Founga ʻOsi mei he ʻInisititiutí

Fakatokangaʻi ange: ʻI he taimi ʻoku lave ai ki he pīsopé mo e palesiteni fakasiteikí ʻi laló, ʻoku toe ʻuhinga pē foki ia ki he palesiteni fakakoló mo e palesiteni fakavahefonuá.

Ko e Fakahinohinó

• ʻOku ʻomai ʻe he polokalama fakaʻosi ako fakataʻú, ha founga ke fakalāngilangiʻi ai e ngāue mo e ngaahi lavameʻa ʻa e fānau ako ʻinisititiutí.

• ʻOku totonu ke fakahoko fakataʻu e fakaʻosi akó.

• ʻOku totonu ke fai e polokalama ʻosi mei he ʻinisititiutí ʻi he ʻapiakó pe ʻi ha polokalama fakasiteiki. ʻOku lava foki heni ke fakatahaʻi ai e ngaahi polokalama fakasiteikí mo e ngaahi polokalama he ʻapiakó pea mo ha ngaahi polokalama fakasiteiki kehe ʻi he ouau ʻosí, ʻo ka pehē ʻe he kau pule mo e kau taki fakafeituʻú, ʻoku taau.

• Kapau ʻe lava, ʻoku totonu ke fai e ngaahi polokalama ʻosí ʻi he ʻosi ʻa e taʻu fakaakó.

• Kapau ʻoku fakapapauʻi he ʻikai ke fai ha ngaahi polokalama ʻosi, ʻe lava ʻa e kau ako kuo ʻosi fakaongoongoleleiʻí ʻo kole ʻenau tipilomá pea paaki ʻe he polokalama ʻinisititiutí, ʻi he ʻosi ʻa e taʻú.

• Ko e kau ako ko ia ʻoku lava (qualify) ke ʻosí, kuo pau ke ʻoua naʻa toe siʻi hifo he credit ʻe 14 te ne maʻu mei he ngaahi kalasi ʻinisititiutí: 4 mei he ngaahi kalasi Makatulikí (8 fakakātoa), pea 3 mei he ngaahi kalasi filí (credit ʻe 6 fakakātoa).

• Ke kakato ha kalasi, kuo pau ke lavaʻi ʻe he kau akó ʻa e (1) maʻu kalasí, (2) laukonga ne vahe ki he kalasí mo e (3) ngaahi fiemaʻu ki he Hikiʻi Hake Aʻusia ʻi he Akó (ELE). ʻOku ʻi ai ha ngāue ʻe lava ke fai ʻe he fānau ako ne ʻikai ke nau fakakakato e ʻuluaki fiemaʻu ʻe tolú, ke fetongi ʻaki. ʻOku totonu ke fakaafeʻi e niʻihi ʻoku pehē ʻe ʻosí, ke nau tohi kole ke fakalāngilangiʻi kinautolu ʻi he polokalama ʻosí.

• Kuo pau ke maʻu ʻe he niʻihi ʻoku pehē te nau ʻosí, ha fakaongoongolelei mei he kau taki fakalotú, kae toki kakato e tohi kole ke kau he ʻosí.

• Ko e fakamoʻoni hingoa pē ʻoku ʻasi he tipilomá, ko e fakamoʻoni ko ia ʻa e sea ʻo e Poate Ako ʻa e Siasí mo e pule ʻo e Seminelí mo e ʻInisititiuti Fakalotú (S&I).

• Ka fiemaʻu ʻi he polokalama ʻosi fakataʻú, ʻe ala fili ʻa e ngaahi polokalama ʻosi he ʻinisititiutí ke fakalāngilangiʻi ha kau ako kuo nau ʻosi maʻu e tohi fakamoʻoni fakakakato ʻo e akó.

Ngaahi Tufakangá mo e Fatongiá

Ko e palesiteni fakasiteiki ʻoku vahe ki he Fakataha Alēlea Faleʻi lolotonga ʻo e ʻInisititiutí (IAC) (vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 14.1.2, ChurchofJesusChrist.org; ʻInisititiuti Fakasiteikí, ChurchofJesusChrist.org) pe ha taha naʻá ne vahe ki ai:

• Te ne feongoongoi mo e talēkita fakalotofonua ʻo e ʻinisititiutí ʻi hono teuteu mo palani e polokalama ʻosí.

• Te ne fakangofua (approve) e polokalama ʻosí.

• Te ne lava ʻo lea ʻi he polokalama ʻosí mo lava ke tokoni ʻi hono fakalāngilangiʻi e kau ʻosí mo foaki ʻo e ngaahi tipilomá.

Kau palesiteni fakasiteiki kotoa pē pe ko ha taha ne nau vahe ki aí:

• Fakapapauʻi ʻoku mahino ki he kau pīsopé ʻa e fiemaʻu ki ha fakaongoongolelei ʻa e taki fakalotú, ʻo hangē ko hono fakamatalaʻi ʻe he talēkita ʻinisititiutí. Ko e fatongia ia ʻo e fānau akó ke feinga ke maʻu e fakaongoongolelei ʻenau kau taki fakalotú kae fakakakato ʻenau tohi kole ʻosi.

• Totonu ke mahino te nau lava ʻo maʻu ha ʻīmeili kehekehe mei ha ngaahi polokalama ʻinisititiuti kehekehe, fakatatau mo e feituʻu ʻoku maʻu ʻinisititiuti ai ʻa e kau taautaha kei talavou ʻi honau siteikí.

• ʻAlu ki he polokalama ʻosí, ʻo poupou ki he lavameʻa ʻa e kāingalotu honau siteikí.

• ʻOku fakaafeʻi ke nau tangutu mei muʻa ʻo kapau ʻoku ʻi ai haʻanau kau ako ʻoku kau he ʻosí.

Ko e pīsopé pe ko ha taha ʻo hono ongo tokoní:

• Te ne fakaongoongoleleiʻi e niʻihi ʻoku pehē te nau ʻosí, ʻi heʻenau fiemaʻu fakaongoongolelei mei he taki fakalotú.

• Fili ʻiate ia pē, ʻi haʻane fakakaukauʻi lelei pe ʻe fakaongoongoleleiʻi pe ʻikai, ʻa e taha teu ʻosi takitaha. Kapau ʻoku ʻikai fakamoʻoni ha pīsope pe ko hano tokoni ʻi ha tohi fakaongoongolelei ʻa ha taha ako ke kau he ʻosí, he ʻikai leva ke kakato e tohi kolé pea he ʻikai ke fakalāngilangiʻi e taha akó ʻi he polokalama ʻosí.

• Fatongia ʻaki ke fakahā ki he kau tohi kole ʻosi mei he ʻinisititiutí ʻa e ʻuhinga ʻoku ʻikai fakaongoongoleleiʻi ai ʻa e taha akó.

• ʻAlu ki he polokalama ʻosí kapau ʻoku ʻi ai haʻane kau ako ʻe kau he fakaʻosi akó, ko e poupou ki he lavameʻa hono kāingalotú.

Fakaongoongolelei mei he Taki Fakalotú ki he ʻInisititiutí

Ko e talēkita ʻinisititiutí:

• Te ne fakapapauʻi ʻoku mahino ki he palesiteni fakasiteiki kotoa ʻa e fiemaʻu kae toki fai e fakaongoongolelei ʻa e taki fakalotú, kae lava ke kau ha taha ki he ʻosi mei he ʻinisititiutí.

Ko e palesiteni fakasiteikí pe ko ha taha naʻá ne vahe ki ai:

• Te ne fakapapauʻi ʻoku mahino foki ki he pīsope takitaha ʻa e fiemaʻu ko ʻení.

Ko e pīsopé pe ko ha taha ʻo hono ongo tokoní:

• Te ne talanoa mo e tokotaha teu ʻosi takitaha. ʻOku fakamahinoʻi ʻe he fakaongoongoleleiʻi ʻo ha taha ako ke kau he ʻosi mei he ʻinisititiutí, ʻoku mahino mo feinga ʻa e taha akó ke ne moʻui ʻaki e ngaahi tefitoʻi moʻoni mo e tokāteline ʻo e ongoongolelei ʻo Sīsū Kalaisí, naʻá ne ako ʻi he ʻinisititiutí, “pea mo fakapapauʻi ʻoku moʻui taau ʻa e kau akó mo nau tukupā ke moʻui ʻaki e ngaahi tuʻunga moʻui ʻoku fakamatalaʻi ʻi he Ki Hono Fakamālohia ʻo e Toʻu tupú pe tuʻunga moʻui tatau ki he kakai lalahi kei talavoú” (Tohi Tuʻutuʻuni Fakakātoá, 31.1.7).

• Lava ke fakaʻaongaʻi e ngaahi taimi-tēpile ʻinitaviu ʻo e kakai lalahi kei talavoú ko ha fakavaʻe ki hono fakaongoongoleleiʻi pe ʻikai fakaongoongoleleiʻi ha taha ke kau he ʻosí. ʻOku ʻikai fiemaʻu ia ke toe fai ha ʻinitaviu fakaongoongoleleiʻi kehe ʻa e taki fakalotu ʻo e kau teu ʻosi mei he ʻinisititiutí.

• Fili ʻiate ia pē, ʻi haʻane fakakaukauʻi lelei pe ʻe fakaongoongoleleiʻi pe ʻikai, ʻa e taha teu ʻosi takitaha. Kapau ʻoku ʻikai fakamoʻoni ha pīsope pe ko hano tokoni ʻi ha tohi fakaongoongolelei ʻa ha taha ako ke kau he ʻosí, he ʻikai leva ke kakato e tohi kolé pea he ʻikai ke fakalāngilangiʻi e taha akó ʻi he polokalama ʻosí.

• Fatongia ʻaki ke fakahā ki he kau tohi kole ʻosi mei he ʻinisititiutí ʻa e ʻuhinga ʻoku ʻikai fakaongoongoleleiʻi ai ʻa e taha akó.