Molaetsa Go Nonofo ya Banana wa Kgwedi le kgwedi, Sedimonthole 2024

Botsalo

Ka David A. Edwards

Dimakasine tsa Kereke

Ithute ka tiragalo ena e e tlwaelegileng ya Keresemose le ka fa e re thusang go tsepama mo go Mmoloki.

Ditshwantsho ka Caroline Vibbert

Bethelehema

Bethelehema e raya “ntlo ya senkgwe” ka Sehebera. Ka dinako tse dingwe o bidiwa motse wa ga Dafite, oo go porofetilweng gore Mesia o tlaa tswa mo losikeng la one (bona Jeremia 23:5; Johane 7:42). Samuele o ne a tlotsa Dafite kgosi kwa Bethelehema (bona 1 Samuele 16:1–13) Go ne ga porofetwa gore Mesia o tlaa tsalelwa koo (bona Mika 5:2).

“Go ne go tshwanetse jang gore [Jeso Keresete], ‘senkgwe sa botshelo,’ a tswe mo ‘ntlong ya senkgwe.’”

President Russell M. Nelson, “In This Holy Land,” Liahona, Tlhakole. 1991, 13.

Ntlo ya baeti

Lefoko la Segerika la ntlo ya baeti le ka raya bonno jwa nakwana, go akaretsa le bonno jwa baeng. Marea “o ne a robatsa [Ngwana Keresete] mo bojelong jwa dipitse; gonne ba ne ba sena bonno mo ntlong ya baeti” (Luke 2:7). (Thanolo ya ga Joseph Smith ya re “ntlo ya baeti.”) “Ga go na bonno” go ne go ka raya gore ba ne ba kgaphelwa thoko kgotsa gore ga go na lefelo le ba ka tswang ba ne ba nna mo go lone le le neng le na le bonno jwa go tsholela ngwana. Le fa go ka nna jang, ba ne ba ya golo gongwe kwa go neng go na le bojelo jwa dipitse gone.

Bojelo jwa dipitse

Bojelo jwa dipitse ke lebokoso le le kwa godimo kgotsa mokoti o o tsholang dijo tsa diphologolo. Kwa Judea wa bogologolo, bontsi jwa dilo tseno di ne di dirilwe ka maje. Matlo a baeti a ne a na le malwapana a a fa gare a a nang le batsamaisi, mme magae a le mantsi le one a ne a na le batsamaisi mo ntlwaneng e kgolo e kgolo gore diphologolo di kgone go bewa koo bosigo jotlhe.

Diaparo tsa go phuthela

Bommè ba ntse ba phuthela masea a a sa tswang go tsholwa (ba a phuthela ka kobo kgotsa letsela) ka dingwaga di le diketekete. Seno se ba ritibatsa le go ba gomotsa morago ga go tshoga fa ba tswa mo sebopelong. Letsela le Marea a neng a le dirisa le ka tswa le ne le na le letshwao le le kgethegileng le le neng le le mo lelwapeng leno fela.

Marea, le Josefa

E ne e le batho ba ba molemo le ba ba siameng, mme boobabedi e ne e le dikokomane tsa ga Dafite. Mongwe le mongwe o ne a etelwa ke moengele go baakanyetsa botsalo jwa Mmoloki (bona Mathaio 1:18–25; Luke 1:26–38). Ba ne ba tsamaya dikilometara di le 100–140 (dimaele di le 60–90) go ya kwa Bethelehema. Marea o ne a imile ka nako ya loeto.

Badisa

Badisa ba ne ba disa matsomane a bone gaufi le Bethelehema. Go ya ka bakanoki bangwe, ke dinku fela tse di neng di diretswe go ntshiwa ditlhabelo mo tempeleng tse di neng di letlelelwa go ruiwa gaufi le motse. Ka jalo badisa bano ba ka tswa ba ne ba disa dinku tse di neng di tla emela setlhabelo sa ga Jeso Keresete mo go rona (bona Moshe 5:6–7). Ba ne ba tlogela matsomane a bone go ya go bona Mesia, yo setlhabelo sa gagwe sa tefelo se neng se tlaa fedisa setlhabelo sa diphologolo.

Ngwana Keresete

Jeso Keresete ke ene motho yo o botlhokwa thata mo tiragalong ya Botsalo—le mo matshelong a rona.

“Ke solofela gore o tlaa tsaya nako mo pakeng eno ya Keresemose go nna fa fatshe metsotso e le mmalwa e e didimetseng mme o letle Mowa wa Mmoloki go go thuthafatsa le go go tlhomamisetsa. … Nna fatshe o didimetse le leseanyana leo mme o tle o nonotshitswe mo semoweng. … A motsotso oo e nne wa boikhutso le go lapolosa le go tlhomamisega le go ntšhafadiwa.

“Modimo a go neye tshegofatso eo ka Keresemose eno fa wena, le nna, re supa ka ga Mmoloki Jeso Keresete—botlhokwa jwa Gagwe mo matshelong a rona, mo botshelong jotlhe jwa batho, le mo boikaelelong jwa go nna teng.”

Mogolwane D. Todd Christofferson wa Khoramo ya Baaposetole ba ba Lesome le Bobedi, “Be at Peace,” Liahona, Sedimonthole. 2015, 37.

© 2024 by Intellectual Reserve, Inc. All rights reserved. E gatisitswe ko USA. Tetla ya Sekgoa: 6/19. Tetla ya thanolo: 6/19. Thanolo ya Monthly For the Strength of Youth Message, December 2023. Tswana. 19346 763

Dintlha

1. Thanolo ya ga Joseph Smith, Luke 2:7 (mo Luke 2:7, footnote b).

2. Bona Andy Mickelson, “Ntlo ya Baeti e e sa Kgoneleng: Dikwalo le Ngwao e e Dikologileng Luke 2:7,” Studia Antiqua vol. 14, no. 1 (May 2015).

3. Bona Andy Mickelson, “Ntlo ya Baeti e e sa Kgoneleng.”

4. Bona Russell M. Nelson, “The Peace and Joy of Knowing the Savior Livesl,” Liahona, Sedimonthole. 2011, 19–20.

5. Bona Alfred Edersheim, The Life and Times of Jesus the Messiah, 8th ed. (1907), 1:186.