“Isifanekiso Sobunye kuJesu Kristu,” iLiyahona, yango-Okt. 2024.
Umlayezo Wanyanga Zonke weLiyahona, yango-Okthoba 2024
Isifanekiso Sobunye kuJesu Kristu
Njengoba sihlangana kuJesu Kristu njengabantu baku Nefi weSine, isifiso sethu sokuba munye sidlula ukwehlukana kwethu futhi siholela enjabulweni.
Siphila enkathini lapho igagasi elikhulayo lokungezwani nempikiswano lisabalala kuwo wonke umhlaba. Esizwa ubuchwepheshe futhi ekhuthazwa abantu abanhliziyo zabo sezipholile, lawa mandla ahlukanisayo asongela ukugcwalisa izinhliziyo zethu ngendelelo futhi onakalisa ukukhulumisana kwethu ngombango. Izibopho zomphakathi ziyanqamuka. Izimpi ziyadlanga.
Ngokumelene nalesi simo, abalandeli bakaJesu Kristu beqiniso balangazelela ukuthula futhi bafuna ngenkuthalo ukwakha uhlobo oluhlukile lomphakathi—osekelwe ezimfundisweni zikaJesu Kristu. Ukuze kufezwe lokhu, iNkosi isiyalile ukuba “sibe munye; futhi uma ningemunye anibona abami” (IMfundiso neziVumelwano 38:27.). Ngempela, ubunye buwuphawu lweBandla langempela likaJesu Kristu.
Sisebenza kanjani ngokumelene namandla okuhlukana nokuphikisana na? Sibufeza kanjani ubunye na?
Ngenhlanhla, uNefi weSine eNcwadini kaMormoni usinika isibonelo. Lesi sahluko sibhala kafushane ngendlela abantu ababephila ngayo emva kokuba uMsindisi ebavakashele, wabafundisa, futhi wamisa iBandla Lakhe phakathi kwabo. Le ndaba ibonisa indlela laba bantu abafeza ngayo ubunye obujabulisayo nobunokuthula, futhi isinikeza isifanekiso esingasilandela ukuze sizuze lobu bunye obufanayo nathi.
Ukuguquka
Kwethi 4 Nefi 1:1, sifunda ukuthi: “Abafundi bakaJesu base bakhe ibandla likaKristu kuwo wonke amazwe ndawo zonke. Futhi [abantu] beza kubo, futhi baphenduka ngokweqiniso ezonweni zabo.”
Sinobunye eNkosini noMsindisi uJesu Kristu. Njengoba umuntu ngamunye efunda ngoJesu Kristu, ivangeli Lakhe, kanye neBandla Lakhe, uMoya oNgcwele uyafakaza ngeqiniso enhliziyweni yomuntu ngamunye. Ngamunye wethu angabe esemukela isimemo soMsindisi sokuba nokholo Kuye futhi simlandele ngokuphenduka.
Luqala kanjalo-ke uhambo lomuntu lokuguquka—ukusuka ezifisweni zobugovu nezono kanye nokuya kuMsindisi. Uyisisekelo sokholo lwethu. Futhi njengoba ngamunye wethu ebheka kuYe kuyo yonke imicabango (bheka IMfundiso neziVumelwano 6:36), Uba amandla ahlanganisayo ezimpilweni zethu.
Izivumelwano
Umbhalo oku Nefi weSine uyaqhubeka usho ukuthi labo abeza eBandleni futhi baphenduka ezonweni zabo “babhabhadiswa egameni likaJesu; futhi phezu kwalokho bawuthola uMoya oNgcwele” (4 Nefi 1:1). Babengene esivumelwaneni—ubuhlobo obukhethekile nobubophezelayo—noNkulunkulu.
Uma senza futhi sigcina izivumelwano, sithatha igama leNkosi kithi njengabantu ngabanye. Ngaphezu kwalokho, sithatha igama Lakhe kithina njengabantu. Bonke abenza izivumelwano futhi bazame ukuzigcina baba ngabantu beNkosi, igugu Lakhe elikhethekile (bheka ku Eksodusi 19:5). Ngaleyo ndlela, sihamba indlela yesivumelwano ngabanye futhi sihlangene. Ubudlelwano bethu besivumelwano noNkulunkulu businika umgomo ofanayo kanye nokuba yithi okufanayo. Njengoba sizibophezela eNkosini, Isisiza ukuba “izinhliziyo zethu zihlanganiswe ndawonye ebunyeni futhi nasothandweni omunye komunye” (Mosiya 18:21).
Ukungakhethi, Ukulingana, Nokusiza Abampofu
Indaba eku Nefi weSine iyaqhubeka: “Kwakungasekho mibango kanye nezimpikiswano phakathi kwabo, futhi wonke umuntu wayenza ukulunga komunye.
“Futhi babane zinto zonke ngokufanayo phakathi kwabo; ngakho-ke babengekho ababecebile nababempofu, ababegqilaziwe kanye nababekhululekile, kodwa bonke babekhululekile, futhi behlanganyela esiphweni sasezulwini” (4 Nefi 1:2–3).
Ekuphathaneni kwethu kwesikhashana, iNkosi ifuna singenzeleli futhi sibe olungileyo komunye nomunye futhi singakhwabaniselani noma sixhaphazane (bheka 1 KwabaseThesalonika 4:6). Njengoba sisondela kakhudlwana eNkosini, “asiyikuba-nengqondo yokulimazana, kodwa ukuhlala ngokuthula, futhi sinike wonke umuntu lokho okumfanele” (Mosiya 4:13).
INkosi isiphinde yasiyala ukuba sinakekele abampofu nabaswele. Kufanele “siphane ngesinakho” ukuze sibasize, ngokwamandla ethu okwenza kanjalo, ngaphandle kokubahlulela (bheka uMosiya 4:21–27).
Ngamunye wethu kufanele “azise umfowabo njengoba ezazisa yena” (IMfundiso Nezivumelwano 38:24). Uma sizoba abantu beNkosi futhi sibe nobunye, akufanele nje kuphela siphathane njengabalinganayo, kodwa kumele futhi sibhekane ngempela njengabalinganayo futhi sizizwe ezinhliziyweni zethu ukuthi siyalingana—silingana phambi kukaNkulunkulu, sibalulekile ngokulinganayo futhi silingana kokungase sibe yikho.
Ukulalela
Isifundo esilandelayo esivela ku Nefi weSine siza ngalenkulumo elula: “Bahamba ngokwemiyalelo ababeyithole eNkosini yabo kanye noNkulunkulu wabo” (4 Nefi 1:12).
INkosi yayibafundisile laba bantu imfundiso Yayo, yabanika imiyalelo, futhi yabiza izinceku ukuba zibaphathe. Enye yezinhloso Zayo ekwenzeni lokhu kwakuwukuqinisekisa ukuthi kwakungeke kube khona izimpikiswano phakathi kwabo (bheka ku 3 Nefi 11:28–29; 18:34).
Ukulalela kwethu izimfundiso zeNkosi kanye nezinceku Zakhe kusemqoka ukuze sibe munye. Lokhu kubandakanya ukuzibophezela kwethu ekulaleleni umyalelo wokuphenduka noma nini lapho senza iphutha futhi sisizane njengoba silwela ukwenza kangcono futhi sibe ngcono nsuku zonke.
Ukuhlangana Ndawonye
Okulandelayo, sifunda ukuthi abantu ku Nefi weSine “[baqhubeka] nokuzila ukudla nokukhuleka, kanye nasekuhlanganeni ndawonye kaningi ukuze bakhuleke futhi balalele izwi leNkosi” (4 Nefi 1:12).
Sidinga ukuhlangana ndawonye. Imihlangano yethu yokukhonza yamasonto onke iyithuba elibalulekile kithi lokuthola amandla, kokubili ngabanye nangokuba sihlangene. Sithatha isidlo esingcwele, sifunde, sikhuleke, sicule ndawonye, futhi sisekelane. Eminye imihlangano isiza nasekuthuthukiseni umuzwa wokuba ngowabanye, ubungane, nenjongo efanayo.
Uthando
Umbhalo oku Nefi weSine ube ususinika lokho mhlawumbe okusemqoka kakhulu kukho konke lokhu—into ubunye bangempela obungeke bufinyeleleke ngaphandle kwayo: “Kwakungekho mbango ezweni, ngenxa yothando lukaNkulunkulu olwalukhona ezinhliziyweni. zabantu” (4 Nefi 1:15).
Ukuthula komuntu siqu kufinyelelwa lapho, ngokuzithoba, simthanda ngempela uNkulunkulu. Yilowo umyalelo omkhulu nowokuqala. Ukuthanda uNkulunkulu ngaphezu kwanoma ubani nanoma yini enye kuyisimo esiletha ukuthula kweqiniso, induduzo, ukuzethemba nenjabulo. Njengoba sikhulisa uthando lukaNkulunkulu noJesu Kristu, uthando lomndeni nomakhelwane luzolandela ngokwemvelo.
Injabulo enkulu kunazo zonke esiyoke sibe nayo iba lapho sigcwele uthando lukaNkulunkulu kanye nabo bonke abantwana Bakhe.
Isihe, uthando olumsulwa lukaKristu, siyikhambi lombango. Siyisici esikhulu somlandeli weqiniso kaJesu Kristu. Uma sizithoba ngaphambi kukaNkulunkulu futhi sikhuleka ngawo wonke amandla ezinhliziyweni zethu, Yena uyosipha isihe (bheka ku Moroni 7:48).
Njengoba sonke sifuna ukuba nothando lukaNkulunkulu oluhlala ezinhliziyweni zethu, isimangaliso sobunye sizobonakala singokwemvelo ngokuphelele kithina.
Umazisi Waphezulu
Okokugcina, abantu abaku NefiweSine bakhombisa uphawu lobunye okufanele silunake: “Kwakungekho baphangi, nababulali, kungekho amaLamani, noma nhloboni yabantu ababehlukaniswe ngokobuzwe; kodwa babemunye, abantwana bakaKristu, nezindlalifa zombuso kaNkulunkulu” (4 Nefi 1:17).
Amalebula ayehlukanise abantu amakhulu eminyaka ancipha ngaphambi kwamazisi ohlala njalo futhi othuthukisayo. Babezibuka—kanye nabo bonke abanye—ngokobudlelwane babo noBaba oseZulwini kanye noJesu Kristu.
Ukungafani kanye nokwehlukana kungaba kuhle futhi kube kukhulu kithina. Kodwa umazisi wethu obaluleke kakhulu yilowo ohlobene nemvelaphi yethu yaphezulu kanye nenjongo.
Okokuqala nokubalulekile kakhulu, ngamunye wethu ungumntwana kaNkulunkulu. Okwesibili, njengelungu leBandla, ngamunye wethu ungumntwana wesivumelwano. Futhi okwesithathu, ngamunye wethu ungumfundi kaJesu Kristu. Ngiyasinxusa sonke ukuthi singavumeli noma yiliphi elinye igama ukuthi “ligudluze, limise, noma lithathe indawo yokuqala kulawa mabizo amathathu ahlala njalo.”
Yibani Munye
UNkulunkulu usimeme sonke ukuthi size Kuye. Kukhona indawo yawo wonke umuntu. Singase sihluke ngamasiko ethu, ezombangazwe, izinhlanga, esikuthandayo nangezinye izindlela eziningi. Kodwa njengoba sihlangana kuJesu Kristu, ukungaboni ngaso linye okunjalo kuyanyamalala futhi kuqedwe isifiso sethu esikhulu sokuba munye—ukuze sibe ngabaKhe.
Beka enhliziyweni izifundo ezifundiswa ku Nefi weSine. Njengoba ngamunye wethu elwela ukufaka lezi zici ezibalulekile zobunye ezimpilweni zethu, kungashiwo ngathi, njengoba kwakunjalo ngabo, “Ngempela akusoze kuze kube khona abantu ababethokoze kangaka phakathi kwabo bonke abantu abadalwa yisandla sikaNkulunkulu” (4 Nefi 1:16).
© 2024 by Intellectual Reserve, Inc. All rights reserved. Igaywe eMelika. Usuku okuvunywe ngalo ukuba lesi sifundo sikhishwe ngesiNgisi: 6/19. Usuku okuvunywe ngalo ukuba lesi sifundo sihunyushwe: 6/19. Ukuhunyushwa kwe Monthly Liahona Message, October 2024. Zulu. 19359 783