“Jisus Kraist pa Srihpac luhn “Moul,” “Ma Wo,” ac “Finsrak Wolacna Yohk,’” Liahona, Tisacmpuh. 2024.
Pweng ke Liahona ke Mahlwem Nuhkwewa, Tisacmpuh 2024
Jisus Kraist pa Srihpac luhn “Moul,” “Ma Wo,” ac “Finsrak Wolacna Yohk”
Ke puhlan pacl yohk srihpac in ahkfuhlwactye isuslac luhn ahwowo fin acn Bethlehem, lwelah kuht in esam na lah Jisus Kraist El tuhkuh nuh facluh in Mwet Lahngo ac Mwet in Molwelah lasr.
Isuslac lal Jisus, sel Sharlotte Andrus
Mwet Sap Peter ac mwet pahluh Jacob ac Moroni ke Puk luhn Mormon sruhmuhn ahkuhtweyac mwe sang muhtahl finsrak kihn Kraist ke ohiyac se fana.
Sie srikasrak an pa, Peter el fahkwelihk, “Lela kut in sang kulo nu sin God, Papa tumun Leum lasr Jesus Christ! Ke sripen pakoten lal, El ase nu sesr sie moul sasu ke El akmoulyalak Jesus Christ liki misac” (1 Peter 1:3; mwet ahkuhtweyac ituckyang). Nuhnakmuhnahs lohacng nuh ke kahs “moul” in ahkuhtweyac “finsrak.”
Jacob el ahkahlwemye, “Ohinge, mwet sacohk wiyuck, ahksuwohsye nuh Sel ke iwaclah luhn Kraist, Wen Sefanna nahtuhl, ac kowos fah eis moulyak, fal nuh ke kuh luhn moulyak ma oasr in Kraist, ac ahkkahlwemyeyuck oacna fahko se emet luhn Kraist nuh sin God, ke luhlahlfongi, ac eis sie finsrak wo ke wolacna in El met liki El ahkkahlwemyacl sifacna in mahnoh” (Jacob 4:11; mwe ahkuhtweyac ituckyang). Nuhnakmuhnahs lohacng nuh ke kahs “wo” in ahkuhtweyac “finsrak.”
Ac Moroni el fahk, “Ac nga oacyacpac esam lah Kom tuh fahk lah Kom ahkolah sie lohm nuh sin mwet uh, ahok, finne oasr inmahsrlon acn in muhta sin Pahpah tomom, yac mwet uh kuh in finsrak wolacna kac; ohinge mwet uh enenuh in finsrak, fin tiac el tiac kuh in eis sie usru ke acn ma Kom ahkolah” (Ether 12:32; mwe ahkuhtweyac ituckyang). Nuhnakmuhnahs lohacng nuh ke kahs se “wolacna” in ahkuhtweyac “finsrak.”
Meac Finsrak ke Kraist?
Mwe sang muhtahl ke finsrakkihn Kraist pa in puhla engan ke moul ma pahtpaht ma tuhkuh ke “ohiyac wo, pahkotwen, ac luhng kuhlwacng luhn Messiah Muhtahl” (2 Nephi 2:8) ac kena fokoko se ke mwe insewowo uliyuck ke suwohswohs. Kahs se ahkuhtweyac “moul,” “wo,” ac “finsrak yohk” ke fuhs inge use nuhnak in ahkyohkye ac ahkahlwemye na pwacye ke Sifilpac Moulyak ac ke moul ma pahtpaht ma tuhkuh ke luhlahlfongi kacl Jisus Kraist.
Mwet pahluh Mormon el ahkuhtweyac:
“Ac sifilpac, mwet lili sacohk luhk, nga kena sramsram nuh suwos ke finsrak. Fuhkah tuh kowos kuh in eis luhlahlfongi, sahyacn na in oasr finsrak lowos?
“Ac meac se kowos ac finsrakkihn an? Liye nga fahk nuh suwos tuh ac fah oasr finsrak lowos ke iwaclah luhn Kraist ac ke kuh luhn sifilpac moulyak Lal, in moulyak nuh ke moul ma pahtpaht, ac ma inge ke srihpen luhlahlfongi lom Kacl in fal nuh ke olwelah uh.
“Ohinge, fin oasr luhlahlfongi luhn sie mwet enenuh se na in oasr finsrak lal; tuh fin wacngihn luhlahlfongi tiac kuh in oasr finsrak” (Moroni 7:40–42).
Plwacn in Engan luhn Pahpah
Finsrak El pa Pahpah tuhmacsr, ac kuht pa tuhlihk nguhn Nahtuhl. Kuht wen ac acn nguhn nuhtin God ac usrui ma wolacna Yohrohl.
Pahpah El pa sihmihs plwacn in engan (liye Abraham 3:22–28). Ekihn wen ac acn nguhn nuhtin God, kuht “pahtok plwacn Lal ma sang tuhlihk Nahtuhl in eis mahno ac srah ac in puhlakihn ohiyac fin facluh in ahkwot nuh ke wolacna ac in eis akihlenyacn oreklac lalos uh ma som nuh ke moul ma pahtpaht.” Ke ma suhmuhslah, kuht lotwelah lah: “Oasr mahno in ikoac ac sri kacl Pahpah oacna mwet uh, ac Wen pac” (Doctrine and Covenants 130:22). Pwacnacng, eis atacn mahno se yohk srihpac nuh ke inkacnek in kapwack in sun finsrak ma pahtpaht lasr uh.
Kuht ma luo in mahno. Nguhn lasr, ip nguhn se in kuht uh, nukumyuckyang ke monin ikoac ma kuh in puhla kena ac ma luhngseyuck ke moul suhkawihl. Plwacn in engan luhn Pahpah luhmweyucklac in ahkahlwemye inkacnek nuh sin tuhlihk Nahtuhl, in kahsrelos in fohlohk sef nuh in lohm Sel ke mahno in sifilpac moulyak, ma pahtpaht, ac in eis mwe sang ke engan ac pacr ma pahtpaht.
Tuhlihk Kraist, sel Sharlotte Andrus
Kunohkohn in Molwelah lal Jisus Kraist ke Plwacn lal Pahpah
Jisus Kraist pa Wen Kuloh Sefanna nuhtin Pahpah Ma Pahtpaht. El tuhkuh nuh facluh in oruh ma luhngse luhn Pahpah Tuhmacl (liye 3 Nephi 27:13). Jisus Kraist El sollac sin Pahpah in Aholuhl ke ma nuhkewa weacng pacna molwelah luhn mwet uh. El pa Mwet Lahngo ac Mwet in Molwelah ke srihpen El kuhtanglah kewa misac ac ma koluk.
Alma el palye nuh sin mwet Gideon orekma in molwelah luhn Messiah:
“Ac El fah som, kweok ke kain in waek ac ongaiyac ac mwe sruhf nuhkwewa; ac ohinge tuh kahs uh in ahkpwacyeiyucklac suc fahk lah El fah eis nuh Facl kweok ac mas luhn mwet Lal.
“Ac El fah eis nuh Facl misac, tuh Elan kuh in tuhlahlihk mwe kapihr luhn misac ma kapriyac mwet Lal; ac El fah eis nuh Facl mas lalos, tuh insiacl in sesseslah ke pahkotwen, fal nuh ke mahno, tuh Elan kuh in etuh fal nuh ke mahno lah El ac kahsruh fuhkah mwet Lal fal nuh ke mas lalos.
“Inge Nguhn uh etuh ma nuhkwewa; ne ohinge Wen nuhtin God El kweok fal nuh ke mahno tuh Elan kuh in eis nuh Facl ma koluk luhn mwet Lal, tuh Elan kuh in elah tahfonglac lalos fal nuh ke kuh luhn molwelah Lal” (Alma 7:11–13).
Ip yohk se emet ac akwuck ke Wosasuc pa luhlahlfongi ke Leum Jisus Kraist. Luhlahlfongi pwacye siiac na ke ac kacn Mwet Lahngo ac use nuh sesr in Luhlahlfongel ac fungyang nohfohn nuh ke kuh Lal in molikuhtlac liki misac, ahknwacsnwacsyekuhtlac liki ma koluk, ac ahkinsewowoyekuht ke kuh lihkihn kuh lasr sifacna.
Moroni el fahkwack, “Ac ke srihpen iweyucklac luhn mwet uh, ma tuhkuh ke srihpen Jisus Kraist, elos fohlohkihnyucklac nuh ye muhtuhn Leum; ahok, pa inge ohiyac ma mwet nuhkwewa iweyucklac, ke srihpen misac luhn Kraist oruh in sikyak sifilpac moulyak, ma oruh in sikyak sie iwaclah liki mutul ma wacngihn sahflahiyac, liki mutul ma mwet nuhkwewa ac fah muhtwaclihk ke kuh luhn God ke mwe ukuk uh fah ukukyak; ac elos fah tuhkuh, kwewana mwet srihk wal la ac mwet yohk wal la, ac mwet nuhkwewa fah tu ye muhtuhn iwen nuhnuhnkuh Lal, iweyucklac ac tuhlweyucklac liki mwe kapihr luhn misac ma pahtpaht se inge, suc misac se inge pa misac luhn mahno” (Mormon 9:13).
Nga fahkwack na pwacye lah Mwet Lahngo El kuhnaoslah sucl in misac. El sifilpac moulyak, El moul, ac El pa inkacnek in moul, wo, ac finsrak yohk se fana.
Mwe Kawuck nuh ke Nguhn
Mwet pahluh Ether el fahkwack etuh lal, “Ohinge, el suc luhlahlfongi na pwacye God el finsrak nuh ke sie facl wo liki inge, ahok, finne sie acn ke lacfahl lacyot sin God, ma finsrak tuhkuh ke luhlahlfongi, oraclah sie kawuck ke nguhn luhn mwet, ma ac oruh ma inge in pwacye ac kuh, sesseslah ke orekma wo, kolyuck in kaksakihn God” (Ether 12:4; mwe ahkuhtweyac ituckyang).
Ke puhlan pacl yohk srihpac se in ahkfuhwlactye isuslac luhn ahwowo fin acn Bethlehem, lwelah kuht in esam na lah Jisus Kraist El tuhkuh nuh facluh in Mwet Lahngo ac Mwet in Molwelah lasr. El use nuh sesr mwe sang muhtahl yohk srihpac luhn moul, kahlwem, ahksasuc, luhngse, mihs, liye luhn kais sie, engan, ac finsrak.
Nga suli kom in kampare suk ke mwe sang luhn nguhn in finsrakkihn Mwet Lahngo ke kom stuhti ke mwe luti ac mwe fahkwack pwacye luhn mwet pahluh meet ac ingena ke iwaclah muhtahl Lal ac Sifilpac Fohlohkyak. Ke kom oruh ohinge, nga olwelah nuh sum lah etuh pwacye lom ke orekma muhtahl luhn Mwet Lahngo e fokokoi,
Wi Mwet Sap ma fahkwack etuh pwacye lal Kacl ke we fahsruh ah, nga engan in fahkwack pac loh luhk lah Jisus Kraist pa Wen moul se nuhtin God moul. El pa Mwet in Molwelah se lasr ma sifilpac moulyak ke mahno in ikoac ac sri wolacna ma kuh in liyeyuck kahlyuck. Ac ke srihpen molwelah ac inseselac nuh sin God pwacnacng Leum El oruh fihsracsr nuh sin mwet nuhkewa, kuht kuh in eis pwacye kac ke nguhn ac moul, ma wo, ac finsrak yohk wolacna, lah “mwet e nukewa fah akmoulyeyukyak ke sripen kupasr lalos nu sin Christ” (Sie Corinth 15:22).
© 2024 sin Intellectual Reserve, Inc. Suwohs nuhkwewa fihliyucki. Printiyucki fin acn USA. Ahkkweyeyucklac ke English: 6/19. Ahkkweyeyucklac ke lweng: 6/19. Lwenglah luhn Pweng in Liahona ke Mahlwem Nuhkwewa, Tisacmpuh 2024.Kosraean.19049 868