“Si Jesucristo ang Ginhalinan sang ‘Buhi,’ ‘Maayo,’ kag ‘Mas Labing Maayo nga Paglaum,’” Liahona, Dis. 2024.
Bulanan nga Mensahe sa Liahona, Disyembre 2024
Si Jesucristo ang Ginhalinan sang “Buhi,” “Maayo,” kag “Mas Labing Maayo nga Paglaum”
Sa sining espesyal nga panahon sang pagselebrar sang pagkabun-ag sang lapsag sa Betlehem, kabay nga panumdumon naton pirme nga nagkari si Jesucristo sa kalibutan para mangin Manluluwas kag Manunubos naton.
The Nativity [Ang Pagbata kay Jesus], ni Sharlotte Andrus
Si Apostoles Pedro kag ang mga propeta sa libro ni Mormon nga sanday Jacob kag Moroni nagpaintiendi sang espirituhanon nga dulot sang paglaum kay Cristo sa palareho nga pamaagi sang pagtudlo.
Halimbawa, ginsiling ni Pedro, “Dayawon ang Dios kag Amay sang aton Ginuong Jesucristo! Bangud sang iya dako nga kaluoy, natawo kita liwat sa paglaum nga buhi paagi sa pagkabanhaw ni Jesucristo” (1 Pedro 1:3; emphasis gindugang). Palihog tandai ang paggamit sang tinaga nga “buhi” para ilarawan ang “paglaum.”
Si Jacob nagsiling, “Gani, pinalangga nga mga kauturan, magpakig-uli kamo sa iya paagi sa pagpasag-uli ni Cristo, ang iya Bugtong nga Anak, kag mahimo kamo nga makaangkon sing pagkabanhaw, suno sa gahum sang pagkabanhaw nga yara kay Cristo, kag ihalad bilang unang mga bunga ni Cristo sa Dios, nga may pagtuo, kag nakaangkon sing maayo nga paglaum sang himaya sa iya antes niya ginpakita ang iya kaugalingon sa unod” (Jacob 4:11; emphasis gindugang). Palihog tandai ang paggamit sang tinaga nga “maayo” para ilarawan ang “paglaum.”
Kag si Moroni nagsiling, “Kag nadumduman ko man nga nagsiling ikaw nga naghanda ka sing balay para sa tawo, huo, bisan sa mga mansyon sang imo Amay, nga sa diin ang tawo mahimo nga makaangkon sing mas labing maayo nga paglaum; gani ang tawo kinahanglan gid nga maglaum, ukon indi sia makabaton sing palanublion sa lugar nga imo ginhanda” (Eter 12:32; emphasis gindugang). Palihog tandai ang paggamit sang tinaga nga “mas labing maayo” para ilarawan ang “paglaum.”
Ano ang Paglaum kay Cristo?
Ang espirituhanon nga dulot sang paglaum kay Cristo amo ang masinadyahon nga pagpaabot sang wala katapusan nga kabuhi paagi sa “mga merito, kag kaluoy, kag grasya sang Balaan nga Mesias” (2 Nefi 2:8) kag sang mabaskog nga handum sa ginpromisa nga mga bugay sang pagkamatarong. Ang mga paglarawan nga “buhi,” “maayo,” kag “mas labing maayo” sa sining mga bersikulo nagapanugyan sang padayon-nga-nagadako kag masanag nga pasalig sang Pagkabanhaw kag sang kabuhi nga wala katapusan paagi sa pagtuo kay Jesucristo.
Ginpaathag ni Propetang Mormon:
“Kag sa liwat, pinalangga kong mga kauturan, magahambal ako sa inyo parte sa paglaum. Paano nga makaabot kamo sa pagtuo luwas nga kamo makaangkon sing paglaum?
“Kag ano ini nga inyo pagalauman? Tan-awa ginasiling ko sa inyo nga makaangkon kamo sing paglaum paagi sa pagbayad-sala ni Cristo kag sang gahum sang iya pagkabanhaw, nga pagabangonon sa wala’y katapusan nga kabuhi, kag ini tungod sang inyo pagtuo sa iya suno sa promisa.
“Gani, kon ang isa ka tawo may pagtuo dapat gid sia nga may paglaum; kay kon wala sing pagtuo mangin wala gid sing bisan ano nga paglaum” (Moroni 7:40–42).
Ang Plano sang Kalipayan sang Amay
Ang paglaum kay Cristo nga buhi, maayo, kag mas labing maayo nagasugod sa ihibalo nga ang Dios nga Wala Katapusan nga Amay buhi. Sia ang aton Amay, kag Iya kita mga anak nga espiritu. Literal kita nga espiritu nga mga anak nga lalaki kag babayi sang Dios kag nanubli sang diosnon nga mga kinaiya sa Iya.
Ang Amay amo ang tagsulat sang plano sang kalipayan (tan-awa sa Abraham 3:22–28). Bilang espiritu nga mga anak nga lalaki kag babayi sang Dios “ginbaton naton ang Iya plano kon sa diin ang Iya mga anak makaangkon sing pisikal nga lawas kag makaagom sang dutan-on nga inagihan sa pag-uswag padulong sa pagkaperpekto kag sa katapusan makalab-ot sa ila diosnon nga kapalaran bilang mga manunubli sang kabuhi nga wala’y katapusan.” Sa balaan nga mga kasulatan, matun-an naton nga: “Ang Amay may lawas nga unod kag mga tul-an nga matandog pareho sang iya sang tawo; ang Anak amo man” (Doktrina kag mga Kasugtanan 130:22). Gani, ang pag-agom sang pisikal nga mga lawas kinahanglanon sa proseso sang pag-abante padulong sa aton diosnon nga kapalaran.
May duha kita ka parte. Ang aton mga espiritu, ang parte naton nga wala katapusan, ginpasul-oban sang pisikal nga mga lawas nga maimpluwensyahan sang mga handum kag kaluyag sang mortalidad. Ang plano sang kalipayan sang Amay gindisenyo sa paghatag sang direksyon sa Iya mga anak, sa pagbulig sa ila nga hilway nga makabalik pauli sa Iya nga may nabanhaw, ginpahitaas nga mga lawas, kag magbaton sang mga bugay sang wala katapusan nga kasadya kag kalipay.
The Christ Child [Ang Bata nga Cristo], ni Sharlotte Andrus
Ang Nagatubos nga Papel ni Jesucristo sa Plano sang Amay
Si Jesucristo amo ang Bugtong nga Anak sang Wala Katapusan nga Amay Nagkari Sia sa duta para tumanon ang kabubut-on sang Iya Amay (tan-awa sa 3 Nefi 27:13). Si Jesucristo ang ginpili sang Amay nga mangin Iya personal nga representante sa tanan nga butang nahanungod sa kaluwasan sang katawhan. Sia ang aton Manluluwas kag Manunubos tungod ginlampuwasan Niya ang kamatayon kag sala.
Ginpropesiya ni Alma sa katawhan sang Gideon parte sa nagapangluwas nga buluhaton sang Mesias:
“Kag magalakat sia nga magabatas sang mga kasakit kag mga pag-antos kag mga pagsulay sang tagsa ka sahi; kag ini agud nga matuman ang pulong nga nagasiling nga dal-on niya sa iya kaugalingon ang mga kasakit kag mga balatian sang iya katawhan.
“Kag dal-on niya sa iya kaugalingon ang kamatayon, agud mapalos niya ang mga gapos sang kamatayon nga nagahigot sang iya katawhan; kag dal-on niya sa iya kaugalingon ang ila mga kahuyangan, agud ang iya tagipusuon mapuno sang kaluoy, suno sa unod, agud mahibal-an niya suno sa unod kon paano buligan ang iya katawhan suno sa ila mga kahuyangan.
“Karon ang Espiritu nakahibalo sang tanan nga butang; apang ang Anak sang Dios magaantos suno sa unod agud madala niya sa iya kaugalingon ang mga sala sang iya katawhan, agud mapanas niya ang ila mga kalapasan suno sa gahum sang iya pagtubos” (Alma 7:11–13).
Ang una nga prinsipyo sang ebanghelyo amo ang pagtuo kay Ginuong Jesucristo. Ang matuod nga pagtuo nagatutok sa Manluluwas kag nagatugot sa aton nga magsalig sa Iya kag magdangop sa Iya gahum para luwason kita sa kamatayon, tinluan kita sa sala, kag bugayan kita sang kusog nga labaw pa sang aton.
Si Moroni nagpamatuod, “Kag tungod sang pagtubos sang tawo, nga nag-abot paagi kay Jesucristo, nadala sila pabalik sa presensya sang Ginuo; huo, ini ang paagi nga ang tanan nga tawo natubos, tungod ang kamatayon ni Cristo nagapahanabo sang pagkabanhaw, nga nagapahanabo sang pagtubos halin sa nagapadayon nga katulugon, nga halin sa amo nga katulugon ang tanan nga tawo pagapukawon paagi sa gahum sang Dios sa pagtunog sang trumpeta; kag magabangon sila, ang magagmay kag dalagko, kag ang tanan magatindog sa atubang sang iya hukmanan, nga natubos kag nahubaran halin sa sining wala’y katapusan nga gapos sang kamatayon, nga ang amo nga kamatayon isa ka dutan-on nga kamatayon” (Mormon 9:13).
Nagapamatuod ako nga ginbugto sang Manluluwas ang mga higot sang kamatayon. Nabanhaw Sia, buhi Sia, kag Sia lamang ang ginhalinan sang buhi, maayo, kag mas labiing maayo nga paglaum.
Angkla sang Kalag
Ginpamatuod ni propeta Eter, “Gani, kon sin-o man ang magpati sa Dios mahimo nga maglaum sing pat-od sa isa ka mas maayo nga kalibutan, huo, bisan isa ka lugar sa tuo nayon nga kamot sang Dios, nga ang amo nga paglaum nagaabot tungod sang pagtuo, nagaserbe nga angkla sa mga kalag sang mga tawo, nga magahimo sa ila nga mabakod kag malig-on, nga dalayon nga nagabugana sa maayo nga mga binuhatan, nga natuytuyan sa paghimaya sa Dios” (Eter 12:4; emphasis gindugang).
Sa sining espesyal nga panahon sang pagselebrar sang pagkabun-ag sang lapsag sa Betlehem, kabay nga panumdumon naton pirme nga nagkari si Jesucristo sa kalibutan para mangin Manluluwas kag Manunubos naton. Ginatanyagan Niya kita sang indi matupungan nga espirituhanon nga mga dulot sang kabuhi, kasanag, pagbag-o, pagpalangga, kalinong, perspectibo, kalipay, kag paglaum.
Ginaagda ko kamo nga pangitaon sing nagakabagay ang espirituhanon nga dulot sang paglaum sa Manluluwas paagi sa pagtuon sang mga pinanudlo kag testimonya sang dumaan kag moderno nga mga propeta parte sa Iya nagabayad-sala nga sakripisyo kag literal nga Pagkabanhaw. Kon himuon ninyo ini, ginapromisa ko nga magabakod ang inyo testimonya parte sa pagkadios sang Manunubos, ang inyo pagbag-o padulong sa Iya magasangkad, magatubo ang inyo handum kag determinasyon para magtindog bilang maisog nga saksi Niya, kag bugayan kamo sang angkla sa inyo kalag—labi na sang buhi, maayo, kag mas labing maayo nga paglaum.
Upod sa mga Apostoles nga nagpamatuod parte sa Iya sa tanan nga katuigan, malipayon ko nga ginapahayag ang akon testimonya nga si Jesucristo buhi nga Anak sang buhi nga Dios. Sia ang aton nabanhaw nga Manunubos nga may ginhimaya, mahikap nga lawas nga may unod kag tul-an. Kag tungod sa pagtubos kag pagpakig-uli sa Dios nga ginpatigayon sang Ginuo para sa tanan nga katawhan, makabaton kita sang espirituhanon nga pasalig kag sang buhi, maayo, kag mas labing maayo nga paglaum nga “kay Cristo ang tanan buhion” (1 Mga Taga-Corinto 15:22).
© 2024 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, December 2024. Hiligaynon. 19296 861