Yon Modèl pou Inite nan Jezikri

Prezidan Russell M. Nelson

Prezidan Legliz Jezikri pou Sen Dènye Jou yo

Lè nou ini nan Jezikri tankou pèp nan 4 Nefi a, dezi nou pou nou vin fè yon sèl la ranplase diferans nou yo epi mennen nan bonè.

N ap viv nan yon tan kote gen yon vag dezakò ak diskisyon k ap pwopaje toupatou sou latè. Avèk kontribisyon teknoloji ak ankourajman yon bann moun san kè, fòs divizyon sa yo ap menase pou yo ranpli kè nou avèk mepri epi kowonpi kominikasyon nou avèk chirepit. Lyen nan kominote yo ap kraze. Lagè ap fè raj.

Nan kontèks sa a, vrè disip Jezikri yo anvi jwenn lapè epi y ap chèche aktivman pou yo bati yon lòt kalite sosyete—yon sosyete ki baze sou ansèyman Jezikri yo. Se nan optik sa a, Senyè a te ban nou tach pou nou “fè youn; epi si nou pa fè youn, nou pa moun mwen” (Doktrin ak Alyans 38:27). An verite, inite se yon mak fabrik vrè Legliz Jezikri a.

Kijan n ap konbat fòs divizyon ak chirepit sa yo? Kijan nou ka rive atenn inite?

Erezman, 4 Nefi nan Liv Mòmon an ban nou yon egzanp. Chapit sa a brèfman rakonte fason pèp la te viv apre Sovè a te fin vizite yo, anseye yo, epi etabli Legliz Li a nan mitan yo. Istwa sa a montre kijan moun sa yo te atenn yon inite nan bonè ak lapè, e li ban nou yon modèl nou ka suiv pou nou atenn menm inite sa a.

Konvèsyon

Nan 4 Nefi 1:1, nou li: “Disip Jezi yo te fòme legliz Kris la toupatou nan peyi a. Epi [moun] te vin jwenn yo, e te reyèlman repanti pou peche yo.”

Nou ini nan pye Senyè ak Sovè a, Jezikri. Pandan chak moun ap aprann sou Jezikri, sou levanjil Li a, ak Legliz Li a, Sentespri a temwaye verite a nan kè chak moun. Nou chak ka aksepte envitasyon Sovè a pou nou gen lafwa nan Li epi suiv Li lè nou repanti a.

Konsa, yon vwayaj konvèsyon endividyèl kòmanse —lwen dezi egoyis ak peche epi nan direksyon Sovè a. Li se fondman lafwa nou. Epi lè nou chak vire gade Li nan chak panse (gade Doktrin ak Alyans 6:36), Li vin yon fòs inifyan ki ap inifye nou nan lavi nou.

Alyans

Rejis nan 4 Nefi a kontinye pou l deklare ke moun yo ki te vin nan Legliz la epi ki te repanti pou peche yo a “te batize nan non Jezi; epi yo te resevwa Sentespri a tou” (4 Nefi 1:1). Yo te antre nan yon alyans— yon relasyon espesyal, pèmanan—avèk Bondye.

Lè nou fè alyans epi nou kenbe alyans yo, nou pran non Senyè a sou nou endividyèlman. Anplis, nou pran non Li sou nou antanke yon pèp. Tout moun ki fè alyans epi ki ap fè efò pou kenbe yo vin tounen pèp Senyè a, trezò espesyal Li (gade Egzòd 19:5). Konsa, nou ap vwayaje sou chemen alyans lan alafwa endividyèlman ak kolektivman. Relasyon alyans nou avèk Bondye ban nou yon kòz komen ak yon idantite komen. Si nou makonnen nou avèk Senyè a, Li ap ede nou “kè nou ap makonnen ansanm nan inite ak lanmou youn pou lòt” (Mozya 18:21).

Jistis, Egalite, ak Ede Pòv yo

Istwa nan 4 Nefi a kontinye: “Pa t gen chirepit ak diskisyon nan pami yo, e tout moun te aji byen youn ak lòt.

‌“Epi, yo te pataje tout bagay nan pami yo, youn bay lòt; se poutèt sa pa t gen rich ak pòv, esklav ak lib, men tout moun te vin lib, e yo te resevwa don ki soti nan syèl la.” (‌4 Nefi 1:2–3).

Nan zafè tanporèl nou yo, Senyè a vle pou nou bon e jis youn ak lòt epi pou nou pa fè fwod oswa fè koken youn ak lòt (gade 1 Tesalonisyen 4:6). Pandan nou ap rapwoche nou de Senyè a, nou “p ap mete nan lide nou pou youn fè lòt mal, men pou nou viv nan lapè e pou nou bay chak moun daprè sa li merite” (Mozya 4:13).

Senyè a kòmande nou tou pou nou pran swen pòv yo ak moun ki nan bezwen yo. Nou ta dwe “pataje byen [nou]” pou ede yo, selon kapasite nou pou nou fè sa, san nou pa jije yo (gade Mozya 4:21–27).

Nou chak dwe “konsidere frè l tankou tèt pa l” (Doktrin ak Alyans 38:24). Si nou dwe vin tounen pèp Senyè a epi vini ini, non sèlman nou youn dwe trete lòt kòm egal, men tou, nou youn dwe vrèman konsidere lòt kòm egal tou epi santi nan kè nou ke nou egal--ego devan Bondye, nan valè egal ak potansyèl egal.

Obeyisans

Pwochen leson ki soti nan 4 Nefi a vini nan ekspresyon senp sa a: “Yo te mache daprè kòmandman yo te resevwa nan men Senyè Bondye yo a” (4 Nefi 1:12).

Senyè a te anseye moun sa yo doktrin Li a, Li te ba yo kòmandman, epi Li te aple sèvitè pou te administre yo. Youn nan objekti Li te genyen nan fè sa se te pou L te asire ke pa t ap gen okenn diskisyon nan pami yo (gade 3 Nefi 11:28–29; 18:34).

Obeyisans nou nan ansèyman Senyè a ak sèvitè Li yo esansyèl pou nou vin ini. Sa gen ladan l angajman nou pou nou obeyi kòmandman pou nou repanti chak fwa nou peche a epi ede youn lòt pandan n ap fè efò pou nou amelyore tèt nou de jou an jou.

Reyini Ansanm

Apre sa, nou aprann ke pèp nan 4 Nefi a “[te kontinye] jene, priye, e reyini ansanm souvan pou yo priye e pou yo koute pawòl Senyè a” (4 Nefi 1:12).

Nou bezwen reyini ansanm. Reyinyon adorasyon chak semèn nou yo se yon opòtinite enpòtan pou nou jwenn fòs, alafwa endividyèlman ak kolektivman. Nou pran Sentsèn, nou aprann, priye, chante ansanm, ak sipòte youn ak lòt. Gen lòt rasanbleman ki ede ranfòse santiman apatenans, amitye, ak objektif komen tou.

Lanmou

Rejis nan 4 Nefi a ban nou sa ki petèt se gran kle nan tout bagay sa yo—bagay ki, san li, nou p ap ka atenn inite a: “Pa t gen chirepit nan peyi a, poutèt lanmou Bondye ki te nan kè pèp la” (4 Nefi 1:15).

Nou jwenn lapè pèsonèl lè nou vrèman renmen Bondye, nan soumisyon ak imilite. Sa se premye ak pi gwo kòmandman an. Renmen Bondye plis pase tout lòt moun oswa tout lòt bagay se kondisyon ki pote vrè lapè, konsolayon, konfyans, ak lajwa. Si nou devlope lanmou pou Bondye ak Jezikri, lanmou pou fanmi ak pwochen nou ap vini natirèlman.

Pi gwo lajwa n ap janm fè eksperyans se lè nou anvayi avèk lanmou pou Bondye ak pou tout pitit Li yo.

Charite, lanmou pi Kris la, se antidot pou chirepit. Li se karakteristik prensipal yon vrè disip Jezikri. Lè nou mete nou enb devan Bondye epi nou priye avèk tout enèji kè nou, Bondye ap akòde nou charite (gade Mowoni 7:48).

Pandan ke nou tout ap chèche gen lanmou Bondye a rete nan kè nou, mirak inite a ap parèt totalman natirèl pou nou.

Idantite divin

Finalman, pèp nan 4 Nefi a te montre yon siy inite ki merite atansyon nou: “Pa t gen vòlè, ni asasen, ni tout pa t gen Lamanit, ni okenn kalite -it; men yo te youn, pitit Kris la, ak eritye wayòm Bondye a” (4 Nefi 1:17).

Etikèt ki te divize pèp la pandan plizyè santèn ane yo te disparèt devan yon idantite ki te pi fò ak pi nòb. Yo te konsidere tèt yo—ak tout lòt moun—daprè relasyon yo avèk Papa nou ki nan Syèl la ak Jezikri.

Divèsite ak diferans ka bon ak siyifikatif pou nou. Men, idantite ki pi enpòtan nou se idantite ki gen rapò avèk orijin ak objektif divin nou.

Toudabò, nou chak se yon pitit Bondye. Dezyèmman, antanke manm Legliz la, nou chak se yon pitit alyans lan. Epi twazyèmman, nou chak se yon disip Jezikri. Mwen egzòte nou tout pou nou pa kite okenn lòt idantifyan “deplase, ranplase, oswa pran priyorite sou twa gwo deziyasyon sa yo.”

Nou dwe fè youn

Bondye envite tout moun pou vin jwenn Li. Gen plas pou tout moun. Nou ka diferan nan kilti, politik, ras, ak gou nou, ak nan anpil lòt fason ankò. Men, si nou ini nan Jezikri, diferans sa yo pèdi nan siyifikasyon yo epi dezi pou nou fè youn nan depase yo —pou nou ka vin pou Li.

Se pou nou byen konsidere leson yo anseye nan 4 Nefi yo. Pandan nou chak ap fè efò pou enkòpore eleman esansyèl sa yo nan lavi nou, yo ap ka di de nou, menm jan yo te di de yo a, “Reyèlman pa t ap kapab gen yon pèp ki pi kontan nan pami tout pèp men Bondye te kreye” (4 Nefi 1:16).

© 2024 by Intellectual Reserve, Inc. All rights reserved. Enprime nan Etazini Damerik. Apwobasyon anglè: 6/19. Apwobasyon tradiksyon: 6/19. Tradiksyon Monthly Liahona Message, October 2024. Haitian. 19359 036