Auala e Faaaoga ai Musika i le Peraimeri

O le faamoemoega o musika i le Peraimeri o le aoaoina atu lea i tamaiti o le talalelei a Iesu Keriso ma fesoasoani ia latou aoao e ola ai. O pese a le Peraimeri o le a sili atu ai ona fiafia i le aoaoina, fesoasoani ai i tamaiti e aoaoina ma manatuaina upu moni o le talalelei, ma valaaulia ai le Agaga i totonu o le Peraimeri.

O metotia o loo ta’ua i lalo o le a fesoasoani lea ia te oe e aoao ai ia tamaiti i le talalelei e ala i musika. O faataitaiga o le a fesoasoani ia te oe i pese o loo fautuaina mai i lenei otootoga. Tagai i le vaega o “Auala e Faaaoga ai Musika i le Peraimeri” i le otootoga o le 2010 ma le 2011 mo ni manatu faaopoopo.

Aoao atu le Talalelei e ala i Musika

O nisi o lesona sili ona maoae o loo aoaoina i le Peraimeri o loo aoaoina atu lea e ala i le musika. “O musika e mafai foi ona faateleina ai le malamalama i mataupu o le talalelei ma faamalolosia ai a latou molimau” (AALVSA, 183). Mafaufau e tuuina atu ni fesili e uiga i se pese e fesoasoani i tamaiti ia malamalama i lona uiga. Mo se faataitaiga o le pese, “Filifili Mea Tonu” (Viiga, nu. 149) o loo aoao mai e le o tuua na o i tatou e faia ni filifiliga i le olaga; o le a taialaina i tatou e le Agaga Paia i le faia o ni filifiliga amiotonu. Tusi ni ata o talita FMT e tolu i luga o le laupapa ma tusi ai i totonu ia fesili nei: “O ai o le a taialaina a’u e filifili le mea sa’o?” “O afea o le a susulu ai i o’u luga le fesoasoani?” ma le “O le a se mea ua folafola mai pe a ou filifili le mea sa’o?” Tusi i le talita muamua, faitau faatasi le fesili, ma fai atu i tamaiti e faalogo ao e usuina le pese ona tutu lea pe a latou faalogo i le tali. Fai atu ia i latou tou te usuina faatasi le tali i ni nai taimi. O le a fesoasoani lea ia i latou e faafesootai ia upu i le fati. Toe fai mo isi ata. Ia talanoaina ia fasi fuaitau po o upu e ono faigata mo tamaiti ona malamalama ai. Usu atoa le pese, ma faamanatu atu pe a latou usuina, ua latou molimau atu o le a fesoasoani le Agaga Paia ia i tatou pe a tatou faalogo ma faia ni filifiliga sa’o.

woman leading music

Faamalosia ia Mataupu Faavae o le Talalelei: O le tuuina atu o musika i le taimi o fetufaaiga o le a fesoasoani e faamalosia ai ia mataupu faavae o loo aoaoina e le au peresitene o le Peraimeri. “O musika o se auala sili lea e valaaulia ai le Agaga o le Alii i au lesona. E fesoasoani le musika ia i tatou e faailoa atu ai lagona e ono faigata ona faaalia i upu e tautala ai” (Teaching Guidebook [2001], 10).

Ia Faaaofia ia Tamaiti Uma i Gaoioiga Faamusika

E tali atu tamaiti o soo se tausaga ma tomai i musika ma e fiafia e auai i gaoioiga faamusika. E fesoasoani ia fati o pese i tamaiti ina ia manatua mea na latou usuina ma le savali o upu. Ao e usuina le pese “Tu Mo Le Mea Tonu” (TT, 81), ma mafaufau e fesuiai le pao ma le leo o le pese. Mafaufau e aoao atu ia faaupuga faamusika e pei o le legato (lemu ma filemu) ma le staccato (vave ma fesuisuiai) ma tuu atu i tamaiti e usu le pese i soo se auala.

actions to music

E fiafia foi tamaiti e auai i gaoioiga, e pei o le patipati i se pao po o ni taga fai i lima e faatusatusa i upu. I le pese o le “Tagata Poto ma le Tagata Valea” (TT, 132), o le a fesoasoani i tamaiti ia taga o lima e taulai atu ai i upu o le pese. E mafai foi ona e faaaogaina ia taga pe a usuina le pese “Lototele o Nifae” (TT, 64–65). Mo se faataitaiga, fai atu i tamaiti e faafoliga o loo uuina se talita i se tasi lima ao latou usuina “Ou te alu,” ia faafoliga o loo uuina se pelu i luga ao latou usuina “Ou te faia le finagalo o le Alii,” ma savali faafitafita i le tulaga ao latou usuina “Na te saunia se ala ia ou usitai ai.” Valaaulia ia tamaiti e fauina a latou lava taga talafeagai mo soo se pese (o nisi o taga e ono le talafeagai mo le polokalama o le sauniga faamanatuga).

Fai ni fesili: Faaaoga fesili e faaauai mai ai tamaiti. O fesili e fesoasoani e taulai atu ai le faalogo a tamaiti ma faateleina ai lo latou malamalama i mataupu faavae o le talalelei (tagai TT, 149). Ia manatua e faaupu atu fesili i se auala e mafai ai ona maua e tamaiti le tali a o latou usuina le pese.

Toe Iloilo ia Pese e Faamalosia ai ia Mataupu Faavae o le Talalelei

children singing

Motugaafa: Uunaia ia tamaiti e usu ni pese Peraimeri i le afiafi faaleaiga, i le taimi e suesue ai ia tusitusiga paia, ma i nisi taimi talafeagai.

Ao e aoaoina atu se pese, o le a manaomia e te toe faia sooa mo tamaiti e aoao ai. O le a manaomia foi e te toe iloiloina ia pese i le tausaga atoa ina ia fou pea i mafaufau o tamaiti. A uma ona aoao atu se pese, toe iloilo ma usuina i auala malie eseese. Ia faaauau pea ona usuina ia pese pe a uma le polokalama o le sauniga faamanatuga ina ia manatuaina pea e tamaiti. Mafaufau e tusi ni pese e te manao e toe iloilo e tamaiti i ni mea faatino eseese (mo se faataitaiga, fugalaau i se fagu, i’a pepa i se faatanoa vai, fulu o se pipi, laulaau i luga o se laau, po o ni fatu o loo faapipiina solo i le potu). Fai i tamaiti e filifili se tasi o mea faatino i le taimi ona usu lea o le pese. O nisi nei o ni manatu faaopoopo i le auala e toe iloilo ai ia pese (o loo maua ia ata vaaia i le sharingtime.lds.org):

• Pusa Faatafafa o Pese: Fai se pusa faatafafa ma se taga e ese o loo tusia i itu taitasi. Fai atu i se tamaitiiti e faataavale le pusa faatafafa e fuafua ai po o le a le taga latou te faia ao latou pepese.

  pusa faatafafa o pese

• Pepese Teine/Pepese Tama: Fai se ata o se tama ma se ata o se teine, ma kelu pe faapipii i luga o ni laau eseese. Ao iloiloina se pese, sui ia ata e faaali mai po o ai e tatau ona pese. O lenei mea o le a auai ai ma le maelega tamaiti.

  pepese teine/pepese tama

• Papeti Pepese: Kopi ma oti se tasi o ata i le itulau e 63 o le tusi lesona a le vasega pepe, Vaai Ia I O Outou Tamaiti, mo tamaiti taitasi e vali. Kelu pe faapipii ata taitasi i se taga pepa e faia ai ni papeti. Valaaulia ia tamaiti e pepese ma a latou papeti.

  papeti pepese

  boy puppet

  girl puppet

• Togi se Ato: Valaaulia se tasi o tamaiti e togi se taga fatupi po o se fasi pepa ua numinumi i totonu o se ato. Afai e ofi i totonu i le taumafaiga muamua, fai i tamaiti e usu tasi le fuaiupu; afai e manao i se taumafaiga lona lua, ona fai lea i ai e usu faalua le fuaiupu, ma faia ai lava faapena.

  togi se ato

music, As a Child of God