsa me—ka metlha le ka bosaengkae. Ka fa tlase ga tsotlhe ke ditsholofetso tse di boitshepo tseo ke di ngaparetseng ka thata. Ghamente ga go ikgantshiwe ka yone kgotsa ga e bontshiweng fa pele ga lefatshe, mme le e seng dikgolagano tsa me. Mme ke tshegetsa tsotlhe gaufi le nna ka bobedi—gaufi ka fa ke ka kgonang ka teng. Ke tsa motho thata-thata e bile di boitshepo thata-thata.

Mo go gakologelweng dikgolagano tseo, ditsholofelo tseo tse tsela-pedi, re apara ghamente botshelo jotlhe jwa rona. Mokgwa o na o bontsha keletso ya rona ya Mmoloki go nna tlhotlheletso e e tlhomameng mo matshelong a rona. Dikao tse dingwe tse di rategang ke tsa gangwe le gape. Re kolobediwa gangwefela mo matshelong a rona. Re ja sakaramente gangwefela mo bekeng. Re tsena tempele jaaka diemo di letla. Mme ghamente ya boperesiti jo bo boitshepo e farologanye: sekao sena re se tlotla letsatsi le letsatsi le bosigo.

Mme ke tsela e dikgolagano di ntseng ka teng—ga di beelwe fa thoka lebaka la boiketlo kgotsa botlhaswa mme ga di fetolwe gore di dumelelane le mekgwa le difeshene tsa setshaba. Mo botshelong jwa motlhanka wa ga Jeso Keresete, ditsela tsa lefatshe di tshwanetse go fetolwa go tsamalana le dikgolagano tsa rona, e seng ka tsela e nngwe.

Fa re apara ghamente, re a bo, jaaka Boporesidente ba Ntlha ba rutile, re apara sekao se se boitshepo sa ga Jeso Keresete. Ga go ntse jalo, ke ka ntlha ya eng fa re ka batla se ipato sa go tlosa sekao seo? Ke ka ntlha ya eng fa re ka ithontsha tsholofetso ya thata, tshireletso, le kutlwelobotlhoko tse ghamente e di kayang? Go fapaana le moo, mogang re tshwanetse go apola ghamente ka nakwana, re tshwanetse go thwaafalela go e apara gape, ka bofefo jobo ka kgonagalang, gonne re gakologelwa tsotlhe ditsholofetso le diphatsa tse di fang bokao mo dikgolaganong tsa rona. Godimo ga tsotlhe, re gakologelwa sefapaano le lebitla le le se nang sepe la ga Keresete.

Ba bangwe ba ka nna ba re, “Ke na le ditsela tse dingwe tsa go gakologelwa Jeso.” Mme ke tlaa araba ke re, seo se se ntle thata. Go botoka go nna le mekgwa e mentsi. A re akanyeng ka ditsela tse dintsi tse re ka kgonang go tshegetsa maitlamo a rona a go “mo gakologelwa ka metlha.” Mme ka go dira jalo, e tlaa bo e le go tlhoka boammaaruri go tlhokomologa ka bomo kgakololo eo Morena ka Boene a neng a e naya ba ba endailweng, ghamente ya boperesiti jo bo boitshepo.

Jeso Keresete le Efangele ya Gagwe di raya sengwe le sengwe mo go nna. Ditsholofelo tsotlhe tsa me tsa bosakhutleng le maikaelelo, sengwe le sengwe seo ke se tshwereng ele sa botlhokwa, di ikaegile ka Ene. Ke “lefika la poloko ya me,” tsela ya me ya katamelo kwa go Rara wa Legodimo, tsela ya me fela ya go boela kwa go seo se nkileng ka nna le sone mme jaanong ke batla go nna le sone gape, mmogo le tse dintsi thata. Mpho ya Gagwe mo go rona ke ya bopeloetshweu thata eo nkileng ka e amogela, ya bopelotshweu thata e e kileng ya neelwa—e e rekilweng ka pogisego e e se nang selekanyo, e atoloseditsweng palo e e se nang selekanyo, e e neetsweng ka lorato le le se nang selekanyo. Mutlwa le sitlasitlwane, botlhoko le tlalelo e e mahehe, bohutsana le sebe sa lefatshe lena le le oeleng tsotlhe di “meditswe mo go Keresete.”

Jalo ke apere ghamente ya boperesiti jo bo boitshepo—letsatsi le letsatsi le bosigo jaaka go tshwanetse fa e sale ke endaiwa dingwaga tse 64 tse di fetileng, ga ke le dingwaga di le 19—gonne ke tlhoka ditshelofetso tse e di emelang.

Dipotso ka go Apara Ghamente?

Bangwe ba lona ba ka tswa ba bala mokwalana ona ba solofela gore ke tlaa araba potso nngwe mabapi le ghamente. O ka nna wa solofela gore “Jaana go bua Morena”—kgotsa le e leng “Jaana go bua batlhanka ba Gagwe”—mo selong se se gaufi le pelo ya gago. Potso ya gago e ka nna ya simolola mo seemong sa gago se se amanang le tiro, ikatiso, bophepa, seemo sa loapi, boingotlo, ditlamelo tsa bophepa, kgotsa le seemo sa botsogo.

Dikarabo dingwe tsa dipotso tsa mefuta ena di ka bonwa kwa temples.ChurchofJesusChrist.org le mo kgaolwaneng 38.5 ya General Handbook. Maloko a lelwapa a a tshepiwang le baeteledi-pele ba ka nna ba botswa ka kgang ya motho ka bongwe. Le fa go ntse jalo, go na le kaelo e e tlhaloganyesegang thata e e neelwang mo ditaong tsa paakanyetso, mme ka metlha le metlha go na le Rara wa gago wa Legodimo, yo o go itseng le go go rata le go tlhaloganya sengwe le sengwe ka diemo tsa gago. A ka itumelela gore o botse Ene dipotso tsena ka bowena.

Motshophe wa Tempele ya. St. George Utah

Tswee-tswee o seka wa tlhoka go tlhaloganya. Fa o ntse o batla kaelo ya selegodimo, Mowa ga o kitla o go tlhotlheletsa go dira kwa tlase ga go sala morago taolo e e amogetsweng mo tempeleng le kgakololo ya seporofeti e e abelwanang ke Boporesidente jwa Ntlha mo polelong ya bone ya bosheng. Rara yo o lorato ga kitla a go thusa go ikemisetsa go dira kwa tlase ga se o ka se dirang go tsamaelana le mekgele ya Gagwe ya lorato le boitshoko tseo di tlaa go segofatsang jaanong le ka bosaengkae. Mme a O tlhaloganya dipotso tsa gago, mme a O tlaa go thusa go amogela ditshegofatso tsa go tlotla ghamente le go tshegetsa dikgolagano tsa gago? Ee! A o tshwanetse gape go buisana le dingaka le baitseanape ba botsogo fa go tlhokafala? Jaaka go solofetswe! A o tshwanetse go tlhokomologa tlhaloganyo kgotsa go leba go feta sekao? Ke rapela gore o se ka wa dira jalo.

Ga ke kake ka araba potso nngwe le nngwe e o nang le yone. Ga ke kake ka araba potso nngwe le nngwe e ke nang le yone. Mme, ke le Moaposetole wa Morena Jeso Keresete, nka go solofetsa thuso ya Modimo yo o lorato, yo o batlang katlego nngwe le nngwe le tshegofatso ya gago, ka ditsela tseo o sa ka keng wa di lekeletsa jaanong kgotsa go di bonela pele, fa o ntse o tshegetsa dikgolagano tse o di dirileng le Ene.

Polelo ya Boporesidente jwa Ntlha ka Ghamente

Ghamente ya boperesiti jo bo boitshepo e re gakolola ka sesiro sa tempele, mme sesiro seo se na le bokao jwa ga Jeso Keresete. Fa o apara ghamente ya gago, o apara sekao se se boitshepo sa ga Jeso Keresete.

Go e apara ke sesupo sa kwa ntle sa maikemisetso a gago a mo teng a go Mo sala morago. Ghamente gape ke kgakololo ya dikgolagano tsa gago tsa Tempele. O tshwanetse go apara ghamente ya gago motshegare le bosigo botshelo jwa gago jotlhe. Fa e tshwanelwa ke go apolelwa ditiro tse ka mabaka di ka se dirweng go aperwe ghamente, batla go e busetsa ka bofefo jo bo kgonegang. Ga o tshegetsa dikgolagano tsa gago, go akaretsa tshiamelo e e boitshepo ya go apara ghamente jaaka go kaetswe mo ditaong tsa paakanyetso, o tlaa nna le phitlhelelo e kgolo ya kutlwelobotlho, tshireletso, nonofo, le thata ya Mmoloki.