Mati
E Aoaoina A’u e Perofeta Soifua e Filifili le Mea Sa’o
“Ia manatua, lo’u atalii e, ma ia e aoao i le poto ina o e taulealea; ioe, a o e taulealea, ia e aoao e tausi i poloaiga a le Atua” (Alema 37:35).
Pese: “Tu mo le Mea Tonu”
(TT, 81)
Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma (3) fesoasoani ia i latou ina ia faaaogaina i o latou olaga. Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”
Vaiaso 1: E talanoa mai le Atua e ala i perofeta.
Faailoa atu le aoaoga faavae (vaaia o se faatinoga ma tauloto se mau): Valaaulia se tamaitiiti e sau i luma o le potu. Tau atu i isi tamaiti e mulimuli i ana faatonuga. Musumusu atu ni faatonuga faigofie i le tamaitiiti, e pei o le “Fai i ai e patipati faatolu” po o le “Fai i ai e tutu ma savavali faafitafita i o latou tulaga.” Faataga nai tamaiti ia tofu avanoa uma e avea ai ma se taitai. Faamatala atu e ui latou te lei lagonaina lou tuuina atu o faatonuga, ae na mafai ona latou usiusitai i faatonuga aua na latou iloa le tagata e mulimuli ai. Fesili atu po o ai e tatau ona tatou mulimuli ai ina ia iloa ai po o le a le mea e finagalo le Tama Faalelagi tatou te faia. Ia faaali atu se ata o le Peresitene o le Ekalesia o loo i ai nei. Tuu atu i tamaiti latou te fai faatasi, “E fetalai mai le Atua e ala i perofeta soifua.” Faitau le Amosa 3:7, ma faamalamalama soo se upu e le malamalama ai ia tamaiti. Fesoasoani i tamaiti e tauloto le mau (tagai i le AALVSA, 187–88).
Vaiaso 2: O Le Au Peresitene Sili ma Aposetolo e Toasefululua o ni perofeta.
Faailoa atu le aoaoga faavae: Tusi i luga o le laupapa, “O Le Au Peresitene Sili ma Aposetolo e Toasefululua o ni perofeta.” Ta’u atu i tamaiti, i totonu o Le Ekalesia a Iesu Keriso o le Au Paia o aso e Gata Ai, ua taitaiina i tatou e le Peresitene o le Ekalesia, o ona fesoasoani e toalua i le Au Peresitene Sili, ma Aposetolo e Toasefululua. Faamalamalama atu o le Au Peresitene Sili ma Aposetolo e Toasefululua o ni perofeta.
Uunaia le faaaogaaga (taaalo i se taaloga faatusatusa): Ao mai ni ata o ni tagata se toaono o le Au Peresitene Sili ma le Korama a le Toasefululua, ma tusi o latou igoa i ni fasi pepa eseese. Faapipii fasi pepa ma ata e faasaga i lalo o le laupapa. Fai atu i se tamaitiiti e fuli se ata, ae valaaulia se isi tamaitiiti e fuli ae le isi itu o se fasi pepa o loo i ai se igoa. Afai e le tutusa le ata ma le igoa, toe faapipii i luga ma tuu i nisi tamaiti se toalua e filifili. Afai e tutusa pepa, musumusu atu i tamaiti e toalua se mataupu faavae o le talalelei na aoaoina e le taitai i le konafesi aoao lata mai nei (tagai i mataupu lata mai o le konafesi Ensign po o le Liahona), ma fai i ai latou te faatinoina se auala e mafai ona latou ola ai i le mataupu faavae. Tuu atu i isi tamaiti e mate mai le mea o loo latou faia.
Vaiaso 3: E saunoa mai ia i tatou ia perofeta ma aposetolo a le Atua i le konafesi aoao.
Uunaia le [agaga] malamalama ma le faaaogaaga (taaalo i se taaloga): Tusi i luga o ni fasi pepa se aotelega i se fuaiupu se tasi o savali lata mai nei o le konafesi mai sui o le Au Peresitene Sili ma le Korama a le Toasefululua. Faapipii i luga o le laupapa faatasi ai ma ata o taitai. Ia talanoaina savali taitasi. Valaaulia se vaega o tamaiti e o ese mai le potu. Aveese mai le laupapa se savali se tasi. Valaaulia ia tamaiti e toe foi mai ma filifili faatasi po o le a le savali o loo misi. Fai atu i tamaiti e filifili se pese Peraimeri e tutusa ma le savali, ona usu faatasi lea. Valaaulia ia tamaiti e fautua mai ni auala e mafai ona latou faaaogaina ai le savali.
Fetuunai au gaoioiga i tausaga ma tomai o tamaiti o loo e aoaoina. I le gaoioiga o le vaiaso 3, e mafai ona e faaaogaina ia ata e faaopoopo atu i savali tusitusia.
Vaiaso 4: E faamanuiaina a’u pe a ou filifili e mulimuli i le perofeta.
Faailoa atu le aoaoga faavae (usuina o se pese): Usu le fuaiupu lona iva ma le tali o le pese “Mulimuli i le Perofeta” (TT, 58–59). Valaaulia ia tamaiti e faalogo mo ni mafuaaga tatou te mulimuli ai i le perofeta. Fai atu i tamaiti e fai faatasi, “E faamanuiaina a’u pe a ou filifili e mulimuli i le perofeta.”
Uunaia le [agaga] malamalama (faatino ia tala faatusipaia): Faamatala atu i tamaiti le tala ia Elia ma le fafine Sarefata ua oti lana tane (tagai i le 1 Tupu 17:8–16), ma valaaulia ia tamaiti tou te faatinoina. Mo se faataitaiga: “Na fetalai le Alii ia Elia e alu i le aai ua ta’ua o Sarefata (savali i le tulaga). Ina ua ia taunuu i le aai, na ia iloa ai se fafine o loo fai fafie (ia faafoliga o loo pikiina i luga ni fasi laau). Na fai atu Elia i le fafine e aumai sona vai (ia faafoliga o loo tuuina atu i se tasi se vaiinu) ma se fasi falaoa. Na tau atu e le fafine ia Elia ua na o le luutaga o falaoa i le kate, ma sina suauu itiiti i le fagu e fai ai se potoi areto mo si ana tama tane (lulu le ulu i le leai). Na fai atu Elia e fai muamua se potoi areto mo ia ona aumai lea e le Atua o le falaoa ma le suauu mo ia. Na usitai le fafine ia Elia (ia faafoliga o loo paluina se falaoa). Sa lava le falaoa ma le suauu e fai ai potoi areto mo le tele o aso (ia faatagā ‘ai).” Toe fai le gaoioiga e faaaoga ai le tala ia Mose ma le gata apamemea (tagai i le Numera 21:5–9) faapea Nifae ma papatusi apamemea (tagai i le 1 Nifae 3–4; 5:21–22). Fai atu i tamaiti e faamatala mai ni auala na faamanuiaina ai tagata i tala ona sa latou mulimuli i fautuaga a le perofeta.
Uunaia le faaaogaaga (talanoaina o aoaoga a perofeta): Fesili i tamaiti, “O ai lo tatou perofeta i le taimi nei?” Ia faaali atu se ata o le Peresitene o le Ekalesia o loo i ai nei. Faamalamalama atu na valaauina o ia e le Atua. Fai atu i tamaiti e talanoa i ni vaega toalaiti ni auala e mafai ona latou mulimuli ai ia te ia. Fai atu i ni nai tamaiti mai vaega taitasi e faasoa mai ni o latou manatu. Valaaulia tamaiti e filifili se auala se tasi latou te mafai ona mulimuli ai i le perofeta i le aluga o le vaiaso. Fatu se mea e faamanatu ai ia i latou e ave i le fale ma faasoa ai ma o latou aiga. Faamanatu i tamaiti latou te mafai ona faalogo i upu o le perofeta i le taimi o le konafesi aoao, ma uunaia i latou e matamata pe faalogo i le konafesi faatasi ma o latou aiga. O le vaiaso e sosoo pe a mavae le konafesi aoao, fesili i nisi o tamaiti e faasoa mai ni mea na latou o’o i ai ina ua latou faalogo i le perofeta ma mulimuli ai i ana aoaoga.
O le vaevaeina o tamaiti i ni vaega e faatagaina ai le toatele o tamaiti e auai. E mafai ona e faatulagaina ni vaega i le tele o auala. Mo se faataitaiga, e mafai ona e fai atu i tamaiti e galulue faatasi o ni vaega o le vasega, pe e mafai foi ona faapaga tamaiti matutua ma tamaiti laiti. E tatau ona vaaia e se tagata matua vaega taitasi.