Bulanan nga Mensahe sang Para sa Kusog sang mga Lamharon, Disyembre 2024

Ang Pagbata kay Jesus

Ni David A. Edwards

Mga Magasin sang Simbahan

Tun-i ining pamilyar nga talan-awon kon Paskwa kag kon paano kita sini ginabuligan nga magtutok sa Manluluwas.

Mga Ilustrasyon ni Caroline Vibbert

Betlehem

Ang Betlehem nagakahulugan nga “balay sang tinapay” sa Hebreo. Kon kis-a ginatawag ini sia nga Siyudad ni David, ang ginpropesiya nga halinan sang Mesias (tan-awa sa Jeremias 23:5; Juan 7:42). Gin-anoint ni Samuel si David nga hari sang Betlehem (tan-awa sa 1 Samuel 16:1–13). Ginpropesiya nga ang Mesias matawo didto (tan-awa sa Miqueas 5:2).

“Dapat gid nga [si Jesucristo], ang ‘tinapay sang kabuhi,’ magahalin sa ‘balay sang tinapay.’”

Pangulong Russell M. Nelson, “In This Holy Land,” Liahona, Peb. 1991, 13.

dalayunan

Ang Griego sang tinaga nga dalayunan mahimo nga nagakahulugan sang bisan ano nga temporaryo nga ilistaran, dala na ang kuwarto para sa bisita. “Ginpahigda [ni Maria ang Lapsag nga Cristo] sa isa ka pasungan kay wala na sing lugar para sa ila sa balay nga dalayunan” (Lucas 2:7). (Ang Joseph Smith Translation nagasiling nga “mga dalayunan.”) “Wala na sing lugar” posible nagakahulugan nga ginbalibaran sila ukon ang ila dalayonan wala sang kwarto para magbata. Tungod sadto, naglakat sila sa lugar nga may pasungan.

Pasungan

Ang pasungan isa ka kahon nga nagaulbo nga ginabutangan sang pagkaon sang kasapatan. Sa dumaan nga Judea, kasami human ini sa bato. Ang mga dalayunan sadto may mga terasa nga may mga pasungan, kag madamo man nga mga pamalay ang may mga pasungan sa mayor nga kuwarto para may pahuwayan ang mga kasapatan kon gab-i.

Lampin

Ginaputos gid sang mga nanay ang ila mga lapsag (sa habol ukon tela) sa linibo na ka tuig. Ginapakalma kag ginapasulhay sila sini pagkatapos nila maggwa sa kalibutan. Ang tela nga gingamit ni Maria posible nga may espesyal nga marka nga tanda sang ila pamilya.

Si Maria kag Jose

Mabuot kag matarong sila nga mga tawo, kag pareho sila nga mga kaliwat ni David. Sila nga duha ginbisitahan sang anghel bilang preparasyon sa pagbata sa Manluluwas (tan-awa sa Mateo 1:18–25; Lucas 1:26–38). Nagbiyahe sila sang 100–140 km (60–90 ka milya) pakadto sa Betlehem. Nagabusong si Maria samtang nagabiyahe.

Mga Bakero

Mga bakero nga nagaatipan sang ila mga karnero malapit sa Betlehem. Siling sang iban nga mangin-alamon, ang mga karnero lang nga gintigana para ihalad sa templo ang ginatugtan nga saguron lapit sa siyudad. Gani ining mga bakero siguro nagaatipan sang mga karnero nga magarepresentar sang sakripisyo ni Jesucristo para sa aton (tan-awa sa Moises 5:6–7). Ginbayaan nila ang ila kasapatan para makita ang Mesias, nga ang nagabayad-sala nga sakripisyo magapauntat na sang paghalad sang kasapatan.

Ang Bata nga Cristo

Si Jesucristo amo ang sentro sang eksena sa Pagbata kay Jesus—kag sa aton mga kabuhi.

“Kabay nga hatagan ninyo sang tiyempo sining panahon sang Paskwa nga magpungko sing malinong kag tugotan ang Espiritu sang Manluluwas nga magpasulhay kag magpabakod sa inyo. … Magpungko sing malinong upod sinang gamay nga bata kag maglakat nga ginpabakod sa espirituhanon. … Tugoti ina nga tiyempo sa paghatag sa imo sang kapahuwayan kag kapagsik kag pasalig kag panibag-o nga kusog.

“Ihatag sa inyo sang Dios inang bugay sining Paskwa, samtang kamo, upod sa akon, nagasaksi sa Manluluwas nga si Jesucristo—sang Iya lugar sa sentro sang aton mga kabuhi, sa kabuhi sang tanan nga tawo, kag sa kahulugan mismo sang kabuhi.”

Elder D. Todd Christofferson sang Korum sang Dose ka Apostoles, “Be at Peace,” Liahona, Dis. 2015, 37.

© 2024 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, December 2024. Hiligaynon. 19346 861

Mga Tanda

1. Joseph Smith Translation, Lucas 2:7 (sa Lucas 2:7, footnote b).

2. Tan-awa sa Andy Mickelson, “An Improbable Inn: Texts and Tradition Surrounding Luke 2:7,” Studia Antiqua vol. 14, no. 1 (Mayo 2015).

3. Tan-awa sa Andy Mickelson, “An Improbable Inn.”

4. Tan-awa sa Russell M. Nelson, “The Peace and Joy of Knowing the Savior Lives,” Liahona, Dis. 2011, 19–20.

5. Tan-awa sa Alfred Edersheim, The Life and Times of Jesus the Messiah, 8th ed. (1907), 1:186.