Jeso Keresete Ke Motswedi wa Tsholofelo e e “tshedileng,” “Molemo,” le e e “Gaisang Bogolo,’” Liahona, Dec. 2024.
Molaetsa wa Liahona wa Kgwedi le kgwedi, Sedimonthole 2024
Jeso Keresete ke Motswedi wa Tsholofelo e e “Tshedileng,” e e “Molemo,” le e e “Gaisang Bogolo”
Mo pakeng e e kgethegileng e ya go keteka botsalo jwa lesea kwa Bethelehema, a re gakologelweng ka metlha gore Jeso Keresete o tlile mo lefatsheng go nna Mmoloki le Morekolodi wa rona.
Botsalo, ka Sharlotte Andrus
Moaposetole Petere le baperofeti ba Buka ya ga Momone Jakobe le Moroni ba gatelela neo ya semowa ya tsholofelo mo go Keresete ka ditsela tse di tshwanang tse di rutang.
Sekai, Petere o ne a bolela jaana, “A go bakwe Modimo le Rre wa Morena wa rona Jeso Keresete, eo go yeng ka kutlwelobotlhoko e kgolo ya gagwe a re tsetseng gape mo Tsholofelo e e tshedileng ka tsogo ya ga Jeso Keresete mo baswing” (1 Petere 1:3; kgatelelo e okeditswe). Tsweetswee ela tlhoko ka fa lefoko “tshedileng” le dirisiwang ka teng go tlhalosa “tsholofelo.”
Jakobe o ne a bolela, “Ke gone, bakaulengwe ba ba rategang, agisanang mo go ene ka tetlanyo ya ga Keresete, Morwawe yo o Tshotsweng a le Esi, mme lo ka bona tsogo, go ya ka fa thateng ya tsogo e e leng mo go Keresete, mme lwa newa le le maungo a ntlha a ga Keresete mo Modimong, le na le tumelo, mme lo tsere tsholofelo e e molemo ya kgalalelo mo go ene pele ga a iponatsa mo nameng” (Jakoba 4:11; kgatelelo e okeditswe). Tsweetswee ela tlhoko ka fa lefoko “molemo” le dirisiwang ka teng go tlhalosa “tsholofelo.”
Mme Moroni,a bolela, “Mme gape ke gakologelwa gore o rile o baakanyeditse motho ntlo, ee, le tota mogare ga manno a magolo a ga Rraago, se mo go sone motho a ka nnang le tsholofelo e e gaisang go feta; Ke gone motho o tshwanetse go solofela, kgotsa ga a kake a amogela boswa mo lefelong le o le baakantseng” (Ethere 12:32; kgatelelo e okeditswe) Tsweetswee ela tlhoko ka fa lefoko “mogolo” le dirisiwang ka teng go tlhalosa “tsholofelo.”
Tsholofelo mo go Keresete ke Eng?
Neo ya semowa ya tsholofelo mo go Keresete ke go lebelela botshelo jo bo sa khutleng ka boitumelo ka “ditshwanelo, le kutlwelobotlhoko, le tshegofatso ya ga Mesia yo o Boitshepo” (2 Nefi 2:8) le keletso e kgolo ya masego a a solofeditsweng a tshiamo. Matlhaodi “ tshedileng,” “molemo,” le “gaisang” mo ditemaneng tseno a akantsha netefaletso e e ntseng e atologa le e e matlhagatlhaga ya Tsogo le ya botshelo jo bo sa khutleng ka tumelo mo go Jeso Keresete.
Moperofeti Momone o ne a tlhalosa jaana:
“Mme gape, bakaulengwe ba me ba ba rategang, ke tlaa bua le lona mabapi le tsholofelo. Go ka nna jang gore lo ka fitlhelela tumelo, fa e se fela lo ka nna le tsholofelo?
“Mme ke eng se lo tlaa se solofelang? Bonang ke a lo raya gore lo tlaa nna le tsholofelo ka tetlanyo ya ga Keresete le thata ya tsogo ya gagwe, go tsosediwa mo botshelong jo bo sa khutleng, mme se ke ka ntlha ya tumelo ya lona mo go ene go ya ka fa tsholofetsong.
“Ke gone, fa motho a na le tumelo o tshwanetse go tlhoka go nna le tsholofelo; gonne kwa ntle ga tumelo ga go kake ga nna le tsholofelo epe” (Moroni 7:40–42).
Togamaano ya Boitumelo ya ga Rara
Tsholofelo mo go Keresete e e tshedileng, e e molemo, le e e gaisang go feta e simolola ka kitso ya gore Modimo Rara wa Bosakhutleng o a tshela. Ke Rara wa rona, mme re bana ba Gagwe ba mowa. Tota re barwa le barwadi ba mowa ba Modimo mme re ruile dinonofo tsa bomodimo mo go Ene.
Rara ke mokwadi wa togamaano ya poloko (bona Aborahama 3: 22-28). Mo botshelong jwa pele, barwa le barwaetsana ba semowa ba ne ba itse Modimo e bile ba mo obamela e le Rraabo wa Bosakhutleng ; ba bo ba amogela thulaganyo ya gagwe e ka yone bana ba Gagwe ba ka amogelang mebele le go ikutlwela botshelo jwa senama, go tlhatlogela tshiamong le go itemogela bokgoni jwa bone go nna dikokomane tsa botshelo jo bo sa khutleng kwa phelelong. Mo dibukeng tse di boitshepo re ithuta gore: “Rara O na le mmele wa nama le marapo o o tshwaregang jaaka wa motho; Morwa le ene” (Dithuto le Dikgolagano 130:22). Jaana, go bona mebele ya nama go botlhokwa mo thulaganyong ya go gatela pele go ya kwa bokhutlong jwa rona jwa bomodimo.
Re ditshedi tse pedi. Mewa ya rona, karolo ya rona e e sa khutleng, e apesitswe mebele ya nama e e laolwang ke dikeletso le ditakatso tsa loso. Togamaano ya ga Rara ya boitumelo e diretswe go naya bana ba Gagwe kaelo, go ba thusa go boela gae ka pabalesego kwa go Ene ka mebele e e tsositsweng, e e godisitsweng, le go amogela masego a boitumelo le boitumelo jo bo sa khutleng.
The Christ Child, ka Sharlotte Andrus
Seabe sa Thekololo sa ga Jeso Keresete mo Thulaganyong ya ga Rara
Jeso Keresete ke Morwa yo o Tsetsweng a le Esi wa Rara wa Bosakhutleng. O tlile mo lefatsheng go dira thato ya ga Rraagwe (bona 3 Nefi 27:13). Jeso Keresete ke ene yo o tloditsweng ke Rara go nna moemedi wa gagwe ka namana mo dilong tsotlhe tse di amanang le poloko ya batho. Ke Mmoloki le Morekolodi wa rona ka gonne o fentse loso le sebe ka bobedi.
Alema o ne a porofita mo bathong ba ga Giteone mabapi le tiro ya poloko ya ga Mesia:
“Mme o tlaa tsamaya, a sotlega ditlhabi le dipogisego le dithaelo tsa mofuta mongwe le mongwe; mme se gore lefoko le diragadiwe le le reng o tlaa rwala mo go ene ditlhabi le malwetse a batho ba gagwe.
“Mme o tlaa rwala loso mo go ene, gore a tle a bofolole dikgole tsa loso tse di bofilweng batho ba gagwe; mme o tlaa tsaya mo go ene makoa a bone, gore dijelo tsa gagwe a ka tladiwa ka kutlwelobotlhoko, go ya ka fa nameng, gore a tle a itse go ya ka fa nameng gore a ka thusa jang batho ba gagwe go ya ka fa makoeng a bone.
“Jaanong Mowa o itse dilo tsotlhe; le fa go ntse jalo Morwa Modimo o boga go ya ka fa nameng gore a tle a rwale mo go ene dibe tsa batho ba gagwe, gore a tle a phimole ditlolo tsa bone go ya ka thata ya kgololo ya gagwe”(Alema 7:11–13).
Molawana wa ntlha wa efangele ke tumelo mo go Morena Jeso Keresete. Tumelo ya nnete e itebagantse le mo Mmoloking mme e re kgontsha go tshepa mo go ene le go nna le tshepo e e feletseng mo thateng ya gagwe go re boloka mo losong, go re ntlafatsa mo sebeng, le go re segofatsa ka nonofo e e fetang ya rona.
Moroni o ne a paka, “Mme ka ntlha ya thekololo ya motho, e e tlileng ka Jeso Keresete, ba busediwa gape mo boleng teng jwa Morena; ee, se ke se batho botlhe ba rekolotsweng mo go sone, ka ntlha ya gore loso lwa ga Keresete lo diragatsa tsogo, e e tlisang thekololo go tswa mo borokong jo bo senang bokhutlo, mo borokong jo batho botlhe ba tlaa tsosiwang mo go jone ke thata ya Modimo fa terompeta e tlaa lela . ; mme ba tlaa tswa, mmogo le ba bannye le ba bagolo, mme botlhe ba tlaa ema fa pele ga mopakarego wa gagwe, ba rekolotswe le go gololwa mo kgolegong e e sa khutleng e ya loso, loso le e leng loso lwa nakwana” (Momone 9:13).
Ke paka gore Mmoloki o kgaotse dikgole tsa loso. O ne a tsosiwa, O tshedile, mme ke Ene fela motswedi wa tsholofelo e e tshedileng, e e molemo, le e e gaisang bogolo.
Tshetledi ya Mowa
Moporofeta Ethere o ne a paka, “Ke gone, mongwe le mongwe yo o dumelang mo Modimong o ne a ka ka tsholofelo e e tlhomameng ya lefatshe le le botoka,, ee, le lefelo ka fa letsogong le le jang la Modimo, tsholofelo e e tswang mo tumelong, e dira tshetledi mo meweng ya batho,e e neng e tla dira gore ba tlhomamame ba bo ba nitame, ka metlha ba nna mo ditirong tse di molemo, ba gogelwa go galaletsa Modimo” (Ethere 12:4; kgateletso e okeditswe).
Mo pakeng e e kgethegileng e ya go keteka botsalo jwa lesea kwa Bethelehema, a re gakologelweng ka metlha gore Jeso Keresete o tlile mo lefatsheng go nna Mmoloki le Morekolodi wa rona. O re naya dineo tsa semowa tse di senang selekanyo tsa botshelo, lesedi, ntšhwafatso, lorato, kagiso, pono, boitumelo, le tsholofelo.
Ke lo laletsa go batla ka tshwanelo neo ya semowa ya tsholofelo mo Mmoloking ka go ithuta dithuto le bopaki jwa baperofeti ba bogologolo le ba segompieno mabapi le setlhabelo sa Gagwe sa tetlanyo le Tsogo ya mmatota. Fa o ntse o dira jalo, ke solofetsa gore bopaki jwa gago jwa bomodimo jwa Morekolodi bo tlaa nonotshiwa, go sokologela ga gago mo go Ene go tlaa tsenelela, keletso le boikemisetso jwa gago jwa go ema jaaka mosupi yo o pelokgale wa Gagwe di tlaa oketsega, mme o tlaa segofadiwa ka tshetledi mo moweng wa gago—le e leng tsholofelo e e tshedileng, e e molemo, le e e gaisang bogolo.
Ka Baaposetole ba ba neetseng bopaki ka ga gagwe go ralala dingwaga, ke bolela bopaki jwa me ka boitumelo jwa gore Jeso Keresete ke Morwa yo o tshedileng wa Modimo o o tshedileng. Ke Morekolodi wa rona yo o tsositsweng ka mmele o o galaleditsweng, o o tshwaregang wa nama le marapo. Mme ka ntlha ya thekololo le poelano le Modimo e Morena a e dirang gore e kgonege mo bathong botlhe, re ka amogela netefaletso ya semowa le tsholofelo e e tshedileng, e e molemo, le e e gaisang bogolo ya gore “mo go Keresete botlhe ba tla tshedisiwa”(1 Bakorintha 15:22).
© 2024 by Intellectual Reserve, Inc. All rights reserved. E gatisitswe ko USA. Tetla ya Sekgoa: 6/19. Tetla ya thanolo: 6/19. Thanolo ya Molaetsa wa Liahona wa Kgwedi le kgwedi, Sedimonthole 2024. Tswana. 19296 763