Faiga Faavae mo Faauuga o le Inisitituti

Manatua: Pe a ta’ua epikopo ma peresitene o siteki i lalo, e faatatau foi i peresitene o paranesi ma peresitene o itu, i lea faasologa.

O Taiala

• O le faatinoga o faauuga faaletausaga ua tuuina atu ai se tasi o auala e faailoa ai taumafaiga ma mea ua ausia e tamaiti aoga o le inisitituti.

• E tatau ona faia faauuga faaletausaga.

• O faauuga a le inisitituti e tatau ona faia i le lotoa [o le aoga] poo tulaga o polokalama a le siteki. O lenei mea ua mafai ai foi ona tuufaatasia polokalama a le siteki ma polokalama a le lotoa o le aoga ma isi polokalama a le siteki mo sauniga o faauuga, e pei ona talafeagai ai e pulega ma taitai i le lotoifale.

• Afai e mafai, e tatau ona faia sauniga o faauuga pe a maea le faaiuga o le tausaga aoga.

• Afai e fuafuaina o le a le faia ni sauniga o le faauuga, e mafai ona talosagaina e tamaiti aoga ua faamaonia ia tipiloma ma lolomiina e le polokalama o le inisitituti pe a maea le tausaga.

• O tamaiti aoga o e agavaa mo le faauuga e tatau ona faamaeaina le le itiiti ifo ma le 14 togi o vasega inisitituti: 4 kosi o le Maatulimanu (aofai o togi e 8) ma kosi e filifili i ai e 3 (aofai o togi e 6).

• Ina ia faamaeaina se kosi, e tatau i tamaiti aoga ona ausiaina le (1) auai, (2) faitauga o le kosi na atofaina atu, ma le (3) tulaga manaomia o le Aafiaga o le Aoaoina e Siitia Ai (AAS). E maua le avanoa e toe fai ai galuega toe faatumu a tamaiti aoga o e e lei ausia ia tulaga manaomia e tolu. E tatau ona valaaulia tagata faauu ua fuafuaina e talosaga mo le faalauiloaga i le faauuga.

• E ao ona tapa e tagata talosaga ua fuafuaina e faauu se faamaoniga faalelotu e faamaea ai le talosaga o le faauuga.

• Na o le saini na muai lolomiina o le taitaifono o le Komiti a Aoga o le Ekalesia ma le taitai o Seminare ma Inisitituti o Mataupu Faalelotu (S&I) e faaalia i luga o tipiloma.

• Afai e manaomia, i le taimi o le sauniga faaletausaga o le faauuga, e mafai ona filifili polokalama o le inisitituti ia faailoa tamaiti aoga o e na mauaina se tusi faamaonia o le faamae’aina.

O Matafaioi ma Tiutetauave

O le peresitene o le siteki e tofia i le Aufono Faufautua o le Inisitituti o i ai nei (AFI) (tagai Tusitaulima Aoao: Auauna atu i Le Ekalesia a Iesu Keriso o le Au Paia o Aso e Gata Ai, 14.1.2, ChurchofJesusChrist.org; Inisitituti a le Siteki, ChurchofJesusChrist.org) po o sona sui:

• E feutagai ma le faatonu o le inisitituti i le lotoifale i le sauniuniga ma le fuafuaga o le faauuga.

• Faamaonia le polokalama faaiu o le faauuga.

• E mafai ona saunoa i le faauuga ma e mafai ona fesoasoani i le faalauiloaina atu o le au faauu ma le tufatufaina atu o tipiloma.

O peresitene uma o siteki poo o latou sui:

• E faamautinoa ua malamalama epikopo i tulaga manaomia o le faamaoniga faalelotu e pei ona faamatalaina e le faatonu o le inisitituti. E nafa tamaiti aoga mo le sailia o se faamaoniga faalelotu e faamaea ai le latou talosaga o le faauuga.

• E tatau ona malamalama e mafai ona latou maua ni imeli se tele mai polokalama inisitituti e tele, e fuafua i le mea o loo auai ai le autalavou matutua a le latou siteki i le inisitituti.

• Auai i le faauuga, lagolago sui o le siteki i le latou ausiaga.

• Ua valaaulia e alala i luga o le tulaga pe afai o i ai ni a latou tamaiti aoga o loo auai i le faauuga.

O le epikopo po o se tasi o ona fesoasoani:

• E faamaoniaina tagata talosaga ua fuafuaina e faauu ao saili e tamaiti aoga taitasi se faamaoniga faalelotu.

• E mafai, i lana pule, ona filifili e faamaonia pe le faamaonia tagata talosaga taitasi. Afai e le sainia e le epikopo po o lona fesoasoani le faamaoniga faalelotu a se tamaititi aoga i luga o le talosaga o le faauuga, e le maea le talosaga ma o le a le faasilasilaina le tamaititi aoga i le faauuga.

• E nafa ma le faailoa atu i le tagata talosaga o le faauuga o le inisitituti pe afai ma o le a le mafuaaga e le o faamaonia ai le tagata talosaga.

• Ua valaaulia e auai i le faauuga pe afai e i ai ni ana tamaiti aoga e auai i le faauuga, e lagolagoina tagata o le uarota i la latou ausiaga.

O Le Faamaoniga Faalelotu o le Inisitituti

Faatonusili o le Inisitituti:

• Faamautinoa ua malamalama peresitene o siteki taitasi i le tulaga manaomia o le faamaoniga faalelotu ina ia avea ai ma se tagata faauu o le inisitituti.

O le peresitene o le siteki po o sona sui:

• Faamautinoa ua malamalama foi epikopo taitasi i lenei tulaga manaomia

O le epikopo po o se tasi o ona fesoasoani:

• Fono ma tagata talosaga taitasi. O le faamaoniga o se tamaititi aoga mo le faauuga o le inisitituti e faailoa atu ai ua malamalama le tamaititi aoga ma taumafai e faaaoga ia mataupu faavae ma aoaoga faavae o le talalelei a Iesu Keriso na aoaoina a’o i ai i le inisitituti, “ma faamaonia ai ua agavaa ma tuuto atu tamaiti aoga ia ola i tulaga faatonuina o loo otootoina atu i le Mo le Malosi o le Autalavou po o tulaga faatonuina talitutusa mo talavou matutua” (Tusitaulima Aoao, 31.1.7).

• E mafai ona faaaoga faatulagaga masani o faatalanoaga a talavou matutua e avea ma faavae e faamaonia ai pe le faamaonia ai se tagata talosaga mo le faauuga ua fuafuaina. E le o se tulaga manaomia le faia o se faatalanoaga ese o le faamaoniga faalelotu mo tagata talosaga mo le faauuga o le inisitituti.

• E mafai, i lana pule, ona filifili e faamaonia pe le faamaonia tagata talosaga taitasi. Afai e le sainia e le epikopo po o lona fesoasoani le faamaoniga faalelotu a se tamaititi aoga i luga o le talosaga o le faauuga, e le maea le talosaga ma o le a le faasilasilaina le tamaititi aoga i le faauuga.

• E nafa ma le faailoa atu i le tagata talosaga o le faauuga o le inisitituti pe afai ma o le a le mafuaaga e le o faamaonia ai le tagata talosaga.