Ehemplo sang Pag-isa kay Jesucristo

Ni Pangulong Russell M. Nelson

Pangulo sang Ang Simbahan ni Jesucristo sang mga Santos sa Ulihing mga Adlaw

Kon mag-isa kita kay Jesucristo pareho sang katawhan sa 4 Nefi, ginabuslan sang aton handum nga mag-isa ang aton mga pagkatuhay kag nagadala [ini] sang kalipay.

Nagakabuhi kita sa panahon nga ang mabaskog kag gamhanan nga puwersa sang di-paghangpanay kag pagbinaisay nagalapnag sa bilog nga kalibutan. Ginapalapnag sang teknolohiya kag ginagatungan sang mga tawo nga ang mga balatyagon nagtig-a, ining nagapain nga mga puwersa nagapamahog sa pagpuno sang aton mga tagipusuon sang pagtamay kag nagapalain sang aton paghinambalanay sa pagbinaisay. Ang kaangtanan sang mga tawo sa komunidad nagakaguba. Nagasandukot ang mga giyera.

Sa sini nga sitwasyon, ang matuod-tuod nga mga sumulunod ni Jesucristo nagahandum sang kalinong kag aktibo nga nagatinguha sa pagtukod sang lain nga klase sang sosyedad—isa nga napasad sa mga panudlo ni Jesucristo. Agud matigayon ini, ang Ginuo nagsugo sa aton nga “mangin isa; kag kon indi kamo isa indi kamo akon.” (Doktrina kag mga Kasugtanan 38:27). Sa pagkamatuod, ang pag-isa importante nga kinaiya sang matuod-tuod nga Simbahan ni Jesucristo.

Paano naton pakigbatoan ang mga puwersa sang pagbinahinbahin kag pagbinaisay? Paano naton mapaluntad ang pag-isa?

Maayo lang, ang 4 Nefi sa Libro ni Mormon nagahatag sa aton sang ehemplo. Ini nga kapitulo malip-ot nga nagarekord sang paagi nga nagpangabuhi ang mga tawo pagkatapos ang Manluluwas nagbisita sa ila, nagtudlo sa ila, kag nagpahamtang sang Iya Simbahan sa tunga nila. Ini kasaysayan nagapakita kon paano natigayon sining katawhan ang malipayon kag malinong nga pag-isa, kag nagahatag ini sa aton sang ehemplo nga mahimo naton sundon agud matigayon naton mismo ang amo man nga pag-isa.

Pagbag-o

Sa 4 Nefi 1:1, mabasa naton: “Ang mga disipulo ni Jesus nagtukod sing isa ka simbahan ni Cristo sa tanan nga kadutaan sa palibot. Kag ang [katawhan] nagpalapit sa ila, kag matuod gid nga naghinulsol sang ila mga sala.”

Nagaisa kita palibot sa Ginuo kag Manluluwas nga si Jesucristo. Kon ang tagsa ka tawo magtuon parte kay Jesucristo, Iya ebanghelyo, kag Iya Simbahan, ang Balaan nga Espiritu nagasaksi sang kamatuoran sa tagipusuon sang tagsa ka tawo. Ang tagsa sa aton dayon makabaton sang pangagda sang Manluluwas nga magtuo sa Iya kag sundon Sia paagi sa paghinulsol.

Sa sini nagasugod ang pagpanglakaton sa pagbag-o sang indibidwal—halin sa maiyaiyahon kag makasasala nga mga handum kag pakadto sa Manluluwas. Sia ang pundasyon sang aton pagtuo. Kag kon ang tagsa sa aton nagatulok sa Iya sa tagsa ka panghunahuna (tan-awa sa Doktrina kag mga Kasugtanan 6:36), mangin isa Sia ka puwersa nga nagaisa sa aton mga kabuhi.

Mga Kasugtanan

Ang rekord sa 4 Nefi nagapadayon sa pagsaysay nga ang mga nagpalapit sa Simbahan, kag naghinulsol sang ila mga sala “ginbunyagan sa ngalan ni Jesus; kag nagbaton man sila sang Balaan nga Espiritu” (4 Nefi 1:1). Nagsulod sila sa isa ka kasugtanan—isa ka pinasahi, nagabugkos nga relasyon—sa Dios.

Kon maghimo kita kag magtuman sang mga kasugtanan, ginadala naton ang ngalan sang Ginuo sa aton kaugalingon bilang mga indibidwal. Dugang pa, ginadala man naton ang Iya ngalan bilang isa ka katawhan. Ang tanan nga nagahimo sang mga kasugtanan kag nagatinguha nga tumanon ang mga ini mangin mga katawhan sang Ginuo, Iya pinasahi nga manggad (tan-awa sa Exodo 19:5). Gani, nagapanglakaton kita sa dalan sang kasugtanan sing indibidwal kag bilang kabilugan. Ang aton kaangtanan sa kasugtanan sa Dios nagahatag sa aton sang magkapareho nga kawsa kag magkapareho nga pagkatawo. Kon ibugkos naton ang aton mga kaugalingon sa Ginuo, ginabuligan Niya kita nga ang aton “mga tagipusuon [mabugkos] sing tingob sa paghiliusa kag sa gugma [ang isa para isa]” (Mosias 18:21).

Pagkamakatarungan, Pagkapalareho, kag Pagbulig sa Imol

Ang kasaysayan sa 4 Nefi nagapadayon: “kag wala sing mga pag-ilinaway kag mga pagbinaisay sa tunga nila, kag ang tagsa ka tawo nakigbagay sing matarong sa isa kag isa.

“Kag gintingob nila ang tanan nila nga pagkabutang agud gamiton sang tanan; gani wala sing manggaranon kag imol, ulipon kag hilway, kundi tanan sila ginhimo nga hilway, kag umalambit sang dulot nga langitnon.” (4 Nephi 1:2–3).

Sa aton dutan-on nga mga pagpakigbagay, luyag sang Ginuo nga mangin patas kita kag matarong sa isa kag isa kag indi magpanginto ukon magpamintaha sa isa kag isa (tan-awa sa 1 Tesalonica 4:6). Sa mas paglapit naton sa Ginuo, kita “indi makapanghunahuna sa pagsakit sa isa kag isa, kundi magkabuhi sing may paghidaet, kag maghatag sa tagsa ka tawo suno sa sinang nagakadapat sa iya.” (Mosias 4:13).

Ang Ginuo nagsugo sa aton sa pagtatap sang mga imol kag nagakinahanglan. Dapat kita “maghatag sang [aton] manggad” agud buligan sila, suno sa aton ikasarang sa paghimo sini, nga wala sila ginahukman (tan-awa sa Mosias 4:21-27).

Ang tagsa sa aton dapat “magkabig sang iya utod” pareho sa iya kaugalingon” (Doktrina kag mga Kasugtanan 38:24). Kon kita mangin mga katawhan sang Ginuo kag mangin isa, indi lang dapat nga tratuhon naton sing palareho ang isa kag isa, kundi dapat naton kabigon ang isa kag isa bilang kapareho kag batyagon sa aton mga tagipusuon nga palareho kita—palareho sa atubang sang Dios, nga may palareho nga bili kag palareho nga potensyal.

Pagkamatinumanon

Ang madason nga leksyon halin sa 4 Nefi matun-an sa sining simple nga pahayag: “Naggawi sila suno sa mga kasugoan nga nabaton nila halin sa Ginuo nga ila Dios” (4 Nefi 1:12).

Ang Ginuo nagtudlo sa sining katawhan sang Iya doktrina, naghatag sa ila sang mga kasugoan, kag nagtawag sang mga alagad nga magserbisyo sa ila. Isa sang Iya mga katuyoan sa paghimo sini amo ang sigurohon nga wala sang mga pagbinaisay sa tunga nila (tan-awa 3 Nefi 11:28-29; 18:34).

Ang aton pagtuman sa mga panudlo sang Ginuo kag Iya mga alagad importante sa aton pagmangin isa. Nagalakip ini sang aton pangako nga tumanon ang kasugoan nga maghinulsol tagsa nga magkulang kita kag buligan ang isa kag isa sa aton pagtinguha nga maghimo sang maayo kag mangin maayo adlaw-adlaw.

Pagtipon sing Magkaupod

Dason, matun-an naton nga ang katawhan sa 4 Nefi “[nagpadayon] sa pagpuasa kag pagpangamuyo, kag sa pagtipon nga magkaupod pirme sa pagpangamuyo kag sa pagpamati sang pulong sang Ginuo” (4 Nephi 1:12).

Kinahanglan naton magtipon nga magkaupod. Ang aton semanal nga mga miting sa pagsimba importante nga oportunidad para sa aton nga makaangkon sang kusog, bilang indibidwal kag bilang kabilogan. Nagaambit kita sang sakramento, nagatuon, nagapangamuyo, nagakanta sing ululupod, kag nagasuporta sa isa kag isa. Ang iban nga mga pagtipon nagabulig man sa pagpatigayon sang balatyagon sang pagkalakip, pag-inabyanay, kag magkapareho nga katuyoan.

Pagpalangga

Ang rekord sa 4 Nefi dayon nagahatag sa aton sang posible mayor nga yabi sa tanan sini—isa ka butang nga kon wala ini ang matuod nga pag-isa indi malab-ot: “Wala sing pagbinaisay sa kadutaan, tungod sang gugma sang Dios nga nagpuno sa mga tagipusuon sang katawhan.”(4 Nefi 1:15).

Ang personal nga kalinong maagom kon kita, sa mapainubuson nga pagsunod, matuod nga nagapalangga sa Dios. “Ini amo ang dako kag nahaunang sugo. Ang pagpalangga sa Dios labaw sa kon kay sin-o ukon sa ano pa man nga butang amo ang kahimtangan nga nagadala sang tunay nga kalinong, kaumpawan, pagsalig, kag kalipay. Sa aton pagpatubo sang pagpalangga sa Dios kag kay Jesucristo, ang pagpalangga sa pamilya kag kaingod natural nga magasunod.

Ang pinakadako nga kalipay nga aton maeksperiyensyahan nagakatabo kon kita napuno sang gugma para sa Dios kag para sa tanan Niya nga mga anak.

Ang gugma sa isigkatawo, ang putli nga gugma ni Cristo, amo ang bulong sa pag-ilinaway. Ini ang mayor nga kinaiya sang tunay nga sumulunod ni Jesucristo. Kon ipaubos naton ang aton mga kaugalingon sa atubang sang Dios kag magpangamuyo sa tanan nga kusog sang aton mga tagipusuon, hatagan Niya kita sang gugma sa isigkatawo. (tan-awa sa Moroni 7:48).

Sa aton pagtinguha nga matigayon ang gugma sang Dios nga magpabilin sa aton mga tagipusuon, ang milagro sang pag-isa mangin daw lubos nga natural sa aton.

Diosnon nga Pagkatawo

Sa katapusan, ang katawhan sa 4 Nefi nagpakita sang mga tanda sang pag-isa nga nagakadapat sang aton igtalupangod: “Wala sing mga tulisan, ukon mga manugpatay-tawo, kag wala man sing mga Lamanhon, ukon ano nga sari sang mga “hon” ukon mga “non”; kundi nagakaisa sila, ang mga anak ni Cristo, kag mga manunubli sang ginharian sang Dios” (4 Nephi 1:17).

Ang mga tatak nga nagbahinbahin sang katawhan sa ginatos ka tuig nag-isol sa atubang sang mas mabakod kag dungganon nga pagkatawo. Gintamod nila ang ila mga kaugalingon—kag ang tanan nga iban pa—suno sa ila relasyon sa Amay nga Langitnon kag kay Jesucristo.

Ang pagkinalain kag mga pagkatuhay sarang mangin maayo kag importante sa aton. Pero ang aton pinakaimportante nga mga pagkatawo amo inang angot sa aton diosnon nga ginhalinan kag katuyoan.

Una kag labi sa tanan, ang kada isa sa aton anak sang Dios. Ikaduha, bilang miyembro sang Simbahan, ang tagsa sa aton anak sang kasugtanan. Kag ikatatlo, ang tagsa sa aton disipulo ni Jesucristo. Ginapaisog ko kita tanan nga indi pagtugotan ang bisan ano nga pagkilala nga “magkakas, mag-ilis, ukon magpangibabaw sa sining tatlo ka mga kinaiya.

Mag-isa kamo

Si Jesucristo nagaimbitar sang tanan nga magpalapit sa Iya. May lugar para sa tanan. Mahimo nga magkatuhay kita sa aton mga kultura, politika, rasa, gusto, kag madamo nga iban pa nga mga paagi. Pero kon mag-isa kita kay Jesucristo, inang mga pagkatuhay nagagamay ang importansya kag ginabuslan sang aton pinakaimportante nga handum nga mangin isa—agud mahimo kita nga mangin Iya.

Dumduma kag sunda ang mga leksyon nga gintudlo sa 4 Nefi. Sa pagtinguha sang tagsa sa aton nga ilakip ining kinahanglanon nga mga elemento sang pag-isa sa aton mga kabuhi, mahimo nga isiling parte sa aton ang pareho nga nasiling sa ila, “pat-od gid nga wala na sing mas malipayon pa nga katawhan sa tanan nga katawhan nga gintuga sang kamot sang Dios” (4 Nefi 1:16).

© 2024 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, October 2024. Hiligaynon. 19359 861