Puleaina o le Potuaoga

O le faamoemoega o Seminare ma Inisitituti o Mataupu Faalelotu ua fautua mai ai ni manulauti taua se tolu o le aoao atu, lea e saili taitai ma faiaoga ia ausia ina ia mafai ai ona faataunuu le faamoemoega o Seminare ma Inisitituti o Mataupu Faalelotu:

1. Tatou te aoao atu i tagata aoga aoaoga faavae ma mataupu faavae o le talalelei o loo maua i tusitusiga paia ma upu a perofeta.

2. O nei aoaoga faavae ma mataupu faavae e aoao atu i se ala e tau atu ai i le malamalama ma le faagaeetiaina.

3. Tatou te fesoasoani i tagata aoga e faataunuu la latou matafaioi i le faagasologa o le aoaoina ma saunia ai i latou e aoao atu le talalelei i isi.

Ina ia fesoasoani e ausia nei sini, ua uunaia faapitoa lava ia faiaoga ma tagata aoga i le seminare ma le inisitituti ina ia faatino ia Mea Faavae o le Aoao Atu ma le Aoaoina Mai o le Talalelei.

O Mea Faavae o le Aoao Atu ma le Aoaoina Mai o le Talalelei

E tatau i faiaoga ma tagata aoga ona:

• Aoao atu ma aoao mai e ala i le Agaga.

• Atiina a’e se siosiomaga o le alofa, faaaloalo, ma le faamoemoe, e aoao ai.

• Suesue ia tusitusiga paia i aso taitasi ma faitau tusi mo le vasega.

• Malamalama i talaaga ma anotusi o tusitusiga paia ma upu a perofeta.

• Faailoa, malamalama, ma lagona le moni ma le taua o, ma faaaoga ia aoaoga faavae ma mataupu faavae o le talalelei.

• Faamalamalama, faasoa atu, ma molimau atu e uiga i aoaoga faavae ma mataupu faavae o le talalelei.

• Tauloto fuaitau o mau ma autu o aoaoga faavae.

O nei mataupu faavae, faiga masani, ma taunuuga e fesootai. A faaaogaina ma le poto ma faaogatusa o le tasi ma le isi, o le a saofaga nei manatu faavae autu i le tomai o tagata aoga e malamalama ai i mau ma aoaoga faavae ma mataupu faavae o loo i ai. O loo fautuaina ai foi tagata aoga ina ia faia se matafaioi mataalia i lo latou aoaoina o le talalelei ma faateleina le tomai o tagata aoga e ola ai i le talalelei ma aoao atu i isi.

Aoao Atu ma le Aoao Mai e ala i le Agaga

E tupu le aoao atu ma le aoaoina mai e ala i le mana o le Agaga Paia. E tupu le aoao atu ma le aoaoina mai e ala i le Agaga pe a faatinoina e le Agaga Paia Lana matafaioi po o faamoemoega faatasi ma le faiaoga, ma le tagata aoga, pe ma i laua uma. E na o le aoao atu ma le aoao mai e ala i le Agaga o le a malamalama ai tagata aoga ma faalagolago i aoaoga ma le Togiola a Iesu Keriso i se ala e mafai ai ona latou agavaa mo le ola e faavavau.

Sa faamamafa mai e Peresitene Henry B. Eyring le taua o le matafaioi a le Agaga Paia i le aoaoina faaleagaga ina ua ia aoao mai: “E le mafai e o tatou tagata aoga ona iloa le Atua, ma faapea ona alolofa ai e pei ona tatau ai ona latou alolofa atu, sei vagana ua aoaoina i latou e le Agaga Paia. E na o le Agaga e mafai ona latou iloa ai le tele o le alofa o le Atua ia i tatou ua auina mai ai Lona Alo e avea ma totogi o a tatou agasala ma o Iesu o le Alo o le Atua ma na totogi e Keriso le tau o a tatou agasala. E na’o le Agaga lava e mafai ai ona latou iloa o le Tama Faalelagi ma Lona Alo toetu ma faamamaluina na faaali ane ia Iosefa Samita. E na’o le Agaga lava e mafai ai ona latou iloa o le Tusi a Mamona o le afioga moni a le Atua. Ma e na’o musumusuga lava e mafai ai ona latou lagona le alofa o le Tama ma le Alo ia i latou, ua tuuina mai ai mo i tatou o sauniga talafeagai e maua ai le ola faavavau. E na o le mauaina o na molimau, teufatuina loloto i o latou loto e le Agaga Paia, o le a mafai ai ona faamauaaina i se faavae mautu e tutu mausali e ala i tofotofoga ma faigata i o latou olaga” (“To Know and to Love God” [address to CES religious educators, Feb. 26, 2010], 2).

O le lisi lenei o loo aofia ai nisi o matafaioi a le Agaga Paia ia e fitoitonu lava i Lana matafaioi i le aoao atu ma le aoaoina mai o le talalelei:

• E molimau mai o Ia i le Atua le Tama ma Lona Alo, o Iesu Keriso (tagai i le 1 Korinito 12:3; Eteru 12:41).

• Na te faagaeetiaina (siitia pe atia’e faaleagaga) le faiaoga atoa ma le tagata aoga (tagai i le 1 Korinito 14:12; Mataupu Faavae ma Feagaiga 50:22–23; 84:106).

• Na te foai mai ia “fua o le Agaga,” lea e aofia ai mea e pei o le olioli, alofa, filemu, onosai, ma le agamalu (tagai i le Kalatia 5:22–23; Roma 15:13; Mataupu Faavae ma Feagaiga 6:23; 11:12–13).

• Na te faamamanaina se tagata e tautala atu i le pule ma le lototele (tagai i le 1 Nifae 10:22; Alema 18:35; Moronae 8:16).

• Na te molimau mai i le moni a’ia’i o aoaoga faavae ma mataupu faavae (tagai i le Ioane 15:26; Mataupu Faavae ma Feagaiga 21:9; 100:8).

• Na te tuu maia le upumoni, iloa, malamalamaaga, malamalama, ma le faapupulaga (tagai i le Ioane 16:13; 1 Korinito 2:9–11, 14; Mataupu Faavae maFeagaiga 6:14; 11:13–14; 76:5–10, 116).

• Na te fesoasoani i faiaoga ma tagata aoga ia manatuaina ia manatu, manatu faavae, po o mataupu faavae (tagai i le Ioane 14:26).

• Na te musuia se tagata i le mea e tautala atu ai po o se mea e le tatau ona tautala atu ai (tagai i le Luka 12:11–12; 2 Nifae 32:7; Mataupu Faavae maFeagaiga 84:85; 100:5–6).

• Na te moliooina le upumoni i loto o tagata (tagai i le 2 Nifae 33:1).

• Na te faamalūlūina ia loto o tagata (tagai i le 1 Nifae 2:16; Alema 24:8).

• Na te tuu maia ia faamafanafanaga (tagai i le Ioane 14:26; Mataupu Faavae ma Feagaiga 88:3).

• Na te faapaiaina ma suia ia loto (tagai i le Mosaea 5:2; 3 Nifae 27:20; Moronae 6:4).

A malamalama [faiaoga] i le taua o le matafaioi e faatino e le Agaga Paia i le aoaoina faaleagaga, o le a [latou] faia mea uma latou te mafaia e valaaulia ai le Agaga e faataunuu nei galuega. Ina ia faia lenei mea, o le a taumafai faiaoga mo le agavaa patino. O le a latou ofoina atu le “tatalo o le faatuatua” (Mataupu Faavae ma Feagaiga 42:14) ma o le a saili ina ia saunia lelei mo lesona taitasi. O le a latou saili e taulai atu i aafiaga e aoao ai a latou tagata aoga ma ia to’amalie i o latou loto nai lo o le lagonaina o le lē fiafia ma le popole e uiga i isi mea. O le a latou faaalia se agaga o le fesili ma le lotomaualalo. O le a latou uunaia foi a latou tagata aoga e valaaulia le Agaga Paia i a latou aafiaga e aoao ai.

E mafai ona fesoasoani ia faiaoga ma tagata aoga e fatua’i se siosiomaga e siitia ai le lagonaina o le Agaga Paia e ala i le:

• Faia o faigalotu anoa.

• Faitauina ma le aoao atu mai tusitusiga paia ma upu a perofeta.

• Taulai atu i faataitaiga ma talanoaga e uiga i le Faaola ma le fefaasoaa’i o molimau e uiga ia te Ia.

• Tā’uaina faafaigofie ma manino ia aoaoga faavae ma mataupu faavae o le talalelei.

• Faaaluina o le taimi mo le mafaufau loloto i taimi o le filemu musuia.

• Fefaasoaai o aafiaga patino talafeagai ma femolimaua’i e uiga i aoaoga faavae ma mataupu faavae.

• Faaaogaina o musika musuia.

• Fefaaalia’i le alofa ma le agaga faafetai mo le tasi ma le isi ma mo le Alii.

“E matua taua lava se siosiomaga e le faanatinatia pe afai e te manaomia le mafuta o le Agaga o le Alii i lau vasega.”

(Jeffrey R. Holland, “Aoao Atu ma le Aoaoina Mai i totonu o le Ekalesia” [fonotaga faaleaoaoga a taitai i le lalolagi atoa, 10 Fep, 2007], Liahona, Iuni 2007, 91)

E mafai e faiaoga ona lagonaina le faaali atu pe leai foi o galuega a le Agaga i a latou vasega e ala i le iloiloina o fesili e pei o fesili nei:

• Pe o lagonaina e tagata aoga se faateleina o le alofa mo le Faaola, le talalelei, ma tusitusiga paia?

• Pe o malamalama lelei ia tagata aoga i mataupu faavae o loo aoaoina?

• Pe o faagaeetiaina ia tagata aoga ma pe o latou lagonaina ni musumusuga e faatino ai mataupu faavae ua latou aoaoina?

• Pe o faateleina le lotogatasi i le vasega?

• Pe o fefaaalia’i ma faamalosia ia molimau?

• Pe o naunau ma punouai ia tagata aoga i le faagasologa o le aoaoina?

• Pe o i ai se lagona o le “alofa, o le olioli, o le filemu, o le onosai, o le mataalofa, o le agalelei, o le faamaoni” (Kalatia 5:22) i le potuaoga?

E taua le manatua e leai se faiaoga, po o le a lava le talenia po o le faamaoni, e mafai ona faataunuuina galuega a le Agaga. E i ai taimi e taumafai ai faiaoga e gaosi se aafiaga faaleagaga. Na aoao mai Elder Boyd K. Packer: “E le mafai ona e faamalosia mea faaleagaga. … E le mafai ona e faamalosia le Agaga e tali mai pe faamalosia foi se pi e totogo a’e, po o se fuamoa e fofoa a o le’i oo i lona taimi. E mafai ona e fatuina se tau e faafailele ai le tuputupu a’e, faafailele, ma puipuia; ae e le mafai ona e faamalosia pe faamalosi: e tatau ona e faatalitali mo le tuputupu a’e” (“Candle of the Lord,” Ensign, Jan. 1983, 53).

O faiaoga o loo saili e aoao atu e ala i le Agaga e le tatau ona faalagolago tasi i lo latou atamai, agavaa faafaiaoga, po o uiga ae i le uunaiga a le Agaga Paia (tagai i le 2 Nifae 4:34). E tatau foi ona latou aloese mai le faaseseina o lagona po o le taumafai ma le iloa e tagi e fai ma faamaoniga o loo i ai le Agaga. Sa lapatai mai Peresitene Howard W. Hunter: “Ou te manatu afai tatou te le faaeteete e pei o … faiaoga o loo galulue i le potuaoga i aso uma, e mafai ona amata ona tatou taumafai e faasese le faatosinaga moni a le Agaga o le Alii e ala i auala le agavaa ma faaseseina. Ou te popole lava pe a foliga mai o lagona malolosi po o loimata e tafe saoloto e tutusa ma le i ai o le Agaga. E moni lava, e mafai e le Agaga o le Alii ona aumaia lagona malolosi, e aofia ai loimata, ae o le faaaliga i fafo e lē tatau ona fenumiai ma le i ai o le Agaga lava ia” (“Eternal Investments” [afiafi faatasi ma le Pulega Aoao, Fep. 10, 1989], 4).

E tatau ona faaeteete ia faiaoga i le faaaogaina o fasifuaitau e pei o le “Na tau mai e le Agaga ia te au e …” po o le “Na fetalai mai le Agaga e tatau ona ou. …” O le faia ma le faamoemoe i ai po o le le faamoemoeina foi, e mafai ai e nei fasifuaitau ona manatu i ai o se tulaga faasausili faaletagata lava ia ma e mafai ona faauigaina o se tulaga faateleina o le faaleagaga ma e ono oo atu ai i se faiga faamalosi faaleagaga. E masani lava ona lava mo faiaoga e galulue ai i uunaiga mai le Agaga e aunoa ma le faasilasila atu o loo latou faia.

Sa tuuina mai e Peresitene Henry B. Eyring lenei fautuaga: “O le tuuina atu i tagata aoga o aafiaga ma le Agaga e sili atu ona taua nai lo o le talanoa e uiga i ai. Ma tau lava o le iloa e eseese teisi aafiaga o tagata taitoatasi i le Agaga. … Ou te manatu e matuā patino lava ma o le a ou faaeteete teisi ai i le taumafai e fai atu ma le faapitoa tele. Ou te manatu o le aafiaga i ai … e mafai ona sili atu nai lo o le faapea mai pea, ‘O e lagonaina le Agaga?’ Ou te manatu e mafai ona tutupu ni faafitauli” (“Elder Richard G. Scott and Elder Henry B. Eyring Discussion” [CES satellite training broadcast, Aug. 2003], 8).

E tatau i faiaoga ona manatua o le aoao atu e ala i le Agaga e le aveesea ai lo latou tiutetauave mo sauniuniga maelega ma le magafagafa o lesona, e aofia ai le faaaogaina o le mataupu aoaoina ua tuuina atu. I se isi itu, o le aoao atu e ala i le Agaga e manaomia ai le sili atu nai lo o le na o le mulimuli i fautuaga uma o mataupu aoaoina e aunoa ma le tatalo, mafaufau, po o fetuunaiga talafeagai. E le gata i lea, e le tatau i faiaoga ona matua taulai atu i le mulimulitaia lelei o a latou otootoga o le lesona lea latou te le avanoa ai ma mulimuli i uunaiga mai le Agaga i le taimi o le vasega.

Atiina A’e se Siosiomaga e Aoao ai le Alofa, Faaaloalo, ma le Faamoemoega

Pe a alolofa ma faaaloalo ia faiaoga ma tagata aoga i le Alii, le tasi i le isi, ma le afioga a le Atua, o le a faaleleia le aoaoina. O se lagona fefaasoaai o le faamoemoega e taulai atu ai taumafaiga ma faamoemoega ma tuuina atu ai le taitaiga i le aafiaga i le potuaoga. O le faavaeina ma le atiina ae o se siosiomaga faapena o le alofa, faaaloalo, ma le faamoemoega o le tiutetauave lea o faiaoga ma tagata aoga ma valaaulia ai le uunaiga faagaeetia a le Agaga Paia.

Alofa ma Faaaloalo

O le alofa e faamaluluina ai loto ma valaaulia ai le uunaiga a le Agaga Paia. Pe a taumafai faiaoga e alolofa e pei ona alofa mai le Faaola, latou te vaai atu i isi e pei ona Ia silasila mai ia i latou. O le alofa faa-Keriso e musuia ai se faiaoga ia aua lava nei fiu e fesoasoani i alii ma tamaitai talavou taitoatasi ina ia liua moni. Na aoao mai Peresitene Dallin H. Oaks: “Pe a valaauina i tatou e aoao atu, e tatau ona tatou taliaina o tatou valaauga ma aoao atu ona o lo tatou alolofa mo le Atua le Tama Faavavau ma Lona Alo, o Iesu Keriso. E le gata i lea, e tatau i se faiaoga o le talalelei ona aoao atu i taimi uma ma le alofa mo tagata aoga. … O le alofa i le Atua ma le alofa i Ana fanau o le mafuaaga aupito maualuga lea mo le auaunaga. O i latou o e aoao atu ona o le alofa o le a faalauteleina o ni meafaigaluega i aao o Ia o loo latou auauna atu i ai” (“Aoaoina Atu o le Talalelei,” Liahona, Ian. 2000, 79).

O faiaoga ma tagata aoga o e alolofa i le Alii ma e iloa Lona alofa mo i latou e lagonaina se manao faamaoni ia latalata atu ia te Ia ma ia avea atili e faapei o Ia. Latou te faaaloalo ma migao i Lana afioga ma upu a Ana perofeta i auala e faaosofia ai i latou e suesue ma le filiga i tusitusiga paia, ia faaaoga mea ua latou aoaoina, ma faasoa atu mea ua latou aoaoina ma isi.

A iloa e tagata aoga e alofagia i latou ma faaaloalogia e lo latou faiaoga ma isi tagata aoga, o le a sili atu ona latou o mai i le vasega ua sauni e aoao. O le taliaina ma le alofa latou te lagonaina mai isi e mafai ona faamaluluina ai o latou loto, tuuitiitia ai le fefe, ma totō ai le manao ma le mautinoa e tatau ai e faasoa ai aafiaga ma lagona ma lo latou faiaoga ma isi tagata o le vasega.

E mafai e faiaoga ona faafaileleina ia lagona o le alofa ma le faaaloalo o tagata aoga mo le Alii e ala i le fesoasoani ia i latou ia malamalama i le Togiola, e ala i le aoaoina o i latou i lo latou natura paia ma le taua lē mafuatiaina i le Tama Faalelagi ma Lona Alo, ma e ala i le tautatala atu ma molimau atu e uiga ia i La’ua i se tulaga talafeagai ma faaaloalo.

E tatau i faiaoga ona atiina a’e le alofa ma le faaaloalo o loo ia i latou mo a latou tagata aoga. O le faia o lena mea o le a fesoasoani ia i latou e faasusulu atu ai le alofa mama o Keriso mo a latou tagata aoga ma fesoasoani ai ia i latou e aoao atu ma le onosai ma le agaalofa. E mafai e faiaoga ona aoao igoa o tagata aoga ma saili ia iloa mea latou te fiafia i ai, taleni, luitau, ma tomai. E mafai ona latou tatalo mo a latou tagata aoga, faatasi ma taitoatasi. E mafai e faiaoga ona faafeiloai patino atu i tagata aoga taitasi i le vasega ma tuu atu i tagata aoga uma se avanoa e auai ai. E tatau ona latou faalogologo toto’a a o fai mai e tagata aoga ni fesili pe faasoa mai o latou mafaufauga ma lagona. E le gata i lea, e mafai e faiaoga ona auai i faafiafiaga, tauvaga afeleti, po o isi gaoioiga o loo auai ai a latou tagata aoga. I a latou taumafaiga e alolofa i a latou tagata aoga, e le tatau i faiaoga ona taumafai e sui matua po o taitai perisitua pe avea foi ma ni fesoasoani patino i tagata aoga.

O le toatele o faiaoga o le a i ai tagata aoga i a latou vasega o e, i nisi tulaga, e tapulaa o latou tomai po o manaoga faapitoa faaletino pe faalemafaufau. O i latou foi o fanau a le Tama Faalelagi ma e manaomia le aoaoina o le talalelei e tusa lava po o a luitau patino po o tapulaa e oo i ai i le olaga nei. Sa aoao mai le Perofeta o Iosefa Samita, “O mafaufau ma agaga uma ua auina mai e le Atua i le lalolagi e mafai ona faatelēina” (Aoaoga a Peresitene o le Ekalesia: Iosefa Samita [2007], 210). E manaomia ona nofouta faiaoga i tagata aoga uma ma mafaufau i o latou manaoga taitoatasi ma gafatia a o latou saunia ma tuuina atu a latou lesona.

O se tasi o mea e sili ona aoga e mafai e faiaoga ona fai e atiina a’e ai le alofa faamaoni mo a latou tagata aoga o le sailia lea o le meaalofa o le alofa mama e ala i le tatalo faamaoni. Sa apoapoai mai le perofeta o Mamona: “O le mea lea, ou uso pele e, ia outou tatalo atu i le Tama ma le malosi atoa o le loto, ina ia faatumulia outou i lenei alofa, lea ua ia faaee mai i luga o i latou uma o e o soo moni o Lona Alo o Iesu Keriso” (Moronae 7:48).

“Afai ou te tautala i gagana a tagata atoa ma agelu, a e leai so’u alofa, ua avea a’u ma apa memea taalili, po o se sumepalo tagitagi.

Afai foi o ia te au ona perofeta ane, ma le iloa o mea lilo uma, ma le poto uma lava; afai foi o ia te au le faatuatua uma e aveese ai mauga, a e leai so’u alofa, ou te le aoga lava.”

(1 Korinito 13:1–2)

Atiina a’e se Lagona o le Faamoemoe

O se lagona o le faamoemoe e fefaasoaa’i e le faiaoga ma le tagata aoga e mafai ona faateleina ai le faatuatua ma tuu atu ai le taitaiga ma le uiga i le aafiaga o le potuaoga. E tatau i tagata aoga ona malamalama o loo latou auai i le vasega ina ia o latou iloa le Tama Faalelagi ma Lona Alo, o Iesu Keriso, ma ia agai ai i le ola e faavavau e ala i le suesue i tusitusiga paia ma upu a perofeta. E tatau ona latou talitonu e ala i le faalatalata atu i le Alii i se uiga faaalia o le ole atu ma le tatalo, e mafai ai ona aoaoina ma faagaeetiaina i latou e le Agaga Paia. A o faagasolo e faiaoga ma tagata aoga le suesueina o tusitusiga paia ma le faamoemoe e aoao e ala i le Agaga ma mai le tasi ma le isi, latou te atiina a’e se siosiomaga e valaaulia ai faaaliga.

E mafai e faiaoga ona uunaia se lagona o le faamoemoe i le potuaoga e ala i le faia o mea nei:

• Ia faamoemoe mo tagata aoga e faataunuu lo latou matafaioi o ni tagata aoao. O loo i ai se lagona o le faamoemoe i se vasega lea e faamoemoe ai faiaoga i tagata aoga e faataunuu la latou matafaioi o ni tagata aoao ma fesoasoani ia i latou i le faia o lea mea, ma lea e faatuatuaina ai tagata aoga e saofaga i ni auala taua. O faiaoga e i ai se lagona o se faamoemoe, pe a alolofa moni i a latou tagata aoga, o le a latou popole tele i lo latou alualu i luma ma le manuia e faamalieina ai i le na o sina taumafaiga itiiti. O na faiaoga o le a uunaia ma le alofa ma o le a siitia a latou tagata aoga ina ia ausia o latou gafatia o ni tagata aoao ma ni soo o Iesu Keriso.

• Ia faamaoni, agalelei, ma mataala e uiga i tusitusiga paia ma le talalelei. E masani lava ona i ai i tagata aoga se manao sili atu e aoao ma le faamoemoe pe a latou lagonaina le naunautaiga o lo latou faiaoga ma le faatuatua i anomea o loo talanoaina.

• Saunia ni lesona faagaeetia. Pe a o mai ia faiaoga i le vasega ma se lesona ua saunia lelei ma faagaeetiaina ma lagona le talitonuina o le taitaiga na taialaina ai i latou e fai, o le a latou faailoa maia se lagona o le faamoemoe lea e faigofie ona iloa e tagata aoga.

• Saunia anomea ma masini e manaomia. E tatau ona taunuu muamua atu faiaoga i o latou potuaoga nai lo o tagata aoga e saunia soo se anomea ma masini talafeagai. O lenei mea e maua ai le avanoa mo le faiaoga e faafeiloai ai tagata aoga taitasi a o latou taunuu mai. E tatau i tagata aoga ona taumafai ia vave oo i le vasega ma ia i ai uma anomea talafeagai e aoao ai—e pei o tusitusiga paia, penitala maka, ma api talaaga—i a latou kesi pe a amata le vasega.

• Aua le faamaimauina le taimi. A amata le vasega i le taimi sa’o ma pe a iloa e tagata aoga e leai se taimi e maimaua, o le a latou lagonaina se lagona o le faamoemoe.

• Faatulaga ni faiga masani i le vasega O le faatulagaina o faiga masani mo gaoioiga a le vasega e masani ona tā’ua soo, e aumaia ai se lagona o le faatulagaga tatau ma le faamoemoe. O faiga masani a le vasega e uunaia ai le auai mai tagata aoga taitasi ma fesoasoani i faiaoga ma tagata aoga ina ia sili atu ona lelei i le faaaogaina o taimi taua o le vasega. O faiga masani e mafai ona faavaeina mo gaoioiga e pei o le mauaina ma le tuueseina o tusitusiga paia ma anomea e aoao ai, faatulagaina ma saunia faigalotu faagaeetia, ma le tufatufaina atu ma le aoina mai o pepa ma anomea. O le faia o faasilasilaga, tusifaamaumauina o le auai o tagata aoga, siakiina o galuega atofaina, ma le faatautaia o isi pisinisi e sili atu ona faia a o lei amataina le faigalotu ma le lesona.

Fautuaga Faaopoopo mo le Atia’eina o se Siosiomaga Talafeagai mo le Aoaoina

E faaopoopo atu i le alofa, faaaloalo, ma le faamoemoe, o se faatulagaga lelei o le aoaoina o le talalelei e aofia ai foi le faatulagaina lelei, migao, ma se lagona o le filemu. Sa aoao mai Peresitene Boyd K. Packer e faapea “e faigofie ona oo mai musumusuga i ni nofoaga toafilemu” ma “o le faaaloalo e valaauliaina faaaliga” (“O Le Faaaloalo Na Te Valaaulia Faaaliga,” Liahona, Ian. 1992, 21–22). O nisi nei o fautuaga faaopoopo e mafai ona faaaoga e faiaoga e faavae ai ma faatumauina se siosiomaga e siitia ai le aoaoina o le talalelei.

Faatulaga le faatulagaga faaletino mo le aoaoina.

O siosiomaga faaletino e mafai ona i ai se faatosinaga i aafiaga o tagata aoga i le aoaoina o le talalelei. E tatau i faiaoga ona faia mea uma latou te mafaia e saunia ai le potuaoga ina ia lagona ai e tagata aoga le lagolelei ma mafai ai ona taulai atu i le lesona. O nisi o iloiloga e ono aofia ai:

Nofoaga. Sei vagana ai i ni tulaga e lē masani ai, e tatau i tagata aoga uma ona i ai se nofoaga lagolelei e nonofo ai, o se nofoaga mo a latou tusitusiga paia ma anomea mo suesuega, ma se nofoaga e tusitusi ai. O le faatulagaga o nofoa e tatau ona faigofie ai ona vaai tagata aoga i le faiaoga ma soo se punaoa vaaia e faaaoga e le faiaoga. I nofoaga e mafai ai, e mafai ona faaaoga faatulagaga eseese o nofoa e lagolago ai ituaiga eseese o gaoioiga e aoao ai. O le i ai o nofoa atofaina e mafai ona fesoasoani i faiaoga e aoao vave ai igoa o tagata aoga, faatulaga le vasega mo galuega a vaega toalaiti po o gaoioiga o le atamai i aoaoga faavae, ma tuueseese tagata aoga o e matele ina talanoa i le tasi ma le isi i le taimi o le vasega. E tatau i faiaoga ona nofouta i tagata aoga o e atonu e i ai ni faafitauli i le feosofai po o le vaai e ala i le faia o ni fetuunaiga e uunaia ai lo latou auai i le vasega.

Mea faalavefau. E tatau i faiaoga ona taumafai e aveese soo se faalavefau e mafai ona faalavelave i le faagasologa o le aoao atu ma le aoaoina mai. Afai e fai le aoaoga i se fale o le aiga, atonu e i ai ni luitau faapitoa, ae e oo lava i lena faatulagaga e mafai e se faiaoga ona faaitiitia le faalavelave i le fuafuaina ma le faaeteete.

Foliga vaaia o le potuaoga. O ata e faatatau i le talalelei, ata tusi, pepa lautele o i ai sāvali, ma isi faaaliga e masani ona faaleleia ai le nofoaga e aoao ai. O se potuaoga e manaia, mama, ma faatulagaina lelei e uunaia ai foi le migao ma faafaileleina ai se siosiomaga e talafeagai ma le faatosinaga a le Agaga.

Foliga vaaia o le faiaoga. O le a sili atu ona iloaina ma le fiafia e tagata aoga le taua o le aafiaga faaleaoaoga pe a tauagafau ma talafeagai ia laei ma foliga o le faiaoga ma atagia mai ai le natura paia o le sāvali o le talalelei.

Valaaulia le Agaga e ala i faigalotu anoa.

E tatau ona amata le vasega i se faigalotu puupuu. O se faigalotu e mafai ona avea o se ala sili ona lelei e faalotogatasi ai tagata aoga e ala i le liliu atu o o latou mafaufauga ma loto i mea faaleagaga. E mafai ona fesoasoani i faiaoga ma tagata aoga e lagonaina le Agaga ma saunia e aoao. O se faigalotu e masani lava e aofia ai se viiga, se tatalo, ma se mafaufauga [faaleagaga] mai i tusitusiga paia. E sili ona anoa pe a faasoa mai e tagata aoga ni lagona ma malamalamaaga sa latou oo i ai i a latou suesuega patino o tusitusiga paia, ma pe a latou molimau atu. O faigalotu uumi pe auiliili e le gata ina alu ai le taimi mai le lesona, ae e ono mafua moni ai ona aluese le Agaga. O faigalotu e aofia ai le tufaina atu o taumafa māmā e toetoe moni lava faalauiloa atu ai se lagona manatu māmā ma faataalo nai lo o se lagona faaleagaga. E tatau i faiaoga ona faaalu se taimi e talanoa ai ma tagata aoga, aemaise lava taitai o vasega, e uiga i le faamoemoega o faigalotu, o mea e mafai ona latou faia ina ia lelei atili ai, ma pe mafai faapefea ona latou uunaia tagata uma ia auai.

Talanoa i mataupu faavae o le aoaoina faaleagaga.

I le amataga o le tausaga, e mafai e faiaoga ona faaaofia ai tagata aoga i le talanoaina po o a tulaga e uunaia ai le aoaoina faaleagaga (tagai 1 Korinito 2:10–11; Mataupu Faavae ma Feagaiga 50:17–22; 88:121–26). O nei talanoaga e mafai ona taulai atu i amioga ia e valaaulia ai le Agaga o le Alii ia faatasi ma i latou i le aoaoina o le talalelei faapea foi i amioga e mafua ai ona aluese le Agaga. E tatau i faiaoga ma tagata aoga ona uunaia e le tasi le isi i se tulaga faifai pea e faaaoga ai mea na latou malilie i ai o le a valaaulia ai le Agaga. O na taumafaiga e mafai ona fesoasoani i tagata aoga ma faiaoga ia malamalama ma faataunuu le matafaioi latou te faia i le valaauliaina o le Agaga i le faagasologa o le aoaoina.

Filifili ma le toto’a ia gaoioiga e aoao ai.

E tatau ona nofouta faiaoga o gaoioiga eseese e aoao ai e uunaia ai faalogona eseese ma uiga faaalia i tagata aoga. Mo se faataitaiga, ina ua uma ona taitaia se taaloga o ni faatonuga leotetele i le amataga o lana vasega, sa le fiafia se tasi o faiaoga ina ua le mafai ona ia ausia se faaiuga faaleagaga sili atu i le lesona. Sa iloa e se isi faiaoga na faateteleina ona faafitauli o le amio le pulea ina ua ia tufaina atu ni taumafa māmā i le taimi o le vasega.

Ia gauai atu i amioga a tagata aoga, ma tali atu i ai ma le talafeagai.

Ia nofouta faiaoga i mea e tulai mai i le taimi o le lesona ma tali atu i ai i se ala talafeagai. Afai e foliga mai ua lelavava pe ua vaivai tagata aoga, atonu ona e le o faaaofiaina i latou i le lesona, pe ona latou te le o malamalama i le mea o loo aoaoina atu pe faapefea foi ona faatatau ia i latou. Ina ia fesoasoani i tagata aoga ia taulai atu, atonu e manaomia ona fetuunaia e le faiaoga se mea i le tuuina atu o le lesona. Afai o faatinoina e tagata aoga ni auala lē talafeagai ma mafua ai ona aluese le Agaga mai le vasega, e manaomia e le faiaoga ona sailia musumusuga i le taulimaina o le faafitauli nai lo o le lē amanaiaina. E tatau foi i faiaoga ona vaavaai mo tagata aoga o ē e le o fegalegaleai ma isi tagata aoga po o ē e foliga mai ua tuuatoatasi. Atonu e manaomia e nei tagata aoga se gauai patino faaopoopo mai le faiaoga pe mai isi tagata aoga i le vasega. I tulaga faapea, e mafai e faiaoga ona talanoa i mātua ma taitai perisitua e filimaoti ai pe o i ai ni mafuaaga po o ni tuutuuga autu e tatau ona latou nofouta i ai.

Ia faasa’o se amio lē pulea pe lē talafeagai.

O loo i ai nisi o mataupu faavae lautele ia manatua o le a fesoasoani i se faiaoga e valaaulia ai le faatulagaga tatau ma le faaaloalo i le potuaoga. O le i ai o le faatulagaga e le faapea o le i ai o se sāō atoa, e le faapea foi e le mafai ona fiafia ma malie se vasega. Ae o se tagata aoga po o se vaega o tagata aoga e ulavavale pe le faaaloalo e mafai ona i ai se aafiaga le lelei i le faagasologa o le aoaoina ma faalavelave ai i le faatosinaga a le Agaga Paia.

Pe a le faalogo se tagata aoga po o se vaega o tagata aoga, e mafai ona lē fiafia ai le faiaoga ma isi tagata aoga. I taimi faapena, e faapitoa lava le taua mo faiaoga ona pulea o latou lagona ma saili le tosinaga a le Agaga. O le ala e tali atu ai faiaoga i soo se mea e tupu atonu e sili atu ona taua nai lo o le mea na tupu ma e mafai ona faateleina pe faaitiitia ai le faaaloalo ma le faatuatuaga o tagata aoga. A o faasa’o e faiaoga se amioga lē talafeagai, e manaomia ona latou mausali ae agalelei, fea, ma manatu alofa ona toe vave foi lea i le lesona. O le tauemuina faalauaitele o se tagata aoga e mafai ona faasa’o ai se amio a se tagata aoga mo se taimi ae o le a le faagaeetia ai le faiaoga po o le tagata aoga. E ono taunuu i le fefefe o isi tagata aoga po o le le faatuatuaina o le faiaoga. E tatau i faiaoga ona manatua le faatosinaga amiotonu o le faatauanau, tali-tiga, agamaualalo, agamalu, alofa faamaoni, ma le agalelei (tagai i le Mataupu Faavae ma Feagaiga 121:41–42).

“Aua lava nei avea le foiaina o se faafitauli ma mea sili atu ona taua nai lo o se tagata e tatau ona alofaina.”

(Thomas S. Monson, “Mauaina o le Olioli i le Faigamalaga,” Liahona, Nov. 2008, 86)

O loo i ai nisi o laasaga fitoitonu e mafai ona faia e faiaoga e taulima ai faafitauli pe a tulai mai. O auala nei e mafai ona faia e aoai ai faafitauli ia atonu e le tutusa le auala e aoga ai i tagata aoga uma po o tulaga:

• Ia vaai sa’o i mata. E masani ona talanoa le vasega i le tasi ma le isi i taimi le talafeagai ona latou te manatu o le a le matauina e le faiaoga. E mafai e le faiaoga ona autilo i tagata aoga ma tilotilo puupuu atu i mata ina ia latou iloa ai o loo nofouta le faiaoga i le mea o loo tupu.

• Taofi le tautala. Afai o talanoa tagata aoga a o tatau ona latou faalogo, e mafai e le faiaoga ona taofi le tautala, tusa lava po o le ogatotonu o le fuaiupu pe a manaomia. O le sii o le leo e talanoa ai ia i latou o le a lē masani ona foia ai le faafitauli.

• Faalatalata atu i ai. O se isi faatinoga e mafai ona fai e le faiaoga e faasa’o ai amioga e aunoa ma le faafetauia sa’o o se tagata aoga o le savali atu lea ma tu i talane o le tagata aoga amio lē pulea. E mafai e le faiaoga ona faaauau pea le lesona, ae e masani lava ona lagona e le tagata aoga le i ai o le faiaoga ma taofi le mea o loo ia faia.

• Fai sa’o i ai se fesili. E aunoa ma le tosina atu i le amioga lē talafeagai, e mafai e se faiaoga ona fai atu i le tagata aoga o loo faatiga se fesili e faatatau i le lesona. E le faia lenei mea e faamaasiasi ai le tagata aoga, ae ia fesoasoani e toe aumai ai o ia i le talanoaga.

Atonu e i ai taimi e lē tali mai ai tagata aoga i nei taumafaiga e lē tuusao ma faaauau pea ona faalavelave i le vasega. O nisi nei o laasaga faaopoopo, ma tuusa’o atu e mafai e se faiaoga ona faia ina ia faatumauina ai le maopoopo:

• Feutagai faalilolilo ma le tagata aoga. Na fetalai mai le Alii afai e faatiga se tasi i se isi, e tatau i le tagata na faatiga ona talanoa ma le tagata solitulafono “tau lava o ia ma oe” (Mataupu Faavae ma Feagaiga 42:88). E mafai e le faiaoga ona fefautuaai ma le tagata aoga e uiga i le mafuaaga ua le fiafia ai o ia ma faailoa atu ia te ia e tatau ona suia le amio pe o le a faia loa ni isi laasaga faaopoopo. E tatau i faiaoga ona mautinoa ua latou iloa le eseesega o amioga a tagata aoga mai lo latou taua faaletagata lava ia. E taua mo faiaoga le manatuaina faapea “ua tele lava le taua o agaga i le silafaga a le Atua” (Mataupu Faavae ma feagaiga 18:10). E tatau ona latou fesootai atu i le tagata aoga e ui e le taliaina amioga le lelei, ae e faatauaina lava o ia. E tatau i faiaoga ona manatua e mulimuli i le fautuaga a le Alii ma faaali atu “pe a mavae, o se alofa faateleina ia te ia o lē na e aoaiina” (Mataupu Faavae ma Feagaiga 121:43).

• Tuueseese ia tagata aoga ia e mafua ai le pisapisaō.

• Feutagai ma mātua po o taitai perisitua. Afai e faaauau pea amioga e lē taliaina, e tele lava ina aogā mo le faiaoga le feutagai ma mātua o le tagata aoga. E tele taimi e mafai ai e mātua ona tuuina mai ni malamalamaaga faaopoopo ma ni manatu o le a fesoasoani e faasa’o ai le popolega. I nisi tulaga, e mafai e le epikopo a le tagata aoga ona fesoasoani.

• Faate’aese le tagata aoga mai le vasega. Na tuuina mai e Peresitene David O. McKay le fautuaga lenei i faiaoga: “Afai e toilalo [au taumafaiga], ona mafai lea ona e faia se talosaga i mātua, ma e mafai ona e faapea atu: ‘Afai e faaauau pea lana amio sese, o le a tatou tuueseina o ia mai le tauvalaauga.’ O se faatinoga ogaoga lena. Soo se faiaoga lava e mafai ona faate’aeseina se [tagata aoga]; e tatau ona e faatinoa uma isi au punaoa ae e te le’i oo i lena mea. Ae o le faatulagaga e tatau ona tatou maua!—e tatau ai mo le tuputupu a’e o le agaga, ma afai e musu se [tagata aoga] se toatasi, pe afai foi e mumusu ni [tagata aoga] se toalua e faaali mai lena elemene, ona tatau lea ona latou o ese. E sili atu le matelaina o se [tagata aoga] se toatasi nai lo le onana faifaimalie o le vasega atoa” (“Guidance of a Human Soul—The Teacher’s Greatest Responsibility,” Instructor, Sept. 1965, 343).

A o lei fai atu i se tagata aoga e tuua le vasega mo soo se taimi umi lava, e tatau i le faiaoga ona fefautuaai ma mātua, supavaisa o le seminare ma le inisitituti, ma taitai perisitua talafeagai. I ia tulaga e taua ai le fesoasoani o le faiaoga i tagata aoga ma mātua ia malamalama o loo filifili le tagata aoga e tuua le seminare e ala i le lē filifili e amio i se amioga e taliaina. O le faalavefau lea e lē taliaina, ae le o le tagata aoga. A filifili o ia e sui, o le a talia le tagata aoga e toe foi i le vasega.

“Afai e le tali mai na [tamaiti aoga], masalo e le mafai ona e aoaoina nei i latou, ae e mafai ona e alofa ia i latou. Ma afai foi e te alofa ia i latou i le asō, atonu e mafai ona e aoao atu i latou a taeao.

(Jeffrey R. Holland, “Teaching and Learning in the Church,” 102)

Suesue i Tusitusiga Paia i Aso Taitasi ma Faitau Anotusi mo le Kosi

Suesue i Tusitusiga Paia i Aso Taitasi

O suesuega faaletagata lava ia o tusitusiga paia i aso taitasi e maua ai se avanoa faifai pea mo faiaoga ma tagata aoga e aoao ai le talalelei, atiina a’e molimau, ma lagona le siufofoga o le Alii. O loo ta’ua e le Alii i le Mataupu Faavae ma Feagaiga, “Ua tuuina atu … tusitusiga paia mai ia te a’u mo lo ou[tou] aoaoga” (Mataupu Faavae ma Feagaiga 33:16). Na aoao mai le perofeta o Nifae e faapea o i latou o e “fetaomi atu i luma, ma taumamafa fiafia i le afioga a Keriso, ma tumau e oo i le iuga, … o le a outou maua le ola e faavavau” (2 Nifae 31:20) ma “o afioga a Keriso o le a ta’u mai ai ia te outou mea uma e tatau ona outou faia” (2 Nifae 32:3).

Ua faamamafa mai e perofeta o Aso e Gata Ai le taua o le suesueina o tusitusiga paia i aso uma. Na lapatai mai Peresitene Harold B. Lee, “Afai tatou te le o faitauina tusitusiga paia i aso taitasi, o lona uiga o loo faaitiitia a tatou molimau, o le a le faateleina le loloto o lo tatou faaleagaga” (Aoaoga a Peresitene o le Ekalesia: Harold B. Lee [2000], 66). Na aoao mai foi Peresitene Howard W. Hunter, “E mautinoa lava o le tagata e suesue i tusitusiga paia i aso uma, na te ausia ni mea e sili atu nai lo le tagata e tuuto atu se taimi tele o se aso se tasi ona tuu foi laia o aso e o, ona faatoa toe faaauau ai lea” (Reading the Scriptures,” Ensign, Nov. 1979, 64).

Sa augani mai Elder Richard G. Scott: “Faamolemole ia faamumu se fiafia i tusitusiga paia i le mafaufau ma le loto o talavou faapelepele taitasi. Fesoasoani e faamumu i totonu o talavou taitasi lena afi mumu e le masuia e faaosofia ai i latou o e ua lagonaina ma se manao ia iloa e le aunoa le afioga a le Alii, ia malamalama i ana aoaoga, ia faaaoga, ma faasoa atu i isi. …

“Muamua, savavali faatasi ma au tagata aoga i lea laasaga ma lea laasaga i le tele o fuaitau o le afioga paia a le Alii. Fesoasoani ia latou lagonaina lou naunautai, faaaloalo, ma le alofa mo tusitusiga paia.

“Lua, fesoasoani ia i latou ia faitau, mafaufau loloto, ma tatalo i le mea lilo e iloa ai le mana ma le filemu lea e tafe mai tusitusiga paia” (“Four Fundamentals for Those Who Teach and Inspire Youth” [CES symposium on the Old Testament, 14 Aok., 1987], 5).

“A o lei mafai ona e faamalosia au tagata aoga, e taua lou suesueina o aoaoga faavae o le malo ma aoao le talalelei e ala i mea uma o le suesue ma le faatuatua.”

(Ezra Taft Benson, “The Gospel Teacher and His Message” [address to CES religious educators, 17 Sete., 1976], 3)

E i ai nai mea e mafai ona faia e faiaoga o le a i ai se aafiaga sili ona mamana ma tumau i olaga o latou tagata aoao nai lo le fesoasoani e aoao ia fiafia i tusitusiga paia ma suesue i ai i aso uma. E masani ona amata lenei mea a o faia e faiaoga se faataitaiga o le suesueina o tusitusiga paia i aso taitasi i o latou lava olaga. O le auai i suesuega anoa o tusitusiga paia faaletagata lava ia i aso uma e faaagavaaina ai faiaoga e tuuina atu a latou lava molimau i a latou tagata aoga i le taua o tusitusiga paia i o latou lava olaga. O lena molimau e mafai ona avea ma se auala taua e fesoasoani ai i tagata aoga ia tuuto atu i le suesueina e le aunoa o tusitusiga paia e i latou lava.

E tatau i faiaoga ona aoao atu e le aunoa i tagata aoga ia aoaoga faavae ma mataupu faavae i tua atu o suesuega faaletagata lava ia o tusitusiga paia i aso taitasi. E mafai foi e faiaoga ona uunaia tagata aoga taitasi e faataatia ese se taimi i aso uma mo suesuega faaletagata lava ia o tusitusiga paia; fesoasoani i tagata aoga ia tali atu mo a latou suesuega i aso taitasi e ala i le faaaogaina o se faiga talafeagai e tulitatao ai lea e fuaina ai a latou faatinoga; ma tuu atu i tagata aoga ni avanoa masani i le vasega e fefaasoaai ai i le tasi ma le isi nisi o mea o loo latou aoaoina ma lagonaina i a latou suesuega faaletagata lava ia o tusitusiga paia. A’o uunaia e faiaoga le suesueina o tusitusiga paia i aso taitasi, ia faaeteete ina ia lē faamaasiasia pe faalotovaivaia soo se tagata aoga o lē atonu o loo tauivi i le suesue na o ia latou lava i tusitusiga paia.

“Ia teu i o outou mafaufau e le aunoa afioga o le ola.”

(Mataupu Faavae ma Feagaiga 84:85)

O tagata aoga e le lelei le faitau po o isi manaoga faapitoa e aoao ai e tatau ona tuu atu i ai le filifiliga e suesue ai tusitusiga paia i se faatulagaga e ono talafeagai lelei mo o latou manaoga, e pei o le leo, Gagana Fai Faitaga FaaAmerika, po o le Braille (Gagana Patupatu). O le toatele o tagata aoga e faigata ona faitau, e manuia mai le mulimuli ai i le itulau na lolomiina a o faitau leotele e se isi tagata.

Tomai ma metotia o le suesueina o tusitusiga paia

Ina ia fesoasoani i tagata aoga ia faamanuiaina i a latou suesuega faaletagata lava ia o tusitusiga paia, e mafai e faiaoga ona fesoasoani ia i latou i le atiina a’e ma le faaaogaina o tomai ma metotia eseese o le suesueina o tusitusiga paia. O tomai ma metotia uma nei, faapea foi ma isi e le o talanoaina i lenei tusitaulima, e tatau ona taitai atu i le fesoasoani i tagata aoga e aoao e ala i le Agaga, malamalama i tusitusiga paia, ma iloa ma faaaoga aoaoga faavae ma mataupu faavae o le talalelei i o latou olaga.

Faaaoga fesoasoaniga mo le suesueina o tusitusiga paia. Ua saunia e le Ekalesia se seti tele o fesoasoaniga e suesue ai tusitusiga paia ma o loo aofia ai i tusitusiga faavae mo nisi gagana. (O le Taiala i Tusitusiga Paia o se vaega o fesoasoaniga mo suesuega ua saunia mo isi gagana.) O nei fesoasoaniga e aofia ai mea e pei o vaefaamatalaga, ulutala o mataupu, faasino autu, le Bible Dictionary, ma faafanua. O nisi na o fesoasoani e sili ona taua e mafai e faiaoga ma tagata aoga ona faaaoga pe a suesue i tusitusiga paia. E mafai e faiaoga ona fesoasoani i a latou tagata aoga ia faamasani i nei fesoasoaniga mo suesuega ma punaoa e ala i le faaaogaina talafeagai i le taimi o le vasega. Ua faia foi e le Ekalesia isi punaoa aoga mo suesuega o loo maua i luga o le initoneti.

Faailoga ma faamatalaga. O le tasi o auala sili ona aogā mo faiaoga ma tagata aoga e taofimau ai mea latou te aoaoina, e ala lea i le faailogaina ma le tusia o faamatalaga i tusitusiga paia. O le faailoga o lona uiga ia atofa, faailoga, vaetofia, pe gauai atu i ai. E mafai ona faia lenei mea e ala i le vaseina, valivaliina, po o le otootoina o upu autu po o fuaitau i tusitusiga paia. O le tusia o faamatalaga o lona uiga o le faaopoopo i ai o ni faaupuga e faamalamalama ai faamatalaga ma manatu. O faataitaiga o faamatalaga faatusi paia e mafai ona aofia ai le tusia o uunaiga patino, faamatalaga faaperofeta, mau fefaasinoa’i, faauigaga o upu, po o malamalamaaga na maua mai manatu faaalia o tagata o le vasega i autafa o fuaitau patino o mau.

O le makaina ma le tusia o faamatalaga i mau e mafai ona fesoasoani i tagata aoga ma faiaoga ia:

• Faigofie ai ona manatuaina ma sue ia upu taua, fasifuaitau, manatu, upumoni, tagata, ma mea na tutupu.

• Faamanino ma iloa ai le uiga o mau faatusitusiga paia.

• Faasaoina ai ia malamalamaaga patino na maua atoa ai ma mea na maua mai isi.

• Saunia e aoao atu le talalelei i isi.

E mafai e faiaoga ona uunaia tagata aoga e faailoga mau i le fai atu o se mea faapenei, “A o tou suesue i nei fuaiupu, ou te valaaulia outou e maka se mataupu faavae autu e te tau i ai”, po o le “O se mau faasino taua lenei. Atonu e te manao e tusi i autafa o au tusitusiga paia. E sili atu ona lelei le aoao atu, faailoa mai, ma faatino elemene autu o le makaina o mau, nai loo le aoao atu o se faiga faapitoa o le makaina o tusitusiga paia.

Mafaufau Loloto. O le mafaufau loloto o lona uiga o le manatunatu loloto pe mafaufau loloto i se mea, ma e masani ona aofia ai le tatalo. A o aoao tagata aoga e mafaufau loloto i le taimi o a latou suesuega faaletagata lava ia o tusitusiga paia, o le a masani ona faaali mai e le Agaga upumoni ia i latou ma fesoasoani ia latou iloa le ala e mafai ai ona latou avea atili e faapei o Iesu Keriso.

Ina ua uma ona aoao atu sa Nifaē, sa ta’u atu e le Faaola ia i latou, “Mafaufau i mea na ou fai atu ai” (3 Nifae 17:3). O se tasi auala e fesoasoani ai i tagata aoga e auai faaleagaga i le lesona ma uunaia i latou e faaaoga ma faalolotoina lo latou malamalama i mea o loo latou aoaoina o le tuu atu lea ia i latou o se taimi i le vasega e mafaufau loloto ai e uiga i mea ua latou aoaoina. I taimi na, e tatau i faiaoga ona fautuaina tagata aoga e fesili mo se taitaiga mai le Alii.

“Valaaulia [au tamaiti aoga] e faitau lemu ma faaeteete faatasi ai ma ni fesili i le mafaufau. Fesoasoani ia latou mafaufau, iloilo upu, ma maa taua uma faatusitusiga paia. Aoao latou e suesue mae’ae’a, tagai ma iloa le aano ma le uiga o i ai. O isi tamaiti, i se aso patino ma se manaoga patino, o sea suesuega e ono maua ai se oa natia: se penina tautele; e le mafaatauina.”

(Jeffrey R. Holland, “Students Need Teachers to Guide Them” [CES satellite broadcast, 20 Iuni, 1992], 4)

Fai fesili. O le aoao e fai fesili ma saili mo tali a o latou suesue i tusitusiga paia o se tasi lea o tomai sili ona taua mo le suesueina o tusitusiga paia e mafai ona atiina a’e e tamaiti aoga. O le faia o fesili, e mafai ai ona taitai atu tagata aoga i se malamalama sili atu i le talaaga ma le anotusi o tusitusiga paia, faapea ai foi ma le mauaina ma le malamalama i aoaoga faavae taua ma mataupu faavae o le talalelei. E mafai e tagata aoga ona aoao e fai fesili o le a taitai atu ai i latou ia lagonaina le moni ma le taua o mea o loo latou suesueina ma iloa ai pe faapefea ona faaaoga mea ua latou aoaoina.

Faauiga upu ma fasifuaitau faigata. O tusi lolomifefiloi, tusi lesona a tagata aoga, vaefaamatalaga, ma fesoasoaniga mo le suesueina o tusitusiga paia, e masani ona fesoasoani i tagata aoga e malamalama ai i upu ma fasifuaitau faigata.

Vaai faalemafaufau. E mafai ona vaai faalemafaufau a o vaai tagata aoga i o latou mafaufau i le mea sa tupu i le tala faatusi paia. Mo se faataitaiga, e mafai ona mafaufau tagata aoga o loo savali Peteru i luga o le vai agai i le Faaola (tagai Mataio 14:28–29), po o Sataraka, Mesako, ma Apeteniko ua lafoina i totonu o le ogaumu aasa (tagai Tanielu 3:19–25). E mafai ona fesoasoani le vaai faalemafaufau e atili ai ona moni ma olaola le tala faatusi paia mo tagata aoga.

Faatatau tusitusiga paia. O le faatatau o tusitusiga paia o le faatusatusa lea i le olaga o le tagata lava ia. E mafai ona fesili tagata aoga, “O a ni vaega ma ni tulaga i lo‘u olaga e pei o vaega ma tulaga i lenei fuaitau o tusitusiga paia?” po o le “E faapefea ona ou pei o tagata o loo tatou aoaoina i tusitusiga paia?” A o vaai atu tagata aoga i mea e tutusa ai o latou lava aafiaga ma i latou na faamatala mai i tusitusiga paia, o le a sili atu ona mafai ona latou faailoa mai aoaoga faavae ma mataupu faavae o le talalelei. E mafai foi ona latou vaai pe mafai faapefea ona faaaoga nei mataupu faavae i ni tulaga talitutusa i o latou lava olaga.

Mau fefaasinoa’i. O se mau fefaasinoa’i o se mau faasino faaopoopo e mafai ona tuuina mai ai ni faamatalaga faaopoopo ma malamalamaaga e uiga i le fuaitau o loo suesueina. O le fefaasinoa’i o mau, pe “faafesootai” o le fesootai o mau ia e fesoasoani e malamalama ai tagata aoga i se fuaitau o se mau po o se aoaoga po o se mataupu faavae. E mafai ona e maua mau faasino i vaefaamatalaga ma isi fesoasoaniga mo suesuega, i tusi lesona a le faiaoga ma le tagata aoga, ma i lauga o konafesi aoao. E mafai foi e faiaoga ma tagata aoga ona maua mau fesootai talafeagai i a latou lava suesuega.

Faatusatusa ma le faaeseesega. O se fuaitau o tusitusiga paia po o se aoaoga faavae po o se mataupu faavae e masani ona faamaninoina pe a faatusatusa ma se isi mea. Matauina o mea e tutusa po o eseesega i le va o aoaoga, tagata, po o mea e tutupu e mafai ona aumaia ai upumoni o le talalelei i se taulaiga e sili atu. Mo se faataitaiga, o le faatusatusaina o le nofoaiga a le Tupu o Peniamina i le nofoaiga a le Tupu o Noa e mafai ai e tagata aoga ona vaai manino i faamanuiaga o se taitai amiotonu e faasaga i taunuuga faataumaoi o se taitai amioleaga. O le faatusatusaina o olaga, aoaoga, ma molimau a Iakopo ma Alema i filosofia ma olaga o Serema ma Korioa e mafai ona fesoasoani i tamaiti aoga ia faigofie atili ai ona iloa filosofia sese i le lalolagi i aso nei ma vaai pe faapefea ona faafetauia i latou. O le faatusatusaina o malaga eseese i laueleele o folafolaga na faia e le fanauga a Isaraelu, Liae ma lona aiga, ma sa Iareto e mafai ona aoao atu ai mataupu faavae e fesoasoani i faiaoga ma tagata aoga i a latou lava malaga i le olaga.

Fai ni lisi. O se lisi o mau o se fesootaiga o le faagasologa o mafaufauga, manatu, po o ni faatonuga. O le vaavaai mo lisi i tusitusiga paia e mafai ona fesoasoani ai i faiaoga ma tagata aoga e faailoa manatu autu o loo faamamafa e le tusitala. Mo se faataitaiga, o Tulafono e Sefulu o se lisi (tagai Esoto 20). O Faaamuia e mafai ona vaaia o se lisi (tagai Mataio 5:3–12; 3 Nifae 12:3–11). O leMataupu Faavae ma Feagaiga 4 o loo i ai se lisi o agavaa o i latou o e ua valaauina e auauna atu i le Alii.

Vaavaai mo fesootaiga, mamanu ma autu. E mafai ona uunaia tagata aoga e vaavaai mo fesootaiga, mamanu, ma autu a o latou suesue i tusitusiga paia. Na saunoa Elder David A. Bednar “O lesailiga i faaaliga mo fesootaiga, mamanu, ma autu e fausia i luga ma faaopoopo i lo tatou malamalama faaleagaga … ; na te faalauteleina la tatou vaaiga ma le malamalama i le ata o le faaolataga” (“A Reservoir of Living Water” [CES fireside for young adults, 4 Feb, 2007], 2).

O le a masani ona faaaoga e faiaoga ma tagata aoga le tele o nei tomai ma metotia i le vasega i le aluga o le tausaga. A o latou faia, e mafai e faiaoga i nisi taimi ona taofi ma talanoa puupuu ma a latou tagata aoga i le metotia po o le tomai o loo faaaogaina ma uunaia i latou e faaaoga i a latou suesuega faaletagata lava ia.

Faitau le Anotusi mo le Kosi

O tusitusiga faavae uma—o le Feagaiga Tuai ma le Feagaiga Fou, o le Tusi a Mamona, o le Mataupu Faavae ma Feagaiga, ma le Penina Tau Tele—o ni tusitusiga musuia o loo i ai aoaoga faavae ma mataupu faavae o le talalelei. Latou te faaalia ia galuega a le Atua i tagata ma aoao mai e uiga i le Togiola a Iesu Keriso. E taua mo tagata taitoatasi, ma i se tulaga aoao e maua ai se malamalamaaga sili atu i le talalelei ma le ata o le faaolataga na saunia e lo tatou Tama i le Lagi.

E tatau i tagata aoga ma faiaoga ona faitau ma suesue le tusi atoa o tusitusiga paia lea e o faatasi ma kosi taitasi o suesuega (vagana ai le tuusaunoaga i vaega filifilia o le Feagaiga Tuai, e pei ona ta’ua ai i le mataupu aoaoina).

“I gasologa o tausaga na musuia ai e le Tama i le Lagi ni alii ma ni tamaitai filifilia e saili, e ala i le taitaiga a le Agaga Paia, ni tali i faafitauli sili ona faigata o le olaga. Na Ia musuia na auauna faamaonia e faamaumau na tali e fai ma se ituaiga o tusitaulima mo i latou o Ana fanau e faatuatua i Lana fuafuaga o le fiafia ma i Lona Alo Pele, o Iesu Keriso. E mafai ona tatou maua lenei taitaiga i soo se taimi e ala i oa ua tatou ta’ua o tusitusiga faavae—o lona uiga, o le Feagaiga Tuai ma le Feagaiga Fou, le Tusi a Mamona, le Mataupu Faavae ma Feagaiga, ma le Penina Tau Tele.”

(Richard G. Scott, “O Le Mana o Tusitusiga Paia,” Liahona, Nov. 2011, 6)

Malamalama i le Talaaga ma Anotusi o Tusitusiga Paia ma Upu a Perofeta

O le malamalama i le talaaga ma le anotusi o tusitusiga paia ma upu a perofeta e saunia ai faiaoga ma tagata aoga ia iloa sāvali a tusitala musuia. O le talaaga ma le anotusi ua faamanino ma faapupula mai ai aoaoga faavae ma mataupu faavae o le talalelei o loo tusia i aafiaga ma aoaoga a isi. E ui o le tele o mea o loo mulimuli mai o loo talanoaina ai le malamalama patino i le talaaga ma le anotusi o tusitusiga paia, ae o le tele lava o mataupu faavae ma manatu e tasi e mafai ona faaaoga i se suesuega o upu ma sāvali a perofeta o aso e gata ai.

Talaaga

O le talaaga (1) o fuaitau ia o mau lea e muamua atu pe mulimuli mai i se fuaiupu po o se soloaiga o ni fuaiupu po o le (2) o tulaga o loo siomia ai pe o loo maua ai le talaaga i se fuaitau patino o mau, se mea na tupu, po o se tala.

O le matalalaga o se auala e malamalama ai i le anotusi o mau. O loo aumaia ai faamatalaga o le talaaga e faamanino ai ma aumaia ai se malamalama loloto i tala, aoaoga, aoaoga faavae, ma mataupu faavae i le anotusi faatusi paia. Sa tusia e tusitala taitasi o tusitusiga paia a o taitaia o ia e le Agaga Paia, ae sa faaofuina tusitusiga i ata ma aganuu a le tusitala. Ina ia malamalama i a latou tusitusiga, e tatau i faiaoga ma tagata aoga ona “laa atu faalemafaufau i lo latou lalolagi” i le telē e mafai ai ona vaai i mea e pei ona vaai i ai le tusitala. O nisi nei o faataitaiga o ituaiga eseese o talaaga.

“Ia faamasani i lesona e aoao mai i tusitusiga paia. Aoao ia iloa le talaaga ma le siosiomaga o faataoto a le Matai ma apoapoaiga a perofeta. Suesue i ai e pei o loo latou talanoa mai ia te oe, auā o le mea moni lava lena.”

Thomas S. Monson, “Ia Avea Ma Tagata Sili E Mafai Ona Avea Ai Oe,” Liahona, Me 2009, 68)

Nofoaga faasolopito. O le iloaina sa i ai Iosefa Samita i le Falepuipui o Liperate i le taimi na ia mauaina ai ma tusia ia vaega 121, 122, ma le123 o le Mataupu Faavae ma Feagaiga ua maua ai se isi uiga ma se mana faaopoopo i aoaoga faavae ma mataupu faavae o loo aoaoina mai i na vaega e faatatau i na mea e pei o faigata ma le faaaogaina o le mana ma le pule.

Faatulagaga faaleaganuu. O le iloaina o le talaaga o aso o le tausamiga ma aso malolo o Isaraelu anamua e mafai ona faamanino ai le ala latou te fesootai ai faafaatusa i le Faaola ma Lana misiona. O le nofouta i le afuaga o Samaria ma lagona o tagata Iutaia e uiga ia i latou i le taimi o Keriso ua faamalamalamaina ai le faataoto i le Samaria Agalelei ma faalolotoina ai le uiga o le fetaiaiga a le Faaola ma le fafine i le vaieli i Samaria.

O le fesili po o le tulaga na uunaia ai le faataoto, mea na tupu, aoaoga faavae, po o le mataupu faavae. O le malamalama o le Mataupu Faavae ma Feagaiga 9 na oo mai o se tali i le lē mafai e Oliva Kaotui ona faaliliu ua faamanino ai mataupu faavae e faatatau i faaaliga na aoaoina i lena vaega.

“Ua ia te au se ki ou te malamalama ai i tusitusiga paia. Ou te fesili atu, o le a le fesili lea na maua mai ai le tali … ?”

(Joseph Smith, i le History of the Church, 5:261)

O ai o loo talanoa ia te ai ma pe aisea. O le aoaoga a Alema e uiga i le Togiola, Toetu, Faamasinoga, alofa mutimutivale, ma le faamasinotonu ua maua ai se uiga loloto atu pe a tatou iloa o le talaaga o na aoaoga o se asiasiga i lona atalii o Korianetona, o lē na popole i taunuuga o agasala matuia na ia solia.

Faatulagaga faafaafanua. O le iloaina o le faafanua o Kanana ua faalolotoina ai lo tatou malamalama i nofoaga na nofoia e Lota ma Aperaamo, o le auala na aafia ai ia filifiliga na la faia, ma le auala na aafia ai o la aiga i nei filifiliga.

O tusitusiga paia, o fesoasoaniga mo suesuega i tusitusiga paia, ma le mataupu aoaoina e masani ona i ai le anoanoai o faamatalaga o le talaaga e fesoasoani ai i faiaoga ma tagata aoga ia malamalamai le anotusi o tusitusiga paia.

Anotusi

O le anotusi o le tala, tagata, mea na tutupu, o lauga ma faamalamalamaga musuia lea e aofia i le tusiga faatusi paia. O le anotusi e tuuina mai le ola ma le taua i aoaoga faavae ma mataupu faavae o loo maua i le poloka o mau. Mo se faataitaiga, o le tala ia Nifae i le mauaina o papatusi apamemea o loo aoao mai ai le mataupu faavae faapea o le faatuatua i le Alii ma le faalogo i le Agaga e mafai ona fesoasoani i tagata taitoatasi e faatoilalo ai mea e foliga mai o ni luitau e lē mafai ona faatoilaloina. O le malamalama i mea na tutupu i le Esoto ua faamanino mai ai o le faalagolago i le Alii ma le mulimuli i se perofeta e mafai ona taitai atu ai tagata ma malo ia maua faamanuiaga folafolaina ae o na faamanuiaga ua taofia pe a muimui tagata ma lē usiusitai.

O le iloaina o tagata o loo faamatalaina i tusitusiga paia e mafai ona musuia ma uunaia tagata aoga e faafetaia’ia luitau o loo latou feagai ai ma ia ola ma le faatuatua. E pei ona folafola mai Elder Richard G. Scott e uiga i le Tusi a Mamona:

“I le va o ona faavaa o le a e maua ai le faauoga ma le faataitaiga agavaa a Nifae, Iakopo, Enosa, Peniamina, Alema, Amona, Helamana, Mamona, Moronae, ma le toatele o isi. O le a latou toe faamumuina le lototele ma faailoga le ala i le faatuatua ma le usiusitai. …

“A o le mea e sili atu ona taua, o i latou uma, e aunoa ma se tuusaunoaga, o le a siitiaina la outou vaai mamao i le uo atoatoa—lo tatou Faaola ma le Togiola, o Iesu le Keriso” (“O Uo Moni e Siitia,” Liahona, Ian. 1989, 77).

O lauga ua faasaosaoina ma le faaeteete i tusitusiga paia, o se tasi lea o vaega taua tele o le anotusi. Mo se tagata aoga o loo tauivi ma le agasala, o lauga a Paulo po o Alema le Itiiti e mafai ona avea ma punavai o le faamoemoe ma le faamalosiauga. O le lauga mulimuli a le Tupu o Peniamina i lona nuu ua aoao mai ai ma le atamai le mana ma le taua o le Faaola ma Lana Togiola ma faamanino ai le uiga o le auauna atu, o faamanuiaga o le usiusitai, ma le taua o le aapa atu ia i latou o e lē tagolima. O se tagata aoga o loo taumafai e avea ma se soo o Iesu Keriso e mafai ona maua se malamalamaaga e ala i le suesue ma saili e faaaoga upu a le Faaola i le Lauga i luga o le Mauga.

O se vaega o le iloaina o le anotusi e aofia ai le aoaoina o le uiga o upu ma fuaitau faigata e faapea foi faauigaga o faataoto, faatusa, ma isi. Mo se faataitaiga, o le iloaina o le uiga o upu e pei o le faasao (Mataio 5:13) po o le pipii atu (Mataupu Faavae ma Feagaiga 11:19; 45:48) ma fasifuaitau e pei o le “fusi i o outou sulugatiti” (Mataupu Faavae ma Feagaiga 75:22), ma le “ete tupe ma le taga” (tagai Luka 10:4) e fesoasoani e faamanino ai le anotusi o tusitusiga paia. O mataupu faavae o loo aoaoina i faataoto a le Faaola e faigofie ona malamalama i ai pe a oo ina iloa le uiga faafaatusa o mea e pei o le penina tau tele (tagai Mataio 13:45–46), o le saito ma le titania (tagai Mataio 13:24–30), ma le mamoe na leiloa (tagai Luka 15:4–7) ua faailoa mai.

Faatasi ai ma faamatalaga uma e mafai ona aoaoina ma aoao atu, e tatau i faiaoga ona faaaoga le poto i le fuafuaina po o le a le telē o le taimi tonu e tuuto atu i le talaaga ma le anotusi ma le telē o le taimi e faaalu e suesue ai aoaoga faavae ma mataupu faavae o le talalelei. E tatau i faiaoga ona tuuina atu ia lava le talaaga ma le anotusi e fesoasoani ai i tagata aoga ia malamalama i upumoni e faavavau o loo maua i anotusi faatusipaia, ae aua le soona faamamafaina na talaaga ma faamatalaga auiliili i le tulaga e avea ai i latou ma totonugalemu o le lesona.

Faailoa, Malamalama, ma Lagona le Moni ma le Taua o, ma Faaaoga ia Aoaoga Faavae ma Mataupu Faavae o le Talalelei

O le faailoaina ma le malamalama i aoaoga faavae ma mataupu faavae o le talalelei e fesoasoani i faiaoga ma tagata aoga e faaaoga tusitusiga paia ma upu a perofeta i o latou lava olaga ma taialaina i latou i le faia o faaiuga. O le lagonaina o le moni, taua, ma le faanatinati o aoaoga faavae ma mataupu faavae o le talalelei e masani ona taitai atu ai i se manao faateleina e faaaoga mea ua aoaoina. O le ola ai i mataupu faavae o le talalelei e aumaia ai faamanuiaga folafolaina, e loloto ai le malamalama ma le liua, ma fesoasoani ai i faiaoga ma tagata aoga e avea atili e pei o le Faaola.

O se aoaoga faavae o se vaega autu taua, o se upumoni e lē masuia o le talalelei a Iesu Keriso. O ia upumoni e pei o le ua i ai i le Tama Faalelagi se tino o aano ma ivi, e taua le papatisoga ina ia ulufale atu ai i le malo o le Atua, ma le o le a toetutu uma tagata o ni faataitaiga ia o aoaoga faavae.

O se mataupu faavae o se upumoni tumau po o se tulafono e mafai ona tatou faaaogaina e taiala ai i tatou i le faia o faaiuga. O mataupu faavae o le talalelei e lautele ma e fesoasoani i tagata e faaaoga aoaoga faavae o le talalelei i o latou olaga i aso uma. Na aoao mai Elder Richard G. Scott, “O mataupu faavae o le upumoni ua taulai i ai, ua afifiina mo le faaaogaina” (“Mauaina o le Malamalama Faaleagaga,” Liahona, Nov. 1993, 86). O lona uiga o se mataupu faavae o le talalelei e masani ona fautuaina mai ai faatinoga faapea foi taunuuga o loo mulimuli mai. Mo se faataitaiga: o le tatalo e le aunoa e mafai ona fesoasoani ia i tatou e faatoilalo ai faaosoosoga (tagai Mataupu Faavae ma Feagaiga 10:5), ma le afai tatou te mulimuli i uunaiga a le Agaga Paia, o le a Ia fesoasoani ia i tatou e faataunuu mea ua poloaiina e le Alii (tagai 1 Nifae 4).

E i ai taimi, o le eseesega i le va o se aoaoga faavae ma se mataupu faavae e mafai ona faigata ona iloatino. Sa faasoa mai e Elder Henry B. Eyring mea nei: “O le a ou le faaaluina le tele o taimi, e taumafai ai e iloa le eseesega i le va o se mataupu faavae ma se aoaoga faavae. Ua ou faalogo i talanoaga o lena ituaiga sa lei fua tele mai” (“Training Guidelines and Resources: Elder Richard G. Scott and Elder Henry B. Eyring Discussion,” [Aug. 2003 CES satellite training broadcast], 10).

Faailoaina o Aoaoga Faavae ma Mataupu Faavae

O se tasi o faamoemoega autu o tusitusiga paia o le aoao atu lea o aoaoga faavae ma mataupu faavae o le talalelei. Sa faamalamalama mai e Peresitene Marion G. Romney e faapea: “E le mafai e se tasi ona suesue faamaoni tusitusiga paia e aunoa ma le aoaoina o mataupu faavae o le talalelei ona o tusitusiga paia na tusia e faasaoina mataupu faavae mo lo tatou manuia” (“The Message of the Old Testament” [CES Symposium on the Old Testament, 17 Aok., 1979], 3). Na aoao mai Elder Boyd K. Packer: “O [mataupu faavae] o loo maua i tusitusiga paia. O aano ia ma le faamoemoega mo faaaliga” (“Principles,” Ensign, Mar. 1985, 8). I lenei tisipenisione, ua poloaiina ai e le Alii faiaoga ma taitai i Lana Ekalesia e aoao atu mataupu faavae o le talalelei e pei ona maua i tusitusiga paia: “O lenei foi, ia aoao atu e toeaina, ositaulaga ma aoao o lenei ekalesia, mataupu autu o la’u talalelei, ua i ai i totonu o le Tusi Paia ma le Tusi a Mamona, ua i ai le atoatoaga o le talalelei” (Mataupu Faavae ma Feagaiga 42:12).

O le aoaoina o le auala e faailoa ai aoaoga faavae ma mataupu faavae o le talalelei o loo maua i tusitusiga paia, e manaomia ai taumafaiga ma faiga faamasani magafagafa. I le saunoa ai i lenei taumafaiga, na fai mai ai Elder Richard G. Scott: “Saili mo mataupu faavae. Ia tuueseese ma le faaeteete mataupu faavae mai faamatalaga ua faaaogaina e faamalamalama ai” (“Mauaina o le Malamalama Faaleagaga,” 86).

O nisi taimi i le vasega, o aoaoga faavae ma mataupu faavae o le a faailoa mai e le faiaoga. O nisi taimi o le a taiala e le faiaoga, faamalosiau, ma tuu atu i tagata aoga e saili ia latou mauaina mo i latou lava. E tatau ona fesoasoani ma le maelega faiaoga i tagata aoga ia maua le tomai e faailoa mai ai aoaoga faavae ma mataupu faavae e i latou lava.

O nisi aoaoga faavae ma mataupu faavae o le talalelei e faigofie ona iloa ona o loo ta‘ua sa’o mai lava i tusitusiga paia. O na mataupu faavae ua ta’ua e tele ina faatomua i fuaitau e pei o le “ua faapea ona tatou vaai ai,” “o lea,” “o le mea lea,” po o le “faauta,” e ta’u mai ai atonu o loo aoteleina e le tusitala o tusitusiga paia lana sāvali po o tusia foi se faaiuga.

Mo se faataitaiga, fai mai le Helamana 3:27 , “Ua faapea ona mafai ona tatou vaai ai e alofa mutimutivale le Alii ia te i latou uma o e e valaau atu i lona suafa paia, ma le faamaoni o o latou loto.”

O loo taua i leAlema 12:10 e faapea, “Ma o lea, o ia o lē e faamaaa lona loto, o ia lava lea na te maua le vaega itiiti o ana afioga; ae o ia o lē e lē faamaaaina lona loto, o ia lea e tuuina mai i ai le vaega tele o ana afioga.”

O loo aoao mai leEfeso 6:13 , “O le mea lea ia outou tago ai i ofutau atoatoa mai le Atua, ina ia outou mafaia ona tetee atu pe a oo i le aso vale, pe a uma ona outou faia o mea uma, tou te tutumau ai lava.”

O loo aofia i leAlema 41:10 le, “Faauta, Ou te fai atu ia te oe, e lei avea lava le amioleaga ma fiafia.”

E tele mataupu faavae e lē o ta’ua tuusa’o mai i tusitusiga paia, ae nai lo o lena e tau faaataata mai. O mataupu faavae ua faa’ataata mai e mafai ona maua mai i se tusi atoa o mau, se mataupu, po o se fuaiupu se tasi ma e mafai ona faamauina i le faasologa o tala faatusi paia, mea na tutupu, po o faataoto. O le faailoaina o mataupu faavae ua faa’ataata mai e aofia ai le iloaina o upumoni o loo faapupula mai i se tala faatusipaia ma ta’u manino mai ma faapuupuu. O lenei mea e masani ona manaomia ai le taimi ma le mafaufau toto’a. Na aoao mai Elder Richard G. Scott e faapea, “E aoga ai se taumafaiga tele e faatulaga le upumoni ua tatou maua i ni faamatalaga faigofie o mataupu faavae” (“Mauaina o le Malamalama Faaleagaga,” 86).

O mataupu faavae o tau faa’ataata mai e masani ona iloa e ala i le vaavaai mo sootaga o mafuaaga-ma-aafiaga i totonu o poloka o mau. E ala i le iloiloina o faatinoga, uiga, ma amioga [mafuaaga] a tagata taitoatasi po o vaega i tala faaletusitusiga paia, ma faailoaina ia faamanuiaga po o taunuuga ia e oo mai ona o se taui [aafiaga], o le a tele ai ina iloagofie ia mataupu faavae o le talalelei

O mataupu faavae o tau faa’ataata mai e mafai foi ona faailoaina e ala i le faia o fesili e pei o le:

• O le a le uiga po o le aano o le tala?

• Aisea e te manatu na faaaofia ai e le tusitala nei mea na tutupu po o fuaitau?

• O le a se mea na faamoemoe le tusitala tatou te aoaoina?

• O a nisi o upumoni autu o loo aoaoina mai i lenei fuaitau?

O nisi o faataitaiga o mataupu faavae tau faa’ataata mai e aofia ai:

Mai mea na tutupu i olaga o Alema le Itiiti po o Paulo: O se tagata ua taliaina le upumoni ma salamo i ana agasala e mafai ona taitai atu ai isi i faamanuiaga o le talalelei (tagai i le Alema 36:10–21; Galuega 9:4–20).

Mai le faataoto i taupou e toasefulu: Afai tatou te saunia ma le faamaoni i tatou lava faaleagaga, o le a saunia i tatou pe a afio mai le Alii; po o leo i latou e faatamala i a latou sauniuniga faaleagaga o le a le taliaina e le Alii i Lona afio mai (tagai i le Mataio 25:1–13).

Mai le tala ia Tavita ma Koliata: Pe a tatou galulue ma le lototetele ma le faatuatua i le Atua, e mafai ona tatou faatoilaloina ia luitau tetele i o tatou olaga (tagai i le 1 Samuelu 17:40–51).

O nisi o auala e fesoasoani ai i tagata aoga e aoao ia iloaina ia mataupu faavae ma aoaoga faavae o le:

• Valaaulia ia tagata aoga e tusi le manatu faavae ua latou aoaoina i se faamatalaga faalesootaga o le “afai-ona”.

• Tofi ni tagata aoga e tusi ni faamatalaga o le “ma ona mafai ai lea ona tatou vaai ai” e aotele ai ia upumoni ua latou aoaoina.

• Tuu atu i tagata aoga e faailoa ia faatinoga sa faia e tagata i totonu o le poloka o mau ma saili mo faamanuiaga po o taunuuga na oo i ai.

• Uunaia ia tagata aoga e vase ia upu po o fasifuaitau autu i a latou tusitusiga paia o loo faailoa ai ia faamatalaga faalemataupu faavae ma faaleaoaoga faavae.

• Tusi se aoaoga faavae po o se mataupu faavae mai le poloka mau i luga o le laupapa. Fai i tagata aoga e saili le poloka, ma vaavaai mo faamaoniga o lena mataupu faavae.

A o faailoa mai aoaoga faavae ma mataupu faavae, e taua le ta’ua manino ma le faafaigofie o le faamatalaina. “Afai e ao ona iloa e tagata le upumoni, e ao ona faaupuina, ma o le sili atu o le manino ma le atoatoa o le faamatalaga, o le lelei atu foi lena o le avanoa o le Aaga Paia e molimau atu ai i agaga o tagata e moni le galuega” [New Witnesses for God, 3 vol. [1909], 2:vii, upusii i le James E. Faust,O Mea ou te Manao ia Iloa e Lou Atalii, ao Lei Tuua mo Lana Misiona,” Liahona, Me, 1996,41; Talai La’u Talalelei [2004], 182).

O le tusia o se mataupu faavae po o se aoaoga faavae ua faailoaina i luga o le laupapa, po o le valaaulia o tagata aoga e tusi pe vase lalo i a latou tusitusiga paia, o se tasi lea o ala e fesoasoani ai e faamanino nei upumoni i mafaufau o tagata o le vasega.

Malamalama i Aoaoga Faavae ma Mataupu Faavae

Ina ia malamalama i se aoaoga faavae po o se mataupu faavae o le talalelei o lona uiga ua malamalama lelei tagata aoga i upumoni ua faailoa mai, o lo latou sootaga i isi mataupu faavae ma aoaoga faavae i le fuafuaga a le Alii, ma po o a ni tulaga e ono faaaoga ai le mataupu faavae i o latou olaga. A malamalama se faiaoga po o se tagata aoga i se aoaoga faavae po o se mataupu faavae, e le gata ina latou iloa po o a uiga o upu ae pe mafai faapefea foi i se aoaoga faavae po o se mataupu faavae ona aafia ai o latou olaga. A iloa loa se aoaoga faavae po o se mataupu faavae ma malamalama i ai, e mafai ona vave faaaogaina.

E mafai e faiaoga ma tagata aoga ona faateleina lo latou malamalama i aoaoga faavae ma mataupu faavae o le talalelei e ala i le suesueina o tusitusiga paia mo aoaoga fesootai ma malamalamaaga faaopoopo, e ala i le liliu atu i upu ma aoaoga a perofeta ma aposetolo o aso e gata ai, e ala i le faamalamalamaina atu i isi o upumoni o le talalelei ua latou aoaoina, e ala i le tatalo mo le fesoasoani a le Agaga Paia. O le malamalama e faaauau pea ona faalolotoina a o faaaogaina ia mataupu faavae.

E mafai ona fesoasoani faiaoga i tagata aoga ia malamalama atili i aoaoga faavae ma mataupu faavae, e ala i le faia o fesili e uunaia ai tagata aoga e iloilo o latou uiga. Mo se faataitaiga, mai le tala i le autau talavou e 2,000 i le Tusi a Mamona, e mafai ona tatou aoaoina le mataupu faavae faapeaafai tatou te le masalosalo, o le a laveai i tatou e le Atua (tagai i le Alema 56:47–48). Ina ia maua se malamalama sili atu i le uiga o lenei mataupu faavae, e mafai e faiaoga ma tagata aoga ona mafaufau i fesili e pei o:

• O le a le mea sa lē masalosalo ai le autau talavou?

• O le a se faamaoniga o i ai e faapea e le i masalosalo nei autau talavou?

• Sa faapefea ona lavea’i e le Atua le autau talavou?

• O a nisi o “taua” o loo tauina e le autalavou o le Ekalesia i aso nei?

• O a nisi o auala e mafai ona lavea’i ai e le Atua i latou mai na taua?

• O le a se mea o aoao mai e le aafiaga o Apinati, Iosefa Samita, po o Sataraka, Mesako, ma Apeteniko ia i tatou e uiga i le laveaiina?

Mai le tala ia Naamanu ma Elisaia i le Feagaiga Tuai, e mafai ona tatou aoaoina le mataupu faavae e faapea afai tatou te lotomaualalo ma naunau e mulimuli i le fautuaga a le perofeta, e mafai ona faamaloloina i tatou (tagai i le 2 Tupu 5:1–14). Ina ia malamalama i le uiga o lenei mataupu faavae, e mafai e faiaoga ma tagata aoga ona mafaufau i fesili e pei o:

• E faapefea ona fesoasoani le lotomaualalo ia i tatou e mulimuli ai i le fautuaga a le perofeta?

• E faapefea e le naunautai mulimuli ane o Naamanu e “tofu faafitu” ona fesoasoani ia i tatou e malamalama ai i le uiga o le mulimuli faamaoni i le fautuaga a le perofeta?

• O a ni mea e ese mai gasegase faaletino atonu tatou te manaomia ona faamaloloina ai i le taimi nei?

• O a nisi o mea ua talosagaina i tatou e perofeta e fai ia o le a faamaloloina ai i tatou faaleagaga ae atonu e leai so latou uiga i le lalolagi?

Lagona le Moni ma le Taua o Aoaoga Faavae ma Mataupu Faavae

E ui atonu e faailoa mai ma malamalama tagata aoga i mataupu faavae ma aoaoga faavae o le talalelei, ae o le a lē mafai ona latou faaaogaina seia vagana ua latou lagonaina lo latou moni ma le taua e ala i le Agaga ma maua se lagona o le faanatinati e faaaoga le mataupu faavae i o latou lava olaga. Na faamalamalama mai e Elder Robert D. Hales , “O se faiaoga moni, afai loa ua na aoaoina atu mea moni [o le talalelei ] … , ua na aveina atu tagata aoga i se laasaga sili atu ia mauaina se molimau faaleagaga ma le malamalamaaga i o latou loto lea na te aumaia le galueaiina ma le faia” (“Teaching by Faith” [saunoaga i faiaoga o aoaoga faalelotu CES, Fep.1, 2002], 5).

“O lo tatou aoao atu o le talalelei e tatau ona faamamafa ai, e faapei e lei faia lava muamua, le moni, le tatau ai, ma le faanatinati o le talalelei toefuataiina a Iesu Keriso. O nei faamoemoega e tolu o le aoao atu e matua taua aua o lo latou malosi o le a faanatinati ai le liua atoatoa.”

(Neal A. Maxwell, “Those Seedling Saints Who Sit before You” [CES symposium on the Old Testament, Auk. 19, 1983], 2)

E mafai e le Agaga Paia ona uunaia mafaufau ma loto o tagata aoga i le taua o se aoaoga faavae po o se mataupu faavae ma e mafai ona tuuina atu i tagata aoga se manao e faatino le mataupu faavae ma le malosi e faia ai. E tatau i faiaoga ona faia taumafaiga uma e faafaigofie ai lenei aafiaga mo tagata aoga taitasi i a latou vasega. Sa uunaia e Elder Richard G. Scott ia faiaoga, “Pe o le a outou tatalo ea mo le taitaiga i le auala e magoto ifo ai le upumoni i mafaufau ma loto o au tagata aoga ina ia faaaogaina i le olaga atoa? A o e saili ma le agaga tatalo i auala e faia ai lena mea, ou te iloa o le a taialaina oe e le Alii” (“To Understand and Live Truth,” [evening with a General Authority, Fep. 4, 2005], 2).

O se tasi o auala sili ona aoga e fesoasoani ai i tagata aoga e valaaulia le uunaiga a le Agaga i o latou loto ma saunia i latou e faatino le mataupu faavae ua latou aoaoina o le uunaia lea o i latou e mafaufau i aafiaga patino e faatatau i lena mataupu faavae (tagai i le vaega 5.1.3, “O Fesili e Valaaulia ai Lagona ma le Molimau” le itulau e 61). E fesoasoani lenei mea i tagata aoga e iloa ai le taua o le mataupu faavae i o latou olaga po o olaga o isi. Mo se faataitaiga, a uma se talanoaga e uiga i le tulafono o le sefuluai, atonu e fesili faiaoga, “O a faamanuiaga ua e vaaia i lou olaga po o olaga o isi mai le tausia o le tulafono o le sefuluai?” A o manatunatu tagata aoga i fesili faapenei ma faasoa mai ni aafiaga patino talafeagai ma a latou vasega, e mafai e le Agaga Paia ona fesoasoani ia i latou ia iloa manino atili faamanuiaga ua latou maua ma isi e ala i le ola ai i aoaoga faavae ma mataupu faavae o le talalelei. O le a fesoasoani foi le Agaga i tagata aoga ia lagonaina se manao sili atu e faaaoga nei upumoni i o latou olaga. E mafai foi e faiaoga ona faasoa atu tala moni mai o latou lava olaga po o olaga o isi e fesoasoani ai i tagata aoga ia lagonaina le moni ma le taua o le ola ai i le mataupu faavae o loo talanoaina.

E mafai e faiaoga ona tuuina atu avanoa mo tagata aoga e molimau atu ai i le moni o mataupu faavae ma aoaoga faavae. E tatau foi i faiaoga ona vaavaai mo avanoa e tuuina atu ai a latou lava molimau. E le gata i lea, e mafai e faiaoga ona fesoasoani i tagata aoga ia lagonaina le moni ma le taua o aoaoga faavae ma mataupu faavae e ala i le faamamafaina o molimau na faaalia e tagata taitoatasi i tusitusiga paia ma e ala i le faitauina po o le faalogologo i molimau a perofeta ma aposetolo o aso e gata ai.

“O le sini o le aoaoina atu o le talalelei … e le o le ‘sasaa atu o faamatalaga’ i mafaufau o tagata o le vasega. O le faamoemoega ia musuia tagata e mafaufau, lagona, ona fai lea o se mea e uiga i le ola ai i mataupu faavae o le talalelei.”

Thomas S. Monson, i le Conference Report, Oke. 1970, 107).

Faaaoga ia Aoaoga Faavae ma Mataupu Faavae

O le faaaogaina e tupu pe a mafaufau, tautala, ma ola tagata aoga e tusa ai ma mataupu faavae ua latou aoaoina. Sa faamalamalama mai e Elder Richard G. Scott le taua o le faaaogaina [o mataupu faavae] ina ua ia faapea mai, “O le fuataga aupito sili lava o le aoga tele o mea o loo tutupu i le potuaoga o le matauina lea pe o malamalama ma faaaogaina ia upumoni i le olaga o se tamaitiiti aoga” (“To Understand and Live Truth,” 3).

A o faaaoga e tagata aoga ia mataupu faavae o le talalelei i o latou olaga, o le a latou mauaina faamanuiaga folafolaina. O le a e maua foi se malamalama loloto atu ma se molimau e uiga i le aoaoga faavae po o le mataupu faavae sa e faaaogaina. Mo se faataitaiga, o tagata aoga o e tausia le aso Sapati ia paia o le a sili atu ona malamalama atoatoa i le uiga o lena mea nai lo tagata aoga e le o faia lena mea. O tagata aoga o e faalagolago i le Alii ma o latou loto atoa (tagai Faataoto 3:5) ma ua faamalolosia ma faamafanafanaina i se taimi o faigata po o tofotofoga, ua i ai se malamalama manino atu o lena mataupu faavae nai lo i latou e leai.

Tuu atu i tagata aoga le taimi i le vasega e manatunatu loloto i le, mafaufau loloto pe tusi e uiga i mea ua latou malamalama i ai ma lagonaina ma ia mafaufau i ni faatinoga patino e tatau ona latou faia e faaaoga ai aoaoga faavae ma mataupu faavae i o latou olaga. I taimi faapena, e tatau i faiaoga ona fautua atu i tagata aoga e fesili mo se taitaiga ma faatonuga mai le Alii. E mafai foi e faiaoga ona talanoaina tulaga e ono oo i ai tagata aoga ma fai atu ia i latou e faasoa mai ni manatu e uiga i le ala o le a faamanuiaina ai o latou olaga i le faaaogaina o mataupu faavae o le talalelei i na tulaga. E mafai ona latou fautuaina tagata aoga e faatu se sini e mafai ona fesoasoani ia i latou e ola ai i le mataupu faavae o loo aoaoina. E mafai e faiaoga ona saunia se mau, upusii, solo, po o se vaega o se viiga e fai ma tufaaga e mafai e tagata aoga ona ave i le fale e fai ma faamanatu o le mataupu faavae.

Atonu e i ai taimi e ofo mai ai e le faiaoga po o tagata aoga i le vasega ni fautuaga i le auala e mafai ona faaaoga ai mataupu faavae o le talalelei. O na faataitaiga e mafai ona maua ai e tagata aoga ni manatu aoga mo le faaaogaina o mataupu faavae o le talalelei i o latou olaga i aso uma. Peitai, e tatau i faiaoga ona faaeteete ia aua nei soona faamaopo i le tuuina atu o ni faaaogaaga patino mo tagata aoga. Manatua o le taitaiga aupito anoa mo le faaaogaina patino e sau taitasi e ala i musumusuga po o faaaliga mai le Alii e ala i le Agaga Paia. Na aoao mai Peresitene Dallin H. Oaks, “O faiaoga o e ua poloaiina e aoao atu ‘mataupu faavae o le talalelei’ ma ‘le aoaoga faavae o le malo’ (Mataupu Faavae ma Feagaiga 88:77) e tatau lava ona galo ia i latou le aoaoina atu o tulafono po o faaaogaaga patino. … A uma loa ona aoao atu e se faiaoga le aoaoga faavae ma mataupu faavae e o faatasi ai, o le faatinoina po o tulafono, o le tiutetauave lava lena o tagata taitoatasi ma aiga” (“Aoaoina Atu o le Talalelei,” 79).

Faamalamalama, Faasoa atu, ma Molimau atu i Aoaoga Faavae ma Mataupu Faavae o le Talalelei

O le faamalamalamaina o aoaoga faavae ma mataupu faavae, faasoaina o malamalamaaga ma aafiaga talafeagai, ma le molimau atu e uiga i upumoni paia e mafai ona faamanino ai malamalamaaga a le tagata aoga i aoaoga faavae ma mataupu faavae o le talalelei ma faaleleia atili ai le tomai o le tagata aoga e aoao atu le talalelei i isi. A o faamatala mai e tagata aoga, faasoa, ma molimau, e tele ina taitai e le Agaga Paia i latou i se molimau e loloto atu ma molimau i mea tonu o loo latou ta’ua. E ala i le mana o le Agaga Paia, e mafai foi e a latou upu ma aafiaga ona i ai se aafiaga taua i loto ma mafaufau o a latou uo po o nisi o loo faalogologo mai.

O faiaoga o e suesue ma le agaga tatalo ma mafaufau loloto, saunia, ma aoao atu se lesona e tele lava ina latou aoaoina se mea maoa’e. O lenei lava mataupu faavae e tasi e moni mo tagata aoga. A o suesue ma aoao atu ia le tasi ma le isi i aoaoga faavae ma mataupu faavae o le talalelei toefuataiina, o le a latou maua se malamalama sili atu ma faamalolosia ai a latou molimau.

Faamalamalama

E faateleina le malamalama i tusitusiga paia pe a faamalamalama atu e tagata aoga ma faiaoga ia tusitusiga paia i le tasi ma le isi. O le saunia e ta’u atu ma le manino ma le faigofie le uiga o se fuaitau o mau po o le uiga o se aoaoga faavae po o se mataupu faavae e uunaia ai faiaoga ma tagata aoga e mafaufau loloto i fuaiupu, faatulaga o latou manatu, ma valaaulia le Agaga Paia e aoao i latou.

Na aoao mai Peresitene Spencer W. Kimball: “Tatou te aoao e fai e ala i le faia. Afai tatou te suesue i le talalelei e aoao atu ai ua tatou maua le malamalama, aua o le mea tatou te tauaveina ai le molitu e faamalamalama ai le ala o isi tatou te faamalamalamaina ai lo tatou lava ala. A o tatou iloiloina ma faatulaga ia tusitusiga paia e tuuina atu ai se lesona talafeagai i isi, ua tatou faamaninoina o tatou lava mafaufau. A o tatou faamatala atu mea ua uma ona tatou iloa e foliga mai ua oo mai ia i tatou se isi faaopoopoga o upumoni, o se faalautelega o lo tatou malamalama, se sootaga ma se faaaogaaga fou” (O Aoaoga a Spencer W. Kimball, [1982], 530).

O le tuuina atu i tagata aoga o ni avanoa e faamalamalama mai ai se aoaoga faavae po o se mataupu faavae, e uunaia ai i latou e mafaufau loloto atili ma saili atu i se malamalama sili atu a o lei aoao atu i isi. E mafai e faiaoga ona fai atu i tagata aoga e faamatala mai pe aisea e taua ai le i ai o le faatuatua, papatisoina, po o le usitai i le tulafono o le sefuluai. E mafai ona valaaulia tagata aoga e ta’u atu i se isi tagata e uiga i le Foafoaga, le Pa’u, po o le mafuaaga latou te talitonu ai o aiga e totonugalemu i le fuafuaga a le Tama Faalelagi. E mafai ona faia lenei mea i ni paga po o ni vaega toalaiti, i tala faatino, ma le vasega atoa, po o le tusitusi. O se valaaulia mai lea taimi i lea taimi mo tagata aoga e faamatala mai se fuaitau o se mau pe aoao atu se aoaoga faavae po o se mataupu faavae i se matua, se uso po o se tuafafine, se uo, po o se tasi e potu faatasi e mafai foi ona talafeagai.

Faasoa atu

E tatau i faiaoga ma tagata aoga ona maua le avanoa e faasoa atu ai o latou malamalamaaga faaopoopo ma malamalamaaga faapea foi ma aafiaga na latou maua i se aoaoga faavae po o se mataupu faavae. E mafai foi ona latou faamatala mai ni aafiaga sa latou molimauina i olaga o isi.

Na saunoa mai Peresitene J. Reuben Clark Jr: “E toetoe lava a leai se talavou e sau i le tou faitotoa o le seminare ma le inisitituti ua le avea ma tagata aoga i faamanuiaga faaleagaga, pe lei vaaia le aoga o le tatalo, pe le’i molimauina le mana o le faatuatua e faamalolo ai e mamai, pe le’i vaaia le anoanoai o le faaleagaga lea e le iloa e le lautele o le lalolagi i aso nei” (The Charted Course of the Church in Education, rev. ed. [1994], 9). E tatau ona tuu atu i tagata aoga le avanoa e faasoa mai ai na aafiaga i le vasega. Peitai, atonu e manaomia ona e fesoasoani i le vasega ia malamalama o nisi aafiaga e paia nauā pe patino tele foi ma e lē tatau ai ona faasoa i le potuaoga; tagai Alema 12:9; Mataupu Faavae ma Feagaiga 63:64.)

Molimau atu

Pe a faamalamalama atu e tagata aoga ia mataupu faavae o le talalelei ma faasoa atu o latou aafiaga i le faaaogaina i o latou olaga, e tele lava ina sili atu ona saunia i latou e molimau atu i mea ua latou talitonu i ai.

Sa faamalamalama mai e Elder Boyd K. Packer se tasi o faamanuiaga o le tuuina atu o le molimau: “Oi, afai e mafai ona ou aoao atu ia te oe lenei mataupu faavae e tasi. O se molimau e tatau ona maua i le tuuina atu o se molimau! …

“E ese le mauaina o sau molimau mai mea sa e faitauina po o le mea sa fai atu ai se isi; ma o se amataga manaomia lea. E ese le i ai o le Agaga o faamautu mai ia te oe i lou loto o le mea na e molimau atu ai e moni“ (The Candle of the Lord,” 54–55).

“O le molimau—molimau moni, e fanau mai i la le Agaga ma faamautuina e le Agaga Paia—e suia ai olaga.”

(M. Russell Ballard, “Molimau Mama Atoatoa,” Liahona, Nov. 2004, 40)

O le faasoaina o se molimau e le gata ina faamanuiaina ai le tagata o loo faia ma e mafai foi ona faamalosia ai le faatuatua ma molimau a isi. O le molimau atu e tuuina atu ai avanoa i le Agaga Paia e molimau mai e uiga i aoaoga faavae ma mataupu faavae patino o le talalelei toefuataiina. O se molimau e lē faapea e tatau lava ona amataina i le fasifuaitau “Ou te tuuina atu la’u molimau.” E mafai ona avea o se faamatalaga o mea ua iloa e se tagata e moni, e tautalagia ma le faamaoni ma le tautinoga maumaututu. E mafai ona avea o se faamautinoaga faigofie o lagona o se tagata e uiga i se aoaoga faavae po o se mataupu faavae o le talalelei ma le eseesega na ia faia i lona olaga. E mafai ona malamalama lelei tagata aoga i le ala e mafai ona faaaoga ai mataupu faavae o le talalelei, ma mafai ona lagona le musuia atili e faaaoga i o latou olaga, pe a latou faalogo i le faiaoga ma isi tagata aoga o molimau atu i le taua o na mataupu faavae.

E mafai e faiaoga ona fautuaina tagata aoga e molimau atu i upumoni o le talalelei e ala i le faia o fesili e valaaulia ai i latou e faasoa mai o latou aafiaga ma talitonuga (tagai i le vaega 5.1.3, “O Fesili e Valaaulia ai Lagona ma Molimau” i le itulau e 61). E mafai foi ona latou tuuina atu isi avanoa mo tagata aoga e molimau atu ai i a latou paaga. E tatau i faiaoga ona nofouta i le natura patino ma le paia o le molimau ma e mafai ona valaaulia ae e lē tatau lava ona manaomia tagata aoga e faasoa mai a latou molimau. E faaaoga e faiaoga le avanoa e molimau soo atu ai i lou alofa i le Tama Faalelagi ma Lona Alo o Iesu Keriso, ma le moni ma le taua o aoaoga faavae ma mataupu faavae o le talalelei. E tatau i faiaoga ona nofouta, ma faasino i ai, o molimau na faaalia e le Faaola faapea foi i latou na tuuina mai e perofeta ma aposetolo o aso e gata ai.

“E tupu le faatuatua i aoaoga pe a faia se matafaioi a tagata aoga e aoao atu ma molimau atu i a latou uo.”

(Robert D. Hales, “Teaching by Faith,” 4)

Tauloto Fuaitau o Mau Autu ma Autu o Aoaoga Faavae

A’o teufatu e tagata taitasi ia upumoni e faavavau i o latou mafaufau ma loto, o le a faamanatu mai e le Agaga Paia nei upumoni i taimi e manaomia ai, ma tuu atu ia i latou le lototele e galulue ai i le faatuatua Sa aoao mai Peresitene Howard W. Hunter:

“Ou te uunaia malosi outou ina ia faaaoga ia tusitusiga paia i a outou aoaoga ma faia mea uma i lo outou malosi e fesoasoani ai i tagata aoga e faaaoga ma maua le lagona mafanafana i a i latou. Ou te manao i o tatou tagata talavou ina ia i ai le talitonuga i tusitusiga paia. …

“Muamua, matou te mananao i tagata aoga ina ia i ai le talitonuga i le malosiaga ma upumoni o tusitusiga paia, le talitonuga o loo fetalai moni mai pea lo latou Tama Faalelagi ia i latou e ala i tusitusiga paia, ma le talitonuga e mafai ona latou liliu atu i tusitusiga paia ma sue ni tali i o latou faafitauli ma a latou tatalo. … …

“… Matou te faamoemoe e leai se tasi o au tagata aoga e tuua lou potuaoga ma le fefe pe maasiasi pe matamuli ona ua latou le mafai ona maua le fesoasoani latou te manaomiaina ona e le o lava lelei lo latou iloaina o tusitusiga paia e sue ai ia fuaitau talafeagai” (“Teugā’oa e Faavavau,” 2).

Ina ia fesoasoani i tagata aoga e teuina upumoni e faavavau ma ia faateleina lo latou talitonuga i tusitusiga paia, ua filifilia ai e Seminare ma Inisitituti o Mataupu Faalelotu (S&I) se vaega o fuaitau o le atamai i aoaoga faavae ma saunia se lisi o autu faaleaoaoga faavae. O le suesueina o fuaitau o le atamai i aoaoga faavae ma nei aoaoga faavae e tatau ona atiina ae faatasi ina ia mafai ai e tagata aoga ona aoao e faamatala nei aoaoga faavae i a latou lava upu ma faaaoga fuaitau o le atamai i aoaoga faavae e fesoasoani ai ia i latou e faamalamalama ma molimau atu e uiga i nei upumoni.

Atamai i Aoaoga Faavae

Ua filifilia e le S&I fuaitau e 25 o le atamai i aoaoga faavae mo kosi taitasi e fa o le seminare. O nei fuaitau ua tuuina atu ai se faavae taua faaletusitusiga paia mo le malamalama ma le faasoaina atu o le talalelei ma mo le faamalosia o le faatuatua. E uunaia tagata aoga o le seminare e atina ae se “taulotoina” o nei fuaitau e pei ona faamatala i lalo. E tatau ona uunaia tagata aoga o le inisitituti e atiae i luga o le faavae o nei fuaitau e 100 o le atamai i aoaoga faavae ma atiae se loloto o le malamalama i isi fuaitau autu o mau.

O fuaitau o mau tauloto e aofia ai:

• Lemauaina o nei fuaiupu e ala i le iloaina o mau faasino fesootai.

• Malamalama i le talaaga ma le anotusi o fuaitau o mau.

• Faaaogaina o mataupu faavae ma aoaoga faavae o le talalelei o loo aoaoina i fuaitau o tusitusiga paia.

• Taulotoina o fuaitau.

“E mafai ona oo mai se mana maoa’e mai le taulotoina o mau. O le taulotoina o se mau o le fatuina lea o se faigauo fou. E pei lava o le mauaina o se tagata fou e mafai ona fesoasoani mai i se taimi o puapuaga, tuu mai musumusuga ma faamafanafanaga, ma avea o se punavai o uunaiga mo suiga manaomia.”

(Richard G. Scott, “The Power of Scripture,” 6)

O le taulotoina e mafai ona avea o se meafaigaluega matagofie e fesoasoani ai i tagata aoga ia iloa ma fiafia i fuaitau filifilia o mau. E pei ona faamalamalama mai e Elder Richard G. Scott, “Pe a faaaogaina tusitusiga paia e pei ona faia e le Alii ia tusifaamaumauina, ua ia i latou le mana taua e le o fesootai mai pe a toe faaupuina” (“He Lives,” Ensign, Nov. 1999, 88). Peitai, e tatau ona faaeteete, ina ia fetuunai ai faamoemoega i gafatia ma tulaga o tagata aoga taitasi. E le tatau ona faamaina pe lofituina tamaiti aoga pe afai latou te le mafai ona taulotoina .

O le a sili atu ona mafai e faiaoga ona fesoasoani i a latou tagata aoga pe afai latou te taulotoina foi nei mau. Pe a tagai faiaoga i fuaitau o le atamai i aoaoga faavae ma le faifai pea, faatumauina faamoemoega talafeagai, ma faaaoga metotia e tosina atu ai i sitaili eseese o le aoaoina, o le a sili atu ona faamanuiaina i latou i le fesoasoani i tamaiti aoga e tauloto nei fuaitau autu. I le taimi o lesona, e tatau ona faaaoga fuaitau o le atamai i aoaoga faavae e faamanino ai aoaoga faavae ma mataupu faavae e fesootai i ai. E mafai ona faaaoga e fai ma autu mo faigalotu pe faaalia i se mea i le potuaoga. E tatau foi ona uunaia tagata aoga e suesue ma faaaoga i fafo atu o le vasega.

I nofoaga e galulue faatasi ai ni faiaoga se toatele i se vaega, o le a faaleleia le aoaoina o tagata aoga pe a faia e faiaoga o le ekalesia se faiga tuufaatasi i le atamai i aoaoga faavae. E mafai e faiaoga mai lea taimi i lea taimi ona filifili e iloilo ia mau faasino o le atamai i aoaoga faavae mai tausaga ua mavae ina ia mafai ai e tagata aoga ona faatumauina le taulotoina o fuaitau uma ua filifilia.

E ui o le atamai i aoaoga faavae o se vaega taua o le mataupu aoaoina, e tatau ona faaopoopo atu i ai, ae le o le faoa o le, suesue faasolosolo i aso taitasi o tusitusiga paia. E tatau i faiaoga ona atamamai i le taimi latou te tuuina atu i le atamai i aoaoga faavae. E tatau i faiaoga mo suesuega i le fale ona matua faaeteete lava ina ia le avea le vasega faalevaiaso ma se gaoioiga o le atamai i aoaoga faavae faalevaiaso. E tatau i faiaoga ona filifili metotia, gaoioiga, ma musika e ogatusa ma le mamalu, faamoemoega, ma le agaga o tusitusiga paia ma ia aloese mai finauga.

Autu Faaleaoaoga Faavae

E iva autu faaleaoaoga faavae ua faailoaina e faamamafaina i vasega seminare ma inisitituti. E ao ona fesoasoani faiaoga i tagata aoga ia iloa, malamalama, talitonu, faamalamalama, ma faaaoga aoaoga faavae nei o le talalelei. O le faia o lea, o le a fesoasoani ai e faamalosia a latou molimau ma faateleina lo latou talisapaia mo le talalelei toefuataiina a Iesu Keriso. O le suesueina o nei autu o le a fesoasoani foi e tapenaina lelei i latou e aoao atu nei upumoni taua i isi.

E taua le manatuaina o le a aoaoina atu foi isi aoaoga faavae taua o le talalelei, e ui lava e le o lisiina atu i autu o aoaoga faavae.

O autu faaleaoaoga faavae nei ua filifilia e Seminare ma Inisitituti o Mataupu Faalelotu:

• O Le Aiga Atua

• O le ata o le faaolataga

• O Le Togiola a Iesu Keriso

• O Le Toefuataiga

• Perofeta ma faaaliga

• Perisitua ma ki o le perisitua

• O sauniga ma feagaiga

• Faaipoipoga ma aiga

• O Poloaiga

A o suesue patino ia faiaoga ma malamalama i nei autu, o le a sili atu ona latou faasino atu ma molimau atu ia i latou a o latou aoao atu. Peitai, e le tatau ona latou o ese mai le aoaoina atu o mau i le faasologa e taulai atoa atu ai i nei autu. Ae, e tatau i faiaoga ona gauai atu ma le faaeteete ma le faifaipea i nei autu a o foliga mai i le anotusi faatusi paia ma kosi o suesuega. I lenei auala, o le lisi o autu faaleaoaoga faavae e avea o se faamanatu e taulai atu ai i na upumoni e faavavau ia o le a sili ona taua i tagata aoga ma faamamafa ai i le gasologa o le kosi o suesuega. O nei autu faaleaoaoga faavae e mafai foi ona faaaoga o ni autu mo faigalotu.

O le a manatua foi e se faiaoga atamai o le onosai ma le tumau e taua i le fesoasoani i tagata aoga ia malamalama i nei autu. E le o faamoemoe o le a malamalama atoatoa se tagata aoga i mea uma i le taimi e tasi. Ua aoao e le Alii Ana fanau i “lea fuaitau i luga o lea fuaitau, ma lea mataupu i luga o lea mataupu” (Mataupu Faavae ma Feagaiga 98:12). E tatau i faiaoga ma tagata aoga ona vaai i le malamalamaaga o nei autu o se faagasologa na tupu i le aluga o le fa tausaga o le seminare ma faaauau ai lava i le aluga o tausaga i le inisitituti.