“Jises Kraist I ewe Popunapen ‘Pochokunen Manau,’ ‘Och,’ me ‘Watten Murinon Epinukunuk,’” Liahona, Dec. 2024.
Porous ren Liahona Iteiten Maram, December 2024
Jises Kraist I ewe Popunapen “Pochokunen manau,” “Och,” me “Watten Murinon Epinukunuk”
Non ei auchean fansoun apwapwan ewe uputiwen ewe monukon non Bethlehem, amwo sipwe chechemeni fansoun meinisin pwe Jises Kraist a feito non ewe fonufan pwe epwe ach Chon Amanau me Chon Angasano.
Ewe Uputiwen Christ, seni Charlotte Andrus
Ewe Aposel Peter me ekkewe soufosun Puken Mormon Jacob me Moronai ra pesei ewe niffangen epinukunuk ren pekin ngun non Kraist non ourourochun napanap mi nonno fengen.
Ren awewe, Peter a affata, “Feioch ewe Kot me Semen ach Samon Jises Kraist, minne anongonong won an umoumoch mi napanap a fen aupusefani kich ngeni ew pochokunen epinukunuk ren ewe manausefan an Jises Kraist seni mano” (1 Peter 1:3; auchean mi kapacheta). Ouse mochen eteneki ewe nounoun ewe kapas “pochokun” ne awewei “epinukunuk.”
Jacob a eisinei, “Ina minne, pwi achengicheng, oupwe siwini nonnomun inisimi ngeni i me ren ewe achasefanin Kraist, Noun we Anamon, iwe oupwe tongeni angei ew manausefan, anongonong won manamanen ewe manausefan minne mi nom non Kraist, me oupwe kawor pwe ami ekkewe chon ewe aewin manausefanitan Kraist ngeni Kot, pokiten ami nuku, me oua angei ew apinukunukun ning mi öch non i me mwen an pwarano inisin non pekin aion” (Jacob 4:11; auchean mi kapacheta). Ouse mochen eteneki ewe nounoun ewe kapas “öch” ne awewei “epinukunuk.”
Me Moronai a apasa, “Iwe ua pwan chechemeni pwe ka fen apasa pwe ka fen amonnata ew imwen aramas, ewer, pwan mwo nein ekkewe imwen Semom we, non minne a tongeni wor an aramas apinukunuk mi kon echipwer; ina minne aramas repwe apinukunuk, are esap ina i ese tongeni angei ew neni non ewe neni minne ka fen amonnata” (Ether 12:32; auchean mi kapacheta). Ouse mochen eteneki ewe nounoun ewe kapas “echipwer” ne awewei “epinukunuk.”
Met Epinukunuk non Kraist?
Ewe niffangen epinukunuk ren pekin ngun non Kraist ina ewe pwapwan esuku manau esemuch me ren nimenomochun fofor, me umoumoch, me ewe chenin ewe Messiah mi Fel” (2 Nephi 2:8) me ew pochokunen mochen ren ekkewe pwonen efeiochun wenechar. Ekkewe awewen kapas “pochokun,” “öch,” me “mi kon echipwer” non ekkei uwokisin ra affata ew feifeino-soposop me mwasangasang ren epinukunukun ewe Manausefan me ewe manau esemuch ren nuku non Jises Kraist.
Ewe Soufos Mormon a awewei:
“Iwe pwan, ami pwi achengicheng, ua mochen kapas ngenikemi usun apinukunuk. Ifa usun pwe ami oupwe tongeni angei nuku, tiwenon chok ika epwe wor ami apinukunuk?
“Iwe met ami oupwe apinukunuku non? Nengeni ua apasa ngenikemi pwe epwe wor ami apinukunuk non ewe achasefanin Kraist me ewe manamanen an manausefan, pwe oupwe manaueta ngeni manau esemuch, iwe ei pokiten ami nuku non i anongonong won ewe pwon.
“Ina minne, ika a wor an emon aramas nuku mi auchea epwe wor an apinukunuk; pun ika ese or nuku ese tongeni wor apinukunuk” (Moroni 7:40–42).
An ewe Sam Kokkotun Pwapwa
Epinukunuk non Kraist minne mi pochokun, och, me mi kon echipwer a poputa ren ewe mirit pwe Kot ewe Sam Napanap mi manau. I Samach, me kich Noun semirit ngun. Kich wesewesen at me nengin ngun noun Kot me sia fen angei nikinik mi och seni I.
Ewe Sam i ewe popun ewe kokkoten pwapwa (nengeni Abraham 3:22–28). Ren at me nengin ngun noun Kot, sia “etiwa An kokkot ren minne Noun semirit ra tongeni angei eu inis me kaeo me won ewe fonufan me fefeita ngeni ar repwe unusoch me esinna unusochun fetanin manauer pwe ir chon angei manau esemuch. Non ekkewe pukefel sia kaeo: Ewe Sam a wor inisin aion me chuu non napanapen me nikinikin aramas; ewe pwan Nau” (Doctrine and Covenants 130:22). Ina minne, ach angei inisin aion mi auchea me non ewe angangen fefeita ngeni fetanin manauach.
Kich aramas mi ru kinikinich. Ngunuch, ewe kinikinich esemuch, ra pwonupwonuno non inis aion ir mi nom fan nemenien aneanen me mochenin manauen fonufan. An ewe Sam kokkotun pwapwa a for an epwe awora emwen ngeni Noun kewe semirit, an epwe anisir ar repwe tumun ne niwin imwer ngeni I fiti inis mi manausefan me tekia, me ar repwe angei ekkewe feiochun mwanek esemuch me pwapwa.
Ewe Semirit Kraist, seni Sharlotte Andrus
Ewe Wisen Angasano an Jises Kraist me non an ewe Sam Kokkot
Jises Kraist i ewe Noun ewe Sam mi Napanap Anaemon. A feito non ewe fonufan an epwe fori mochenin Saman we (nengeni 3 Nephi 27:13). Jises Kraist i ewe emon mi kepitino me ren ewe Sam an epwe pwisin Noun chon tupuni non mettoch meinisin mi wewe ngeni amanauen aramas. I ach Chon Amanau me Chon Angaseno pokiten I a okkufu me ru mano me tipis.
Alma a osini ngeni ekkewe aramasen Gideon usun ewe angangen amanau an ewe Messiah:
“Iwe i epwe feino, epwe engino ngeni metek me riaffou me sokopaten sossot meinisin; iwe ei epwe fis pwe ewe kapas epwe tongeni pwonueta minne ra fen apasa pwe i epwe wata won inisin ekkewe metek me semwenin noun kewe aramas.
“Iwe i epwe wata won inisin mano, pwe i epwe tongeni epichano ekkewe senin mano minne ra foti noun kewe aramas; iwe i epwe wata won inisin ar apwangapwang, pwe nenukan epwe tongeni ureno ren umoumoch, anongonong won ewe pekin aion, pwe i epwe tongeni sinei anongonong won ewe pekin aion ifa usun an epwe anisi noun kewe aramas anongonong won ar apwangapwang.
“Iei ewe Ngun mi sinei mettoch meinisin; nge inamo ewe Noun Kot epwe riaffou ren pekin aion pwe i epwe tongeni wata won inisin tipisin noun kewe aramas, pwe i epwe tongeni tonano ar kewe atai annuk anongonong won ewe manamanen an epwe angasereno” (Alma 7:11–13).
Ewe aewin nongonongun ewe kapas allim iei nuku non ewe Samon Jises Kraist. Ennetin nuku a anonga non me won ewe Chon Amanau me otufichi kich ach sipwe epinukunuk non I me awora unusen nuku non An manaman ne amanaua kich seni mano, nimeti kich seni tipis, me efeiochu kich ren pochokun mi nap seni pwisin ach.
Moronai a apwarata, “Iwe pokiten ewe ngasenon aramas, minne a fis me ren Jises Kraist, ra emmwenito sefan me mwen ewe Samon; ewer, iei ewe aan non minne aramas meinisin ra ngaseno, pokiten ewe manon Kraist a efisi ewe manausefan, minne a efisi ew ngaseno seni ew mour fochofoch, seni minne mour aramas meinisin repwe neno me ren ewe manamanen Kot nupwen ewe rappwa epwe tik; iwe repwe feito, ekkewe mi kisikis me pwan ekkewe mi napanap, iwe meinisin repwe uta me mwen an we nenien kapung, ra fen ngaseno me pichino seni ei foffon mano esemuch, minne mano ina ewe manon inis” (Mormon 9:13).
Ua pwarata pwe ewe Chon Amanau a epichi ekkewe fofon mano. I a manausefan, I mi manau, me I ewe chon popunapen pochokunen manau, och, me watten murinon epinukunuk.
Eu Angko ngeni ewe Ngun
Ewe soufos Ether a pwarata, “Ina minne, ekkewe ra nuku non Kot repwe tongeni fiti ennetin apinukunuku ew fonufan mi murino, ewer, pwan mwo ew neni ren peniemwanin poun Kot, minne apinukunuk a feito seni nuku, a fis eu angke ngeni netipen aramas, minne a fori ar repwe pochokun me tipepos, ar repwe fori chommong angang mi öch fansoun meinisin, me emweni ir ar repwe mwareiti Kot” (Ether 12:4; auchean mi kapacheta).
Non ei auchean fansoun apwapwan ewe uputiwen ewe monukon non Bethlehem, amwo sipwe chechemeni fansoun meinisin pwe Jises Kraist a feito non ewe fonufan pwe epwe ach Chon Amanau me Chon Angasano. I a ngeni kich ewe niffangen manau ren ngun ese wor kikian momon, saram, asofosefan, tong, kinamwe, weweoch, pwapwa, me epinukunuk.
Ua etiwa kemi oupwe kutta fichi ewe niffangen epinukunuk ren ngun non ewe Chon Amanau ren ami kaeo ekkewe afanafan me pwarata an soufosun nom me ikenai usun An achasefanin asor me weswesen Manausefan. Nupwen kopwe fori, ua pwonei pwe om pwarata usun ewe manamanen ewe Chon Angasano epwe pochokununo, om siwin ngeni I epwe anonnonono, om mochen me tiniken ne uta pwe kopwe emon chon pwarata mi pwaracho ussun I epwe napeno, me kopwe feioch ren eu angko ngeni ngunum—pwan mwo pochokunen manau, och, me watten murinon epinukunuk.
Fiti ekkewe Aposel ra fen pwarata usun I non unusen fansoun, ua pwapwa ne affata ai pwarata pwe Jises Kraist i ewe Nau mi manau noun ewe Kot mi manau. I ach we Chon Angasano mi manausefan ren eu inisin aion me chuu mi ning. Me pokiten ewe ngasano me achusefan ngeni Kot minne ewe Samon a otufichi ngeni aramas meinisin, sia tongeni angei epinukunukun ngun me ew epinukunuk mi pochokun, och, me mi kon murino pwe “non Kraist meinisin repwe manau”(1 Corinthians 15:22).
© 2024 ren Intellectual Reserve, Inc. Meinisin pung mi kawor. A för non USA. Kapungunon non fosun Merika: 6/19. Kapungunon chiakun: 6/19. Chiakun Porous ren Liaona Iteiten Maram, December, 2024. Chuukese. 19296 901