“O Jisu Karisito na iVurevure ni ‘Bulabula,’ ‘Vinaka,’ kei na ‘iNuinui Uasivi Cake,’” Liaona, Tise. 2024.
iTukutuku Vakavula ni Liaona Tiseba 2024
Jisu Karisito Sa iVurevure ni “Bulabula,” “Vinaka,” kei na “iNuinui Uasivi Cake”
Ena gauna talei oqo ni marautaki ni sucu ni gonelailai mai Peceliema, meda dau nanuma tikoga ni a lako mai ki vuravura o Jisu Karisito me noda iVakabula ka Dauveivueti.
Na Sucu nei Jisu, mai vei Sharlotte Andrus
Na iApositolo o Pita kei na parofita ni iVola i Momani o Jekope kei Moronai ratou a vakabibitaka na isolisoli vakayalo ni inuinui vei Karisito ena sala vata oqori.
Me vaka beka oqo, a kaya o Pita, “Me vakavinavinakataki na Kalou ka Tama ni noda Turaga ko Jisu Karisito, o koya sa vakasucumi keda tale ena dua na inuinui bulabula ena tucake tale mai na mate nei Jisu Karisito” (1 Pita 1:3; vakaikuritaki). Yalovinaka raica na vakayagataki ni vosa “bulabula” me vakamacalataki kina na “nuinui.”
E vunautaka o Jekope, “O koya gona, oi kemudou na wekaqu lomani, dou veivakaduavatataki mada kei koya ena vuku ni veisorovaki i Karisito, na Luvena e Duabau ga, dou na qai rawata kina na tucake tale mai na mate, me vaka na kaukauwa ni tucake tale mai na mate sa tu vei Karisito, ka mo dou na soli yani me vuana taumada na Karisito ki vua na Kalou, ni sa tu vei kemudou na vakabauta, ka dou sa rawata mai vua e dua na inuinui dei ni lagilagi, ni bera na nona vakaraitaki koya mai vakayago” (Jekope 4:11; vakaikuritaki). Yalovinaka raica na vakayagataki ni vosa “vinaka” me vakamacalataki kina na “inuinui.”
Sa kaya ko Moronai, “Ka’u sa nanuma tale ga ni ko ni a kaya ni ko ni sa vakarautaka e dua na tikina me nodra na tamata ena vale i Tamamuni, me nodra inuinui dei; na tamata; raica sa kilikili sara me ra vakanuinui na tamata, ia kevaka e sega, ena sega na nodra ivotavota dodonu ena vanua ko ni sa vakarautaka” (Ica 12:32; vakaikuritaki). Yalovinaka raica na vakayagataki ni vosa “uasivi” me vakamacalataki kina na “inuinui.”
Na Cava na iNuinui vei Karisito?
Na isolisoli vakayalo ni inuinui vei Karisito sai koya na vakanamata ena reki ki na bula tawamudu ena “cakacaka, kei na loloma cecere, kei na loloma soli wale ni Mesaia Tabu” (2 Nifai 2:8) kei na gagadre kaukauwa ki na veivakalougatataki yalataki ni ivalavala dodonu. Na itukutuku “bulabula,” “vinaka,” kei na “uasivi cake” ena veitikina oqo e vakaraitaka e dua na veivakadeitaki rabailevu ka kaukauwa ni Tucaketale kei na bula tawamudu ena vakabauti Jisu Karisito.
E vakamacalataka na parofita ko Momani:
“Oi kemudou na wekaqu lomani, au na tukuna oqo vei kemudou baleta na inuinui. Dou na rawata vakaevei na vakabauta, kevaka sa sega vei kemudou na inuinui?
“Ia na cava na ka dou vakanuinui kina? Raica au sa kaya vei kemudou, ni dou na rawata na inuinui ena vuku ni veisorovaki i Karisito kei na kaukauwa ni nona tucake tale mai na mate, mo dou vakaturi cake kina ki na bula tawamudu, ia dou sa rawata oqo ena vuku ni nomudou vakabauti koya, me vaka na vosa ni yalayala.
“O koya gona kevaka e dua sa tu vua na vakabauta, sa tu tale ga vua na inuinui; ni kevaka sa sega na vakabauta, sa sega tale ga ni rawa ni dua na inuinui” (Moronai 7:40–42).
Na iTuvatuva ni Marau nei Tamada
Na inuinui vei Karisito e bulabula, vinaka, ka uasivi cake ena tekivu ena kila ni bula tiko na Kalou na Tamada Tawamudu. O Koya na Tamada Vakalomalagi, ka sa i keda na luvena vakayalo. Eda sa luvena tagane ka luvena yalewa vakayalo na Kalou ka da sa rawata mai Vua na itovonibula vakalou.
Na Tamada sa ikoya na itekitekivu ni ituvatuva ni bula marau (raica na Eparama 3:22–28). Me vaka ni da luvena tagane kei na yalewa na Kalou, eda sa “ciqoma na nona ituvatuva ka [meda] rawa ni mai vakayago ka vuli e vuravura me da toro cake yani ki na bula e uasivi sara ka kila deivaki kina na [keda] icavacava vakalou ena bula tawamudu.” Ena ivolanikalou, eda vulica kina: “Sa vakalewe ka vakasui na Yagona na Tamada me vaka na yago ni tamata; na Luvena talega” (Vunau kei na Veiyalayalati 130:22). O koya gona, na rawati ni yago vakayago e sa ka bibi sara ena noda toso ki liu ki na noda icavacava vakalou.
O keda na kabula rua na tikida. Na yaloda, na tikida tawamudu, e vakaisulu tu ena yago vakayago ka dau sotava na gagadre kei na gagano ni bula vakayago. Na ituvatuva ni bula marau nei Tamada e tuvanaki me vakarautaka na veidusimaki vei ira na Luvena, me vukei ira me ra lesu bula ki Vale Vua ena yago sa tucaketale, vakacerecerei, ka ciqoma na veivakalougatataki ni reki tawamudu kei na marau.
Na Gone ko Karisito, mai vei Sharlotte Andrus
Na iTavi ni Veivueti i Jisu Karisito ena iTuvatuva nei Tamada
O Jisu Karisito na Luvena Duabau Ga na Tamada Tawamudu. A lako mai ki vuravura me cakava na lomai Tamana (raica na 3 Nifai 27:13). Ko Jisu Karisito na ilumuti nei Tamana me matataki Koya saraga ena veika kece e baleta nodra vakabulai na kawatamata. O Koya na noda iVakabula ka Dauveivueti baleta ni a vakamalumalumutaka ruarua na mate kei na ivalavala ca.
A parofisaitaka o Alama vei ira na tamata i Kitioni me baleta na cakacaka ni veivakabulai ni Mesaia:
“Ia ena lako yani ko koya, ena vakila na mosi kei na veivakararawataki kei na veivakatovolei kecega, ia sa yaco na veika oqo me vakayacori kina na vosa sa tukuni, ni na colata ko Koya na nodra mosi kei na nodra tauvimate na nona tamata.
“Ena soli Koya me mate me sereka kina na i vesu ni mate sa vesuki ira tu na nona tamata; ia sa mai bula vakatamata ko Koya me kila kina na nodra malumalumu na nona tamata, ka vakabulai ira ena nona yalololoma.
“Raica sa kila na ka kecega na Yalotabu; ia ena vosota na ka rarawa na Luve ni Kalou, me colata kina na nodra i valavala ca na nona tamata; ia ena bokoci na nodra i valavala ca ena nona isoro” (Alama 7:11–13).
Na imatai ni ivakavuvuli ni kosipeli sa ikoya meda vakabauta na Turaga o Jisu Karisito. Na vakabauta dina e vakanamata vua na iVakabula ka rawa kina vei keda meda vakararavi Vua ka nuitaka taucoko na Nona kaukauwa me vakabulai keda mai na mate, vakasavasavataki keda mai na ivalavala ca, ka vakalougatataki keda ena kaukauwa e sivia na noda.
E vakadinadinataka o Moronai, “Ia ni ra sa sereki na tamata mai vei Jisu Karisito, era sa kau lesu ki na iserau ni Turaga; io, oqo na sala era sa sereki kina na tamata kecega, na mate i Karisito sa yaco kina na tucake tale mai na mate ka ra sereki kina na tamata kecega mai na dua na moce tawacava, na moce ka ra na qai vakayadrati ga mai kina na tamata kecega ena kaukauwa ni Kalou ni sa uvuci na davui; ka ra na qai tucake mai na mate na tamata lalai kei na turaga, ka mai tu ena nona itikotiko ni veilewai, ni ra sa sereki mai na ivesu ni mate tawamudu oqo, na mate vakayago” (Momani 9:13).
Au vakadinadinataka ni a voroka na iVakabula na ivau ni mate. A tucaketale o Koya, e bula o Koya, ka sai Koya duadua ga na ivurevure ni inuinui bulabula, vinaka, ka uasivi cake.
Dua na iYaqa ni Yalo
“Ia ko ira yadua sa vakabauta na Kalou, era sa nuitaka e dua na vuravura vinaka cake, io, e dua na tikina ena liga imatau ni Kalou, na inuinui sa yaco mai ena vakabauta, ka sa ikelekele ni yalo ni tamata, ka na vakadeitaki ira mera tudei sara ka tawayavalati rawa ena cakacaka vinaka kecega, ka sa tuberi ira mera vakalagilagia kina na Kalou” (Ica 12:4; vakaikuritaki).
Ena gauna talei oqo ni da marautaka na sucu ni gonelailai mai Peceliema, meda dau nanuma tikoga ni a lako mai ki vuravura o Jisu Karisito me noda iVakabula ka Dauveivueti. E solia vei keda na isolisoli vakayalo sega ni saumi rawa ni bula, rarama, vakavoui, loloma, vakacegu, rai, reki, kei na inuinui.
Au sureti kemuni mo ni vakasaqara ena kena dodonu na isolisoli vakayalo ni inuinui vua na iVakabula ena nomuni vulica na nodra ivakavuvuli kei na nodra ivakadinadina na parofita ni gauna makawa kei na gauna oqo me baleta na Nona solibula veisorovaki kei na Tucaketale dina. Ni ko sa vakayacora vakakina, au yalataka ni na vaqaqacotaki na nomu ivakadinadina me baleta na vakalou ni Dauveivueti, ena vakatitobutaki na nomu saumaki Mai Vua, na nomu gagadre kei na yalodina mo tu me ivakadinadina qaqa me baleti Koya ena vakalevutaki, ka ko na vakalougatataki ena dua na iyaqa ki yalomu—ena bulabula, vinaka, ka vakanuinui uasivi cake.
Vata kei ira na iApositolo ka ra sa vakadinadinataki Koya ena veitabayabaki kecega, au a tukuna ena reki na noqu ivakadinadina ni o Jisu Karisito na Luvena bula na Kalou bula. O Koya na noda Dauveivueti sa tucaketale ka taukena na yago vakalagilagi, ka rawa ni tarai ka laurai vakalewe ka vakasui. Ena vuku ni veivueti kei na veivakaduavatataki kei na Kalou ka sa rawa ena vukuna na Turaga me baleti ira kece na kawatamata, sa rawa kina meda ciqoma na veivakadeitaki vakayalo kei na dua na inuinui bulabula, vinaka, ka uasivi cake ni “ena vakabulai kecega ena vukui Karisito” (1 Korinica 15:22).
© 2024 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka Valagi: 6/19. Vakadonui me vakadewataki: 6/19. iVakadewa ni iTukutuku Vakavula ni Liaona, Tiseba 2024. Fijian. 19296 858