“Jezikri se Sous yon ‘Esperans Vivan,’ ki ‘Bon,’ ak ‘Pi Ekselan,’” Liahona, Desanm. 2024.
Mesaj Mansyèl Liahona, Desanm 2024
Jezikri Se Sous yon “Esperans Vivan,” ki “Bon,” ak “Pi Ekselan”
Nan epòk espesyal sa a kote n ap selebre nesans tibebe nan Betleyèm nan, se pou nou toujou sonje ke Jezikri te vini nan mond lan kòm Sovè nou ak Redanmtè nou.
Lanativite, pa Sharlotte Andrus
Apot Pyè ak pwofèt Jakòb ak Mowoni nan Liv Mòmon an mete aksan sou don espirityèl esperans nan Kris la nan menm fason enstriktif yo.
Pa egzanp, Pyè te deklare: “Benediksyon pou Bondye ak Papa Senyè nou an, Jezikri, ki nan gran mizèrikòd li te anjandre nou ankò nan yonesperans vivan atravè rezirèksyon Jezikri soti nan mò yo” (1 Pyè 1:3; anfaz ajoute). Tanpri remake itilizasyon mo “vivan” an pou dekri “esperans.”
Jakòb te pwoklame, “Se poutèt sa, frè byenneme m yo, rekonsilye nou avèk li pa mwayen ekspyasyon Kris la, Sèl Pitit Gason Literal li a, e nou kapab jwenn yon rezirèksyon, daprè pouvwa rezirèksyon ki nan Kris la, pou nou kapab prezante kòm yon premye fwi pou Kris la devan Bondye, avèk lafwa, e pou nou gen yon bon esperans laglwa nan li, anvan li fè nou wè l nan kò fizik li”. (Jakòb 4:11; anfaz ajoute). Tanpri remake itilizasyon mo “bon” an pou dekri “esperans.”
Epi Mowoni te di, “Epi m sonje tou ou te di konsa ou te pare yon plas pou lòm, wi, menm nan pami pakèt kay Papa w yo, kote lòm kapab gen yon esperans pi ekselan ; se poutèt sa, lòm dwe gen esperans; sinon li pa kapab resevwa yon eritaj nan plas ou te pare a” Etè 12:32; anfaz ajoute). Tanpri remake itilizasyon mo “pi ekselan” an pou dekri “esperans.”
Kisa Esperans nan Kris la ye?
Don espirityèl ki se esperans nan Kris la se antisipasyon plen lajwa pou lavi etènèl atravè “merit, ak mizèrikòd, ak lagras Mesi ki Sen an” (2 Nefi 2:8) ak yon gwo dezi pou benediksyon lajistis yo pwomèt yo. Adjektif “vivan,” “bon,” ak “pi ekselan” yo nan vèsè sa yo sijere yon asirans vibran e k ap grandi tout tan konsènan Rezirèksyon an ak lavi etènèl atravè lafwa nan Jezikri.
Pwofèt Mòmon te eksplike:
“Epi ankò, frè byenneme m yo, m ta vle pale avèk nou konsènan esperans. Kòman nou kapab gen lafwa si nou pa gen esperans?
“Epi, ki sa nou dwe espere? Gade, m di nou, nou dwe gen esperans nan ekspyasyon Kris la ak pouvwa rezirèksyon li a, pou nou resisite nan lavi etènèl la, e se poutèt lafwa nou nan li, dapre pwomès la.
“Se poutèt sa, si yon moun gen lafwa, li dwe gen esperans; paske san lafwa pa kapab gen okenn esperans” (Mowoni 7:40–42).
Gran Plan Bonè Papa a
Esperans vivan, ki bon, ak pi ekselan an nan Kris la toujou kòmanse avèk konesans ke Bondye Papa Etènèl la vivan. Li se Papa nou, e nou se pitit lespri Li. Nou se literalman pitit gason ak pitit fi lespri Bondye e nou eritye kalite diven Li yo.
Papa a se otè plan bonè a (gade Abraram 3:22–28). Kòm pitit gason ak pitit fi lespri Bondye, nou te “aksepte plan Li a kote pitit Li yo te kabab vin gen yon kò fizik pou yo fè eksperyans terès pou yo pwogrese nan direksyon pèfeksyon epi pou yo vin rive alafen nan destine diven yo kòm eritye lavi etènèl.” Nan ekriti yo, nou aprann: “Papa a gen yon kò lachè ak zo moun ka touche menmjan ak pa lòm nan; Pitit Gason an tou” (Doktrin ak Alyans 130:22). Kidonk, jwenn kò fizik esansyèl nan pwosesis pou pwogrese nan direksyon destine diven nou an.
Nou se èt ki gen de pati. Lespri nou, pati etènèl nou an, abiye avèk kò fizik ki sijè a dezi ak apeti mòtalite yo. Plan bonè Papa a fèt pou bay direksyon pou pitit Li yo, pou ede yo retounen san danje lakay li avèk kò resisite, egzalte, epi resevwa benediksyon lajwa ak bonè etènèl yo.
Kris, Timoun nan, pa Sharlotte Andrus
Wòl Redanmsyon Jezikri a nan Plan Papa a
Jezikri se Sèl Pitit Gason Literal Papa Etènèl la. Li te vini nan mond lan pou l fè volonte Papa l (gade 3 Nefi 27:13). Jezikri se sila Papa a te sanktifye pou L te vin reprezantan pèsonèl Li nan tout bagay ki gen rapò ak sali limanite. Li se Sovè nou ak Redanmtè nou paske Li te kwape lanmò ak peche.
Alma te pwofetize bay pèp Jedeyon an konsènan travay sali Mesi a:
“Epi li prale pou l soufri lapenn, afliksyon ak tout kalite tantasyon; e sa pral fèt pou pawòl la kapab akonpli, pawòl ki te di li pral pran lapenn ak maladi pèp li a sou tèt pa l.
“Epi, li pral pran lanmò sou tèt li, pou l kapab lage kòd lanmò ki mare pèp li a; e li pral pran enfimite yo sou tèt li, pou zantray li kapab plen mizèrikòd dapre kò fizik la, pou l kapab konnen dapre kò fizik la kouman pou l pote pèp li a sekou dapre enfimite yo.
“Kounyeya Lespri a konnen tout bagay, poutèt sa, Pitit Gason Bondye a soufri nan kò fizik la pou l kapab pran peche pèp li a sou tèt li, pou l kapab efase transgresyon yo dapre pouvwa delivrans li a” (Alma 7:11–13).
Premye prensip levanjil la se lafwa nan Senyè a, Jezikri. Vrè lafwa a konsantre nan Sovè a ak sou Sovè a epi li pèmèt nou mete konfyans nou nan li epi gen konfyans konplè nan pouvwa Li pou sove nou anba lanmò, netwaye nou anba peche, epi beni nou avèk fòs ki depase nou.
Mowoni te temwanye, “Epi poutèt redanmsyon lèzòm, ki te vini nan Jezikri, y ap retounen nan prezans Senyè a; wi, se nan fason sa a tout moun rachte, paske lanmò Kris la reyalize rezirèksyon an, ki reyalize yon redanmsyon anba yon somèy san fen; anba somèy sa a, pouvwa Bondye pral reveye tout moun lè twonpèt la sonnen; e yo pral leve, piti kou gran, e yo pral kanpe devan tribinal li a apre yo fin rachte, e apre yo fin delivre anba kòd lanmò etènèl sa a, ki se lanmò tanporèl la” (Mòmon 9:13).
Mwen temwaye ke Sovè a te kase tout kòd lanmò. Li te resisite, Li vivan, epi Li se sèl sous esperans vivan, ki bon, ak pi ekselan.
Yon Ankraj pou Nanm nou
“Se poutèt sa, nenpòt moun ki kwè nan Bondye kapab reyèlman espere yon lemond ki pi bon, wi, menm yon plas a dwat Bondye,esperans sa a soti nan lafwa, li atache avèk nanm lèzòm, ki fè yo gen asirans epi yo rete fèm, pou yo fè bon zèv tout tan, pou yo bay Bondye laglwa.”Etè 12:4; anfaz ajoute).
Nan epòk espesyal sa a kote n ap selebre nesans tibebe a nan Betleyèm nan, se pou nou toujou sonje ke Jezikri te vin nan mond lan kòm Sovè nou ak Redanmtè nou. Li ofri nou kado espirityèl san parèy ki se lavi, limyè, renouvèlman, lanmou, lapè, pèspektiv, lajwa ak esperans yo.
Mwen envite nou pou nou chèche nan yon fason ki apwopriye, pou nou jwenn don espirityèl esperans nan Sovè a pandan n ap etidye ansèyman ak temwayaj pwofèt ansyen ak modèn yo konsènan sakrifis ekspyatwa Li a ak Rezirèksyon literal Li a. Pandan nou ap fè sa, mwen pwomèt ke temwayaj nou konsènan divinite Redanmtè a ap vin pi solid, konvèsyon nou nan Li pral apwofondi, dezi nou ak detèminasyon nou pou kanpe kòm yon temwen vanyan pou Li ap ogmante, epi n ap beni avèk yon ankraj nan nanm nou— menm yon esperans ki vivan, ki bon, ak pi ekselan.
Avèk Apot yo ki te rann temwayaj konsènan Li atravè syèk yo, mwen jwayezman deklare temwayaj pa mwen ke Jezikri se Pitit Gason vivan Bondye vivan an. Li se Redanmtè resisite nou ki gen yon kò glorifye, lachè ak zo nou ka manyen. Epi gras ak redanmsyon ak rekonsilyasyon avèk Bondye ke Senyè a rann posib pou tout limanite a, nou ka resevwa asirans espirityèl ak yon esperans vivan, bon, ak pi ekselan ke “nan Kris la, tout bagay pral vivan” (1 Korentyen 15:22).
© 2024 by Intellectual Reserve, Inc. All rights reserved. Enprime nan Etazini Damerik. Apwobasyon anglè: 6/19. Apwobasyon tradiksyon: 6/19. Tradiksyon Monthly Liahona Message, December 2024. Haitian. 19296 036