Mesaj Mansyèl Pou Fòs Jèn yo, Desanm 2024

Lanativite

Tablo David A. Edwards

Revi Legliz yo

Dekouvri sèn abityèl Nwèl sa a ak kijan li ede nou konsantre sou Sovè a.

Ilistrasyon Caroline Vibbert

Betleyèm

Betleyèm vle di “kay pen” nan lang ebre a. Pafwa yo rele li vil David la, se nan lineyaj li yo te pwofetize ke Mesi a te gen pou soti (gade Jeremi 23:5; Jan 7:42). Samyèl te wenn David kòm wa nan Betleyèm (gade 1 Samyèl 16:1–13). Yo te pwofetize ke Mesi a t ap fèt nan kote sa a (gade Miche 5:2).

‌“Ala sa apwopriye ke [Jezikri] Limenm, ‌“pen lavi a,” te soti nan “kay pen” an.”

Prezidan Russell M. Nelson, “Nan Tè Sent sa a,” Liahona, Fevriye 1991, 13.

Otèl

Mo Grèk pou ‌otèl la ta ka vle di nenpòt lojman tanporè, sa enkli yon chanm envite. Mari “mete [Jezikri timoun] kouche nan yon kote yo bay bèt manje; paske pa t gen plas pou yo nan lotèl la” (Lik 2:7). (Tradiksyon Joseph Smith lan di “lotèl yo.”) “Pa gen chanm” te kapab vle di yo te refize yo oswa pa t gen okenn kote yo ta ka rete ki te gen chanm pou akouche yon ti bebe. Kèlkeswa jan sa te ye, yo te ale yon kote ki te gen yon kay pou bay bèt manje.

Manjwa (Kote pou bay bèt manje)

Yon manjwa se yon bwat ki wo oswa ki fèt pou kenbe manje pou bèt. Nan tan lontan nan Jide, yo te sitou fèt an wòch. Otèl yo te gen lakou santral ak manjwa, epi anpil kay te gen manjwa nan gwo chanm prensipal la tou pou bèt yo te ka rete la nan lannwit.

Moso Twal

Manman yo te konn vlope tibebe ki fèk fèt yo (vlope yo nan yon dra oswa yon moso twal) pandan dè milye ane. Sa kalme ak rekonfòte yo apre chòk soti nan matris la. Moso twal Mari te itilize a kapab te gen yon makfabrik espesyal a fanmi an.

Mari ak Jozèf

Yo te bon moun e yo te jis, e toulède te desandan David. Yo chak te resevwa vizit yon zanj pou preparasyon nesans Sovè a (gade Matye 1:18–25; Lik 1:26–38). Yo te vwayaje sou yon distans 100-140 kilomèt (60–90 miles) pou yo t ale Betleyèm. Mari te tou ansent pandan vwayaj la.

bèje

Bèje yo t ap gade twoupo yo toupre Betleyèm. Selon kèk savan biblik, se sèlman mouton yo t ap leve pou sakrifis nan tanp yo te pèmèt yo leve toupre yon vil. Konsa, bèje sa yo gendwa t ap gade mouton ki ta pral reprezante sakrifis JeziKri pou nou (gade Moyiz 5:6–7). Yo te kite twoupo yo pou yo yo t al wè Mesi a, ke sakrifis ekspyatwa li a ta pral elimine sakrifis bèt yo.

Kris, Timoun nan

Jezikri se pèsonaj santral sèn nativite a—ak lavi nou.

‌“Mwen espere ke nou pral pran tan nan sezon Nwèl sa a pou nou chita pandan kèk moman trankil epi kite Lespri Sovè a rechofe ou ak rasire nou. … Chita tou dousman avèk ti bebe sa a epi soti nan sa avèk yon renouvèlman espirityèl. … Kite moman sa a tounen yon moman repo ak rafrechisman ak reyasirans ak renouvèlman.

“Bondye ba ou benediksyon sa a nan Nwèl sa a pandan ke oumenm, avèk mwen, ap rann temwayaj konsènan Sovè a Jezikri—konsènan wòl santral li nan lavi nou, nan lavi tout imen, ak nan bi egzistans lan menm.”

Èldè D. Todd Christofferson nan Kolèj Douz Apot yo: “Se pou nou gen lapè,” Liahona, Des. 2015, 37.

© 2024 by Intellectual Reserve, Inc. All rights reserved. Enprime nan Etazini Damerik. Apwobasyon anglè: 6/19. Apwobasyon tradiksyon: 6/19. Tradiksyon Monthly For the Strength of Youth Message, December 2024. Haitian. 19346 036

Remak

1. Tradiksyon Joseph Smith, Lik 2:7 (nan Lik 2:7, referans b).

2. Gade Andy Mickelson, “Yon Otèl enpwobab: Tèks ak Tradisyon ki Antoure Lik 2:7,” Studia Antiqua vol. 14, no. 1 (Me 2015).

3. Gade Andy Mickelson, “Yon Otèl enpwobab.”

4. Gade Russell M. Nelson, “Lapè ak Lajwa nan Konnen Sovè a Vivan,” Liahona, Des. 2011, 19–20.

5. Gade Alfred Edersheim, Lavi ak Epòk Jezikri, Mesi a, 8èm ed. (1907), 1:186.